Kaleratzeen aurka eta enpleguaren defentsan mobilizatu gara Donostian, Egia auzoan, Nuestra Señora de la Paz zaharren egoitzaren aurrean. Mondragon korporazioko Gestion Servicios Residenciales (GSR) kooperatibaren jokabidea salatu dugu.
Blog Page 896
Erabateko jarraipena izan dute Edesa eta Geyserren egindako lan uzteek
Edesa Industrial eta Geyser Gastech enpresetako langileek lan uzteak egin dituzte gaur Arrasate, Eskoriatza eta Basauriko lantegietan, hartzekodunen aurrekonkurtsoaren aurkezpenarekin sortutako kezka adierazteko eta zuzendarizari eta Eusko Jaurlaritzari konponbide bat eskatzeko. Fagor CNA Groupeko enpresa batzordea jabeekin bildu da gaur bertan, eta zuzendaritzak ez diela etorkizuneko planik aurkeztu adierazi du.
Gaurko protestarekin, langileek euren kezka azaldu eta enpresa batzordeak egunotan adierazitakoa berretsi dute; hau da, enpresaren jokabidea onartezina dela. Hala, bidegarritasun plan bat exijitu dute berriro.
Hain zuzen ere, Fagor CNA Groupeko enpresa batzordeko kideak enpresako jabeekin bildu dira gaur, eta ondorengo prentsa oharra kaleratu dute bilerari buruz:
Gaur uztailak 6, Fagor CNA Groupeko enpresa batzordeko kideak enpresako jabeekin bildu gara. Bilera horretan ondorengoa esan digute:
– CNA Groupek aurrekonkurtsoa aurkeztu arren ez du hartzekodunen konkurtsoa aurkezteko asmorik.
– Jarduearekin jarraitzeko asmoa dute eta errentagarritasuna hobetzeko asmoarekin egituran aldaketak egin nahi dituzte. Hala ere, amaitutako bideragarritasun planik ez dagoela esan digute.
– Zeresana duten eragile guztiekin negoziatzeko asmoa dutela esan digute, enpresaren egoerari irtenbidea topatzeko.
Gure balorazioa da bilera etsigarria izan dela, ez digutela etorkizunerako planik aurkeztu.
Gure borondatea proiektuarekiko osoa da, baina gure konpromisorako beharrezkoa da 30 lagun kaleratzeko Enplegua Erregulatzeko Espedientea kentzea. Ez badu horrela egiten, gatazka egoeran aurkituko gara.
Gardentasun eta inprobisazio etengabeko honekin amaitu behar dugu eta etorkizuneko proiektu industrial serio bat eraikitzeko laguntzeko prest gaude, serioa izango dena, konpromiso eta bermeekin, eta zeresana duten eragileen babesa izango duena.
LABek ere egoeraren irakurketa egin du, hartzekodunen aurrekonkurtsoaren aurkezpenaren harira.
Espetxe politika garai berrira egokitzeko eskatu diogu sindikatuok Espainiako Gobernuari
ELA, LAB, UGT, Steilas, ESK, Hiru, EHNE eta Etxaide Mugimenduak agerraldi bateratu bat egin dugu gaur Bilbon, Foro Sozial Iraunkorraren babesean, Madrilgo Gobernuari espetxe politika alda dezala eskatzeko.
Hauxe da gaurko agerraldian publiko egin dugun adierazpena:
Hemen agertzen garen sindikatuak, ELA, LAB, UGT, Steilas, ESK, Hiru, EHNE Konfederazioa eta Etxalde Mugimendua, ezohiko Bilboko gaurko azaltze honetan bilduta Foro Sozial Iraunkorraren bultzadari esker, euskal gizarteari zera adierazi nahi diogu: joan den ekainaren 29an Eusko Legebiltzarreko parlamentarien %88ak espetxe politikaren inguruan hartutako akordio garrantzitsuari, eta, bereziki, larri gaixo dauden presoei ezarritako politika dagokionari, gure onespena ematen diogula.
Beraz, ondorengo aitorpena egiten dugu:
1. Sindikatuok eskumena duten agintariei eskatzen diegu indarrean dagoen estatuko legedia eta nazioarteko estandar zorrotzenak aintzat har ditzatela gaixotasun sendaezin oso larriak dituzten presoak hirugarren graduan sailkatzea eta espetxetik ateratzea ahalbidetzeko, arrazoi humanitarioak eta duintasun pertsonala dela eta.
2. Sindikatuok Gobernu zentralari eta bereziki Espetxe Erakundeei eskatzen diegu espetxe populazio osoaren bizitza, segurtasun eta osasun eskubideen errespetua babes dezatela, botere publikoek sentsibilitate berezia adierazi behar dutelako espetxe politika zuzendu behar duten printzipioak eta, zehazki, Espetxe Erregelamenduaren 104.4 artikulua aplikatzean.
3. Hori dela eta, sindikatuok eskatzen dugu Espetxe Erakundeen Idazkaritza Nagusiaren 3/2017 instrukzioa indargabetzea eta Barne Ministroak adierazitako irizpidea zuzentzea, zeinaren arabera gaixo dagoen presoei ez zaien baldintzapeko askatasuna emango bi hilabeteko epean hiltzeko berehalako arriskua ez badago, irizpide horrek legalitate eta humanitate oinarrizko printzipioak urratzen dituelako eta halako erabakia ustez hartu beharko lukeen pertsonal medikuaren printzipio deontologikoen kontra doalako.
4. Sindikatuok beste behin ere Gobernu zentralari eskatzen diogu euskal erakundeekin partekatu eta adostu dezala espetxe-politikaren orientazioa.
Hemen bildutako sindikatuek, apirilaren 5an Bilbon egindako adierazpena errepikatzen dugu: “Gure erantzukizuna da, erakunde sindikalak garen aldetik, hainbeste hamarkadak utzitako ondorioak gainditzea. Besteak beste, geure erakundeentzako ere erronkak dira honakoak: hitza armagabetzea, zilegizko gure gorabeherak demokratikoki eta gizalegez bideratzea, eta tirabirak kudeatzeko elkarrizketa eta negoziazioari balioa ematea”.
Ondorioz, instituzioekin, alderdi politikoekin eta gizarte zibileko beste erakundeekin aribidean dauden elkarrizketa bideak sakontzeko konpromezua hartzen dugu.
Gaur, hemen, alderdi politikoen gehiengoa eta sindikatuen osotasuna dagoeneko beste fase batean gaudela egiaztatzen dugu. Espetxe politikari buruzko aldeetan nahikoa izango den adostasun transbertsala eta barneratzailea lortzeko lan egiten, espetxe politika, baita ere, garai politiko berriari egokitu dezan.
Euskal Herrian murru demokratiko sendo bat altxatzeko unea da, Altsasuko basakeriaren aurrean
Elkartasuna eta besarkadarik estuena helarazi nahi diegu gazte altsasuarrei eta haien senideei. Gure deia, halaber, altsasuarrei, nafar jendarteari eta euskal herritar guztiei, basakeria honi herri mobilizaziotik erantzun irmoa ematera. Altsasun bertan dugu horren adibide txalogarria. Dei egiten diegu ere Nafar Gobernuari zein Eusko Jaurlaritzari, injustizia honen aurrean erantzun irmo bat eman dezan.
Auzitegi Nazionaleko fiskaltzak 62 urterainoko espetxe zigorrak eskatu ditu Altsasuko auzipetuentzat; lesio terroristak egozten dizkie, eta launa delitu leporatu, bakoitzari. Zalantzarako tarterik gabe, basakeria politiko eta judizial hutsa da fiskalatzaren eskaera. Honen aurretik, kezka handiz hartu genuen auzia Iruñeara bideratzea ukatu eta Audientzia Nazionalaren esku mantentzeko erabakia, eta orain, gure susmorik txarrenak berretsi egiten dira, fiskalaren zigor eskaerarekin.
Kolpe antidemokratiko izugarria da gazteentzat, haien familia eta lagunentzat zein Altsasuko herriarentzat. Jendarte zibiletik, eragile politiko, sozial eta sindikalon eskutik, baita eremu instituzionaletik ere, ahots ugari izan gara behin eta berriro justizia, demokrazia, proportzionaltasuna eskatu dugunak. Audientzia Nazionalak, baina, fiskaltzaren eskutik, desproposito honekin erantzun du.
Jai giroan sortutako liskarra, terrorismo delituaren akusazioa eta 62 urterainoko espetxe zigor eskaera. Gutxieneko berme eta joko arau demokratikoak sustraituak dituen herrialde batean pentsaezina litzatekeena, guztiz posible da Espainiar Estatuan, horretarako ditu salbuespenezko tribunalak, horretara bideratuak, Estatu aparatuak, politikoak, judizialak, polizialak.
Auzi honen larritasuna azpimarratu nahi dugu, eta salatu, hasieratik eman zaion erabilera politikoa. Baita estrategia horretan erabakigarria izan den bulkada eta manipulazio mediatikoa ere, komunikabide unionisten aldetik. Maniobra polizial, mediatiko, juridiko-politiko erabatekoa da 8 gazte altsasuarren etorkizuna jokoan jarri eta eta herri oso bat kriminalizatu duena.
Elkartasuna eta besarkadarik estuena helarazi nahi diegu gazte altsasuarrei eta haien senideei. Gure deia, halaber, altsasuarrei, nafar jendarteari eta euskal herritar guztiei, basakeria honi herri mobilizaziotik erantzun irmoa ematera. Altsasun bertan dugu horren adibide txalogarria. Dei egiten diegu ere Nafar Gobernuari zein Eusko Jaurlaritzari, injustizia honen aurrean erantzun irmo bat eman dezan, eta bere bitarteko guztiekin eragin, gazteen askatasunaren alde, eta Estatuko indar polizial eta militarren okupazioarekin amaitzeko. Gure herrian abian dugun garai berriari tresna eta estrategia zaharrekin erantzuten jarraitzen duen Estatua bera da orain armagabetu behar dena.
Eraiki dezagun, herriaren bulkadaz eta eragileon inplikaziotik murru demokratiko sendo bat Euskal Herrian, Madrildik datozen eraso zibil eta politikoei, eraso antidemokratiko guztiei bidea mozteko.
Gazteak Altsasun nahi ditugu, gurekin behar ditugu, libre!
Lan hitzarmenaren eta bost kaleratuen alde egin dugu protesta FCC-GMSM enpresaren aurrean
LABeko FCC-GMSMko Sail sindikalak elkarretaratze bat egin du gaur Gasteizen, enpresaren aurrean. Bost langile kaleratuak izan direla salatu eta lan hitzarmenaren egoeraren berri eman dugu. Ekainaren 29an ere elkarretaratze bat egin genuen arrazoi beragatik. Ostegunean berriro egingo dugu protesta, 13:30ean, enpresan bertan.
Hego Euskal Herrian 167.207 arrazoi ditugu oraindik enplegu politika eraginkorra exijitzeko
3.802 pertsonatan egin du langabeziak behera. Zifra hau 1.360ean gelditzen da kontutan hartzen badugu gizarte segurantzari afiliazioa azpienplegua eta prekarietatearen kontura egin dela, azken urteotan gertatu den moduan. Urtarriletik hona sinatu den kontratuen %92,5 aldi baterakoa da eta ia erdia hilabetetik beherakoak dira.
120.990 langabetuk ez dute langabeziagatiko inolako prestaziorik jasotzen, sistemaren estaldura %29,2an utziz, oraindik apalagoa dena emakumeen kasuan (%27).
Bere helburua interes finantzieroak eta patronalarenei mesede egitea duen politika ekonomikoak desberdintasunak areagotzen ditu, krisia betikotu eta gero eta alde gehiago sortzen du laneko errenta eta kapitaleko errenten artean, azken hauen mesedetan.
Ez gara egoera honetatik aterako neurri urjenteak hartzen ez badira. Inbertsio ekoizpen publiko eta pribatua, inbertsioa zerbitzu publiko eta enpleguaren sorreran, Europako Karta Sozialaren araberakoa izango den lanbidearteko gutxieneko soldata, lanaldia murriztea eta enpleguaren sorrera sektore publiko zein pribatuan eta 1.080 eurotako gutxieneko soldata soziala.
Edesa Industrialeko langileek prentsaren bidez izan dute hartzekodunen aurrekonkurtsoaren berri
Edesa Industrial enpresak aurkeztutako hartzekodunen aurrekonkurtsoaren aurrean dugun iritzia eman genuen atzo, LAB sindikatu gisa. Bada, enpresa batzordearen txanda izan da gaur. Bere kezka adierazteaz gain, enpresaren jokabidea onartezina dela salatu du.
Hauxe da Edesa Industrialeko langileen ordezkariek kaleratu duten oharra:
Danok dakizuen bezala, Edesa Industrialeko zuzendaritzak hartzekodunen aurrekonkurtsoa aurkeztu zuen aurreko ostiralean.
Honi buruz, Langileen Ordezkaritza Legalak honakoa adierazi nahi du:
– Langileen ordekaritza honek prentsaren bidez jakin zuela honen berri.
– Larunbatean bertan zuzendaritzari azalpenak eskatu zitzaizkion eta aste hontan bilera bat egingo zela jakinarazi ziguten. Bilera hau atzo 2017/07/03an egin zen, 15:30ean egin zen.
– Parladé jaunak langileen ordezkaritza legalarekin egoteko konpromisua hartu
du, datorren ostegunerako.
– Martín jaunarekin izandako bileran, aurrekonkurtsoa aurkeztearen arrazoia babes judizial izatea dela esan zigun, izan ere uztailaren erdialdean agortzen da tresna finantzieroek duten luzapena eta derrigorrezkoa dela enpresaren berfinantziaketa
– Zuzendaritza lanean dauden produkzio lerroen hornikuntzan lanean dagoela.
-Enpresaren jokabide hau onartezina iruditzen zaigu, eta bidegarritasun plan bat exijitzen dugu, gure bizkarretara eginik ez dagoena. Gure langabezia kontsumitzen ari gara EEE baten bitartez, eta ez dakigu CNAk Edesa Industrialekiko zein enpresa proiektu duen.
– Langileen ordezkaritzak zaintza lanetan jarraituko du, langileen eskubideak bete daitezen, baita enpresarekin hartuko akordioak ere.
– Gogorarazi nahi dugu, langileen ordezkariak, sindikatuekin batera, hainbat alditan joan direla Eusko Jaurlaritzara enpresaren egoera salatzeko.
Azken lan heriotzak salatu dituzte Azpeitian
Lan istripuen aurka mobilizatzeko eguna izan da gaurkoa, atzo beste bi lan heriotzen berri izan eta gero. Hain zuzen ere, Azpeitiako Astigarraga Kit Line (JJ Producciones) enpresaren aurrean elkarretaratze batera deitu du gaurko enpresa batzordeak, eta, horrekin batera, 24 orduko lan uztea egin dute. Azpeitiako enpesa honetan izan zen atzoko lan heriotzetako bat; bestea, Bedian izan zen, Forjas Unidas Vascas enpresan.
Lan heriotzen aurkako mobilizazio gehiago egongo dira arratsaldean. Azpeitiko plazan, 19:00etan, elkarretaratze batera deitu du herri mugimenduak.
Txikizioak salatzeko mendi ibilaldiarekin egin dugu bat
La Via Campesinak munduko kongresua Derion egingo du uztailean. Elikadura burujabetza da La Via Campesinaren aldarrikapenen ardatza, baina horretarako lurra behar da eta azpiegitura handiek lurra erabat artifizializatzen dute. Hori dela eta, lurraren aldeko zein gizarte mugimenduko hainbat talde, LAB barne, Bergaratik Deriora mendi ibilaldia prestatzen ari gara uztailaren 14tik 16ra, "Txikizioa borrokatu, bertako elikadura bultzatu", leloarekin. Hala, jarduera honen berri atzo eman genuen, Sabin Etxearen aurrean, Bilbon, EAJren egoitzaren aurrean protesta egiteko hurbildu baiginen, txikizioen erantzuleetako bat den neurrian.
Bost kontinenteetako nekazari mugimenduak elkartuko dira uztailaren 15etik 24ra Derion (Bizkaia), Via Campesinaren Munduko Batzarrean. Koordinakunde horrek hainbat hamarkada darama elikadura burujabetzaren aldeko borrokan, hau da, herriek eta komunitateek beren ongizaterako eta osasunerako beharrezko dituzten elikagaiak ekoizteko eta jateko duten eskubidearen aldeko lanean. Defendatzen duten nekazaritza eredua ekoizpen dibertsifikatuan oinarritutakoa da; komunitatearen beharren neurriko ustiategi txikiz osatua, jatorri naturaleko simaur eta ongarriak erabiltzen dituena, eta ingurunea eta lurraren zikloak errespetatzen dakiena.
Bada, batzarraren testuinguruan, gizarte mugimenduko hainbat taldek Bergaratik Deriora mendi ibilaldi bat egingo dugu, uztailaren 14tik 16ra. Hauxe da ibilaldiaren egitaraua:
Uztailak 14, ostirala / BERGARA-ELORRIO- IZURTZA
-10:00etan. Irteera: Bergarako autobus geltokia
-Bazkaria: Elorrioko gaztetxea.
-19:00etan. Hitzaldia: EKOPOLen txostenaren aurkezpena. David Hoyos. Izurtzako frontoian.
-21:00etan. Afaria.
-22:30ean. Kontzertua: Eneritz Furyak.
-Lo egiteko frontoian.
Uztailak 15, larunbata/: IZURTZA-ZORNOTZA-LARRABETZU
-9:30ean. Irteera: Izurtzako frontoia.
-10:00etan. Andra Mari plaza. Durango.
-Bazkaria: Zubiondo plaza (Parke gorria). Zornotza.
-19:00etan. Solasaldia: “Elikadura burujabetzatik bizitza burujabetzara” eta “EHko azpiegiturek eragindako lurraren artifizializazioa. Anguleri Kultur etxea. Larrabetzu.
-21:00etan. Afaria: Hori bai gaztetxea. Larrabetzu.
-22:30ean. Kontzertua: Gerra zibileko kantuak eta musika. Hori bai gaztetxea.
-Lo egiteko polikiroldegian.
Uztailak 16, igandea: LARRABETZU-DERIO
-10:00etan. Irteera: Askatasunaren Enparantza. Larrabetzu.
-13:00etan. Giza-kate-jira. Derio.
-13:30ean. Amaierako ekitaldia. Derio
IZEN EMATEA: ahtgelditu@ahtgelditu.org edo 628243066