2025-12-14
Blog Page 919

BBVAk zentsuratu egin du Maiatzaren Lehenerako argitaratu dugun agiria

admin
-
0
BBVAk zentsuratu egin du Maiatzaren Lehenerako argitaratu dugun agiria

BBVAko Lan Harremanen zuzendaritzak uko egin dio LABek argitaratutako Maiatzaren Leheneko agiria banatzeari intraneteko e-postaren bidez, BBVAko LAB Sail sindikalari zentsura ezarriz. LAB sindikatuak salatu egiten du adierazpen askatasunaren aurkako eraso hau, bankuak berak ezartzen dituen irizpide murriztaile eta subjektiboak bidegabeak direlako eta pentsamentua eta adierazpen askatasunaren kontrakoak.

Hau da gertatutakoa: BBVAn akordio bat dago indarrean, 2014an adostua, funzio sindikalaren jarduera arautzeko. Akordio horretan Intranetaren erabilera arautzen da , eta sindikatuetako agiriak langile guztiei e- postaren bidez bidaltzeko sistema bat ezartzen da. Bertan, literalki, zera esaten da agirien informazioei buruz: “Transmititu beharreko informazioak zorrozki lanekoa den edukia izan beharko du eta zuzenean langileen legezko ordezkaritzari lotutako funtzioekin harreman zuzena duena”.

BBVAko LAB Sail sindikalak sindikatuak argitaratutako agiri orokorra bidali zuen apirilaren 25ean intraneten dagoen orriaren bidez langile orori bidaltzeko. Bankuak aurrez ikuskatzen ditu bidalitako agiriak. Maiatzaren Leheneko manifestazioetara deitzeko LABen agiriak euskal estatua eta burujabetza osoa aldaketa sozialerako eskatzen ditu.

Hori lan-arloko informazioa ez dela argudiatuz, bankuak apirilaren 27an LABeko Sail sindikalari jakinerazten dio ez duela agiria bidaliko. LABen sail sindikalak zentsura dela erantzuten dio bankuari, eta eurak ez direla nor zer den lan-arloko interesekoa esateko. Langileok eurek esan behar dute zer den ala ez den irakurtzeko interesgarria euren buruaren jabe direlako.

Berriro esango dugu, argi ta ozen. Guretzat, aldaketa soziala eta burujabetza lotuta daude. Hortan, adibidez, Euskal Herriko lan-harremanetako esparrua eta Euskal Herriko bankako hitzarmen kolektiboa doaz.
 

 

 

Okupazioak behera egin du urte hasierarekin, azpienpleguak gora egin duen arren

admin
-
0

Lehen hiru hilabetean zehar behera egin du Hego Euskal Herrian pertsona okupatuen kopuruak, 1.170.400 pertsonetan kokatu arte, horrek esan nahi du urtarriletik martxora bitartean 9.000 enplegu galdu direla. Okupazioaren jaitsiera honek emakumeak kaltetu ditu bereziki, hauek baitziren suntsitutako enpleguen %90 betetzen zituztenak. Ondorioz, langabeziak izan duen jaitsiera apala, %11,5era iritsi arte, biztanleria aktiboaren gutxitzeari ondorio da, eta ez enplegu sorrerarena. Bestalde, emakumeen lagabezia %12,2tik %12,9raino igo da.

Honek lan merkatuaren egoera gehiago okertzea dakar, bere azken hiru urteetako bilakaerak prekarietatea eta azpienpleguaren gorakada arriskutsua izkutatzen ditu. Izan ere, INEk gaur zabaldutako Biztanlego Aktiboaren Inkestaren arabera, urtearen lehen hiruhilabetekoan lanaldi osoko 17.800 lanpostu suntsitu ziren Hego Euskal Herrian, eta era berean lanaldi partzialean okupatutako 8.800 pertsona gehiago zenbatu ziren.

Azken finean, suspertze ekonomikoa ez da modu bidezko eta orokortuan islatzen sektore sozial guztietan eta horregatik pobrezia eta desberdintasuna krisiaren aurreko garaietan baino maila larriagoetara iritsi dira.

