2026-02-22
Blog Page 680

EAEko eskola jantokietako enpresa pribatuetako langileek greba egingo dute otsailaren 26an, hitzarmenaren alde

admin
-
0
EAEko eskola jantokietako enpresa pribatuetako langileek greba egingo dute otsailaren 26an, hitzarmenaren alde

LAB, ELA, CCOO eta UGT sindikatuok deituta, grebaren bidez jakinarazi nahi diete euren lan baldintzen gainbeheraren enpresa arduradunei eta okerrera egin duen zerbitzu publikoaren ardura duen Jaurlaritzari merezi duten hitzarmena lortzeko borrokatuko dutela, eta jasotzen duten erantzunaren arabera mobilizazioak areagotu egin daitezkeela.

Hauxe da langileek, gaur egindako agerraldian, irakurri duten oharra:

Azken bi urteetan negoziazio-mahaia hamabost bider bildu ondoren, eta EAE guztian batzar bateratuak egin ondoren, kudeaketa zuzeneko eskola-jantokietako mahaian ordezkaritza dugun sindikatuok gure hausnarketaren berri eman nahi diegu kolektiboari zein euskal jendarte guztiari.

Patronalek mahai gainean jarri duten proposamenak ez ditu aintzat hartu gure aldarri nagusiak, ez eta hitzarmen honen helburu izan dena ere: HOMOLOGAZIOA LORTZEA Hezkuntza saileko sukaldeetako langileekiko.

Enpresen proposamenak honako puntuak jaso ditu:

Soldata igoera portzentualak, baina homologazioarekin loturarik gabeak. Igoera hauekin 2015eko homologazio maila berean geratuko ginateke. Ez dugu aurrera egiten; pobrezian kateatuta jarraitzen dugu.

Ez dizkiete atzerapenak ordaindu nahi kolektibo guztiari; areago, ausartzen dira esatera inork ez dituela kobratuko, honetarako baldintza gisa jarri nahi baitute plantilla egoera aktiboan egotea; haatik, jakina da sektore honetan udan langile guztiak langabezian egoten direla.

Beste puntu batzuk enpresen arabera hobekuntzak dira, baina benetan fede txarraren emaitza dira, lan-hitzarmenaren testua eta asmoa nahasten baitute. Areago, diru-goseak ez du mugarik: aurreko hitzarmenean lortutako akordioak ukatu eta orain eskaintza bezala aurkezten dizkigute. Hots, BAGENEUKANA saldu nahi digute berriz.

Homologazioarekin batera beste aldarri sindikal garrantzitsuak ukatzen dizkigute:

Ez dute aipatzen ratioak hobetu behar direla; alabaina, gero eta haur gehiagok dituzte dieta bereziak, eta horrek arreta eskaintzeko denbora gehiago eskatzen du.

Gutxieneko lanaldirik ere ez dute finkatu nahi, eta kontratu batzuk egunean 50 minutukoak dira…

Ez dute nahi langileek beren lankideak ordezkatzerik; enplegu egonkorra ez dute sustatu nahi, ez dutelako aldizkako finkorik aitortu nahi.

Ez dute nahi langileen prestakuntza orduak gehitzerik, ez eta zerbitzua hobetzeko orduak ere.

Eta gainera negozioa egin nahi dute lanaldi aldaketekin, horrek lanaldi trinkoen aplikazioa eta murrizketak baitakartza berarekin.

Ez dute gure eginkizunez hitz egin nahi; hauek gero eta gehiago dira egunetik egunera, baina ez digute denbora gehiago ematen. Esaten dute gure eginkizuna dela “jantokiaren garapen egokirako beharrezko den edozein funtzio”; hau 2000 urtetik hona mantendu da, eta horren bidez Eusko Jaurlaritzak hezkuntzan egin izan dituen murrizketa guztiak jantokietako enpresa pribatuetako langileek osatu dituzte…

Enpresen aldetik arduragabekeria muturrera eramaten dute, esanez gai hauek ez direla beren eskumenekoak, eta Eusko Jaurlaritzari dagozkiola. Beren langileak babesten ez badituzte zein da enpresa hauen rola? Lizitazioak kobratzea? Iruzur egitea?

BALDINTZA AGIRIAK

Gainera, laster argitaratuko dira baldintza agiri berriak. Ez dakigu zer nolakoak izango diren, baina badakigu hau:

• Eusko Jaurlaritza oso bide okerretik abiatu da. Guraso-elkarteen esku jantokien kudeaketa uzteko aukera aipatzea aldez eta moldez inolako fundamenturik gabe egin dute.
• Gure artean zalantza eta kezka erabatekoa da, ez baitakigu gure lanpostuekin benetan zer gertatuko den.

MOBILIZAZIOAK

Horregatik, asanbladak deitzea erabaki genuen, informazioa emateko, eztabaidatzeko eta babes gabezia honek merezi duen erantzuna erabakitzeko.

Asanblada hauetan aho batez erabaki dugu kolektibo honen mobilizaziorik gabe ez dugula ezer lortuko. Ez hitzarmen onik, ez eta Eusko Jaurlaritzak aintzat hartzerik ere.

Horregatik, datorren otsailaren 26an eskola jantokietako enpresa pribatuetako langileok greba egingo dugu. Egun horretan hasiko dira mobilizazioak; hauen bidez jakinarazi nahi diegu gure lan baldintzen gainbeheraren arduradunei (enpresak) eta okerrera egin duen zerbitzu publikoaren ardura duen Jaurlaritzari erabakita gaudela merezi dugun hitzarmena lortzeko, eta jasotzen dugun erantzunaren arabera mobilizazioak areagotu egin daitezkeela.

 

 

 

Gestamp taldeko bi enpresetako langileen borrokek bat egingo dute bihar

admin
-
0
Gestamp taldeko bi enpresetako langileen borrokek bat egingo dute bihar

Borrokan dauden Gestamp taldeko bi enpresetako langileek bat egingo dute bihar, GTE enpresaren aurrean, Erandion. GTHn atzo hasi zuten 15 egunetako greba, gaur Bilboko SPRIren egoitzaren aurrean egin dute mobilizazioa -irudian- eta bihar GTEren egoitza aurrean elkartuko dira GTOko langileekin. GTOkoek, aldiz, 2 ordutako lanuztea egingo dute bihar txanda bakoitzean, 12:00etatik 16:00etara guztira. Bi enpresetako langileak Gestamp taldeko gainontzeko enpresetakoen baldintza berdinak nahi dituzte, eurenak okerragoak baitira antzerako lanak egiten dituzten arren.
 

 

 

Egogain helduen egoitzako langileek lan baldintza duinak aldarrikatu dituzte Eibarren

admin
-
0
Egogain helduen egoitzako langileek lan baldintza duinak aldarrikatu dituzte Eibarren

Egogain helduen egoitzako langileak kalera irten dira berriro. Eibarren mobilizatu dira, eta abian duten sinadura bilketarekin jarraitu dute lan baldintza eta arreta hobeago baten defentsan. Bihar mobilizazio gehiago egingo dituzte. 10:30ean, Informazio gunea jarriko dute Urkizun; eta elkarretaratzeak egingo dituzte Urkizun bertan, Amañan eta Egogainen, 11:45ean, 14:20ean eta 14:30ean, hurrenez hurren.
 

 

 

DIA% supermerkatuak eta TWINS-eko itxiera EEEak salatzen ditugu, Euskal Herrian ehundaka lanpostu suntsitzea ekarriko dutenak

admin
-
0
Enpresa-batzordeak berehala batzea exijitzen dugu, egoerari erantzun bateratua emateko.

LAB sindikatutik Grupo Twins (DIA, SA eta Twins Alimentación S.A enpresek osatutako taldea) itxiera EEE bati ekiteko asmoa salatu nahi dugu. Aipatu espedienteak Espainiako estatuko 2100 langileri eragingo dio.

