2026-01-25
Blog Page 713

Negoziazio prozesu erreala martxan jartzea premiazkoa da Osakidetzan

admin
-
0
Gaur Osakidetzako Mahai Sektorialeko batzarrean ez da ezer negoziatu, aspalditik ohitura bihurtu dena.

Osakidetzako zuzendaritzak gaurko bilera erabili du, gai batzuen gainean aldebakarrez erabaki dutena sindikatuoi jakinarazteko. Gai horietako asko garrantzi handikoak izanik ere, sindikatuok ez dugu aukerarik izan hartzen diren erabakien parte izateko. Honen adibidea Onkologikoa dugu: publifikazioa ziurtatzen ez duen prozedura ekarri digute, baina tartean ez da inolako informaziorik egon, ezta eztabaidarik ere, ez gurekin, ezta jendartearekin ere. Azken finean, ekarpenak egiteko aukera antzerki hutsa baino ez da, aurretiaz Osakidetzak ebatzi duen horretan inolako eraginik ez daukana.

Mahai sektorial honetan LABek jarrera argia erakutsi du: premiazkoa da negoziazio prozesua erreala abian jartzea. Esate baterako, Hitzarmen berria negoziatzeko ordua da, bere osotasunean, ez soilik baimen eta lizentzien atala, Osakidetzak nahi duen bezala. Bestaldetik, Onkologikoaren inguruko eztabaida demokratikoa abian jartzea derrigorrezkoa jotzen dugu. Era berean, erantzun negoziatuak behar ditugu beste gai batzuetan ere: zer gertatuko den Garapen Profesionalarekin, zelan berreskuratuko dugun urte hauetan guztietan galdutako eros-ahalmena (soldataren %13,3 koa); zein EPE eredu berria behar dugun, etab. LABek gai hauen inguruko ekarpen zehatzak helaraziko dizkio Osakidetzari, baina beti ere negoziazio prozesu baten barruan. Adibidez, erosmen-ahalmena berreskuratzeko urteko %4,5eko soldata igoera planteatu dugu Mahai Orokorrean, guztiz bideragarria dena. Halaber, 10 urte beranduago heltzen den Berdintasun Plana aurrera ateratzeko nahitaezkoak izan dira LABen ekarpenak eta bultzada.

Bestaldetik, pozteko da kendutako eskubide oso garrantzitsu bat berreskuratu dugula langileok mobilizazioaren bitartez: irailetik aurrera, edozein baja egoeratan soldataren %100 kobratuko dugu berriro langileok. Hori bai, ardura falta leporatu diogu Osakidetzari, gaur arte ez dielako langileei honen gaineko informazio ofizialik helarazi.

Amaitzeko, Larrialdietako langileen mobilizazioek lortu dute Osakidetzak gai-ordenean sartzea euren negoziazio eskaera. Osakidetzak negoziazio proposamena mahai gainean jarri izana modu positiboan baloratzen dugu, nahiz eta bertan ez jaso langileok aldarrikaturiko puntu guztiak. LABek eskatzen duena zera da: Osakidetzaren proposamena abiapuntu hartuta, denbora luzean eskatu dugun benetako negoziazio prozesua irekitzea Osakidetzako zuzendaritza eta Larrialdietako Pertsonal Batzordearen artean.

 

 

 

Gutxienez, 62 dira Euskal Herrian urte hasieratik hildako langileak

admin
-
0
Gutxienez, 62 dira Euskal Herrian urte hasieratik hildako langileak

Azken egunotan, langile bi hil dira lanean. Urriaren 31an, Castejonen hil zen C.V.B. langilea, Construcciones y Obras Vitorino Vicente S.L. enpresakoa, in itinere istripu hatean. Bestalde gaur goizean, 10:00ak aldera, J.S.F. 57 urteko langilea hil da Eibarren, lan istripu ez traumatiko batean, ABC enpresan lanean zegoela, ADECCO enpresatik azpikontratatua.

Lehenik eta behin, LAB sindikatutik senide, inguruko eta lankideei gure elkartasuna eta babesa helarazi nahi diegu. Babes hau hilabete honetan hildako langile guztien ingurukoei zabaltzen diegu.

Eibarrekoa bezalako istripu ez traumatikoak ere lan-istripuak dira. Ez dira kasualitatez ematen laneko orduetan, zorte txarragatik, ez da enpresariek dioten moduan “ez dutela lanarekin zerikusirik”.

Jakina da horrelako gertaerak lan zehatz batzuetan gertatzen direla, baldintza zehatz batzuen pean, lanean jasotzen diren presioak eta estresa bihotzekoak eta zirkulazio gaitzen ezinbesteko faktoreak direla eta gehienetan, oinarrizko faktore gauzatzailenak direla. Bizi eta lan baldintzek eragindakoak ere badira.

Gainera dagoeneko istripu ez traumatikoak, bihotzekoak, iktusak bilakatu dira heriotz lan istripuen lehendabiziko faktoreak.
Lan istripu guztien atzean lan-baldintzak daude. Erritmo azkarrek, presioak edo autoritarismoak gaixotasun ezberdinak sortarazten dituzte eta hainbatetan, heriotzera eramaten gaituzte.

Argi daukagu lan istripuak, traumatiko, ez traumatiko eta joan-etorrikoak, ez direla zoriak edo kasualitateak sortutakoak, ematen diren lan harremanen, prekarizazioaren, lan arautegiaren eta azpikontratazioaren emaitza baino.

LABen argi dugu, bizi eta lan duinak behar ditugula, lanetik onik eta bizirik bueltatzeko eskubidea dugula. Norbanako, familia eta jendarte osoarena den lakra honekin bukatzeko bide bakarra borroka eta antolakuntza direla, lan harremanen eta joku arauen aldaketa batetik etorriko dela aldaketa. Eredu berri bat gauzatu behar dugu, langileon bizitza eta osasuna lehenetsiko dituena.

Horregatik LABek dei egiten du langile guztientzako lan-baldintza duinen aldeko borroka egitera.

Heriotza honen aurrean protesta egiteko, ABCko enpresa-batzordeak orduerdiko lanuztea egingo du bihar, azaroaren 6an, enpresa aurrean, Eibarren. 13:45etik 14:15era izango da lanuztea eta bien bitartean, langileek kontzentrazioa egingo dute enpresa aurrean (Azitain poligonoa, 6. zkia).
 

 

 

Iraunaldi zehatza duen aldi bateko kontratuen %56a astebetekoa edo laburragoa da

admin
-
0
Hego Euskal Herrian dauden Enplegu Zerbitzu Publikoetan erregistratutako langabetuen kopurua 155.593 pertsonatakoa da urri amaieran. Hautetatik %57,6 dira emakumezkoak.

Kopuru garbietan, azken hilabetean 559 pertsonatan egin du behera langabeziak eta honek irailean baino %0,4 gutxiago suposatzen du. Hala ere, beherakada honek Bizkaian soilik izan du isla, emakumeen artean eta nagusiki, zerbitzu sektorearen bilakaerari esker.

Kontrapuntu bezala, nabarmendu beharrekoa da sinatutako 100 kontratutatik 8 soilik dira mugagabeak, eta iraunaldi zehatza duten aldi batekoen %56a astebetekoa edo laburragoa da.

Gainera, Eurostaten arabera, mugagabe bihurtu diren aldi baterako kontratuen portzentaia Europar Batasuneko baxuenetakoa da. Horrela, aldi baterakotasuna enplegurako “sarbide” baino, gehiago bihurtu da lan-prekarietate iraunkorrerako tresna.

Izan ere, Hego Euskal Herrian soldatapean lanean ari diren 4 langiletatik batek aldi baterako kontratua dauka. Honek Europako buruan kokatzen gaitu aldi-baterakotasunari dagokionez, soilik Espainiako estatuaren atzetik.

Bestalde, azken krisiak agerian utzi zuen enpleguaren ahultasuna laneko aldi-baterakotasunarekin lotuta dagoela. Atzeraldiaren zatirik gogorrenean 6 milioi lanpostu suntsitu zen Europar Batasunean, erdia baino gehiago Espainiako estatuan.

Hori bai, Estatuen lanpostuen %17 suntsitu bazen, Hego Euskal Herrian ere krisialdiaren aurretik zeuden enpleguen ia %16 suntsitu zen.

Horregatik, krisi handieraren hasieratik hamar urtetara, itxi gaude dauden zauri sozial askorekin eta atzeraldi berri baten arriskuaren inguruko etengabeko ohartarazpenak ikusita, beharrezkoa da aldi baterakotasun maila handien salaketa azpimarratzea.
 