Garrantzitsua da nabarmentzea egungo aldi baterakotasun eta laneko errotazio mailak, azpienpleguaren hedatzea orduen eznahikotasunagatik eta soldata apalak lan-erreformen ondorio zuzena direla, eta prekarietatea arau bihurtu nahi duten praktika enpresarialena.

Zehazki, lan-baldintzak okertzea da pobrezia tasen gorakada azaltzen duen faktore nagusia, ez soilik aldi baterako enplegua duten pertsonen artean, baita enplegu egonkorra dutenen artean ere. Horrela erakusten dute berriki kaleratutako inkesta ofizialek, hala nola urtarrilean Lakuako Enplegu eta Politika Sozialen Sailak argitaratutakoak.

Testuinguru honetan, euskal langile-klaseari dei egiten diogu LABek Maiatzaren Lehena dela eta “Burujabetza osoa aldaketa sozialerako” lemapean egingo dituen mobilizazioetan parte hartzera, horrela erabakitzeko gaitasuinaa eta gure lan-eskubideak eta babes sozialeko bidezko eredu bat bermatzeko mekanismo propioak aldarrikatzeko.
 

 

 

CGT sindikatuak ZF TRWko enpresa batzordean egingo dituen proposamenak eztabaidatzen jarraituko dugu

admin
-
0
ZF TRWko enpresa batzordeko CGT sindikatuko kideak zigor ohartarazpen bat jaso du. Horren aurrean, LABek CGTko ordezkariari elkartasuna adierazi dio, eta adierazpen askatasuna defendatuko duela berretsi du, orain arte egin duen bezala: "CGTk enpresa batzordean proposatzen dituen proposamenak eztabaidatu eta landuko ditugu".

Hiru puntuz osatutako ohar bat kaleratu du ZF TRW enpresako LABeko sail sindikalak, CGT sindikatuko kide bati helarazi dioten zigor ohartarazpena dela eta.
 

 

 

Sunsundegui kontratazioetan iruzurra egiten ari dela salatu dugu

admin
-
0

Sunsundeguin, 330 langile dituen enpresa honetan, gaur egun, behin-behinekotasun tasa %42koa da, aurten 50 langile utziko ditu kale gorrian, hauek beste batzuengatik ordezkatuz eta ze langile geratuko diren ala ez erabakitzeko garaian irizpide diskriminatzaileak erabili ditu. Beste modu batera esanda Sunsundegui enpresa kontratazioetan iruzur egiten ari da, langileak banatzeko tresna gisa eta prekarietatea hedatzeko tresna gisa erabiltzen ari dira.

Gaur egun, lan karga nahikoa dago enpresan kontratu mugagabe gehiago egiteko. Horren adibide garbia da enpresan sartzen diren ordu estra kopuruak (Lan Ikuskaritzak askotan enpresa zigortu izana egoera horren adierazle da) edo enpresaren saiakerak urteko lan ordu kopurua handitzeko.

Enpresa aurrera eramaten ari den politika baztertzailea bere proiektu industrialaren aurkakoa dela deritzogu. Enpresaren datuen arabera lan karga mantendu egiten da eta ondorioz pertsona hauek kaleratu ostean beste batzuk kontratatzera behartuak egongo dira. Beraz, pertsona berri hauek, berriro ere formatu beharko dira. Lan poltsa prekario bat sortzen ari dira. Jada, hau gertatzen ari da, kontratazioan iruzur eginez eta produkzioan gain kostu bat sortuz, proiektuari kalte eginez.

LABek egoera hau salatu nahi du iritzi publikoaren aurrean, jakinarazi nahi dugu ere beharrezkoak diren neurri judizial eta ekintza sindikalekoak hartzeko prest gaudela, prekarietateari aurre egiteko eta kontratazioan jasotzen den iruzurrari aurre egiteko. Bide honetatik jarraituz, kontratuak amaitzen dituzten pertsona guztiei, beren auzia epaitegira eramateko proposamena egiten diegu, kaleratzeak iruzurra direlako.