Pasa den astean, e-mail bidez eta hedabideei emandako informazio bera errepikatuz izan zuten LAB sindikatuko delegatuek enpresaren asmoen berri.

Ezaguna da enpresa honetako langileak esplotazioa eta prekarietate erabatekoan bizi direla. Urte asko daramatzagu egoera hau salatzen Bizkaia eta Gipuzkoako enpresa-batzordeetan, eta azken hilabeteetan baita kalean ere, jarraipen handiko greba deialdiekin.

LAB sindikatutik, gogor salatu nahi dugu milaka eta Euskal Herrian ehundaka lanpostu txikituko dituen basakeria hau. Enpresa bera izan da, bere politika ekonomikoarekin egoera honetara eraman gaituena, bere interes merkantilista eta internazionalak gainjarri baititu beti, eta partida horretan, langileen eskubide eta lan- eta bizi-baldintzekin jolastu du.

LAB sindikatuan EEE honek izango dituen ondorio dramatikoak baldintzatzeko ahaleginetan ari gara, eta ez dugu baztertzen mobilizaziei ekitea, kontuan izanda Euskal Herriko familia askorentzat izan dezakeen garrantzia.

Horregatik, enpresa-batzordeak berehala batzea exijitzen dugu, egoerari berehalako erantzun bateratu eta erabatekoa emateko.

 

 

 

Hegoaldeko Tren Saihesbidearen egungo proiektua gelditzea eta Ezkerraldea eta Meatzaldeko eragile guztien artean eztabaida prozesua abiatzea eskatzen dugu

admin
-
0
Hegoaldeko Tren Saihesbidearen egungo proiektua gelditzea eta Ezkerraldea eta Meatzaldeko eragile guztien artean eztabaida prozesua abiatzea eskatzen dugu

Egungo proiektua berehala gelditzea exijitzen dugu eta alternatiba guztiak kontuan hartzeko eskatzen dugu, orain arte aurkeztu direnak baina baita etorkizunean aurkeztu daitezkeenak ere.

Eusko Jaurlaritzak eta Sustapen Ministerioak aurkeztutako eta bultzatutako Hegoaldeko Tren Saihesbidearen proiektuak eragin ekonomiko, sozial eta natural larriak ditu; horregatik, hain zuzen ere, gure gaitzespena adierazi nahi diogu. Eragin ekonomiko larriak ditu 454 milioi euroko kostea izango duelako bere lehenengo fasean, diru kantitate hori seguruenik handiagoa izango delarik proiektuak aurrera egiten duen heinean. Eragin natural larriak ditu, Barakaldoko natur gune garrantzitsuenak, Gorostiza/El Regato eta Zubileta/Kastrexana, kaltetuak ikusiko direlako, baita Ezkerraldea eta Meatzaldeko beste hainbat landa eremu; eta azkenik, eragin sozial larriak ditu, proiektuak ez dituelako Ezkerraldeak eta Meatzaldeak dituzten beharrak asetzen eta ez diolako bizi duten larrialdi egoerari aterabiderik eskaintzen.. Eskualde hauek desindustrializazio prozesu larria bizi dute, langabezia tasa handiak eta aktibitate ekonomiko eza direlarik horren adierazpen nagusiak. Hau guztia alde batera utzita ere, Eusko Jaurlaritzak eskainitako erabilpen datuak ikusirik, proiektua gaur egun planteatuta dagoen bezala, honekin aurrera jarraitzeak ez du justifikaziorik.

Horregatik guztiagatik, egungo proiektua gelditzea eskatzen dugu eta Ezkerraldea eta Meatzaldeko eragile guztien artean eztabaida prozesu bat abiatzea, horien artean, agente sozio sindikalak. Alternatiba guztiek aukera berdinak izan behar dituzte herritarren aurrean azalduak eta defendatuak izateko, baita eragile inplikatu guztien artean eztabaidatuak izateko ere. Gainera, ezinbestekotzat jotzen dugu herri bezala makroproiektuan inguruko eztabaida integral bat ematea. Horrelako proiektuek, lehen aipaturiko ikuspuntu ekonomiko, sozial eta naturalak kontuan hartzen baditugu, Euskal Herria jasangarria ez den egoera batera eramaten ari dira.

Azpiegituren arloan egingo litzateek edozein proiektuk, izan trenbidea edo bestelakoa, besteak beste elementu hauek barnebildu beharko lituzke:

• Suspertze ekonomikoa bultzatuko duen plan integral baten parte izatea. Ezkerraldea eta Meatzaldeko industriaren etorkizuna kontuan hartu beharko luke (adibidez, egun mahai gainean dagoen proiektuak ez du ACBrekin inongo konexiorik planteatzen, enpresa honen merkantziek trenez garraiatzen diren %25a suposatzen dutenean) baita garapenerako eredu integrala ere. Gainera, enplegu publikoak eta babes sozialeko neurri bereziak plan integral honen parte izan beharko lirateke.

• Kontuan hartzea hirigintzan eta ingurumenean izango lituzkeen eraginak. Bizigarriak izango diren herriak, auzoak eta hiriak behar ditugu. Ezkerraldea eta Meatzaldeako ingurumena eta hirigintza errespetatzea eta hobetzea ezinbesteko baldintza da, baita eskualde horietako langileon bizi baldintzak hobetzea.

• Kalitatezko garraio publiko eta komunitarioak bultzatzea. Bilbo Metropolitarreko garraio publikoak berritu eta indartu behar dira, mugikortasunean aurrerapausoak eman ahal izateko. Horregatik, gaur egun martxan dauden tren sareek inbertsioa eta hain aldeko apustu erabakigarriak behar dituzte.

HTSaren gaur egungo proiektuak aurretik aipaturiko baldintzak betetzen ez dituela uste dugu; gainera, ez da Ezkerraldea eta Meatzaldeako herritarrekin eta agente sozio sindikalekin kontatu. Horregatik, LAB sindikatuak gaur egungo proiektua berehala gelditzea exijitzen du eta alternatiba guztiak kontuan hartzeko eskatzen du, orain arte aurkeztu direnak baina baita etorkizunean aurkeztu daitezkeenak ere. Edozein kasutan, langileon beharrizan sozialak, eskualdeetako etorkizun ekonomikoa, ingurune naturalal eta hiriguneak kontuan hartzea edozein proiektu egikaritzeko baldintzak izan behar dira.
 

 

 

Erregimena kalean zein hautesontzietan garaitzea da gakoa, burujabetzan eta aldaketa sozialean sakontzeko Nafarroan

admin
-
0
Erregimena kalean zein hautesontzietan garaitzea da gakoa, burujabetzan eta aldaketa sozialean sakontzeko Nafarroan


Azken asteotako Nafarroako gertakarien aurrean, LAB sindikatuak agerraldi bat egin du Iruñean, aldaketaren eta egoera soziopolitikoaren inguruan. Hain zuzen ere, sindikatuak, herritar eta eragile ugarik bezala, kezkaz dakusa azken asteotan Nafarroan sortutako testuinguru nahasia. Beharrezkoa da energia, ilusio eta determinazioa berreskuratzea, aurrean dugun erronkari eusteko: Erregimena garaitzea, hala kalean nola hautesontzietan, burujabetza eta aldaketa sozialean aurrera egiteko.  


Nafarroan aldaketa instituzionala eman zenetik, LAB sindikatuak borrokan jarraitzeko beharra aldarrikatu du behin eta berriz, duela lau urteko aldaketa instituzionala sakoneko aldaketa sozial eta politikoan gauzatu zedin. Gure kontrabotere sindikal posiziotik, dialektika eraikitzaile bat garatu dugu, norabide bikoitzean aurrera egiteko asmoz: langileriaren lan eta bizi baldintzen hobekuntza; eta Nafarroaren erabateko demokratizazioa, nafar herritarrok dagozkigun gai guztien inguruan erabaki ahal izan dezagun. Ildo honetan, adierazpen bat osatu dugu, eta gaurko agerraldian eman dugu ezagutzera, gure posizioa adierazteko. 

LABeko idazkari nagusiaren ondoko Igor Arroyok eta LABeko Nafarroako bozeramaile Imanol Karrerak irakurri dute adierazpena; haien ondoan egon dira Zerbitzu Publiko, Zerbitzu Pribatu eta Industriako federazioen arduradunak eta Sakana-Mendialdea eta Erdialde-Erriberako eskualdeetako arduradunak.

 

 

 

Elkarrizketa sozialaren izaera antidemokratikoa salatu dugu Lakuan bertan, mahaiaren lehen bileraren aurretik

admin
-
0
Elkarrizketa sozialaren izaera antidemokratikoa salatu dugu Lakuan bertan, mahaiaren lehen bileraren aurretik

Delako elkarrizketa sozialaren mahaiko lehen bilera egin aurretik, LABeko 30 kide inguruk protesta-ekintza egin dute Eusko Jauralritzaren egoitza nagusian bertan, Gasteizen, mahaiaren izaera antidemokratikoa eta bere helburuak salatuz, langileak prekarizatu eta pobretzea ahalbidetzen duelako. Urkulluren politikak eta Confebasken planak onesteko espazioa da horrelako elkarrizketa sozialeko mahaia.

“Langileoi iruzurrik ez, demokrazia” lelopean egin dugu protesta Lakuan. Xabier Ugartemendia ekintza sindikala eta negoziazio kolektiboko idazkariak honakoa adierazi du: “Mahai negoziatzaile hau iruzur hutsa da. Lehenik eta behin, ez duelako langileen egoera kontutan hartzen. Eta bigarrenik, ez duelako ezer egin nahi langileen baldintzak hobetzeko. Mahai honek beste helburu bi ditu, zehatzak, Confebasken planak garatzen jarraitzearena, lan-zentroetan prekarietatea hedatzen jarraitzearena eta Urkulluren politika neoliberalak zuritzea. Hori gutxi balitz esan beharra dago mahai antidemokratikoa dela, ez duelako kontutan hartzen langileek ordezkaritza sindikala. Gehiengo sindikala baztertu egiten gaituzte eta gutxiengo sindikalarekin lortu nahi dituzte adostasunak. Eta hau zergatik? Gutxiengo sindikala osatzen duten sindikatuek sindikalismo otzana praktikatzen dutelako eta askoz errazagoa delako hauekin akordioak lortzea prekarietatea zabaltzen jarraitzeko eta politika neoliberalak zuritzeko”.

LABek protesta egin du Eusko Jaurlaritzaren egoitza nagusian bertan, mahai horrek lan baldintzak eta soldata duinak bermatzeko helbururik ez duela agerian uzteko. Izan ere, EAEn ezarritako elkarrizketa sozialaren helburua patronalaren politikei eta Eusko Jaurlaritzaren politika publikoei zilegitasuna ematea da, gehiengo sindikalei muzin eginez.

Eusko Jaurlaritzak, Confebask-ek, CCOOek eta UGTk delako elkarrizketa sozialaren lehen bilera izan dute Gasteizen, joan den urtarrilean Eusko Jaurlaritzaren Gobernu Kontseiluak elkarrizketa soziala instituzionalizatzeko dekretua onartu eta gero. Bada, bileraren ordu berean, LABek Eusko Jaurlaritzaren egoitza nagusira bertara eraman ditu bere aldarrikapenak eta agerian utzi du, berriro ere, mahai horrek patronalaren eta Eusko Jaurlaritzaren politikei zilegitasuna emateko baizik ez duela balio. Lakuan egindako protestan, Lan Harremanetarako eta Babes Sozialerako Euskal Esparrua aldarrikatu dugu.

 

 

 

Administrarien Taldeak, lanpostuen balorazioan euren aldarrikapenak kontutan hartzea eskatu dio Donostiako Udalari

admin
-
0

Aldarrikapen justu baten alde borrokan ari da Donostiako Udaleko Administrarien Taldea. Bi urte daramatzate mobilizazioak egiten Udaleko Gobernu Taldearen inongo interesik piztu gabe eta harremanik izan gabe.

Une honetan, lanpostuen balorazio prozesua aurrera doa. Prozesu honetan euren aldarrikapenak aztertzea eskatu dute. Talde feminizatua dira eta horrek, bere sorreran, lanpostu horri zegokion a baino maila txikiago ematea ekarri zuen, eta euren lansarien berrazterketan eragina euren kalterako izan du. Egoera bideratu ez denez, mobilizazioekin aurrera egingo dutela adierazi dute.

Euren lan baldintzak erabakitzen diren foroetan jarriko dute euren ahalegina, Balorazio Batzordean eta Udalbatzan, besteak beste. Balorazio batzordean euren soldataren baldintzak markatuko dira eta Udalbatzan, hauek onartu edo ukatuko dituzten arduradunak bilduko dira.

Udal Gobernuko taldeetako ordezkariekin egin dituzten bileretan, gutxiespen sentsazioarekin atera dira eta ez dute inongo enpatiarik ikusi.

Ez dute euren aldarrikapenetan etsiko. Mobilizazioak, aproposak diren egoera eta lekuetan egingo dituzte euren presioa sendoagoa izan dadin.  

 

 

Arabako metalgintzako arazo nagusiei erantzun behar zaiela aldarrikatu dugu

admin
-
0

Gaur, otsailak 11, Arabako Metalgintzako Mahai Negoziatzailea batzartu da eta sindikatuok SEAren proposamena baloratu dugu. LABen ustez, proposamen horrek ez die inolaz ere erantzuten sektorearen arazo nagusiei. Honen aurrean, gure proposamena berresteaz gain, mobilizazioekin hasiko gara. Otsailaren 13an egingo dugu lehena, Gasteizen, SEAren egoitzaraino.

Gaurko bileran sindikatuok SEAk hitzarmenerako proposamenaren balorazioa egin dugu. Sindikatu guztion adostasuna erabatekoa izan da proposamena baztertzeko, arrazoi desberdinak direla kausa. LABen ustez, prekarietatea iraunkortzea bilatzen du eta ez die inolaz ere erantzuten Arabako Metalak dituen arazo nagusiei:

– Soldata baxuak eta lanaldi altua.
– Azpikontratazioa.
– Aldi bateko kontratazioa.
– Emakumeen diskriminazioa
– Osasun eta segurtasun falta lanean.
– Lan erreforma eta estatalizazioa.

Bileran zehar, SEAk argi utzi du gai batzuetan ez dela inondik inora mugituko, lanaldian adibidez, eta horrek enplegua sortzea eta bizitza pertsonalarekin kontziliatzea oztopatzen ditu. Horretaz gain, SEAk ez du konpromiso argirik hartu nahi metalgintzako enpresetan emakumeen kontrako diskriminazio egoerak aztertzeko eta ezabatzeko. LABen ustez, bereziki larria da gaur egun gai honetan hitz hutsaletan gelditzea eta konpromisorik ez hartzea.

Beraz, LABek Arabako metalgintzaren arazoei erantzungo dien hitzarmenak aldarrikatzen ditu, bai sektore mailan baita enpresetan ere, eta horretarako, mobilizazio bat burutuko du asteazkenean, otsailaren 13an, goizeko 12:00etan Aldabe Gizarte Etxetik SEAren egoitzaraino, “Arabako metalgintzan, hitzarmen duinak” lelopean.
 

 

 
1...679680681...1,594Page 680 of 1,594

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus