2025-04-22
HomeUncategorizedPrebentzioa eta lan-osasuna lehentasun gisa jorratzeko exijitu dugu Arrasaten

Prebentzioa eta lan-osasuna lehentasun gisa jorratzeko exijitu dugu Arrasaten

Herrian gertatutako bi lan ezbehar larriak (bata hilgarria) salatu ditugu intersindikalarekin batera, eta beste behin ere gogorarazi behar izan dugu neurri egokiak hartuta lan istripuak saihesgarriak direla. Horrez gain, estresak, lan-erritmoek eta bestelako arrisku psikosozialek langileon osasunean duten eragina azpimarratu dugu.

Bi egunetako tartean lanean hildako pertsona bat eta larriki zauritutako beste bat izan dira berriki Arrasaten. Hori dela eta, Prekaritatea hiltzailea lelopean elkarretaratzea egin dugu Herriko Plazan. Beste behin ere senide eta gertukoei babesa adierazteaz gain, langileon bizitzak patronalaren etekinen gainetik egon behar duela aldarrikatuko dugu.

Bihar, Gasteizen

Arrasatekoa ez da izan azken egunotan Euskal Herrian gertaturiko lan-heriotza bakarra. Izan ere, Gasteizko Talleres Aratz lantegian 33 urteko behargin bat hil zen joan den ostiralean, makina batek harrapatuta. Asteasun kokatuta dagoen enpresa bateko langilea zen, Gasteizko lantegiak azpikontratatuta zebilena. Bada, gaur Asteasun elkarretaratze bat egin dute, eta bihar Gasteizen beste bat egingo da, ezbeharra gertatu zen lekuan, 11:00etan.

AZKEN ALBISTEAK | ÚLTIMAS NOTICIAS

Enviserreko langileek greba gogortu dute, protestaren hirugarren astean

Hiriko parkeak, lorategiak eta eraztun berdea mantentzeko Gasteizko Udalaren kontrata den Enviser enpresako langileek hiru aste bete dituzte greban. Baldintza duinak jasoko dituen hitzarmen propio bat lortzea da beren helburua. Hainbat langilek Gasteizko udaletxearen aurrean pasa dute gaua, azken honen inplikazioa eskatzeko.

LABek ontzat jo du Iruñeko Udalaren eta alokairuzko bizikleten enpresaren artean sinaturiko akordioari esker langileei zor zitzaizkien soldatak ordaintzea

LAB sindikatuak duela bi aste salatu zuen Ride On Pamplona Iruñeko alokairuko bizikleta elektrikoen zerbitzuko langileak egoera larrian zeudela, sei hilabete baitzeramatzaten nominak berandu kobratzen eta, gainera, enpresak bi nomina oso zor baitzizkien. Iruñeko Udalak eta Ride On-ek gaur iragarri duten akordioaren arabera badirudi zerbitzuaren jarraipena bermatuko dutela eta enpresak berehala kitatuko dituela langileekin dituen zorrak.