Modu berean ere, kontratazio politika baztertzailea salatu nahi dugu. Gogoratu behar dugu proiektu industrial hau diru publikoak lagundu duela, egungo zuzendaritzak bezala pentsatu ala ez pentsatu.

LAB sindikatuak proposamen ezberdinak egin ditugu behin behinekotasuna %42tik %20ra jaisteko, negoziazioa eta akordioak bilatuz. Enpresaren itxikeriak agortutzat ematen du bide hau, eta ondorioz fase hau. Horregatik LAB sindikatuak salaketa eta mobilizazioaren bidea da ikusten duen bide bakarra.
 

 

 

Prekarietateak gaixotu eta hil egiten duela salatu dugu Gasteizen, SEA patronalaren aurrean

admin
-
0
Prekarietateak gaixotu eta hil egiten duela salatu dugu Gasteizen, SEA patronalaren aurrean

Lan Segurtasun eta Osasunaren Nazioarteko Eguna da bihar, eta, horren harira, prekarietatea lan merkatuaren gaixotasun larriena dela salatu dugu gaur Gasteizen. Osasuna babesteko sistema alternatibo bat garatzeko borondate politikoa besterik ez dela behar adierazi dugu euskal gehiengo sindikala osatzen dugun sindikatuok, eta Gasteizko eta Iruñeko gobernuei hainbat erabaki har ditzatela eskatu diegu, enplegu osasuntsu, kalitatezkoa eta segurua sortu ahal izateko.

Hain zuzen ere, Gasteizko eta Iruñeko gobernuei honako erabakiak har ditzatela eskatu diegu:

-Enplegu osasuntsu, kalitatezko eta segurua sortzea.
-Baliabide gehiago gaixotasun profesionalak ikertzeko; arreta berezia eman behar zaie emakumeek jasaten dituzten gaitz eta patologiei.
-Osasuna politika guztietan babestu. Politika publikoek osasunean eta osasunaren berdintasunean duen eraginen ebaluazioa sustztea, osasun sektorean zein beste sentoreetan.
-Lan istripuetan eta gaixotasun profesionaletan gertatzen den azpierregistroari jazartzeko neurriak. Erregistro propioa sortzea.
-Lan osasuneko sistema publikoa, sistema publiko osoaren atal gisa.
-Gizarte-Segurantzako sistema propioa sortzea.
-Araudia urratzen duten enpresen gaineko ikuskatze, kontrol eta zigor ugariagoa.
-Egungo egoeran, euskal herri-erakundeek mutualitateen jarduera zaindu eta kontrolatzea.
-Prebentzio sistema publikoa, zeinaren lehentasuna pertsonen osasuna izango den.
-Enpresen prebentzio integral eta integratua, baliabide propioekin garatua.

Bilbo, Iruñea eta Baionan, bihar
Gasteizen izan dira mobilizatzen lehenak. Bihar, manifestazioak egingo ditugu Bilbon eta Iruñean, euskal gehiengo sindikalak deituta ere. Bilbon 11:00etan izango da, Confebasken egoitzatik abiatuta. Iruñean 12:00etan izango da, Fremap mutuatik irtenda.

Bestalde, Baionan ere irtengo gara kalera. Herriko etxearen aurrean elkartuko gara 12:30ean, eta lan istripu bat irudikatuko dugu.
 

 

 

Burujabetza osoa aldarrikatu dugu Iruñeko Gizarte Segurantzaren aurrean

admin
-
0
Ekimen berezi bat egin dugu Iruñean, burujabetza osoa aldarrikatzeko. Zehazki, Gizarte Segurantza eta Lan Ikuskaritzako bulegoen plakak kendu ditugu eta bi plaka alternatiboak jarri ditugu. Alde batetik, nafar orori gutxieneko pentsioa bermatzeko eta dagozkigun prestazioak izateko, Nafarroan Gizarte Segurantzako kutxa propioa kudeatzeko eskumena aldarrikatuz. Eta beste aldetik, Nafarroak lan arloko eskumenak izatea eta zehazki, Lan Ikuskaritza propioa izateko eskumena aldarrikatuz.

Nafarroak ez du lanbidearteko gutxieneko soldata finkatzeko edota eskubide laboralak bermatzeko eskumenik. Izan ere, azken hamarkadan hartutako erabakiek agerian utzi dute Nafarroaren ustezko autogobernua erabat mugatua dagoela. Sektore publikoaren garapena oztopatzen duten hamaika arau ezarri dizkigu Espainiako Gobernuak.

Honen aurrean LABen proposamena garbia da: estatu propio bat eratzea nafar langileon lan eta bizi baldintzen hobekuntzarako biderik emankorrena da. Menpekotasunak sozialki kaltetzen gaitulako.
Murrizketa, prekarietate eta inposaketen garaia gainditu eta berri baten bila goaz: langileon garaia, burujabetzaren garaia, aldaketa sozialaren garaia.
 

 

 

Sindikatu nazional moduan jorratu beharreko bidea izan dugu aztergai hendaian

admin
-
0
Sindikatu nazional moduan jorratu beharreko bidea izan dugu aztergai hendaian


Datozen urteetan sindikatuaren lerroan zentralitatea izango duten gaiak landuz hainbat solasaldi egin ditu LABek azken hilabeteetan. Ziklo honen baitan gaurkoan Lurralde Batasunaren Garaia, Sindikalgintza mugaz gaindi izenburupean hendaian antolatutako mintegian hartu dugu parte. Bertan LABek, sindikatu nazional moduan jorratu beharreko bidea izan dugu aztergai.

Hamarkada bat baino gehiago da LABek muga pasa eta sindikatu nazionala izateko jauzia egin zuenetik. LAB da Euskal Herriko hiru errealitate administratiboatean lanean ari den sindikatu bakarra, sindikatu nazional bakarra alegia. Eta honek berarekin erantzunkizunez jokatzea eskatzen du.

Urteak pasa dira, eta asko aurreratu dugun arren eguneroko praktikan zailtasun ugarirekin egiten dugu topo. Muga horiek gainditzeko asmoz egitasmo bat martxan jartzea erabaki da. Eremu politiko, sindikal eta sozialean zatiketa administratiboa gainditu eta eraiki nahi dugun estatuaren bidean eman beharreko urratsen inguruan eztabaidatzeko parada izan dugu.
 

 

 

Azken lan heriotza salatu dute Zornotzan

admin
-
0
Azken lan heriotza salatu dute Zornotzan

Impactoko enpresa batzordeak eta Zornotzako Udaleko enpresa batzordeak elkarretaratze batera deitu dute gaurko, Zornotzako udal kiroldegian astelehenean zendutako langilearen lan heriotza salatzeko. Aldi berean, lan uzteak egin dituzte.

Impacto enpresako langilea zen hildakoa. Bertako enpresa batzordeak ikerketa bat exijitu du gertatutakoa argitzeko, eta Zornotzako Udalari eskatu dio azpikontratatutako langileen segurtasuna eta lan osasuna zaindu ditzala, "ardura zuzena" duelako langile horiekiko.

LABek ere lan heriotza ikertzeko exijitu du, eta instituzioetako arduradunei eskatu die azpikontratazioekin bukatzu eta kalitatezko enplegu eta lan-baldintza duinen aldeko apustua egin dezatela. Era berean, Lan Segurtasunaren eta Lan Osasunaren Nazioarteko Egunean egingo diren mobilizazioetarako deia luzatu du sindikatuak.

Hain zuzen ere, kalera irtengo gara apirilaren 28an, lan heriotzak salatzeko eta istripu gehiagorik gerta ez daitezen neurriak aldarrikatzeko. 

Gasteiz, Bilbo, Iruñea eta Baionan
Gasteizen izango dira mobilizatzen lehenak. Ostegunean, apirilaren 27an, elkarretaratzea egingo dugu SEA patronalaren egoitzaren aurrean, 11:00etan, euskal gehiengo sindikalak deituta. Bilboko eta Iruñeko manifestazioak ostiralean izango dira, euskal gehiengo sindikalak deituta ere. Bilbon 11:00etan izango da, Confebasken egoitzatik abiatuta. Iruñean 12:00etan izango da, Fremap mutuatik irtenda.

