2026-07-16
Blog Page 788

Osakidetzak Bilbon itxitako hiru Etengabeko Arreta Puntuak berriro zabaltzea eskatzen dugu

admin
-
0
Darponek eta Osakidetzako Zuzendaritzak Osakidetzako zentroak ixten jarraitzen dute, euskal jendarteari emandako osasun zerbitzua gero eta gehiago murriztuz.

2010. urtean, PSE-ren zuzendaritzapean, 42 osasun zentro itxi zituzten larunbat goizez. Harrez geroztik ohikoa da aste santuan eta udan Lehen Arretako zentroen ordutegia murriztea, arratsaldeko 20:00etan itxi beharrean 17:00etan ixtea, alegia. Oraingoan, murrizketak gehiago estutu eta udarako itxitako Bilboko Alde Zaharreko, Txurdinagako eta Santutxu-Solokoetxeko Etengabeko Arreta Puntuak (EAP) ez zabaltzeko erabakia hartu du Osakidetzako Zuzendaritzak. Uda baliatu du EAJk, erabiltzaileoi beste osasun zerbitzu bat lapurtzeko.

Osakidetzako Zuzendaritzak sarri egiten duen bezal,a honako erabakia langileen ordezkaritzari inolako informazioa helarazi barik hartu du. EAP hauek itxi eta gero, bi galdera datozkigu burura:

1) Zer gertatzen da itxitako zentroen erabiltzaileekin?
Osakidetzari bost axola. Erabiltzaileek atean aurkituko dute zentroaren itxiera iragartzen duen paper zati bat eta momentu horretan pairatzen duten gaixotasuna artatzeko Basurtuko larrialdi zerbitzura joan beharko dute, zerbitzu hau are gehiago estutuz.

2) Zer gertatzen da zentro hauetako langileekin?
Alde Zaharreko, Txurdinagako eta Santutxu-Solokoetxeko EAPetan ez dago behin-betiko lanpostua daukan langilerik. Osakidetzak horrela erabiltzen du %38ko behin behineko tasa. Nahikoa du bertan zeuden langileei kontratua ez luzatzearekin lan zentroetako langileak “desagerrarazteko”.

Askotan entzun behar dugu agintarien ahotik osasun baliabideak zentzuz erabili behar ditugula, herritarrok Osakidetzarekiko errespetu falta bagenu bezala. LAB sindikatuaren iritziz, EAJ eta Darpon Sailburua dira euskal jendarteari errespeturik ez diotenak. Herritarren osasun eskubidea ziurtatzen duten zerbitzu publikoak gero eta gehiago murrizten baitituzte, osasun pribatuaren negozioa bultzatzeko.

Amaitzeko, Bilbo-Basurto ESIko zuzendariari, erabaki honetan atzera egiteko eta EAP hauen itxiera bertan behera uzteko eskatzen diogu.
 

 

 

Doakotasuna berehala gauzatzea eskatzen dugu Haurreskoletan, urtean 18.000 eurotik beherako diru-sarrerak dituztenentzat

admin
-
0
Bihar, irailaren 13an, Gasteizko Legebiltzarrean 2018-2022rako Familiei Laguntza emateko Erakundeen arteko IV. Plana aurkezteko, Enplegu, Gizarte politika eta Gazteria batzordea batuko da. Urte hasieran, Eusko Jaurlaritzak, Foru Aldundiek eta EUDELek konpromisoa hartu zuten familiaren eta haurren aldeko politika publikoak garatzeko, Familien eta Haurren aldeko Ituna sinatuz.

Itun honen baitan, beste batzuen artean, jaso da lehenik Legebiltzarrak eta gerora Euskadiko Eskola Kontseiluak, LABen emendakina bozketara eramanda, Eusko Jaurlaritzari eskatu diotena jaso da: “Haurreskolak Partzuergoan doakotasunaren bidean lehen urrats gisa eta progresibotasunean sakontzeko, 18.000 euro baino gutxiagoko diru sarrerak dituzten familientzat doakoa izan dadila horietarako sarbidea.”

LABek, neurria berandu baino lehen gauzatzea eskatu zuen eta Hezkuntza eta Enplegu eta Gizarte politiketako Sailburuen erantzuna izan zen “2018-19 urteetako epean, kuoten berrikuntza hau gauzatuko da beharrezkoa den prozedurari eta erabakiei jarraiki.”

Ikasturtea jada hasi da, jaiotze-tasaren jaitsierarekin batera, Haur Hezkuntzako lehenengo zikloan kezkagarria den % 2,95ko matrikulazio jaitsierarekin, eta ez dugu familia planean aurkeztu diren neurrien berririk, Beraz, LABek eskatzen du, 2018ko irailean Haurreskolak Partzuergoan hasi diren haurren familiek 18.000 euro baino gutxiagoko diru sarrerak badituzte, doakoa izan dadila, jaiotzatik aukera berdintasunean hezkuntzarako eskubidea bermatzen hasteko.

Haur Hezkuntzako lehenego zikloa (0-3 urte) doakoa, unibertsala, euskalduna eta kalitatekoa izan behar da.
 

 

 

Garbiñe Aranburu: “Herriari hitza ematea inoiz ez da delitu”

admin
-
0
Garbiñe Aranburu: “Herriari hitza ematea inoiz ez da delitu”

Euskal Herrian ere presente dugu. Hain zuzen ere, Gasteizen elkartasun mobilizazioa egin dugu gaur, 12:00etan, Kutxa plazan, “Visca la república catalana. Bi herri, borroka bakarra” lemapean.

LABeko idazkari nagusi Garbiñe Aranburuk adierazpenak egin ditu Gasteizen, Diada eguna dela-eta egindako mobilizazioaren harira. "Gure elkartasuna eta babesa adierazi nahi dugu hemendik herri katalanari, Errepublika katalana eraikitzeko irekita duten burujabetza prozesu horretan. Askotan salatu izan dugu Espainiako Estatuaren izaera ez demokratikoa, eta horren erakusle nagusiena da gaur egun preso politikoak daudela eta erbestean jendea dagoela. Horrek erakusten du demokrazia eza, herriari hitza ematea inoiz ez da delitua", nabarmendu du.

LABeko idazkari nagusiaren hitzetan, "astakeria juridiko eta politiko bat da preso eta exiliatu hauen existentzia bera. Horregatik, lehenbailehen beraiek askatzea eskatzen dugu. Espainiako Estatuak, Pedro Sanchezen Gobernuak,  orain arte erakutsi du ez duela inolako eskaintza demokratikorik lurralde ereduaren auziari irtenbide bat emateko, ez Euskal Herriarentzat, ez Kataluniarentzat. Behin eta berriz legalitatearen eztabaidaren barruan urtu edo ezkutatu nahi dute printzipio demokratikoaren eztabaida, eta ezin da herri baten borondatea mugatu legalitatearen eztabaidara, lehenago edo geroago muga horiek apurtzea lortuko delako". 

Garbiñe Aranburuk berretsi du LABetik jarraituko dugula "herritar guztien bizitza duina bermatzearen aldeko borrokan, jarraituko dugu aldaketa sozialaren aldeko borrokan, aldaketa politikoaren aldeko borrokan, burujabetza prozesua sustatuz, bai Euskal Herrian eta baita Katalunian ere. Eta jarraituko dugu Kataluniako presoen askatzea eskatuz, eta baita ere hemen ditugun preso politikoak etxera hurbiltzeko urratsak emateko eskatuz ere".

Bartzelonan
Bestalde, azken urteotan ohitura duen moduan, LAB Katalunian dago gaur egiten ari diren mobilizazioetan parte hartzeko. Hara joan da Koldo Saenz Nazioarteko arduraduna, eta Bartzelonan ANCren deialdiarekin egin du bat. Era berean, arratsaldean, Alerta Solidaria, Arrán, CUP, Endavant eta SEPCk deitutako Bartzelonako mobilizazioan parte hartuko du Saenzek, “Independéncia, socialismo, feminisme. Autodeterminació als Països Catalans. Perqué no decideixein per nosaltres” lemapean egingo dena.

Atzo, berriz, sindikatuen arteko bileran parte hartu zuen LABeko ordezkariak. Autodeterminazio eskubidearen alde eta errepresioaren kontrako adierazpen bat adostu genuen bertan sindikatuok.

 

 

 

Erakundeen, patronalaren eta CCOOren eta UGTren lehentasuna prebentzioari esleituko omen zaion dirua beraien artean banatzea da

admin
-
0
Erakundeen, patronalaren eta CCOOren eta UGTren lehentasuna prebentzioari esleituko omen zaion dirua beraien artean banatzea da

Lan Arriskuen Fundazioaren diru-laguntzak izango dira puntu bakarra Osalanen Kontseilu Orokorraren bileran, lan istripuak nonahi gertatzen ari diren honetan.