 

 

Osakidetzako Emergentziak zerbitzuak bidezko lan-baldintzak eskatu ditu

admin
-
0
Osakidetzako Emergentziak zerbitzuak bidezko lan-baldintzak eskatu ditu

Langileak azaroaren 5ean elkarretaratu dira Gasteizen, Osasungintzako Mahai Sektoriala egin bitartean, Osakidetzaren Giza Baliabideetako Zuzendaritzarekin negoziazio zuzena eta zerbitzuaren arazoak konpontzea exijitzeko.

Osakidetzako Emergentziak zerbitzuko langileak Gasteizko Osakidetzaren Zuzendaritza Nagusiaren aurrean elkarretaratu dira gaur goizean. Osakidetzaren Emergentziak zerbitzuko Langileen Batzordeak, ELA, CCOO, LAB, SATSE, ESK, SME eta UGT sindikatuekin batera, mobilizazioetara itzultzea erabaki dute Osakidetzaren erantzun ezaren aurrean. Mobilizazio etapa berri honetan, gatazkaren erantzule nagusiengana eramango dituzte protestak.

“Emergentzietako gatazka Mahai Sektorialaren bileraren gai ordenean dago. Horregatik, zerbitzuaren arazoak konponduko dituen negoziazioa exijitzera joango gara”, adierazi dute sindikatuek. Langileen Batzordeak, gutxienez, honako gai hauek defendatu nahi ditu:

• Emergentzietako osagarria langile guztientzat.
• Koordinazio eta erantzukizun osagarria, koordinazio lanak egiten dituzten langile guztientzat. Manutentzioa, ordutegia eta atsedenak.
• Aldi baterako langileentzat egonkortasuna.
• Urteko egutegiaren negoziazioa.
• Informazioa transmititzeko denboraren aitorpena (txandartekoa)
• Formakuntza jarraia ugaritzea, lan orduetan izanda.
• Sakabanatze geografikoa, egutegiagatik, base batetik bestera ibili behar dutenentzat.
• Laneko arropa egokia.
• Lanpostu funtzionalen berrikuspena eta balorazio objektiboa.
Emergentzietako arriskuagatiko balorazioa kontuan hartuz.
• Araba eta Gipuzkoako Koordinazio Zentroak desegiteko proiektua berehala gelditzea.
 

 

 

Igande eta jai egunetan irekitzearen kontra mobilizatu gara Gasteizen

admin
-
0
Igande eta jai egunetan irekitzearen kontra mobilizatu gara Gasteizen

Kontsumo eredu arduratsu eta iraunkorren alde, eta igande eta jai-egunetan erostearen kontra, “Jaietan Denok Jai” plataformak mobilizazio bat egin zuen atzo Gasteizen. Hain zuzen ere, SuperCOR aurrean hasi zen protesta, eta Gasteizko hiribidean dagoen SIMPLY-ALCAMPOren aurrean amaitu zen. Datorren iganderako ere deitu dute protestara.

Araba mailan merkataritza igande eta jai-egunetan irekitzearen kontrako “Jaietan Denok Jai” plataformako kide garen LAB, ELA, CCOO, UGT, ESK eta CGT sindikatuok Supermercados SABECO enpresak SIMPLY-ALCAMPO izenpean Gasteizen duen dendetako bat urteko 365 egunetan irekitzeko hartutako erabakiaren kontrako jarrera adierazi nahi dugu.

Ez da ezaugarri hauek dituen denden artean Gasteizen irekitzen duen lehendabiziko kate handia. Oso urrun joan gabe, maiatzean El Corte Inglesena den SuperCORek bere ateak ireki zituen Zulaikako lokal zaharretan.

Igande eta jai-egunetan irekitzeak ondorio ezin txarragoak dakartza, lan ikuspegitik ez ezik, jendarte ikuspegitik ere bai, zabaltzearen aldekoek gezurrak erabili arren argudio moduan.:

– Igande eta jai-egunetako irekierak ez du jarduera ekonomikoa handitzen.

– Ez du enplegurik sortzen, are gehiago, enplegu gehiago suntsitzen du merkataritza txikian.

– Ez zaie kontsumitzaileei askatasun gehiago eskaintzen. Eskaintza murriztu egiten da eta hiriguneen desertizazioa ematen da.

– Jai-egunetan irekitzearen aldeko salbuespenak jartzen badira, sektoreko langileentzat erabat gehiegizkoa den estrategia normalizatzea suposatuko du.

Hori dela eta, Simply-Alcampo eta SuperCor enpresa hauek igande eta jai egunetan irekitzeko hartutako erabakiaren kontra gaude, etorkizunean gerta daitezkeen irekitzeen aurka azaltzen gara, eta merkataritzan igande eta jai-egunetan lan egin ez dadin, mobilizatu gara.
 

 

 

Muhammad Ehsan Ullah Khan Pakistango umeen esklabutzaren aurkako borrokalariarekin elkartu gara gaur

admin
-
0
Muhammad Ehsan Ullah Khan Pakistango umeen esklabutzaren aurkako borrokalariarekin elkartu gara gaur

Ullah Khan umeen esklabutzaren kontrako borrokalari pakistandarra Euskal Herrian da egunotan eta LABeko ordezkaritza batekin batzartu da gaur, sindikatuaren Bilboko egoitzan. LABeko ordezkaritza Ekintza Sozialeko Idazkari Bea Martxueta eta Mikel Alvarez Bilboko Ekintza Sozialeko kideak eta Nazioarteko Idazkari Koldo Saenzek osatu dute.

Pakistandarra Adreilu Lantegietako Langileen Frontearen sortzaile eta presidentea da, eta baita Pakistango Lan Behartutik Askatzeko Frontekoa (BLLF, Bounded Labour Liberation Front) eta Lan Behartutik Askatzeko Fronte Globalekoa ere. Azken honek esklabutza eta umeen lanari aurre egiten dio Pakistan eta Asia Hegoaldean. Global March-aren koordinatzailea ere bada Suedian.

Ezaguna da Nazio Batuen Erakundean umeen esklabutzaren kontra egindako lanagatik, Esklabutza forma Garaikideetarako Lan-taldearen bidez egindakoa lana, eta baita Lanaren Nazioarteko Erakundeko topaketetan parte hartzeagatik.

 

 

 

Talleres Berasateguiko langileak zoriondu nahi ditugu hitzarmena sinatzeko akordioa lortu dutelako

admin
-
0
Talleres Berasateguiko langileak zoriondu nahi ditugu hitzarmena sinatzeko akordioa lortu dutelako

Talleres Berasategui Arrigorriagako Txako industriagunean kokatutako enpresa da, 27 langile dituena eta galdaragintza astunean diharduena. 2 egunetako greba burutu ondoren, urriak 25 eta 30ean zehazki, azaroaren 6tik aurrera iragarrita zeukan greba mugagabea bertan bera utzi du LABek.

Atzoko egunean zehar, langile guztiek egindako greba dela medio lantegiak bere ekoizpena etenik zuen bitartean, langileen eta enpresaren arteko elkarrizketak areagotu ziren. Zenbait bilera eta gero, asebetetzen zituen akordioa lortu zuten langileek.

Akordioa, KPIren gaineko igoeran eta herrialde mailako Bizkaiko metalgintzako hitzarmenean azaltzen den denbora disponibilitatearen murrizketan oinarritzen da.

Enpresa hitzarmena sinatu ondoren, azaroaren 6an hastekoa zen greba mugagabea bertan bera geratu da.

LABeko Industria Federaziotik Talleres Berasateguiko langileak zoriondu nahi ditugu, beren lan baldintzetan lortutako aurrerapenengatik eta hitzarmen duina eskuratzeko adierazi duten tinkotasunagatik.

Gainerako langileak beren eskubideen alde borrokatzen jarraitzera animatu nahi ditugu. Bizitza hobea merezi dugu eta horren alde borrokatzeak merezi du.

 

 

 

LABek gogor salatzen du EAEko LEPen inguruan Cristina Uriartek egin duen irakurketa demagogiko eta sinplista

admin
-
0

Cristina Uriarte Hezkuntza Sailburuak agerraldia egin du gaur Gasteizko Parlamentuko du Hezkuntza batzordean, Lan Eskaintza Publikoen (LEP) prozesuaren eta ereduaren inguruan azalpenak emateko. LABek gogor salatu nahi du Hezkuntza Sailburuaren interbentzioa, ikasturte honetako LEP prozesuan izandako emaitzak parte hartzaile kopuru eskasari leporatuz.

Emaitza horiek justifikatzeko behin-behineko irakasleek oposaketarik egin nahi ez dutela eta ez dutela parte hartzen argudiatzea, oso pobrea eta maltzurra iruditzen zaigu, irakasleen kolektiboan kokatzen baitu arazoaren foko eta oinarria. Gainera, ez du inolako hausnarketarik planteatzen zergatik ematen ote den horrelako parte hartze baxurik. Langileen adina haintzat hartu al du? Langileen lana eta bizitza pertsonala uztartzeko baliabiderik eskaini al du? Irakaskuntzako oposaketetan planteatzen den prozedura ikaragarri konplexu, zail, luze, korapilatsu, ilun eta subjektiboa aintzat hartu al du? Erreklamazioek inolako ibilbiderik ez dutela kontenplatu du? Frogak eliminatorioak direla baloratu al du? Ebaluaketa irizpide ilun eta orokorregiak erabiltzen dituztela kontutan hartu al du? Erantzunak argiak dira. Ezezkoa kasu guztietan. Gainera, Espainiako estatuarekiko menpekotasuna onartu eta betikotzen du Hezkuntza Sailak, burujabetza eta konpetentzia guztien eskumenei borondatez uko eginez. Irakasleak oposaketetara aurkeztera motibatzeko bidea bilatu beharra daukagula ere aipatu du. Kezkagarria iruditzen zaigu motibatzeaz hitz egiten duenean behartzeaz hitz egiten ari ez ote den. Izan ere, izangaiak motibatzeko formula arestian aipatutako elementuak aintzat hartuz etorriko da, inolaz ere inposaketaren bidetik. Prozesu erakargarriak egitea saritzearekin lotzeak ere arrisku handiak ditu, praktikan inposaketa litzatekeelako. Administrazioak buruan duen metodologia konduktistarekin ez du bat egiten LAB sindikatuak.

LABek oposaketa ereduaren goitik beherako aldaketa aldarrikatzen du, prozesu honek ez baititu irakasle trebatuenak ematen. Paradoxikoa iruditzen zaigu Heziberri planean konpetentzietaz hitz egitea, konstruktibismoaz, soziokonstruktibismoaz eta pedagogia berritzaileetaz, eta paraleloki irakasleen LEP eredu arkaiko, erabat memoristiko eta subjektiboa mahaigaineratzea. Deigarria egiten zaigu ere epaimahai guztietan gainditu kopuru beretsuak ematea kasu guztietan, eta ikasturtez ikasturte errepikatzen den zerbait izatea. Susmagarria erabat. Tamalez, epaimahaien esku geratzen ez den irizpide ilun hori nondik datorren susmatzen dugu. Ahozko defentsa izangai guztiek egiteko epeak asko luzatuko lirateke eta prozesuak derrigorrean uztailean amaituta egon beharra du administrazioaren aburuz. Gainera, ahozko defentsa da hain zuzen ere irakaslearen trebakuntza eta maila hobekien isladatzen duen prozesuaren zatia, eta atal honetan emaitzak oso onak izan ohi dira, gainditu kopurua %100ra hurbiltzen delarik. Horrela gauzak, oposaketa eredua erabat berritzeaz gain, beharrezkoa zaigu behin-behineko irakasleen eta ikastetxeen egonkortasuna bermatuko lukeen planteamendu bat adostea. Beharrezkoa da planteamendu integral bat, bai behintzat ikastetxeetan proiektu pedagogiko sendoak aurrera ateratzeko eta langileen lan baldintzak duintzeko. Ikastetxeak eta langileak egonkortzeko, prozeduren maiztasuna adostu beharko litzateke, lekualdatze lehiaketak, oposaketa deialdiak eta abar bat eginez. Behin behineko irakasleek eskualdekako zonifikazioa hautatzeko aukera eduki beharko lukete eta formakuntza jarraiari baliabide handiagoak eskaini beharko litzaizkioke besteak beste.

LABek, bestelako egonkortasun eredu baten alde borrokan tinko jarraituko du, hezkuntza sistema propio eta burujabea defendatuz.

 

 

 

LAB: “Erabakitzeko eskubidearen aitortza eta bermea estatus berriaren erdigunean jarrita, hemen bide propioa egin behar dugu, ez baitira Madrildik etorriko herri honek behar dituen erantzunak”

admin
-
0
LAB: “Erabakitzeko eskubidearen aitortza eta bermea estatus berriaren erdigunean jarrita, hemen bide propioa egin behar dugu, ez baitira Madrildik etorriko herri honek behar dituen erantzunak”

Gaur bilera egin dute LAB sindikatuak eta EAJk, Gasteizko Parlamentuan. LABetik, Garbiñe Aranburu Idazkari Nagusia, Xabier Ugartemendia Ekintza Sindikala eta Negoziazio Kolektiboko Idazkaria eta Bea Martxueta Ekintza Sozialeko Idazkaria izan dira bertaratutakoak. EAJren ordezkaritzari dagokionez, Joseba Egibar, Luisja Telleria eta Josune Gorospe parlamentariek hartu dute parte.

LAB sindikatuak abiatutako errondako azken bilera izan da gaurkoa. Sindikatu ezberdinekin eta Podemos nahiz EHBilduko talde parlametarietako ordezkariekin egin dira bilkurak, estatus politiko berria hizpide hartuta, besteak beste.

Giro adeitsuan garatu da gaurko batzarra eta EAEn egungo autonomia estatutua gaindituko duen estatus berriaren beharra eta garrantzia aitortzerakoan bat etorri dira alde biak. Estatus politiko berriak, hain zuzen ere, egungo marko konpetentzialen topeak gainditu behar dituela adierazi du LABek. Eremu soziolaboralean, lan arautegian eta babes sozial gaietan ahalmen legegile osoa eskatzen dio LABek estatus berriari, langileontzat lan eta bizi baldintza duinak ziurtatzeko. Ahalmen legegile osoa, eta marko propio baten beharra, 1200 euroko gutxieneko soldata ezartzeko, 1080 euroko pentsioak bermatzeko, soldata arrakalarekin amaitzeko edota, estatalizazioaren izurritearekin amaitu eta, inolako injerentziarik gabe, langileon lan baldintzak, lan harremanak, hemen negoziatzeko, besteak beste.

Azken urteetan Estatutik erreformak eta murrizketan bata bestearen atzetik, inposatu izan dizkigutela aintzat hartuta, ez du LABek euskal langileon, euskal herritarron arazoen konponbidea Madrilen ikusten. Ez dira Madrildik etorriko herri honek behar dituen erantzunak. Espainiara begira egoteari utzi eta hemen bide propioa egiteko determinazioa eskatu dio LABek EAJri. Euskal sindikatuon aldarrikapen historikoa denari bide emateko momentua dela eta Lan Harremanetarako eta Babes Sozialerako Euskal Esparrua eta Esparru Sozioekonomiko propioa eraikitzeko aukera ireki dezala estatus berriak, hori da LABetik eskatzen duguna.

Eta zentzu horretan ohartarazpen bat ere bai. Estatusaren inguruan kontsentsu zabalagoak lortu nahi izatea zilegi bada ere, adostasunaren izenean edukiak erlatibizatzerik ez duela onartuko ohartarazi dio LABek EAJri eta erabakitzeko eskubidearen aitortza eta bermea, bai ala bai, estatus berriaren erdigunean kokatzea ezinbesteko baldintzatzat jarri dio.

Esku artean izan dituzte beste bi gai ere, elkarrizketa sozialaren dekretua eta Jaurlaritzaren aurrekontu proiektua.

Lehenari dagokionez dekretua bertan behera uzteko beharra aldarrikatu du LABek.

Aurrekontuei dagokienean, berriz, Jaurlaritzaren proiektuak abiapuntutik izan dituen ageriko hutsuneak nabarmendu nahi izan ditu sindikatuak, gastuari bakarrik ez, sarrerei ere erreparatu behar zaielako, eta aurrekontuen bidez sortzen den aberastasunaren banaketa justu baten alde egin nahi bada fiskalitateaz hitz egin behar delako. Aurrekontu proiektu honek langileon lehentasunezko beharrei erantzuten ez dietela eta, enplegua duintzeko aurrekontuak eskatu ditu LABek, besteak beste, 1200 euroko gutxieneko soldata bermatu eta soldata arrakalarekin amaitzeko neurriak jaso dituzten aurrekontuak. Eta behar sozialei aurre egiteko bokazioa ere izango dutenak, tartean neurriok aurreikusita: 1080 euroko gutxieneko pentsioa bermatzea, pentsio arrakalarekin amaitzea eta Euskal Herriko Eskubide Sozialen Gutunaren Herri Ekimen Legegilean jasotako RGIaren igoera ontzat ematea, aurreikusia dagoen %2,25eko igoera guztiz askieza delako.

Aurrekontu neoliberalen aurrean aurrekontu sozialak aldarrikatu ditu LABek, sektore publikoan enplegua egonkortzera bideratutako aurrekontuak, eta Industria politika eraginkor bat garatzea ere posible egingo dutenak.
 

 

 

1...712713714...1,586Page 713 of 1,586

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus