2026-02-14
Blog Page 834

Mobilizaziora deitu dugu itsasoan hildako ATUNSA enpresako langilearen heriotzaren aurrean

admin
-
0
Mobilizaziora deitu dugu itsasoan hildako ATUNSA enpresako langilearen heriotzaren aurrean

Bermeoko ATUNSA enpresako arrantza-ontzi bateko langile bat hil zen atzo. Langilea zauriturik suertatu zen itsasoan izandako istripu batean, hiru egun lehenago. Kasu honetan, nabarmentzekoa da ATUNSA enpresak langile honen heriotzaren aurrean erakutsi duen gardentasun falta. LABek dei egiten du astelehenean, hilak 29, euskal gehiengo sindikalak deituta Bermeoko Lamera plazan egingo den kontzentrazioan parte hartzera. Mobilizazioa 12etan izango da.

LABek bere elkartasun eta babesa erakutsi nahi die hildakoaren senitarteko eta gertukoei, eta langile klaseari okorrean. Honekin, gutxienez 4 dira urte hasieratik lan-istripuetan hildako langileak, Euskal Herrian edo euskal enpresetan lanean ari zirela.
Gaur egungo krisi ekonomikoak lanpostuak inoiz baino gehiago prekarizatu ditu, itsasoko lanetan diharduten pertsonei dagozkienak ere. Beraien lan baldintzak, istripu bat gertatuz gero ezer ezin egina, ez medikurik, ez soroslerik, urruntasuna…
 

 

 

Bat egin dugu Bolibarren antolatutako elkartasun egunarekin, Hugo Chavezen heriotzaren 5. urtemuga dela eta

admin
-
0
Bat egin dugu Bolibarren antolatutako elkartasun egunarekin, Hugo Chavezen heriotzaren 5. urtemuga dela eta

Venezuela Aurrera plataformak eta bertan dauden eragileetako ordezkariek, LABekoak barne, agerraldi bat egin dute gaur Bilbon, Veneuzela plazan. Hain zuzen ere, Hugo Chavezen heriotzaren 5. urtemuga beteko da martxoaren 4ean, eta, horren harira, omenezko elkartasun egun bat antolatu dute Bolibarren. Egun horretan izango diren ekitaldien berri eman dute gaurko agerraldian.

Kontzeruak, herri bazkaria eta haurrentzako jarduerak egingo dituzte Bolibarren, martxoaren 4an, Hugo Chavezen heriotzaren 5. urtemuga dela eta. Ekitaldi nazional bat ere antolatuko dute, Venezuela Aurrera plataformak deituta.

Plataforma honen hitzetan, "Venezuelako proiektu sozialistak, ondo egindakoak zein gaizki egindakoak kontutan hartuta, beste hainbat borroka global zein lokalekin batera, mundu hobe bat nahi dugunontzako izar gorri bat izaten segitzen du; itxaropenez beterikoa, gainera. Horregatik zaigu ezinbesteko borrokan den Venezuelari, gaur inoiz baino gehiago, gure elkartasuna adieraztea".
 

 

 

EAEn kolektibitateen hitzarmen bat sortzeko eskatu dugu Gurutzetako ospitalean

admin
-
0
EAEn kolektibitateen hitzarmen bat sortzeko eskatu dugu Gurutzetako ospitalean

Kolektibitateetako langileek elkarretaratze bat egin dute gaur Gurutzetako ospitalean. Hain zuzen ere, salatu dute lan bera egiteagatik lan baldintza kaskarragoak dituztela, eta horretarako “Estatalizaziorik ez! Hemen lan egin, hemen negoziatu” leloarekin egin dute protesta.

Gurutzetako ospitaleak, Eurest enpresaren bezero gisa, langileen lan eskubideak okertzea ahalbidetzen du, soldata okerragoa eta medikuntza bajengatik penalizazioak inposatuz.

Sodexo, Eurest eta Serunion enpresetako langileek sektoreko lankideekiko lan baldintza okerragoak dituzte, lan bera egiteagatik. Soldata zozkatu egiten dute, baita lanaldia, bajen osagarria eta lan hitzarmen kolektiboa ere. Hau guztia, Eurest, Sodexo eta Serunion enpresek irabazi gehiago atera ditzaten, langileen prekarietatearen kontura.

Ostalaritzako hitzarmen estatalaren aurrean, EAEn kolektibitateen hitzarmen bat sortzeko eskatu dugu gaurko mobilizazioan. Hemen lan egiten duten heinean, hemen erabaki behar dutela aldarrikatu dugu, azken batean.
 

 

 

Prekarietateak babes politikoa duela ikusi da Donostiako gaurko udal plenoan

admin
-
0
Gaurkoan EAJ, PSOE eta PPk udal plenoan erabaki dute dirulaguntza eskatuko duten eraikinen obretan Gipuzkoako Lan Hitzarmena aplikatzea derrigorrezkoa ez izatea. Erabaki honek, hitzarmena ez betetzeari eta esplotazioari ateak zabaltzen dizkio. Alderdi hauek eraikuntzako sektorean prekarietatea zabaltzeaz gain, enpresariei gutxieneko lan arauak ez betetzeko deia egiten diete.

Gertatutakoa oso larria da. Onartezina. Hau tamalez, Donostiako Udalaren menpe dauden beste obretan gertatzen ari da, Anoetako estadioaren berritze lanetan bezala, LABek berriki Lan Ikuskaritzan salatu duen moduan. Eskandalugarria da. Horrela nahi dute kalitatezko enplegua sortu eta defendatu? Negoziazio kolektiboaren aldeko alderdi horien mezuak propaganda hutsa direla argi geratu da. Ze zilegitasunarekin eskatuko diete herritarrei arauak betetzea Udalak berak lan hitzarmenak betetzen ez dituenean? LABek Donostiako alkatea den Eneko Goia jaunari bilera urgentea eskatu dio euren jarrera aldatu dezan.

Prekarietatea, gaur egungo lan merkatuan langileen lan baldintzen kontura gutxi batzuk aberasteko tresna da. Baina argi salatu nahi du LABek: prekarietateak babes politikoa du Euskal Herrian. Azken adibidea Donostian gertaturikoa da.
 

 

 

Igorreko Talleres Negarrako langileek elkarretaratze bat egin dute bost nomina zor dizkietelako

admin
-
0
Igorreko Talleres Negarrako langileek elkarretaratze bat egin dute bost nomina zor dizkietelako

Igorreko Talleres Negarrak 85 langile ditu gaur egun. 2014ko apirilean egoera ekonomiko txar baten aitzaki pean kaleratze kolektibo bat eraman zuen aurrera. Politika neoliberalak jarri zituen martxan, 30 langile kaleratu eta soldatak izoztuz. Orduz geroztik zorretan eduki ditu nominak, eta azken bi urteotan, 2 nomina etengabe atzeratzen ibili da. Gaur egun bost nomina zor dizkie langileei eta ez dago lanik tailerrean.

Honek argi erakusten digu politika neoliberalek ez dutela enpresaren egoera ekonomikoa hobetzen, baizik eta langileen bizkar bota egoera ekonomiko okerra.

Datu makroekonomikok aurkezten dizkigute egoera onean gaudela sinistarazteko. Errealitatea ordea beste bat da. Krisia deituriko honen ondorioz, langileen baldintzak okertu dituzte. Talleres Negarrako egoera, honen adibide argia da.

Horregatik, enpresak bere erantzunkizuna bere gain har dezala eta Eusko Jaurlaritzak benetako politika industriala martxan jar dezala eskatzen dugu, langileak hobeto bizi ahal izateko, eta ez soilik enpresen mozkinak bermatzen dituena soilik.
 

 

 

Prekarietatean oinarritutako kontratazioa oso errotuta dagoela erakusten dute Biztanleria Aktiboaren Inkestaren azken datuek

admin
-
0
Langabeekiko babes sistemaren gabeziak are eta larriagoa egiten du egoera. Izan ere, ofizialki langabe dauden pertsonen %70ari ez zaie inolako prestaziorik eskaintzen.

2017. urtea %10,4ko langabezia tasarekin amaitu zen Hego Euskal Herrian, Biztanleria Aktiboaren Inkestaren arabera. Okupatutako biztanleen kopurua %1 handitu zen 2017. urteko azken hiruhilekoan. Hala, 1.196.1000 pertsona zenbatu zituzten okupatu gisa, aurreko hiruhilekoan baino 12.000 inguru gehiago.

Hala ere, nabarmentzekoa da urteko azken hiruhilekoan sortutako enplegua aldi baterakoa eta lanaldi partzialekoa izan dela.

Hain zuzen ere, mugagabe diren lanpostuen kopuruak behera egin du piska bat (-100), eta sortutako enplegu guztiak aldi baterako kontratuak izan ditu oinarri. 2017. urtean 1.330.000 kontratu sinatu zituzten Hego Euskal Herrian, eta horietatik %93 aldi baterakoak izan ziren.

Bilakaera honek behin behinekotasun tasa %25,4 izatea ekarri du soldatapeko biztanleriari dagokionez. Emakumeen kasuan, tasa honek gora egiten du: %27,6koa da.

Lanaldi motari dagokionez, 2017. urteko laugarren hiruhilekoan aurreko hiruhilekoan baino 13.200 pertsona gehiago zeuden lanaldi partzialarekin, eta 1.200 okupatu gutxiago lanaldi osora.

Bestalde, azpimarratzeko beste datu bat badago: Hego Euskal Herrian, 399.500 pertsona daude harrapatuta langabezia eta aldi baterako enplegu baten artean; biztanleria aktiboaren %30, hain justu.

Gainera, langabezia tasak %10,4ra egin du behera, baina ekonomikoki aktiboa den gazteriaren %25,3 langabe dago; hau da, 16 eta 25 urte bitarteko lau gazteetatik bat.

Datu hauek guztiek erakusten dute oso errotuta dagoela prekarietatean oinarritutako kontratazioa; hots, gehiegikeria ardatz duen kudeaketa eredu hau bere egin dutela enpresek. Ondorioak begibistan daude. Lan baldintzak eta soldatak modu justu eta zentzuzkoan hobetzea ekiditen duen arazoaren erroa hemen aurki daiteke.

 

 

 

Lan hitzarmen duin bat eskatu dute Hezkuntza Saila eta EHUko garbiketako langileek

admin
-
0
Lan hitzarmen duin bat eskatu dute Hezkuntza Saila eta EHUko garbiketako langileek

Borrokan dira Hezkuntza Saila eta EHUko garbiketako langileak, LAB, ELA, UGT, ESK eta CCOO sindikatuok deituta. Hala, elkarretaratze bat egin dute gaur Bilbon, Eusko Jaurlaritzaren egoitzaren aurrean, eta lan hitzarmen duin bat aldarrikatu dute berriro.
 

 

 

Elkartasuna adierazi diegu La Asuncion klinikako langileei

admin
-
0
Elkartasuna adierazi diegu La Asuncion klinikako langileei

Tolosaldeako eskualdeko delegatuen batzarra egin genuen atzo, eta, bertan, La Asuncioneko langileei elkartasuna adierazi genien. Hain zuzen ere, Eusko Jaurlaritzari esku hartu dezala eskatu genieon, eta, publifikazioaren bidean, gaurko egoerari konponbidea eman diezaiola.

 

 

 

Profesionalen gabeziaren arazo larriari berehalako konponbidea jartzea exijitzen diogu Osakidetzari

admin
-
0
Pasa den ostiraletik Igorreko osasun zentroan bai langileak eta bai herritarrak egoera larria pairatzen ari dira. Dauden bi pediatretatik batek baja hartu zuen.Ondorioz,beste pediatrak honen lana jaso behar izanzuen, bi kontsulten antolaketa ere bere esku geratuz (zein gaixo ikusi eta zeintzuk ez). Honek suposatu zuen egun bakarrean 55 ume ikusi behar izatea eta bere lanaldia ordu betez luzatzea, horrelako egoerek sortzen duten presioa eta lana ondo ez egitearen sentsazioari zuzendaritzaren aldetik batere garrantzirik ematen ez zaiolarik.

Gaur arte, Barrualde ESIan arazo honi konponbidea emateko modua hauxe izan da: Egun solteetan bajan dagoen langilea ordezkatu hasieran, eta ondoren, bajak irauten duen bitartean, 2 ordutako ordezkoa ipintzea. Orain, bigarren pediatrak ere baja hartu du eta 2 egunetako kontratazio bat egin da 2 hauek ordezkatzeko.

Egoera larri honen berri izan bezain pronto Barrualdeko zuzendaritzarekin harremanetan jarri gara eta eman diguten azalpena hutsaren hurrengoa da: pediatra eta umeak artatzen dituzten familia medikuen falta dela arazoaren oinarria.

LABen iritziz, epe ertain eta luzeko neurririk hartu ez izana Osakidetzaren eta Eusko Jaurlaritzaren ardugabekeria galanta da. Aspaldiko kontua da fakultatibo batzuen falta. Eta orain arte ez da plan estrategokirik martxan ipini. Alderantziz, mediku askok -batez ere ebentualak- Osakidetzatik alde egiten dute pairatzen dituzten lan egoera prekarioengatik, eta horietako asko beste erkidegoetako osasun sistemetan amaitzen dute, soldata agian baxuarekin, baina lan egoera hobeagoetan. Mediku baten formakuntzak suposatzen duen denbora, esfortzu eta dirua kontuan hartuta, egoera egonkortzea premiazko helburua izan beharko lizateke Osakidetzarentzat.

Izan ere, Osakidetza eta Osasun Sailaren aurreikuspen eta proposamen falta denborazko bonba da, kontuan hartzen badugu hurrengo urteetan milaka eta milaka mediku erretiratuko direla. Neurri sakonak ez badira hartzen, egoera arriskutsu baten aurrean izango gara, osasun arreta bermatu ezinik.
Igorreko adibidea ez da salbuespena, egoera normala baizik, zoritxarrez. Beraz, Barrualde ESIko zuzendaritzari pediatria zerbitzuaren funtzionamendu normala berreskuratzeko eta Osakidetzako zuzendaritzari eta Osasun Sailari, profesionalen falta arazo larriari sakoneko iretenbideak martxan ipintzea exijitzen diegu.
 

 

 
1...833834835...1,592Page 834 of 1,592

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus