2026-02-12
Blog Page 718

Bi orduko lanuzteak egin ditugu Telefonican

admin
-
0
Bi orduko lanuzteak egin ditugu Telefonican

Lanuzteak deitu ditu gaurko LABek Telefonican, Bizkaia, Gipuzkoan eta Nafarroan, aurreikuspen soziala kanpora ateratzearen kontra, negoziazioaren alde eta etengabeko inposaketaren kontra. Bi orduko lanuzteak aurreikusi ditugu txanda bakoitzean eta kontzentrazioak egin ditugu Bilbo, Donostia eta Iruñean.

Hauxe da langileek egindako oharra, gaurko lanuzteak direla eta:

Telefonicako langileok salatzen dugu Telefonicak kanpoko aseguru-entitate bati saldu nahi diola ANTARES (Osasun Aseguruak eta Aseguru Kolektiboak, Istripu, Bizitza eta Biziraupen Polizak). Langileen eskubideez ari gara, lan-bizitza osoan TESAU enpresarentzat, “Telefónica SA” taldearentzat eta honen aurrekoentzat egindako lanaren ordainez. Hura betetzen dela bermatzea Grupo Telefónicaren eta TESAUren betebeharra da, taldearen aktiboekin zuzenki lotua (Eraikinak, Sareak, Merkataritza Funtsa,…), hura funtsen egiazko berme bakarra izanik, enpresak bere langileekiko duen Gizarte-aurreikuspeneko eginkizunak bete daitezen.

Betebehar hauek merkaturatuz eta kanpora eramanez, enpresatik eta haren aktiboetatik besterenduz, denok hura sortzen lagundu genuen, hura galtzeko arriskua ekarriko liguke, langile gehienok Gizarte-aurreikuspena gehien behar dugunean hain zuzen.

Enpresa honetan egunero suntsitzen da enplegu duina. Gaur egun, Banakako Etendura Planaren bitartez eta, iraganean Enplegua Erregulatzeko Espedienteen bidez. Enplegu duina prekarioaz ordezkatzen da, gaizki ordaindua eta sasi-morrontzako baldintzetan. Oraingoan ekin diote geratzen diren eta enpresatik joan behar izan duten langileen gizarte-aurreikuspena kanpora eramateari.

Telefonica pribatizatu zutenetik 55.000 lanpostu baino gehiago suntsitu dira. 53, 55, 57… urtetako profesional bikainak baztertu dituzte, erabili eta botatzeko produktuak bailiran zokoratuz, hamarkada luzetan egin borroka eta mobilizazioen ondorioz lanpostu duinari eutsi diotelako. Aipatu lanpostuak autonomo faltsuez edota kontrata eta azpikontraten bidez ordezkatu dituzte.

LABek aldarrikatzen duen gizarte eredua aberastasunaren banaketa solidarioan oinarritzen da, sortzen den langabezia eta miseria suntsitzeko. Enpresari dagokionez, horrez gain, lortu nahi dugu: lanpostuen egonkortasuna, lan eta gizarte baldintzen hobetzea, azpikontratazioa eta prekarietatea amaitzea, enplegu duina sortzea eta askoz ere kalitate hobeagoko zerbitzua ematea.

ETENGABE EGITEN ZAIGUN EZARPENARI AURRE EGINEZ ESKATZEN DUGU:

• ANTARES saltzeari ez, OSASUN ETA PENTSIOEN Gizarte-aurreikuspena kanpora eramateari ez.
• TELEFÓNICAko ENPLEGUAREN alde, 17/22 PLANAREN, Berregituraketen eta Nahitaezko lekualdaketen aurka.
• ENPLEGU PLANA LURRALDEKA, Unitateen, Zereginen eta langile-kopuruaren arabera kuantifikatua Euskal Herrian.
• BORONDATEZKO ERRETIRO AURRERATUA, langileei kosturik eragingo ez diena, Gizarte-aurreikuspena jasotzen duena.
• Lantokien arteko Batzordea DESEGIN; LANTOKIEN ARTEKO BATZORDEAK ez gaitu ordezkatzen (Madril): gai guztiak NEGOZIAZIO KOLEKTIBORA eraman dira 2019. urtean, URTEKOA eta ERREFEREMDUM batez amaitua.

 

 

 

Bateraguneko atxiloketak eta zigorrak ez ziren justuak izan, basakeria juridiko-politikoa baizik

admin
-
0
Herrien erabakitzeko eskubideak eskatzen duen konponbide demokratikoaren bidean, Euskal Herrian zein Katalunian auzi politiko guztien amaiera eta presoen politikoen askatasuna eskatzen dugu LABetik.

Bateraguneko epaiketa ez zen inpartziala izan. Hala ebatzi du gaur Estrasburgoko auzitegiak, Euskal Herrian beti argi izan dugun baieztapena berretsiz. Herri honetan aspaldi eman genuen bai epaia, herri erantzun anitz eta zabal batekin eman ere, Bateragune auziko atxiloketak eta zigorrak ez zirelako justuak izan, basakeria juridiko-politikoa baizik.

Urte luzez askatasuna bahitu eta eskubide zibil eta politikoak urratu dizkiete Miren Zabaleta, Sonia Jacinto, Arkaitz Rodriguez, Arnaldo Otegi eta Rafa Diezi eta ez dago sententziarik egindako kaltea erreparatzeko. Hori horrela da, baina aldi berean LAB sindikatutik ongietorria ematen diogu Estrasburgoren ebazpenari, espainiar Estatuaren izaera antidemokratikoa eta justiziaren erabilpen politikoa agerian uzten dituelako.

Bateragunekoen delitu bakarra izan zen Euskal Herriarekiko konpromisotik, gure herrian bake eta konponbide demokratikorako garai berri bat irekitzeko lanean aritzea. Euskal Herrian gatazka politikoa gainditzeko Ezker Abertzaleko militante hauek jokatutako papera eta egindako ekarpena oso garrantzitsua izan da. Denbora izan da testigu.

Estatuak zituen blokeo mekanismo guztiak martxan jarri zituen Ezker Abertzalearen estrategia politikoa zapuzteko. Eta Bateragunekoek, aurretik eta ondoren auzi ezberdinetan injustuki zigortutako beste hainbat euskal herritarrek bezala, garesti ordaindu zuten justiziaren erabilpen politikoa. Zorionez, determinazioz egin zen aurrera gatazkaren arrazoiak eta ondorioak gainditzeko, eta Euskal Herrian garai berri bat irekitzeko.

Gaurko ebazpen honekin enegarrenez Estrasburgok Espainia zuzendu du. Eta hala ere, ezin Espainiako justiziatik justiziarik espero. Ez orduan, ez orain, Estatua ez zen prest azaldu aldaketak ekarriko dituen prozesu demokratiko batean sartzeko. Hori ikusi dugu Euskal Herrian eta ikusten ari gara Katalunian ere. Espainiak justizia modu injustuan erabiltzen jarraitzen du; herrien erabakitzeko eskubidea termino demokratikoetan konpontzeko eskaintzarik gabe jarraitzen du; eta jarraitzen du etengabe eskubide zibil eta politikoak bidegabeki urratzen.

Herria bake bidean jartzeagatik bost lagun espetxeratu eta zigortzea basakeria izan zen moduan, herriari hitza emateagatik erbestean edo espetxean izatea, eta, ez dezagun ahaztu, inolako bermerik gabeko epaiketa baten zain, disparate juridiko eta politikoa da.

Herrien erabakitzeko eskubideak eskatzen duen konponbide demokratikoaren bidean, auzi politiko guztien amaiera eta presoen politikoen askatasuna eskatzen dugu LABetik. Arrazoi asko ditugu, gehiegi, mobilizatzen jarraitzeko.

 

 

 

Euskaraldia dela eta, 11 egunez Ahobizi eta Belarriprest izango gara

admin
-
0
Euskaraldia dela eta, 11 egunez Ahobizi eta Belarriprest izango gara

Langileok Euskaraldian subjektu aktiboak izango gara. Lanean zein kalean, askatasunean, euskararen hazia erein egingo dugu euskararen erabilera hazteko.

2000. urtean LAB sindikatuak erabaki zuen sindikatuaren LAN eta KOMUNIKAZIO hizkuntza euskara izango zela. Erabaki horren aurretik euskararen normalizazioan lan handia egina bagenuen, erabakiaren ostean EUSLAB egitasmo estrategikoa jarri genuen martxan sindikatu barruko jardueran zein lan munduan euskararen erabilera areagotzeko. Ez gara berriak lan munduan euskararen erabileran eragiteko dinamiketan.

EUSKARALDIA euskararen erabilera areagotzeko ariketa sozial eta kolektiboa den neurrian, LABek bat egiten du dinamikarekin eta EUSKARALDIAn eragile aktiboa izatea erabaki dugu. LAB sindikatuko kideok, urte osoan zehar bezala, azaroaren 23tik abenduaren 3ra, 11 egunez, euskara erein egingo dugu kalean zein lanean, langileok euskararen erabileran hazteko.

Euskararen berreskuratze proposamen guztietan lan mundua eta langileak bazter geratu gara eta EUSKARALDIAn subjektu aktiboak izan nahi dugu. LABeko kideok gure eginbide sindikalean AHOABIZI eta BELARRIAPREST izango ditugu eta horrela, sindikatuaren jardueran euskararen erabilera areagotu nahi dugu eta langileekin euskararen erabileraren erantzukizuna partekatuko dugu eta aukera eskainiko diegu gurekin eta lan munduan euskara erabiltzeko.

Sindikatu barruan zein lan munduan hizkuntzarekin ditugun inertziak astindu nahi ditugu eta sindikatu barruko prozesuetan euskararen erabilera areagotzeko ahalegin kolektiboa egingo dugu.

LABek EUSKARALDIA baliatu nahi lan munduko euskaltzaleen sareak berraktibatzeko eta indartzeko eta 11 egun horietan gure sindikatuan eta lan munduan sortutako dinamikak denboran mantentzeko ahalegin berezia egingo dugu.

EUSKARALDIAn LAB sindikatua euskara erabili nahi dutenentzat ingurune sozial eroso, abegikor eta naturala izango da. Gure eginbide sindikala egiteko moduari eta prozesuari emango diogu garrantzia: Euskaraz egingo dugu.

 

 

 

Garbialdiko langileek mobilizazioekin jarraitzen dute, akordioa urrun dagoela ikusita

admin
-
0
Garbialdiko langileek mobilizazioekin jarraitzen dute, akordioa urrun dagoela ikusita

Negoziazio mahaia egin zuten atzo enpresak eta foru aldundiko egoitzen garbiketaz arduratzen diren langileen ordezkariek. Garbialdi enpresak egindako azken eskaintzak akordioa urrundu egiten duela ondorioztatu ondoren, LAB, UGT, ESK eta CCOOek mobilizazioekin aurrera jarraitzea erabaki dute, eta, hala, elkarretaratze bat egin dute gaur Bizkaiko aldundiaren aurrean.
 

 

 

Botere Judizialaren Lege Organikoaren erreformaren aurrean Hego Euskal Herrian deituko diren mobilizazioak babestuko ditugu

admin
-
0
Sindikatuak transferentzia osoa eskatzen du justizia arloan.

Madrildik datorkigun eraso bati aurre egin behar diogu berriro ere. Kontua da dugun transferentzia zeharo ez nahikoa dela, Madrilen ez baita ezer negoziatzen, bai ordea, ugari inposatzen. Era berean, sindikatu deitzaileen partetik ere heltzen zaigu inposizioa: CCOO, UGT, CSIF eta STAJ erakundeek mobilizazioetara eta greba egun batera deitu dute, aintzat hartu gabe gainerako sindikatuak (besteak beste, Intersindical Canaria, CUT, CIGA, ELA, LAB, Intersindical Valenciana…). Baina deialdia egin eta gero nahi dute besteok babestu ditzagula ekintza batzuk, beraiek antolatzerakoan baztertu bagaituzte ere. Ez dute inolako errespeturik erakusten eta gobernuak ere ez: bilera bat egin zuen sindikatu deitzaileekin, beste guztiak aintzat hartu gabe. Zer adostu edo negoziatu ote dute bilera horretan? Inork ez daki. Horixe da gainerako sindikatuon kexa. Horrexetarako balio du Madrileko mahaira joateak.

Bada, Estatuko Parlmentuak zein erakunde deitzaileek jarrera berbera dute: inposizioa. Hala eta guztiz ere, langile guztien hobe beharrez, ezin gara geratu mobilizazioetan parte hartu gabe. Hortaz, Euskal Herrian antolatuko diren mobilizazioetan parte hartuko du LABek.

Gure lan-baldintzen aurkako eraso honekin hauexek ezartzera doaz:

-Erabateko mugikortasuna, baja bakar bat ere ez dute nahi ordezkatu, horretarako beste zerbitzuetako langileak baliatzeko asmoa dute;

-Gero eta bitarteko langile gutxiago kontratzearen ondorioz titularrek lan zama handiagoa izango dute eta herritarrei emandako zerbitzua kaskartuko da;

-Errefortzuzko kontratuak ez dituzte 6 hilabetetik aurrera luzatuko;

-Instantzia Auzitegiak ezartzeko bidea jartzen dute;

-Lanbide-karrerarako aukera deusezten dute;

-Ez dute Botere Judizialaren Lege Organikoa egokitu, beraz gaixotasun aldietako deskontuak egiten jarraituko dute.
guztia zeren truke?

Eta hori guztia zeren truke?

LABen betiko aldarrikapenetako bat transferentzia osoa da. Gure lan-baldintzetan eragina duen erabaki orotan esku hartzeko eskubidea aldezten dugu: berton lan egiten badugu, berton erabaki behar dugu. Gauzak horrela, beste behin ere interpelatzen ditugu Nafarroako eta EAEko
gobernuak gutxieneko borondate politikoa erakuts dezaten beraiek hartutako erabakiak burutze aldera –transferentzia osoa exijitzea ez da nahikoa, betearazi behar baita-; eta, bide batez, hirugarren klaseko langiletzat ez gaitzaten har.

Lehenago esandako guztia dela eta, gure lan-eskubideen defentsan Euskal Herrian deituko dituzten mobilizazio guztiak babestuko ditu LABek.

Lan-baldintzak inposatzeari ez! Transferentzia osoari bai! Benetako parekidetasuna orain!
 

 

 

Negoziazio prozesu erreala martxan jartzea premiazkoa da Osakidetzan

admin
-
0
Gaur Osakidetzako Mahai Sektorialeko batzarrean ez da ezer negoziatu, aspalditik ohitura bihurtu dena.

Osakidetzako zuzendaritzak gaurko bilera erabili du, gai batzuen gainean aldebakarrez erabaki dutena sindikatuoi jakinarazteko. Gai horietako asko garrantzi handikoak izanik ere, sindikatuok ez dugu aukerarik izan hartzen diren erabakien parte izateko. Honen adibidea Onkologikoa dugu: publifikazioa ziurtatzen ez duen prozedura ekarri digute, baina tartean ez da inolako informaziorik egon, ezta eztabaidarik ere, ez gurekin, ezta jendartearekin ere. Azken finean, ekarpenak egiteko aukera antzerki hutsa baino ez da, aurretiaz Osakidetzak ebatzi duen horretan inolako eraginik ez daukana.

Mahai sektorial honetan LABek jarrera argia erakutsi du: premiazkoa da negoziazio prozesua erreala abian jartzea. Esate baterako, Hitzarmen berria negoziatzeko ordua da, bere osotasunean, ez soilik baimen eta lizentzien atala, Osakidetzak nahi duen bezala. Bestaldetik, Onkologikoaren inguruko eztabaida demokratikoa abian jartzea derrigorrezkoa jotzen dugu. Era berean, erantzun negoziatuak behar ditugu beste gai batzuetan ere: zer gertatuko den Garapen Profesionalarekin, zelan berreskuratuko dugun urte hauetan guztietan galdutako eros-ahalmena (soldataren %13,3 koa); zein EPE eredu berria behar dugun, etab. LABek gai hauen inguruko ekarpen zehatzak helaraziko dizkio Osakidetzari, baina beti ere negoziazio prozesu baten barruan. Adibidez, erosmen-ahalmena berreskuratzeko urteko %4,5eko soldata igoera planteatu dugu Mahai Orokorrean, guztiz bideragarria dena. Halaber, 10 urte beranduago heltzen den Berdintasun Plana aurrera ateratzeko nahitaezkoak izan dira LABen ekarpenak eta bultzada.

Bestaldetik, pozteko da kendutako eskubide oso garrantzitsu bat berreskuratu dugula langileok mobilizazioaren bitartez: irailetik aurrera, edozein baja egoeratan soldataren %100 kobratuko dugu berriro langileok. Hori bai, ardura falta leporatu diogu Osakidetzari, gaur arte ez dielako langileei honen gaineko informazio ofizialik helarazi.

Amaitzeko, Larrialdietako langileen mobilizazioek lortu dute Osakidetzak gai-ordenean sartzea euren negoziazio eskaera. Osakidetzak negoziazio proposamena mahai gainean jarri izana modu positiboan baloratzen dugu, nahiz eta bertan ez jaso langileok aldarrikaturiko puntu guztiak. LABek eskatzen duena zera da: Osakidetzaren proposamena abiapuntu hartuta, denbora luzean eskatu dugun benetako negoziazio prozesua irekitzea Osakidetzako zuzendaritza eta Larrialdietako Pertsonal Batzordearen artean.

 

 

 

Gutxienez, 62 dira Euskal Herrian urte hasieratik hildako langileak

admin
-
0
Gutxienez, 62 dira Euskal Herrian urte hasieratik hildako langileak

Azken egunotan, langile bi hil dira lanean. Urriaren 31an, Castejonen hil zen C.V.B. langilea, Construcciones y Obras Vitorino Vicente S.L. enpresakoa, in itinere istripu hatean. Bestalde gaur goizean, 10:00ak aldera, J.S.F. 57 urteko langilea hil da Eibarren, lan istripu ez traumatiko batean, ABC enpresan lanean zegoela, ADECCO enpresatik azpikontratatua.

Lehenik eta behin, LAB sindikatutik senide, inguruko eta lankideei gure elkartasuna eta babesa helarazi nahi diegu. Babes hau hilabete honetan hildako langile guztien ingurukoei zabaltzen diegu.

Eibarrekoa bezalako istripu ez traumatikoak ere lan-istripuak dira. Ez dira kasualitatez ematen laneko orduetan, zorte txarragatik, ez da enpresariek dioten moduan “ez dutela lanarekin zerikusirik”.

Jakina da horrelako gertaerak lan zehatz batzuetan gertatzen direla, baldintza zehatz batzuen pean, lanean jasotzen diren presioak eta estresa bihotzekoak eta zirkulazio gaitzen ezinbesteko faktoreak direla eta gehienetan, oinarrizko faktore gauzatzailenak direla. Bizi eta lan baldintzek eragindakoak ere badira.

Gainera dagoeneko istripu ez traumatikoak, bihotzekoak, iktusak bilakatu dira heriotz lan istripuen lehendabiziko faktoreak.
Lan istripu guztien atzean lan-baldintzak daude. Erritmo azkarrek, presioak edo autoritarismoak gaixotasun ezberdinak sortarazten dituzte eta hainbatetan, heriotzera eramaten gaituzte.

Argi daukagu lan istripuak, traumatiko, ez traumatiko eta joan-etorrikoak, ez direla zoriak edo kasualitateak sortutakoak, ematen diren lan harremanen, prekarizazioaren, lan arautegiaren eta azpikontratazioaren emaitza baino.

LABen argi dugu, bizi eta lan duinak behar ditugula, lanetik onik eta bizirik bueltatzeko eskubidea dugula. Norbanako, familia eta jendarte osoarena den lakra honekin bukatzeko bide bakarra borroka eta antolakuntza direla, lan harremanen eta joku arauen aldaketa batetik etorriko dela aldaketa. Eredu berri bat gauzatu behar dugu, langileon bizitza eta osasuna lehenetsiko dituena.

Horregatik LABek dei egiten du langile guztientzako lan-baldintza duinen aldeko borroka egitera.

Heriotza honen aurrean protesta egiteko, ABCko enpresa-batzordeak orduerdiko lanuztea egingo du bihar, azaroaren 6an, enpresa aurrean, Eibarren. 13:45etik 14:15era izango da lanuztea eta bien bitartean, langileek kontzentrazioa egingo dute enpresa aurrean (Azitain poligonoa, 6. zkia).
 

 

 

Iraunaldi zehatza duen aldi bateko kontratuen %56a astebetekoa edo laburragoa da

admin
-
0
Hego Euskal Herrian dauden Enplegu Zerbitzu Publikoetan erregistratutako langabetuen kopurua 155.593 pertsonatakoa da urri amaieran. Hautetatik %57,6 dira emakumezkoak.

Kopuru garbietan, azken hilabetean 559 pertsonatan egin du behera langabeziak eta honek irailean baino %0,4 gutxiago suposatzen du. Hala ere, beherakada honek Bizkaian soilik izan du isla, emakumeen artean eta nagusiki, zerbitzu sektorearen bilakaerari esker.

Kontrapuntu bezala, nabarmendu beharrekoa da sinatutako 100 kontratutatik 8 soilik dira mugagabeak, eta iraunaldi zehatza duten aldi batekoen %56a astebetekoa edo laburragoa da.

Gainera, Eurostaten arabera, mugagabe bihurtu diren aldi baterako kontratuen portzentaia Europar Batasuneko baxuenetakoa da. Horrela, aldi baterakotasuna enplegurako “sarbide” baino, gehiago bihurtu da lan-prekarietate iraunkorrerako tresna.

Izan ere, Hego Euskal Herrian soldatapean lanean ari diren 4 langiletatik batek aldi baterako kontratua dauka. Honek Europako buruan kokatzen gaitu aldi-baterakotasunari dagokionez, soilik Espainiako estatuaren atzetik.

Bestalde, azken krisiak agerian utzi zuen enpleguaren ahultasuna laneko aldi-baterakotasunarekin lotuta dagoela. Atzeraldiaren zatirik gogorrenean 6 milioi lanpostu suntsitu zen Europar Batasunean, erdia baino gehiago Espainiako estatuan.

Hori bai, Estatuen lanpostuen %17 suntsitu bazen, Hego Euskal Herrian ere krisialdiaren aurretik zeuden enpleguen ia %16 suntsitu zen.

Horregatik, krisi handieraren hasieratik hamar urtetara, itxi gaude dauden zauri sozial askorekin eta atzeraldi berri baten arriskuaren inguruko etengabeko ohartarazpenak ikusita, beharrezkoa da aldi baterakotasun maila handien salaketa azpimarratzea.
 

 

 

Osakidetzako Emergentziak zerbitzuak bidezko lan-baldintzak eskatu ditu

admin
-
0
Osakidetzako Emergentziak zerbitzuak bidezko lan-baldintzak eskatu ditu

Langileak azaroaren 5ean elkarretaratu dira Gasteizen, Osasungintzako Mahai Sektoriala egin bitartean, Osakidetzaren Giza Baliabideetako Zuzendaritzarekin negoziazio zuzena eta zerbitzuaren arazoak konpontzea exijitzeko.

Osakidetzako Emergentziak zerbitzuko langileak Gasteizko Osakidetzaren Zuzendaritza Nagusiaren aurrean elkarretaratu dira gaur goizean. Osakidetzaren Emergentziak zerbitzuko Langileen Batzordeak, ELA, CCOO, LAB, SATSE, ESK, SME eta UGT sindikatuekin batera, mobilizazioetara itzultzea erabaki dute Osakidetzaren erantzun ezaren aurrean. Mobilizazio etapa berri honetan, gatazkaren erantzule nagusiengana eramango dituzte protestak.

“Emergentzietako gatazka Mahai Sektorialaren bileraren gai ordenean dago. Horregatik, zerbitzuaren arazoak konponduko dituen negoziazioa exijitzera joango gara”, adierazi dute sindikatuek. Langileen Batzordeak, gutxienez, honako gai hauek defendatu nahi ditu:

• Emergentzietako osagarria langile guztientzat.
• Koordinazio eta erantzukizun osagarria, koordinazio lanak egiten dituzten langile guztientzat. Manutentzioa, ordutegia eta atsedenak.
• Aldi baterako langileentzat egonkortasuna.
• Urteko egutegiaren negoziazioa.
• Informazioa transmititzeko denboraren aitorpena (txandartekoa)
• Formakuntza jarraia ugaritzea, lan orduetan izanda.
• Sakabanatze geografikoa, egutegiagatik, base batetik bestera ibili behar dutenentzat.
• Laneko arropa egokia.
• Lanpostu funtzionalen berrikuspena eta balorazio objektiboa.
Emergentzietako arriskuagatiko balorazioa kontuan hartuz.
• Araba eta Gipuzkoako Koordinazio Zentroak desegiteko proiektua berehala gelditzea.
 

 

 
1...717718719...1,592Page 718 of 1,592

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus