LAB, CCOO eta UGT sindikatuok, Bizkaiko metalaren azken hitzarmenaren sinatzaileek, Bizkaiko siderometalurgiaren sektorean Sexu-Jazarpenaren eta Sexuagatiko Jazarpenaren aurka Jarduteko Protokoloa adostu dugu FVEMekin.

Bizkaiko metaleko hitzarmena sinatu arteko bidea ez zen batere erraza izan. Sektore horretako langileen kolektiboa modu masibo eta irmoan atera zen kalera. Langileek argi zuten, beraien lan- eta bizi-baldintzak aldatuko zituen hitzarmenaren alde ari zirela borrokan. Horretarako, ezinbestez, hitzarmen honek ikuspegi feminista bat jaso behar zuen, pertsonen bizitza erdigunean jartzeko, eta ez kapitala.

Borrokaren ondorioz enpresetan egindako presioek emaitzak izan zituzten, eta hitzarmen honetan inork uste ez zituen aurrerapenak lortu ziren negoziazioari ekin zitzaionean. Aurrerapen horiek arlo feministan ere eman ziren, eta Berdintasun-Batzorde bat sortu zen. Batzorde horrek, besteak beste, Bizkaiko siderometalurgiaren sektorean Sexu-Jazarpenaren eta Sexuagatiko Jazarpenaren aurka Jarduteko Protokolo bat egitea zuen eginkizun.

2020ko otsailaren 28an argitaratu zen BAOn Bizkaiko metalaren hitzarmena argitaratu zen. 3 egun geroago, martxoaren 3an, LABek Berdintasun-Batzordea sortzeko eskaera erregistratu zuen, baina irailaren 21era arte atzeratu zen, Covid-19ak sortu zuen egoera zela eta. Batzorde horretan, lehenengo zeregina sexu-jazarpenaren eta sexuan oinarritutako jazarpenaren aurkako protokolo sektoriala egitea izan zen. Bidea ez da erraza izan, eta patronalaren borondate faltari aurre egin behar izan diogu, baina Berdintasun-Batzordea osatzen dugun sindikatuok eta patronalak 13 bilera egin ondoren, akordioa lortu dugu.

Adostu dugun protokoloak lantokietan gertatzen den indarkeria matxistari aurre egiteko eta amaitzeko lan-tresna izan nahi du. Errealitate hori ezkutuan geratzen da, eta kaleratua izateko mehatxua beti dago horren atzean; horregatik, indarkeria matxista ez da behar bezala salatzen, ezta behar bezala adierazten ere enpresetan, eta are gehiago gehienbat gizonen enpresak badira. Horregatik, bermeak eta neurriak egon behar dira salaketa jarri ahal izateko, emakumeen hitza eta salaketak zalantzan jar ez daitezen.

Protokolo hori nahitaez aplikatu beharko da Bizkaiko metaleko enpresa guztietan, baldin eta berezko protokolorik ez badute. Hori oso urrats garrantzitsua da sektoreko enpresa txikienetako emakumeentzat, egoera horien aurrean babesgabeenak baitira. Protokoloak argi eta garbi jasotzen ditu sexu-jazarpentzat eta sexuan oinarritutako jazarpentzat hartu beharreko jokabideak, egoera horiek saihesteko prebentzio-neurriak ezartzen ditu, eta sexu-jazarpenagatiko edo sexuan oinarritutako jazarpenagatiko salaketa bat gertatzen denean jarduteko prozedura ezartzen du eta alderdi sozialari aitortzen zaio prozesu osoan parte hartzeko aukera.

Beraz, Bizkaiko Metala bezalako sektore batek, gaurtik aurrera, emakumeei lantokietan indarkeria matxistari aurre egin ahal izatea bermatuko dien tresna bat izatea albiste eta garaipen handitzat jotzen dugu. Hori hasiera baino ez da, eta protokolo bizia izatea nahi dugu, behar izanez gero balorazio eta hobekuntzak izango dituena.

Amaitzeko, LABek berretsi nahi du sektoreko emakume guztiekin dugun konpromisoa, eurekin batera borrokatzekoa, Bizkaiko metalgintzan erabateko berdintasuna lortu arte.