Bestalde, Baionan ere irtengo gara kalera. Herriko etxearen aurrean elkartuko gara 12:30ean, eta lan istripu bat irudikatuko dugu.

Iruñean, euskal gehiengo sindikalak deitutako manifestazioaz gain, Arrotxapeako elkarte batek beste mobilizazio bat antolatu du ostiral arratsalderako. Lanean hildako hainbat senide biltzen ditu elkarteak, eta martxa bat egingo dute udaletxeraino. Hain zuzen ere, 3.000 sinadura bildu dituzte eskaera bat egiteko: langile klasearen omenez monolito bat ezar dezan eskatuko diote udalari. Martxa 19:00etan irtengo da Arrotxapeatik, Matesa lantegia zegoen lekutik.
 

 

 

Michelin langile ebentualak masiboki kaleratzen ari dela salatu dugu

admin
-
0
Michelin langile ebentualak masiboki kaleratzen ari dela salatu dugu

Lan Ikuskaritzak 137 kontratu, iruzurrezkoak direlakoan, mugagabe bihurtzeko ebatzi ondoren, Michelinek erabaki du kontratu ebentuala bukatzen duten pertsonak kalean uztea. LABek exijitzen du kaleratzeak etetea, kaleratutako langileak berronartzea eta mobilizazioak eta kontratazio eredu berri bat proposatuko ditu, iruzurra ekiditeko eta kalitatezko enplegua bultzatzeko.

Duela egun batzuetatik, Michein beraien kontratu ebentuala bukatzen duten langileak kalean uzten ari da eta hurrengo asteotan, hamarnaka pertsona kaleratuak izan daitezke. LABen ustez, iruzurraren bigarren botea da, beraien lanpostuak estrukturalak baitira, ez produkzioaren igoera puntualari lotutakoak, eta beraien ordez lanpostu berean aritzeko pertsonak kontratatzen ari baitira. Hori dela eta, kaleratzeak eten egin behar dira eta enpresak langileok berronartu behar ditu. Horregatik, pertsona hauek animatzen ditugu beraien kaleratzeak salatzera, beraien lan harremana mugagabea delako eta ez ebentuala.

Beraz, badirudi Michelinek, iruzurrarekin amaitu beharrean, bere horretan sakontzen duela eta prekarietatea areagotzea erabaki duela, kontratazio berriei, soldataren diskriminazioaz gain, ziurgabetasun handiagoa eskainiz.

Honen aurrean, LABek kaleratzeak bertan behera uztea eta kaleratutako langileak berrartzea exijitzearekin batera, Michelinen kontratazio eredu berri bati ekitea proposatzen du honako oinarriak aintzat hartuz: irizpide objektiboak izatea, iruzurra ezabatzea, lanpostu estrukturaletan kontratazio mugagabea bultzatzea, Langileen Batzordeari kontratu ebentualen eta obrakoen bermeak eskaintzea eta kalitatezko enplegua bermatzea.

Aldi berean, Lan Ikuskaritzari dei egiten diogu esku hartzeko eta Michelinen iruzurrezko ekinbideari behingoz amaiera emateko, hamarnaka langile ebentual kalean utz baititzake. Horrekin batera, gai honetan gainontzeko erakundeek esku hartu behar lukete ere; hortaz, gogorarazi nahi dugu duela urtebete bat hain justu Arabako Foru Aldundiak Urrezko Domina eman ziola Michelini, zeini eta kontratazioan iruzurra egiten duenari, ebentualak masiboki kaleratzen dituenari eta ordutik hona bere lantegian 3 langileren heriotza izan duenari. Beraz, erakunde berberek parte hartu behar dute iruzurrari bukaera emateko eta, enpresaren jokabideak babestu beharrean, langileak defendatu behar dituzte.

Azkenik, LABek mobilizazioak proposatuko ditu ebentualen kaleratze masiboaren kontra eta Michelinen enplegua duina eta kalitatezkoa izatearen defentsan.
 

 

 
1...918919920...1,580Page 919 of 1,580

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus