2026-01-25
Blog Page 711

Bankak demokraziari iruzur egiten diola salatu dugu Bilbon

admin
-
0
Bankak demokraziari iruzur egiten diola salatu dugu Bilbon

Kutxabank Auziko Herri Akusazioa osatzen dugun LAB, ESK, STEILAS, EHNE-Bizkaia, HIRU, EKA eta Euskal Herriko Pentsiodunen Plataformak elkarretaratze bat egin dute gaur, Bilboko Plaza Eliptikoko Banco Santanderren aurrean. Hain zuzen ere, bankak duen gehiegizko boterea salatu dute bertan.

Hauxe da, gaurko mobilizazioa dela eta, egindako irakurketa:

LAB, ESK, STEILAS, Bizkaiko EHNE eta Hiru sindikatuok, EKA kontsumitzaileen elkartea eta Euskal Herriko Pentsiodunen Elkarteekin batera, osatzen dugu Herri Akusazioa demokrazia bahituta duen bankaren aurrean mobilizatu gara.

Aste honetan, Espainiako Auzitegi Gorenaren auzi administratiboen aretoak esan du aurrerantzean bezeroek ordaindu beharko dutela hipoteken dokumentaturiko ekinbide juridikoaren zerga. Beraz, Gorenak aurretik esandakoa alde batera utzi eta bezeroa zigortu du, bankaren mesedetan.

Ezer berririk ez. Erregimen antidemokratiko honetako jabeak dira, Konstituzioa berritu zutenak dira, inoiz bueltatuko ez duten diru publikoa beraien buruak erreskatatzeko jaso zutenak dira, botere legegileari legeak aldatzeko eskatzen dutenak dira, eta orain, botere judizialari sententzia bat aldatzeko eskatu, eta beraien eskaerak epaitegientzat aginduak dira.

Honela funtzionatzen du 78ko erregimenak. Hauek agintzen dute gure bizitzetan. Bankak, oligarkiak eta patronalak Estatua eta sistema beraien neurrira eraikita daukate. Gure bizitzak bizigarriak izan daitezen, hau goitik behera aldatu beharra dugu, azkar gainera.

Ikusten gauden bezala, gaur egungo finantza tresnak herritarron beharrizanak are eta gehiago aberasteko erabiltzen dituzte. Ez dugu ahaztu behar, sarri askotan bizi garen etxeko hipotekaz ari garela; oinarrizko eskubideaz ari gara, beraz. Euskal Herrian erabaki honek eragin handiegirik izango ez badu ere, Herri Akusazio hau herrialde guztietan finantza arloan eman daitekeen edozein iruzur kasu salatzeko dago. Kasu honetan, demokraziari iruzur larria da.

Herri Akusazio honek, behinbaino gehiagotan adierazi duenez, Euskal Herrian arazo finantzieroen aterabidea izaera publikoa eta demokratikoa lukeen banka sortzetik letorke. Banka horren kontrola herritarrok, eragile sozial eta sindikalok egingo genuke.

Alderdi politikoei zuzentzen gatzaizkie herritarron segurtasun judiziala bermatu dezaten, botere banaketa ziurtatu dezaten, eta herritar gehienen interesen alde egin dezaten, botere ekonomikoen interesen alde egin beharrean. Zentzu honetan, Estatuko Presidentearen Lege Dekretua ez nahikoa zaigu, atzerako kasuak bere gain hartzen ez dituelako.

 

 

 

Amiantoarekin lan egin zuten langileei laneko gaixotasun izaera onar diezaiela eskatu diote berriro CAFeko zuzendaritzari

admin
-
0
Amiantoarekin lan egin zuten langileei laneko gaixotasun izaera onar diezaiela eskatu diote berriro CAFeko zuzendaritzari

Beasaingo eta Irungo CAFeko enpresa komiteek zuzendaritzari bere jarrera behingoz alda dezala eskatu diote, amiantoaren gaiari dagokionez; hots, izan daitezela kontsekuente dagokien erruarekin.

Hauxe da Beasaingo eta Irungo CAFeko enpresa komiteek egindako oharra:

Pasa den urrian, Celestino Tolosaren “laneko gaixotasuna” onartu zuen Euskal Autonomia Erkidegoko Auzitegi Gorenak (EAEAN). Bere sententzian, epaileak Estatuko Gizarte Segurantzak (INSS) ordainketaren erantzukizuna beregain hartu beharko zuela azaltzeaz gain, berak lan egin zuen CAF enpresak, eragindako kalteengatik, oraindik zehazteko dagoen zenbateko garrantzitsu batekin erantzun beharko zuela ere ebatzi zuen.

Celestino Tolosa “Xarra” zenaren albiste honen aurrean, beste behin CAFek epaitegian errekurritu du beste amianto kasu argi eta garbi bat.

Beasaingo eta Irungo CAFeko Komiteetatik, berriro CAFeko Zuzendaritzak hartu duen jarrera salatu nahi dugu. Era berean, familiari gure erabateko babesa azaldu nahi diogu.

Ondo legoke gogoraraztea, pasa den apirilaren 28an, amiantoak eraildako lankideei eskainitako omenaldian, langileok eskaera zuzena egin geniola CAFeko Zuzendaritzari: “Amiantoarekin lan egin zuten langileei onar ziezaietela laneko gaixotasun izaera, egindako mina onartu eta inongo tramite judizialik urrera eraman gabe, gaixoei zein haien senitartekoei sufrimendu gehigarririk sortu gabe, kalte ordainak ordain zitzala”.

Guzti honegatik, CAF SAko komite guztien aldetik, aurrez aipatutako eskaera hauek berriro luzatu eta Zuzendaritzari euren jarrera behingoz alda dezaten eskatzen diegu. Izan daitezela kontsekuente dagokien erruarekin.

 

 

 

Donostiako Udaleko hauteskunde sindikalak irabazi ditugu

admin
-
0
Donostiako Udaleko hauteskunde sindikalak irabazi ditugu

Donostiako Udalean egin genituen atzo hauteskunde sindikalak, eta 24 delegatu hautesleetatik 10 lortu ditugu, 2014ko hauteskundeetan baino bat gehiago. Lau hauteskunde mahaietatik hirutan irabazi dugu, eta laugarrenean duela 4 urteko emaitza mantendu dugu. ELAk zazpi delegatu lortu ditu, hiru galdu eta gero; CCOOk bost, bi gehiago; eta ERNEk bi, zituenak mantenduta.

Donostiako Udalean lanean hasi ginenetik 36 urte pasa dira, eta, orduz geroztik, langileen eskubideen defentsan aritu gara, lan egiteko gaitasuna eta konpromisoa erakutsi eta gero. Horren isla da hauteskundeetako emaitzen etengabeko goranzko bilakaera.

Aurrerantzean, beti jarraitu dugun bide arduratsutik jarraitzeko konpromisoa dugu, lan baldintzen eta zerbitzu publikoen alde borrokatuz eta ordezkaritza kolektiboak bultzatuz. Zentzu honetan, beti egin dugun eta beti egingo dugun apustua azpimarratu behar dugu: Langileen Bartzordea (Funtzionarioen junta biltzen duen atala) eta Erakunde Batzarra (behargin laboralena) indartzea.

Honela gauzak, jasotako babesa eskertu nahi dugu, eta dagokigun ardura kudeatzeko prest gaudela berretsi.

 

 

 

Eusko Jaurlaritzak ez du enplegu planen negoziazioaz entzun nahi, eta akordio teknikoen argazkietara mugatzen du negoziazio kolektiboa

admin
-
0
Eusko Jaurlaritzak ez du enplegu planen negoziazioaz entzun nahi, eta akordio teknikoen argazkietara mugatzen du negoziazio kolektiboa

Gaurko Mahai Orokorreko bileran gai bakarra izan dugu eztabaidagai, lan kontratudun langileentzat erretiro partzialerako proposamena hain zuzen ere. Behin eta berriz eskatu egin badiogu ere, gobernuak ez du bestelako gairik mahaiaren gainean jarri.

Badirudi administrazio publikoetan enpleguari dagokionez ez dutela bestelako erronkarik antzematen, eta sindikatuon papera negoziazio kolektiborako baino, akordio tekniko hutsetara mugatzen dute, protokolo edo photo-call argazkietarako alegia. Madrilek agindutako erretiroaren erreformaren traslado tekniko hutsa ordezkaritzaren gutxiengoarekin adostu izana horren froga argia da, akordioaren beharrik ere ez zegoelako. LABek ez du joko horretan parte hartu eta ez du akordioa babestu.

Jakina da sektore publikoan enpleguaren egoera kaxkarra dela benetan. Etengabe salatzen ari gara behin-behinekotasun tasa handiak, pribatizazioak eta bere garaian egindako murrizketak betirako gelditzea. Garbi dago Eusko Jaurlaritzak ez daukala egoerari buelta emateko inolako asmorik, ez baitu enpleguari begira ditugun erronken inguruan inolako plangintza bat aurkezten. Argi utzi du Jaurlaritzak enplegu kopurua zehaztu duela, eta inposaketa hori sektoreetan negoziatuko dela.

Enplegu plan integral bat da hain zuzen aspaldian LABek egiten duen aldarrikapena. Neurri partzialek ez diete sektore publikoak dituen oinarrizko beharrei erantzuten. Gure ustez, gaur egun ditugun beharrak zein etorkizunekoak kontutan hartu behar dira; behin-behinekotasuna eta etorkizuneko erretiroen ordezkapena hain zuzen. Horregatik enplegu plan horretan gutxienez gai hauek kontutan hartu beharko lirateke:

• Behin-behinekotasunarekin amaitzeko bakante guztiak deialdi publikoetara atera behar dira.
• Kontsolidazio deialdiak adostu behar dira.
• Funtzionarioentzat aurrez erretiratze sariak berreskuratu behar dira.
• Errelebo kontratua lan kontratudun guztiei zabaldu behar zaie.
• Erretiratzen diren langileen plazak deialdi publikora urtero atera behar dira.
• Beharrezkoak diren lanpostu guztiak sortu behar dira.

Bileran berriro ere enplegu publikorako plan integral baten negoziatzea proposatu dugu, eta argi daukagu Jaurlaritzak ez duela halakorik nahi, eta bere neurriak alde bakarrez prestatzen eta inposatzen jarraituko duela. LABen ez gaude argazki edo publizitate hutsezko sinaduretarako prest, eta argi dugu benetako eta edukiak dituen negoziazio bat bilatzen badugu, langileon mobilizazioaren bitartez bakarrik lortuko dugula.

 

 

 

Lan istripu hilgarrien gorakada eskandaluzkoa salatzen dugu

admin
-
0
Lan istripu hilgarrien gorakada eskandaluzkoa salatzen dugu

Gaur azaroak 8, langile baten heriotzaz hitz egin behar dugu berriz. Nafarroan aurten izan den 21. lan heriotza izan da, eta jadanik 64 dira Euskal herrian 2018an lanean hildako langileak.

Atzo Sarrigurenen, 52 urteko langile batek bizitza galdu zuen, hustuketa -lanetan ari zen dumper batek harrapatuta.
LAB sindikatutik, lehenik eta behin, langilearen senitarteko, lagun eta lankideei gure elkartasuna eta babesa adierazi nahi diegu.

Istripu hilgarriak ikaragarri handitzen ari dira, lan baldintzak gero eta prekarioagoak direlako, patronalak bere irabaziak langileen osasun eta bizitzaren aurretik jartzen dituelako. Administrazioak, Lan Ikuskaritzak, Fiskaltzak, ezin dute ez ikusiarena egiten jarraitu, pausu bat aurrera emateko ordua da, arduradunak seinalatzea eta ordain dezatela exigitzen dugu. Langabeziaren jaitsieraz hitz egiten duen bitartean, prekarietatea erabiliz langileak hiltzen jarraitzen dute.

Lan istripuak ez dira kasualitatez ematen. Erantzuleak dituzte eta, horrela izanik, instituzioei eta gainontzeko eragileei lanean ematen diren istripuak ekiditeko, beharrezko diren politika errealak martxan jar ditzaten, aldi berean Lan Ikuskaritzaren eskumena Nafarroan izateko eskaera egiten dugu, kontrola eta zaintza bermatzeko behar den bezala.

LAB sindikatutik lanean eta borrokan jarraituko dugu langileon eskubide, segurtasun eta osasunaren alde. Horregatik azken istripua salatzeko, dei egiten dugu langile klaseari, Euskal Herriko gehiengo sindikalak bihar, hilak 9, eguerdiko 12:30ean Iruñeko Lan Ikuskaritzan deitu dugun elkartaratzean parte hartzeko.
 

 

 

Azken hilabeteetan, borrokaren bitartez, 73 akordio lortu ditugu industriako lantokietan enplegua duintzeko

admin
-
0
Azken hilabeteetan, borrokaren bitartez, 73 akordio lortu ditugu industriako lantokietan enplegua duintzeko


LABek agerraldi bat egin du gaur, Bilbon, industriaren egoeraren inguruan. Sindikatuak sektorean azken hilabeteetan egindako ekintza sindikalaren eta hauteskunde sindikaletako emaitza esanguratsuen berri eman du bertan, Garbiñe Aranburu idazkari nagusi eta Eulate Zilonizaurrekoetxea Industria Federazioko idazkariaren eskutik.  


“Garai zailak langileontzat, baita industrian ere. Ez da bidezkoa dagoen aberastasun mailarekin lan munduan langileek pairatu behar dituzten hainbat egoera bizi behar izatea”.

Garbiñe Aranbururen hitzak dira horiek, gaur egindako agerraldian esandakoak. LABeko idazkari nagusiak nabarmendu du sindikalgintza inoiz baino beharrezkoagoa dela, baina ez edozein sindikalgintza. Sistemak negoziazio kolektiboaren muga estuetan eta elkarrizketa sozialeko mahai antzuetan nahi gaituela kateatuta adierazi du, eta horrela ez dagoela lan mundua eraldatzerik. “Horregatik, kontrabotere sindikalgintzaren aldeko apustuan berresten gara”, esan du.

Garbiñe Aranbururen hitzetan, “LABen eredu sindikala berritzea erabaki genuen, aitzindariak izan gara sindikalgintzan horrelako eztabaida bat egiten. Ekintza sindikal klasikoaren topeak gainditu eta eraginkorragoak izatea erabaki genuen. Federazioz federazio erabaki hori praktikan gauzatzen ari gara, baita Industrian ere. Enpresaz enpresa langileak antolatzeari ekin diogu, gako nagusia, lantokietako borrokak indartzeko gaitasuna izatea delako. Lantokietan egindako lanaren ondorioz, aldarrikapenak akordio bilakatzeko gai izan gara. Akordio horiei esker langileek euren lan baldintzak hobetu ahal izan dituzte. 73 akordio lortu ditugu industriako lantokietan”.

Greba, tresna nagusia
LABeko ordezkariek azpimarratu dute greba dela langileok borrokarako dugun tresna nagusiena. Hala, azaldu dute sindikatuak bi premisa nagusiren arabera antolatzen dituela borrokak:

-Patronalak langileoi dagokiguna aitortzeko borroka egin behar dugu. Patronalak, berez, ez du ezer ematen. Patronalari ahalik eta kostu sozial eta ekonomiko handiena eragin behar zaio

-Langileei ahalik eta onura handienak emango dizkien borrokak piztea da gure helburua.

Akordio horiek erdiesteko industriako 41 enpresatan greba edo lanuzte deialdiak izan dira, enpresa handi edo txikiak, egun osokoak edo partzialak, greba luzeak edo motzak.

LABek sinaturiko akordioek gutxieneko batzuk jasotzen dituzte: atzerapauso berririk ez, azken urteetan galdutako eros ahalmena berreskuratu eta KPIaren erreferentzia kontuan izango duen soldata igoera eta lan erreformari aurre egiteko klausulak.

Gutxieneko horiekin batera prekarizazio prozesuari aurre egiteko neurri desberdinak jasotzen dituzten akordioak sinatu ditugu.

LAB hitza eta ekintza delako, jarraitu egingo dugu lantokietan prekarizazio prozesuari mugak jartzen eta ziur gaude hauteskunde sindikalen garai honetan geroz eta gehiago izango direla LAB proiektuarekin bat egingo duten langileak.

Hona hemen gai desberdinetan gauzatutako borroka eta lortutako lorpenetako batzuk:

EMAKUMEEK INDUSTRIAN BIZI DUTEN BAZTERKETA ESTRUKTURALA SALATU DUGU

Soldata arrakalaren kontra borrokatzeko inkestak lantokietan

Kontratazioan ematen den diskriminazioarekin amaitzeko akordioak. Aipagarria Kybsen lorturiko akordioa. Kontratazioen erdia emakumeak izateko konpromisoa

LANETIK ETXERA BIZIRIK ETA OSASUNTSU BUELTATZEKO ESKUBIDEA BERMATZEKO AKORDIOAK 

Aurten jada, 64 langile hil dira lan istripuz. GSHydron, Jeman, Solidus San Andres enpresetako langileen osasuna babesteko akordioak lortu ditugu.

AZPIKONTRATAK

Azpikontrata eta ABLE-tako langileen lan baldintza, soldata eta egoerak ere enpresa nagusiko langileekin batera garrantzia dutela aldarrikatu dugu. Gero eta gehiago dira ABLEak eta azpikontratazioa mugatu edota debekatzen duten enpresa hitzarmenak, edota enpresa nagusiko langileak azpikontratetako langileen defentsan mobilizatu izana. CAFen, hainbat lanpostuen errebertsioa lortu zuten langileek lanuzteen bidez. Gamesa Aoizen ABLEak mugatu ditugu, edo Forjas Iraetan lehen oinarria jarri dugu gutxieneko 1.500 euroko soldata lortzeko.

DISKRIMINAZIO IDEOLOGIKO ETA SINDIKALARI AURRE EGITEKO PROPOSAMENAK

Kontratazio proposamen gardenak aldarrikatu ditugu; Volkswagenen edo Mercedesen, adibidez.

ENPLEGUA MANTENTZEKO AKORDIOAK

Badira lanaldi murrizketa jasotzen duten akordioak, Arcelor Olaberriakoa, Bruss edo OWLn bezala. Badira etorkizuneko kaleratzeak ekiditeko enplegu bermea jasotzen duten akordioak, Teknikerren edo Kauxoten lortutakoa bezala. Eta badira errelebu kontratua jasotzen duten kontratuak, SNA Europen bezala.

DESLOKALIZAZIOARI AURRE EGITEKO BORROKA

Multinazionalen deslokalizaizo mehatxuen aurrean, proiektu industrialen defentsarako eta enpleguaren defentsarako aldarrikapenak egitera eraman gaitu, Gasteizko BSHko borrokan egin dugun bezala.

 

 

 

Elkarkideko zuzendaritzak langileen aldarrikapenak onartu ditu

admin
-
0
Elkarkideko zuzendaritzak langileen aldarrikapenak onartu ditu

Lorpen gutxiko urte bateko negoziazioen ondoren, 13 eguneko lanuzte eta mobilizazioen ostean, hainbat orduko negoziazio mahaiaren bilera eta gero, aurreakordioa lortu dugu enpresarekin.

Atzoko egunean langile asanblada burutu dugu eta aurreakordioari babes handia helarazio dio langileriak. Honakoak izan dira bozketen emaitzak:

• Bai: 60
• Ez:10
• Txuri: 9
• Baliogabe: 1
• Partehartzea: 80 langile

Aurreakordioaren puntuak hauek dira:

• Iraupena: 4 urte. 2017, 2018, 2019 eta 2020.

• Soldata igoera:
◦ Enplegu zentru berezian: 2018ko urtarrilak 1etk aurrera, iraupena bitarte.
▪ Behargin eta laguntzaileak: AurrekourtekoKPI+%1
▪ Beste guztentzat: Aurreko urteko KPI +%0,5

◦ Zentru okupazionala: Jardunaldi jeitsierak 2018 eta 2019an.
▪ 2017: 1650 ordu.
▪ 2018: 1642,5 ordu.
▪ 2019-2020: 1635 ordu.

• Gehigarriak: Berreskurapena enplegu zentru berezian azarotk aurrera.
◦ Aterpez kanpoko langileak:
▪ 2018: 15€ (14paga)
▪ 2019: 18€ (14paga)
▪ 2020: 22€ (14paga)
◦ Industriagune barnekoak: 15€ (14 paga)

• Aldi baterako ezintasunaren osagarria:
◦ Enplegu zentru berezian: Lehen hiru egunen osagarri igoera %50tik% 70ra.

• Malgutasuna:
◦ Enplegu zentru berezia: 70ordutatik 40ra jaiitsi.
◦ Zentru okupazionala: 27 ordutatik 20ra jaitsi.
• Azaroan izandako hiru lanuzte partzialen soldatak ez kentzea.

Oso balorazio positiboa egiten dugu lortutako akordioaz. Elkarkideko langileriak borrokaz eta jarrera eredugarri bat erakutsiz, hitzarmen duin bat irabaztea lortu du. 13 egun luzez, euri, hotz eta eguraldi kaskarrari aurre eginez, oztopoak oztopo, ilusioz eta irudimenez lortu dute.

 

 

 

Tecuni enpresako zuzendaritzaren jokabide anti-sindikala salatu dugu

admin
-
0
LAB eta ELA sindikatuok Tecuni enpresako zuzendaritzaren jokabide anti-sindikala salatu dugu, 40 langileren etorkizuna kolokan jartzeagatik eta haiengana zuzentzeagatik langileen ordezkariekin bildu gabe.

Tecuni S. A. Ortuellako Abra Industrial enpresagunean dago, eta 228 langile ditu. Zerbitzu elektrikoen mantenimenduaz arduratzen da hogeitik gora udaletan; Bilbo, Arrasate, Bermeo eta Zierbenako udaletan, kasu. Horrez gain, enpresak ere lan egiten du Iberdrola, Bizkaiko Foru Aldundia, Red Electrica España, Osakidetza, Ferrovial eta zenbait unirbertsitatentzako.

Langileek lau orduko lanuzteak egin zituzten joan den urriaren 30ean, lan baldintza prekarioak salatzeko eta bi langileren kaleratzearen kontra.

Astebete geroago, langileen ordezkariekin bildu gabe, Tecuniko gerentzia Omexon Bilbaoko unitateko langileei zuzendu zitzaien (langile grebalariak), eta mehatxatu zien Iberdrolarekin akordio markoa hautseko aukerarekin, 40 familien etorkizuna kolokan jarriko lukeen erabakia izanik.

Hori dela eta, LAB eta ELA sindikatuok zuzendaritzaren jokabide anti-sindikala salatu dugu, baita langile eta euren familiarekiko ardura falta kritikatu ere. CCOO eta UGTren jarrera ere salatu dugu, enpresaren gerentziak hartutako erabakiak babesteagatik eta ezer ez egiteagatik langileen alde.

 

 

 

Pobrezia eta bazterketarik gabeko herri bat aldarrikatuko dugu Barakaldon

admin
-
0
Pobrezia eta bazterketarik gabeko herri bat aldarrikatuko dugu Barakaldon

Duela sei urte, Amaia Egañak bere buruaz beste egin zuen Barakaldon, etxegabetua izaterakoan. Murrizketek hildako lehen heriotza izan zen. Bada, bihar ostirala, azaroak 9, elkarretaratze bat egingo dugu hainbat eragilek, Amaia Egaña gogoratzeko eta pobrezia eta bazterketarik gabeko herri bat aldarrikatzeko. Barakaldoko Justizia Jauregian elkartuko gara, 10:15ean.


 

 

 
1...710711712...1,586Page 711 of 1,586

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus