2024-06-25
HomeEkintza PolitikoaSexu lanari buruzko mahai inguru bat egingo dugu Donostian, Sexu Langileen Nazioarteko...

Sexu lanari buruzko mahai inguru bat egingo dugu Donostian, Sexu Langileen Nazioarteko Egunaren etorrerarekin

Sexu Langileen Nazioarteko Egunaren harira, hitzaldi bat antolatu dugu Donostian, arratsalderako, beste eragile batzurekin elkarlanean. Mahai ingurua sindikatuaren Groseko egoitzan izango da, 18:30ean.

Egun honen harira, LAB sindikatuak bere irakurketa plazaratu nahi du:

Sexu langileak 1975tik borrokatzen ari dira euren jardueraren ondoriozko eskubideak onar daitezen, gainontzeko langileei bezalaxe. Jabetzen gara jarduera horrek ezaugarri bereziak dituela, badakigu sexualitatea errealitate konplexua dela eta ez dugula guztiok berdin ulertzen eta kudeatzen. Horregatik eskatzen dugu ekonomikoki errealistak diren lan-alternatibak egotea jarduera utzi nahi dutenentzat, legediak enpresaburuaren zuzendaritza-boterea deuseztatzea eta, jakina, gizakien salerosketa amaitzea. Azken puntu honi dagokionez, gizakien salerosketa prostituzioa deslegitimatzeko baliatzen duten ikuspegietatik urrun gaude, eta azpimarratu nahi dugu ez dela jarduera honetan bakarrik bukatu behar praktika horrekin, gizakien salerosketa sektore ekonomiko guztietan amaitu behar da.

Orain, sexu langileak klandestinitatera behartuko dituzten bi lege ezartzearekin mehatxatu dute: sexu askatasunaren legea batetik, lege abolizionista bestetik. Legislazio eredu honek baditu aurrekariak beste herrialde batzuetan, ez dute gizakien salerosketarekin bukatu eta ez dira gutxiago sexu lanetan ari diren pertsonak. Lege hauetan esaten dena esaten dela ere, ez dute baliorik izan emakumeak babesteko; eta kontran, bazterketa, zahurgarritasuna eta estigma egoerak larritu ditu.

Praktikak erakusten duenari begiratuz, “Putxs en lucha” elkartean, LAB sindikatuan eta eskubideen aldeko mugimenduan pentsatzen dugu neurri abolizionistek ez dituztela sexu langileen eskubideak kontutan hartzen. Horregatik, eredu antipunitibista bat defendatzen dugu, Angela Davisek dionari jarraituz, kontzeptu honek bere jatorrian zuen esan nahia berreskuratuz. Gu pobreziaren, mugen eta kartzela sistemaren abolizionistak gara.

AZKEN ALBISTEAK | ÚLTIMAS NOTICIAS

Bero boladen aurrean garatu beharreko ekintza sindikalaren inguruko prestakuntza eman diogu 350 delegaturi

Iaz, lantokietan beroaren arazoari aurre egiteko gida argitaratu genuen Lan Osasuneko idazkaritzaren eskutik. Gure egoitzetan zein sarean eskuragai dagoen argitalpen honek gero eta ohikoagoak diren diren bero egunen aurrean garatu beharreko ekintza sindikalerako proposamenak jasotzen ditu, lan osasunaren arloan prebentzioak duen garrantzia azpimarratuz. Aurten, gaiaren inguruko prestakuntza saioak antolatu ditugu Araba, Bizkaia, Gipuzkoa eta Nafarroan. Industria, Zerbitzu Pribatuak eta Zerbitzu Publikoetako Federazioetako 350 delegatuk hartu dute parte egin diren 16 saioetan.

Espainiar Estatuko langile publikoentzako soldata igoera inposatua da eta erosahalmenaren galeran sakontzen du Hego Euskal Herriko langileentzat

LABen ez dugu ontzat ematen bihar Espainiako Gobernuko Ministro Kontseiluak Estatu osoko langile publikoentzako (*) onartuko duen %2ko igoera gehi %0.5eko baldintzatutako gehigarria.

Zumarragako posta zerbitzuaren egoera onartezina da

Plantillari dagokionez, lanpostu huts ugari daude; adibide gisa, goizeko txandako langileen egoera; izan ere, egun batzuetan 5 pertsona baino ez daude bete beharreko 13 lanpostutarako, hau da, % 62 ez da betetzen. Zoritxarrez, egoera hori oso ohikoa da lantoki honetan. Plantillak hainbat elkarretaratze egin ditu langile-falta salatzeko, baina arazoa ez da hobetzen hauteskunde-aldiaren ondoren, eta enpresak ez du inolako asmorik kontrataziorik egiteko. Uztailaren 7an oporraldian sartuko gara eta oporretara joango diren langileak inork ez dituela ordezkatuko aurreikusten da.