Kezkagarria eta asaldagarria gertatzen ari zaigu lan istripuak EAEn gero eta gehiago izatea. Uztailera arte, eguneko 228 lan-istripu gertatu dira, horietatik, gutxienez, 29 hilgarriak izan dira, eta 112 larriak. Atzo jakin genuen bi istripu larri gertatu zirela: 55 urteko basozain bat larriki zauritu zen Mallabian eta 58 urteko garraiolari bat larriki zauritu zen altzairu xafla deskargatzen ari zela Eibarko Alca enpresan.

Lehenengo eta behin, gure elkartasuna eta sostengua adierazi nahi diegu zauritu diren langileen senideei, adiskideei eta lagunei. Espero dugu ahalik eta bizkorren osatuko direla.
Datuok izugarriak dira, batipat kontuan hartzen badugu lan istripu gehien-gehienak saihets daitezkeela. Esan dezakegu gure lan harremanetan nagusi den prekarietatea lan istripuen oinarrian dagoela.

Urtez urte, hilabeteak joan, hilabeteak etorri, lan-istripuen kopurua handitzen eta handitzen ari da. Langileriari ez zaio bermatzen lan osasunerako eskubidea; ez zaigu bermatzen etxera bizirik itzultzeko eskubidea. Egunerokoan aurre egin ohi dugu egoera tamalgarri honetan salatu nahi dugu erakundeetako arduradunek erakutsi jarrera, ezbehar-kopurua oso handia izatearen arazoa ez dutelako kokatzen haien agenda politikoan. Euskal erakundeetako ordezkariei ez diegu aditu prekarizatze-politika salatzen, aitzitik, sostengua adierazi diote.

Ez diegu aditu senideei sostengu hitzak adierazten, aitzitik, atzokoan bertan Osalanen Kontseilu Orokorrak ohiz kanpoko bilera deitu zuen irailak 13 izango dituenerako, non eztabaidatuko den puntu bakarra Lan Arriskuen Fundazioak ematen dituen diru-laguntzak diren. Aldiz, erakundeen, patronalaren eta CCOOren eta UGTren lehentasuna prebentzioari esleituko omen zaion dirua beraien artean banatzea da. Errealitatea, berez, bestelakoa da: langileok bakar-bakarrik eta guztiz babesgabe gaude, administrazio publikoek beren zereginen utziera egiten dute, eta ez dute egiazko kontrolik egiten enpresetan, ez dute zigor eredugarririk ezartzen. Lotzekotan, hitzordua lotzen dute dirutza banatzeko.

Osalani eta Eusko Jaurlaritzari eskatzen diegu lan osasun politikak erabat alda ditzatela, enpresetan handitu ditzatela lan segurtasun arloko kontrola eta ikuskaritza, eta ez ditzatela ezar lan baldintzen kaskartzea ekarriko dituzten politikak.

LAB sindikatuak eutsi egingo dio langileen eskubideen aldeko lanari eta prekaritatearen aurkako sentsibilizazioa hedatzeari. Sindikatuak emango duen erantzunaren eta mobilizazioen bidez, langileen aurka erabiltzen den bortxa mota honen aurkako erabateko arbuioa artikulatuko dugu gizartean.
 

 

 

Dei zuzena egiten diogu Donostiako alkateari, Parte Zaharreko gaztetxearen aurkako inolako neurri polizial zein juridikorik martxan jar ez dadin

admin
-
0
Dei zuzena egiten diogu Donostiako alkateari, Parte Zaharreko gaztetxearen aurkako inolako neurri polizial zein juridikorik martxan jar ez dadin

Parte Zaharreko gazteek joan den larunbatean bideratu zuten Orixe Ikastolaren eraikin zaharraren okupazioaren harira, Donostiako Udaleko LABeko Sail Sindikalak txalotu du ekimena.

Hauxe da Donostiako Udaleko LABeko Sail Sindikalaren oharra:

Parte Zaharreko gazteek joan den larunbatean bideratu zuten Orixe Ikastolaren eraikin zaharraren okupazioa dela eta, Donostiako LABeko Sail Sindikalaketik hainbat gauza adierazi nahi ditugu.

Lehenik eta behin, txalotu nahi dugu gazteen ekimena, azken 12 urteotan hutsik eta utzita egon den Orixe Ikastolaren eraikin zaharra okupatzea zilegitzat jotzen baitugu, besteak beste, Parte Zaharreko Gazte Asanbladak Uxategi garaietik aldarrikatu zuen horrelako eskaera bati Udalak inolako erantzunik eman ez diolako azken urteotan. Orixe eraikinaren okupazioa ez da partikular pribatu batek etekin ekonomikoa eskuratzeari begira eginiko legez kanpoko ekimen bat, helburu soziala bideratzeko utzita zegoen espazio publiko baten erabilerarako ekintza zuzena baizik, anitza eta zabala.

Bestalde, bat egiten dugu Parte Zaharreko Auzo Elkarteak eginiko proposamenarekin, eta ondorioz, guk ere Udal Gobernuari dei egiten diogu lan-mahai bat osatu dezan ahalik eta azkarren, non auzoko eragile eta udal teknikari eta arduradunak elkartuko garen auzotarron ekipamendu beharrei irtenbideak behingoz bilatzeko eta horien artean, lehentasunez, Gaztetxea eta Auzoetxea adosteko.

Jarraitzeko, dei zuzena egiten diogu Eneko Goia alkateari gaztetxearen aurkako inolako neurri polizial zein juridikorik martxan jar ez dadin eta ez dezan eta Udaltzaingoa errepresio bide eta jarduera horietatik urrun dezan, bereziki, elkarrizketaprozesuak zer eman dezakeen ikusi aurretik. Hitzari aukera eman behar zaio.

Aitzitik, Orixe eraikinean egon daitezkeen proiektu ezberdinen artean Udalak bat hautatu eta hura martxan jarri bitartean, Gaztetxea bertan garatzen uzteko deia egiten diegu ordezkari politiko eta ekonomikoa guztiei, Biurrun epaileak ondo esan zuen moduan.

Bidenabar, gazte mugimenduaren eta langile mugimenduaren dinamiken arteko uztarketaren garrantzia azpimarratu nahi dugu. Eredu kapitalistaren aurrean, demokraziaren eta sozialismoaren aldeko borrokan bi sektore hauek bat egitearen garrantzia azpimarratu nahi dugu. Esperientzia eta ilusio batzen direnean, eraldaketa geldiezina bihurtzen da. Gaurko gazteria biharko langileria izango delako, Gaztetxea langileriaren etxea ere badela azpimarratu nahi dugu.

Horretaz gain, dei egiten diegu Parte Zaharreko herritar guztiei eta baita donostiar guztiei, Orixeko Gaztetxearen alde joka dezaten, gazteak behar duten guztietan laguntzen, bertako ekimenetan parte hartzen.

Azkenik, inoiz aurkako eraso errepresiborik balego, bertaratzeko eta bortxarik gabeko desobedientziaren bidez poliziaren erasoari aurre egiteko, argi utziz beraiek direla biolentzia erabiltzen duten bakarrak.
 

 

 

Feminizatuak eta prekarioagoak diren sektoreetan presentzia indartzea erronketako bat dela berretsi dugu Arabako delegatuen batzarrean #ZureBideLagun

admin
-
0
Feminizatuak eta prekarioagoak diren sektoreetan presentzia indartzea erronketako bat dela berretsi dugu Arabako delegatuen batzarrean #ZureBideLagun

Delegatuen batzarrak deitu ditugu egunotarako, kurtso berriaren etorrerarekin, sindikatuaren erronkei eta hauteskunde sindikalen epealdi trinkorako ezarritako helburuei buruz aritzeko. Gipuzkoako batzarrarekin ekin genion atzo errondari, eta, gaur, Arabako delegatuen txanda izan da.

Hernanin atzo gertatu bezala, LABeko idazkari nagusi Garbiñe Aranburuk eta sindikatuko Antolakuntza idazkari Izaskun Garciak hitza hartu dute Gasteizen, Aldabe zentroan egindako batzarrean. Arabako hainbat ordezkarik ere hitz egin dute, zerbitzu publikoak, zerbitzu pribatuak eta industria sektoreen egoera irudikatzeko.

Hauteskunde sindikaletarako erronkei helduta, ekaineko azken datuen berri eman dugu: Euskal Autonomia Erkidegoan bigarren sindikatua izaten jarraitzen dugu; hori bai, CCOOekiko aldea 44 delegatuena baino ez da. Hain zuzen ere, EAEn, %18ko langa pasata bukatu genuen orain 4 urte eta, jada, %19an gaudela hasten gara epealdi trinko berria.

Azken batean, ahalik eta langile gehien LABekin bat egitea da hauteskunde sindikal hauen helburua; hots, langileria sektore desberdinetara iristea, orain arte sindikalismoa erreferentziatzat izan ez duten eremuetan presentzia lortuz batez ere. Feminizatuak eta prekarioagoak diren eremuetan ere indartu nahi dugu gure eragina. "LAB indartuz, konfrontaziozko sindikalismoa boteretu eta eraldaketa sozialaren norabidean urrats berriak emango ditugu", azaldu dugu.

Erronka honetan kopuruak garrantzia handia hartzen dute. Arabari dagokionez, ekaineko datuen arabera, 403 delegatu ditugu (%13,17). Hala, epealdi trinko honetan ezinezkoa izango bada ere, Araban hirugarren sindikatua izatea izan behar du erronka epe ertain batean. UGTrekiko 116 delegatura gaude gaur egun. Horrenbestez, epealdi trinkoan gure ordezkaritza %14ra igo (25 delegatu gehiago lortu) eta UGTrekiko aldea gutxitzen joatea izan behar du erronka. Momentu honetan UGTik 4 puntura gaude. Lakuan ordezkaritza handitzea da Araban dugun beste erronketako bat.

Baionan, bihar
Gipuzkoako eta Arabako delegatuen batzarrak egin eta gero, asteazkenean eta ostegunean Ipar Euskal Herriko eta Nafarroako batzarrei egokituko zaie txanda, hurrenez hurren; eta datorren astean, irailaren 19an, Bizkaikoa egingo dugu, Bilboko Itsas Museoan.
 

 

 

Autodeterminazio eskubidearen alde eta errepresioaren kontra egin dugu hainbat sindikatuk

admin
-
0
Autodeterminazio eskubidearen alde eta errepresioaren kontra egin dugu hainbat sindikatuk

Kataluniaren gatazkaren konponbidea Kataluniako herriaren borondatearen errespetuarekin bakarrik etorriko dela berretsi dugu.

LAB, Intersindical CSC, Coordinadora Obrera Sindical, Intersindical Alternativa de Catalunya, Intersindical Valencia, STEI Intersindical, Confederación Intersindical , CSI, Central Unitaria de Trabajadores/as, Colectivo Unitario de Trabajadores, CIG, ELA, ESK, STEILAS, SAT eta Intersindical Canaria gara sindikatu sinatzaileak, eta hauxe da osatutako adierazpena:

2017ko urriaren 1ean herri katalanak duela urteak hasitako autodeterminazio eskubidea egikaritu zuen. 2009an hasi ziren herri-kontsultetatik hasita, 2014ko azaroaren 9ko kontsultatik edo Estatuari erreferendum bat egiteko planteatu zaion 18 aldietatik pasatuz. Hau sinatzen dugun sindikatuok herri katalanaren ondoan egon ginen askatasunez erabakitzeko eskubidea

Sindikatu soberanista katalanek urriaren 3ko eta azaroaren 8ko grebak bultzatu zituzten, langileen lan-baldintzak hobetzeko zein euren eskubide sozial eta laboralak defendatzeko.

Espainiako Estatuko aparatuak ofentsiba errepresiboa garatzen ari dira Kataluniaren autodeterminazioaren aldeko sektoreen kontra: ordezkari politikoak eta ANC, Ómnium edo CDRetako ekintzaileen kontra. Hauetako batzuk ia urtebete daramate gartzelan epaiketarik gabe, erbestean daude beste batzuk. Hala ere, errepresioa ez da hemen amaitzen, irakasleak, su-hiltzaileak eta artistak ere jazarriak dira beldurra sortzeko helburu bakarrarekin, horrela Kataluniako autodeterminazioaren aldeko mugimendua apaldu nahian.

Sindikalismoak ere errepresioa pairatu du eta pairatzen jarraitzen du borrokatzen duenean. Bodalo, Alfon, Sidil, Molero eta beste sindikalista asko kartzelan daude eskubideak defendatzeagatik. Horregatik, ondo dakigu Estatuak bere errepresioa nonbaiten inposatzea lortzen badu, are eta indar handiagoa izango duela beste nonbaiten oldartzeko, batez ere ezker politikako sentsibilitate batek konplizitate ideologikoa indartu duenean. Oldarraldia eta eskubideen murrizketak Katalunian iraunkortuz gero, Estatuan normalizatu egingo da. Arrazoi honengatik, zalantzarako zirrikiturik utzi gabe defendatu behar ditugu grebarako eskubidea eta joan den udazkenean jazarpena eragin zuten horiek sortutako erasoaren amaiera.

Sindikatu sinatzaileok preso, iheslari eta jazartutako pertsonei elkartasuna adierazi nahi diegu, baita euren familia, gertuko eta erakundeko kideei ere. Euren askatasuna exijitzen dugu, pairatzen duten jazarpenaren amaierarekin batera.

Gaur, urriaren 1eko urtemuga gerturatzen ari den honetan, duela urtebete esaten genuena berresten dugu sinatzaileok:

Bozkatzeko eskubidea oinarrizko eskubide bat da edozein gatazka modu justu eta parte hartzaile batean demokratikoki konpondu nahi duen ororentzat.

1.- Katalunia eta Espainiako Estatuaren arteko gatazka politikoa bakarrik konpon daiteke erreferendum baten bitartez, Kataluniako herriak bere etorkizun politikoa erabaki dezan.
2.- Kataluniako Parlamenta behartua egon zen autodeterminazio erreferendum bat aldebakarrez deitzera, 2017ko urriaren 1ean. Espainiako Estatutik jasotako ezetz etengabeengatik izan zen horrela, erreferendum hitzartu bat helburu zuen prozesu bat abiatzeko eskaerari uko egin baitzion behin eta berriz.
3- Espainiako Gobernuak Kataluniako herriaren askatasun nahiari ezin dio erantzun debeku, errepresio eta auziperatzeen bitartez, inolaz ere.

Sindikatu gisa, jakitun gara Kataluniako langile klasea askatasunaren alde bultzatzen ari den borroka monarkia apurtzeko borroka bat dela, baita trantsizioak ezabatu ez zituen frankismoaren ondorioekin amaitzeko borroka ere.

Borroka honi babesa emateko konpromisoa hartzen dugu gure herrialdetik eta lantokietatik.

Kataluniaren gatazkaren konponbidea Kataluniako herriaren borondatearen errespetuarekin bakarrik etorriko da.
 

 

 

Gasteizko BSH BOSCH lantegia itxiko ote duten susmoa dute langileek

admin
-
0
Gasteizko BSH BOSCH-eko enpresa batzordeak ohar bat kaleratu du, kezkatuta baitago lantegiaren eta UFESA markaren salmenta eta gero. B&B TRENDS enpresak erosi du, eta mugimendu hau operazio espekulatzaile bat izan daitekeela uste dute langileek. Era berean, enpresak ez dituela bere konpromisoak bete salatu dute, eta bilera bat egiteko eskaera egin diote, baita industria plan bat egongo dadila berma dezala exijitu ere. LABek bere iritzia eman zuen duela aste batzuk, gai honen inguruan.

 

 

 

Euskal Herrian dagoela adieraziko diogu Espainiako Itzuliko tropelari, asteazkenean

admin
-
0
Euskal Herrian dagoela adieraziko diogu Espainiako Itzuliko tropelari, asteazkenean

Vuelta a España txirrindularitza itzulia jokoan da, eta bere azken astean Euskal Herritik igaroko da. Hain zuzen ere, asteazkenean, irailak 12, Oiz mendian amaituko da etapa, Bizkaitik igaro ondoren. Hori dela eta, Euskal Herrian gaudela adierazteko, Oiz mendian eta itzulia igarotzen den herrietan ikurrina erakusteko deia egin du LABek, espainiarrak ez garelako.

Irailak 12an Espainiako Txirrindularitza Itzulia Bizkaiko hainbat herritatik pasako da. Adierazi diezaiogun Euskal Herrian daudela, Oiz gailurrean eta herriko bazter guztietan Ikurrinak erakutsiz. Ez garelako espainiarrak, kalera irtetzeko deia egiten dugu. Helburua Oiz mendiko magalak Ikurrinez betetzea da, eta Oiz mendira ezin dena joan bere herriko kaleetan agertu dezala bere haserrea edo nahigabea espaniar inposaketa honekin.

 

 

 
1...787788789...1,635Page 788 of 1,635

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus