Suhiltzaile izangai hau 2010. urteko ekainean hiru sexu- abusu delitu egiteagatik 3 urte eta 3 hilabetera kondenatua izan zen epai irmoz. Epaia egon arren, ez zuen inolako espetxe-zigorrik bete, Gobernu Espainiarrak indultatutako lehen erasotzaile sexuala izanda (1808/2011 Errege Dekretua, abenduaren 16koa).
Paradoxikoa da benetan Rodriguez Zapateroren gobernua, Berdintasunerako Ministerioa eta 3/2007 Lege Organikoa, emakume eta gizonen berdintasun efektiboa arautzen duena artikulatu zituenak, sexu-erasotzaile bat indultatu zuen gobernu bera izatea. Botere judizialaren eskumenetan zuzenean eskua sartzen duen erabaki politikoa da.
Harrezkero, indultua eta indarkeria matxistaren aurkako baztertze- sozialak sortutako eztabaida gizon honen aldamenean izan da. Ez ditu bere delituak aitortu. Kontrara, 2015. urtean Durangoko mugimendu feministaren kide baten aurkako salaketa aurkeztu zuen, froga ezagatik auzitegiak artxibatu zuena.
Salaketa hau egiten du LABek:
1. LAB sindikatutik, indarkeria matxistaren aurkako erreakzio sozialaren parte bezala, Bizkaiko Foru Aldundiari exijitzen diogu argitzea nolako neurriak hartuko dituen, erasotzaile sexual bat bere langileen artean izatea oso posiblea delako. Zalantzarik gabe, erakundearen edozein berdintasunerako politikarentzako elementu nahaslea da. Aldundiak bere iritzia azaldu dezala eta erantzun publiko argia ematea ere exijitzen dugu, ea nola ikusten duen posible erasotzaile sexual bat emakume suhiltzaileak dauden plantillan sartzea, eta zehatz-mehatz zehaz dezala nola aplikatuko dituen hurrengo neurriak, Emakumeen eta Gizonen Berdintasunerako V. Foru Planean jasota daudenak:
• SISZeko gizon eta emakumeen artean berdintasunezko lan harremanak erraztea eta estereotipoak deuseztatzea sustatzea.
• Bizkaiko Foru Aldundian maskulinitate berrien garrantzia sustatzea.
2. 4/2005 Legea, otsailaren 18koa, Emakumeen eta Gizonen Berdintasunerakoaren 43. Artikuluaren arabera, LABek lanean jazarpen sexistaren aurkako protokolo espezifikoa sortzea exijitzen du. Gaur egun, Bizkaiko Foru Aldundiko langileriak ez du jazarpen sexista prebenitzeko eta erauzteko inolako tresnarik.
LABek zero tolerantzia azaltzen dio indarkeria matxistak egindako edozein agerpeni, edonondik datorrela, eta onartezina deritzogu inongo administrazio publikotan erasotzaile sexual bat hartzeari, indultu lotsagarria jaso ostean zigorrik bete ez duena eta bere delituak aitortu ez dituena. Eta behar den eztabaida-leku guztietan eta behar hainbeste alditan salatuko dugu.
Beste sindikatuei, eragile sozialei eta Aldundia berari deialdia luzatzen diegu, gure salaketarekin bat egin dezaten.