PNVk aurtengo ekainean udal hauteskundeak irabazi eta alkatetza hartuz geroztik, bai Donostian eta bai bertako Udalean ere, gure hizkuntzarekiko erakutsitako errespetu eza nabaria izan dela salatzen du LABeko sail sindikalak. Era berean, udalarekin egiten dituen bileretan euskara baztertzeko asmorik ez duela jakinarazi du.
PNV ALDERDIAK DONOSTIAN ETA UDALEAN EUSKARAREKIKO DUEN POLITIKA
PNVk aurtengo ekainean udal hauteskundeak irabazi eta alkatetza hartuz geroztik, Donostiako hiritarrak eta Udaleko langileak zeharo harrituta gaude alderdi hau (euskalduna), bere gobernu kide den PSOEkin batera, izaten ari den euskararekiko politikarekin.
Ekainean ere bukatu egin zen legealdian zehar euskararen erabilera sendotzen joan zen, bai hiritarrei begira bai udaleko barne funtzionamenduari begira. Kalean euskararen aldeko kanpainak egin ziren eta udal langileak motibatuak izan ziren, presiorik gabe eta etengabeko laguntzaren bitartez, lan harremanak, idatzizkoak nahiz ahozkoak, eta bakoitzaren ezagupen mailaren arabera, euskaraz izan zitezen. Baita zinegotzien eta langileen ordezkapenaren arteko bilera gehienak ere euskaraz egiten ziren.
PNV eta PSOE alderdiek udaleko agintea hartuz geroztik gure hizkuntzarekiko errespetu eza nabaria izan da sarritan:
– Hizkuntz eskakizunak murriztu egin dira zuzendari berrientzat.
– Giza Baliabideetako zinegotzi delegatua den Juan Ramón Vilesen (PNV) eta ordezkaritza sindikalaren arteko bilerak gazteleraz egin behar dira, zinegotzi honek ez baitaki gure hizkuntza eta ez baitu erabiltzen udalak berak duen itzulpen zerbitzua. Ezta idatzizko bere mezu guztientzat ere.
– Eneko Goiak Atletiko San Sebastianeko nesken softbol taldeari harrera egin eta plaka bat eskaini zion txapelketa irabazteagatik zorionduz, gaztelera hutsean.
– Hain desiratuak izan diren (batek daki noren aldetik) zezenketak iragartzen zituzten karteletan euskara ez da inonen agertzen, ezta Donostia izena esateko ere, baina alderdi hauek ez dute begitartea aldatu ere egin.
– …
Gure hizkuntzarekiko mespretxuzko jarrera horren azkeneko adibidea pasa den abuztuaren 6an izan zen, sail sindikal honek horrela eskatuta Udalaren Euskara Batzordeak legealdi honetako lehenbiziko bilera egin zenean.
Bilera honetara aipatutako Giza Baliabideetako zinegotzi delegatua, Viles jauna, etorri zen, baina ez zituen erabili zinegotzia den bere arloan bertan dauden itzulpenerako tresnak. Horrela, Euskara Batzordearen bilera, logikoa denez, euskaraz izatea oztopatuz, eta bere hizkuntzan, hau da espainolez, egitera behartuz.
Suposatzen dugu udal honetako Euskarako zinegotzi delegatuak, Miren Azkaratek, (Euskaltzaindiako kidea eta PNVkoa ere) euskararekiko Viles jaunak baino sentsibilitate handiagoa izango duela (azken finean Viles jaunak ez du ezagutzen) eta bere erabilera sustatuko duela Udalaren eta hiritarren arteko harremanetan eta udalaren barne harremanetan.
LAB sail sindikal honek udalarekin egiten dituen bileretan euskara baztertzeko asmorik ez duela jakinarazten du. Horregatik zinegotzi delegatuei iradokitzen diegu behar duenek udalean dauden itzulpenerako tresnak erabil ditzatela.