AHTrik EZ Araba Plataformatik "AHT: Zulora garamatzan trena" hitzaldia antolatu dute biharko, maiatzak 8, asteazkena, Aldabe Gizarte Etxean, 19:00etan. Bertan, EKOPOLeko David Hoyos-ek alde ekonomikoa jorratuko du, Aramaioko alkatesa den Lierni Altuna inpaktuaz arituko da, eta, azkenik, AHTrik EZ Araba Plataformaren izenean Iñigo Leza-k gaur egungo egoera azalduko du. Hitzaldi hau, maiatzaren 18an, 12:30ean, Gasteizko San Anton plazatik abiatuko den manifestazioaren atarian kokatua dago.
Funtzio Publikoan greba izango da ostegunean, Ipar Euskal Herrian, eta LAB sindikatuak mobilizazioetan parte hartzeko deia egin du. “Uda baino lehen, Frantziako Gobernuak ‘Funtzio Publikoaren aldaketa plantoa’ bozkatu nahi du ministroen kontseiluan. Mobilizatzeko garaia dugu. Proiektu horrek Funtzio Publikoa hautsi nahi du, eta hortan langileak zein jendarte osoa kaltetuak izango gara”, adierazi dugu. Baionan, 10:30ean abiatuko da manifestazioa, Santa Ursula plazatik.
Macronen Gobernuak bultzatutako zerbitzu publikoen suntsitze bidea salatu nahi dugu bere orokortasunean. Izan ere, medio gero eta gutxiagorekin lan egin behar da, lan baldintza txarretan. Kontratu prekarioak errazten dituzte, irakasleen estatutua berrikustearen alde daude, zerbitzuak gero eta gehiago pribatizatu nahian daude, indize puntua blokaturik utzi nahi dute, eta postu batzuk kendu, emakume eta gizonen arteko berdintasun ezaren aurrean benetako lanik ere ez dute abiatu…
Euskal Herrian halakorik ez dugu nahi. Horri aurre egiteko, bertan behar ditugun tresnak sortzelp ahalmena dugu, Macron legea hemendik kanpo geldi dadin. Zerbitzu publikoetan ere eragin dezagun, ddenok elkarrekin interprofesional moduan, eta bertan antolatu gaitezen. LABek berriz dio: bertan erabakitzea eta bertan antolatzea posible da!
Enpleguaren kalitate kaskarrak eta prekarietateak bere horretan jarraitzen dute, Hego Euskal Herrian apirilean erregistratutako langabeziak behera egin duen arren. Hiru kolektiboren egoera nabarmendu nahiko genuke, emakumeak, 45 urtetik gorako langabeak eta gazteak.
Emakumeei dagokienez, aipatu beharrekoa da langabeen gehiengo direla (%57,7). Eta lana dutenen artean, lanaldi partzialek askoz presentzia handiagoa dute gizonekin alderatuz gero, egoera honek dakartzan ondorio guztiekin.
Langabeen adinari erreparatzen badiogu, 45 urtetik gorakoena da talderik zabalena, %50,57rekin, eta ondoren datoz 30etik 44 arterainokoa (%33,73), 25etik 29rainokoa (%8,18) eta 25 urtetik beherakoena (%7,40). Enplegua lortzeko zailtasunik handiena duen kolektiboko kideek, 45 urtetik gorakoek, osatzen dute erregistratutako langabetuen erdia baino gehiago, kolektibo bereziki zaurgarria eta enplegua aurkitzeko itzelezko zailtasuna dutenak.
Kontratazioari dagokionez, nabarmen geratzen da enpleguaren kalitate eskasa, prekarietateari ateak zabaltzen dizkiona. Izan ere, martxoko kontratuak aldi baterakoak izan ziren produkzio arrazoiengatik (%48,5) eta lan edo zerbitzuagatikoak (%26,3). Kontratu mugagabeak, aldiz, %5,2an kokatu ziren.
Lan merkatuaren egoera kaskar honek neurri larriagoan eragiten die gazteei, kalitate txarreko enplegua, prekarietateak goitik behera baldintzatua, soilik dutelako eskura.
Hortaz, erregistratutako langabeziaren jaitsierak ez du estaltzen kalitate txarreko enpleguan eta aldi- baterakotasunean oinarritutako lan-merkatua, bizitza duina aurrera eramatea zailtzen diona milaka eta milaka langileri. Prekarietatea sustatzen duen herri batek ez du etorkizunik, ez baitu bizitza duina izateko aukerarik bermatzen.
Hezkuntza Departamentuak LOMCE proba "deskafeinatuak" aplikatzeko asmoa dauka, berriz ere, kanpotik inposatua eta erabat atzerakoia den legearen ildoak gure hezkuntzara ekarriz.
Izan ere, LABen ustez, bide propioa garatzeko ausardia behar dugu une hauetan. Horrela, LABek hezkuntza burujabetzaren bidean herri gisa elkarlanean ebaluazio eredu propioa osatzeko determinazioa adierazi nahi du askotan, bai eta gaia jorratzeko materialak eta foroak sortu ere. Izan ere, beharrezkoa dugu bestelako ebaluazio sistema bat, non ikaslea ezezik, baliabideak eta lan baldintzak, metodologiak, formazioa, azpiegiturak, eskola, eta finean, sistema guztia ere baloratuko den; hobekuntza, ekitate, aukera berdintasunean oinarrituz eta are garrantzitsuago dena, bide horretan aurrera egiteko plan eta neurri zehatzak eskainiko dituena. Eredu berri horren eraikuntza, hezkuntza komunitate guztiaren parte hartzean oinarrituko da, ebaluazioaren afera, ikuspegi poliedrikotik landu behar baitugu.
Kanpo frogen aurkako jarrera aktiboa
LABek probak egitea egokitu zaien ikastetxeetako hezkuntza komunitateari azterketa hauen kontrako jarrera aktiboa hartzera gonbidatzen du eta ekimen aldarrikatzailerik eginen dituzten ikastetxeak hauek publiko egin ditzaten. Hezkuntza Departamentuak entzun dezala beste behin, Nafarroako Hezkuntza komunitateak ez duela LOMCEren flexibilizazio ezta moratoriarik nahi. Behingoan gure Hezkuntza Sistema Propioaren bidean urratsak eman ditzala.
Halaber, Hezkuntza Komunitateari gonbitea luzatu nahi diogu proba hauen inguruan hausnarketa egin dezan eta ahalik eta adostasun handienarekin erabaki kontsekuenteak har ditzan.
LABek, negoziazio mahaietan maiz eskatu bezala, Hezkuntza Departamentuari komunitateko eragileekin elkarlanean LOMCEren aurrean estrategia bateratua adostu dezala eta ebaluazio hezitzaile eredu propioaren bidean eztabaida ireki dezala galdegin nahi dio.
LABek bestelako ebaluazio eredu berri baterantz urratsak ematen jarraitzeko hitza berresten du. Ebaluazio hezitzailearen bidean sakondu eta eguneroko hezkuntzaren errealitatea eraldatzeko tresnak sortuz.
Venezuelaren burujabetza eta bakearen defentsan, eta Estatu kolpe saiakeraren kontra, kalera irten ginen larunbatean Bilbon.
Larunbatean, maiatzaren 4ean, Euskal Herriko hainbat eragile politiko sindikal eta sozialek deituta, Venezuelaren burujabetza eta bakearen defentsan, eta Estatu kolpe saiakeraren kontra, kalera irten ginen Bilbon. Deitzaileen artean Gobernuz Kanpoko Erakunde desberdinek, eragile sozialek, CCOO, EHNE Bizkaia, ELA, ESK, Etxalde, Hiru, LAB eta Steilas sindikatuek eta EH Bildu, Antikapitalistak, Ezker Anitza,-IU, PCE-EPK eta Podemos bezalako alderdi politikoek deitu zuten.
Manifestazioaren bukaeran irakurritako komunikatuan, antolatzaileok kolpe saiakeraren ondoren sortutako egoerarengatik gure kezka adierazi genuen. Kanpo injerentzia honek Venezuelako herria muturreko egoera batera eramatea du helburu, eta biolentziaren gorakadak aurrera jarraitzen badu, erregio osoa gerra egoera batetara eraman dezake.
Aipatutako guztiagatik, larunbatean Bilboko kaleetan adierazi genuen bezala, Venezuelako herriaren burujabetzarekiko errespetuaren defentsa egiten jarraituko dugu; hala nola Venezuelako gobernuaren zilegitasun demokratikoaren eta bere erakunde demokratikoen alde. Kanpo injerentzia honek eta gerra ekonomiko, diplomatiko eta mediateko honek Venezuelako herria eta hainbestetan adierazitako borondate politikoa suntsitzeko duen helburua gogor gaitzesten dugu.
Francisco de Goya ikastetxeko jangelako langileen kolektiboak, Cocina Central Goñik kontratatua, greba eguna egin zuen ostiralean, ikastetxeak 2019/2020 ikasturterako eskola-jangelaren ordutegia murrizteko egindako planteamenduaren egunean. Gaur berriro egin dute greba, eta asteazkenean ere hala egingo dute. Astero baloratuko dute grebekin jarraitu ala ez.
Planteatzen den ordutegi murrizketa egunean 40 minutukoa izango litzateke. Hortaz, jantoki zerbitzu osoa egiten 2 ordu eta 10 minutu izan beharrean, datorren ikasturtean ordubete eta 30 minututan egin beharko da lan berdina. Ordutegi murrizketa honekin, ostegun guztietan jardunaldi jarraia egingo litzateke, ostegun arratsaldeetan klaserik izan gabe.
Zerbitzuak egindako murrizketa hau babestu asmo dituen kolektiboaren kaltetan izango litzateke, hau da, umeen kaltetan. Ikasleei emandako arreta ez litzateke zuzena izango denbora faltagatik. Jangelako denboraren barruan sartzen da jangelara sartzea, esertzea, eskuak garbitzea, jaten irakastea, jateko denbora, kuluxka edo patioa. Jangelak bi txanda izango lituzke ordu eta erdian, eta honi gehitu egin beharko litzaioke jasotzea, garbitzea eta aurreko prozesu osoa errepikatzea.
Zerbitzua okerragoa da, menuaren prezioa berdina da eta langileon soldatak %25 egiten du behera.
Eskola-jangelak ezin du izan umean “aparkatzeko” leku bat. Egiten ari diren lan hezitzailea aldarrikatzen dute langileek. Jarraitu behar da umeei heziketa, ohiturak, errespetua eta baloreak ematen, jangela ikasgeletan bultzatzen den heziketaren hedapena izan dadin.
Gaur LAB sindikatuak, Bizkaiko metalgintzako mahaia 2018ko otsailean lehenengoz elkartu zenetik sektoreko delegatuen 4. asanblada egin du, Bilboko Bizkaiko Abokatuen Elkargoan.
Asanblada honetan orain arte egindakoak birpasatu (kontzentrazioak, manifak, asanbladak afiliatuekin, ageraldiak, mozioak enpresetan…) eta LABek estrategia egokia daramala babestu dute delegatuek.
Urte luzea izan da, gogorra eta lan asko egin badugu ere; argi dugu aurrera begira konfrontazioa hasi eta langile guztiek batera Patronalari metalgintzako hitzarmen duina exijitu behar diogula.
Horregatik, gaur galdera argia egin zaie delegatuei, “prest gaude Bizkaiko metalgintzako hitzarmen duina lortzeko grebak antolatzeko?”. Baiezkoaren aldeko emaitza argia izan da eta horregatik, LABek adierazi nahi du grebarako prest, konpromisoz eta indartsu dagoela.
Astebeteko greban murgilduta gaude Gipuzkoako helduen egoitzetan. Hain zuzen ere, apirilaren 29an hasitako grebak laugarren eguna bete du, eta larunbata eta igandean egingo ditugun lanuzteekin osatuko dugu protestaldia. Gaurko mobilizazioei dagokienez, Gipuzkoako Foru Aldundiaren egoitzaren aurrera eramango ditugu gure aldarrikapenak. Bihar, larunbata, 11:00etan, Bergarako plazan izango gara; bertan, performance bat egingo dugu.
Lehen kasuan, salmenta mota desberdinak daude, batetik aurre-salmenta egiten da (telematikoki) eta bestetik txartelak erosteko makina bat dago jarrita geltokian. Makina hau maiz trabatzen da eta askotan paperik gabe geratzen da, baina salmenta onartu egiten du, nahiz eta agiririk ez eman. Gainera, autobusean bertan txartela erosteko aurkera ere badago, azken aukera hau delarik arazo gehien sortzen dituena. Jende ugari egoten da autobus sarreran txartela bertan erosteko asmoarekin, baina askotan eserleku guztiak aurrez okupatuta daude. Gidariok, lehentasuna eman behar diegu eserlekua aurrez erosi dutenei, eta, ondoren, hutsik dauden eserlekuak saltzen hasten gara. Baina hau egitea ezinezkoa izaten da. Eserlekurik gabe geratzeko aukeraren aurrean, jendea urduri jartzen da, bultzaka eta oihuka hasten delarik, tentsio uneak sortuz. Nahi baino gehiagotan Ertzaintzari deitu behar izaten diogu jendearen jarrera oldarkorraren aurrean gure segurtasuna bermatu eta lan egiten jarraitu ahal izateko.
Duela gutxi, Gipuzkoako Foru Aldundiko Garraio idazkaritzara jo dugu arazoaren berri emanez eta ez digu inolako erantzunik eman.
Gure eskaera oso sinplea da: txartelak saltzeko leihatila bat jar dadila Bizkaibusek duen bezala, eta salmenta osoa bertan zentralizatu dadila. Linea honek geroz eta erabiltzaile gehiago dauzka eta beste trataera bat merezi duela uste dugu, bai gidariekiko zein bezeroekiko ere.
Donostia-Arrasate lienari dagokionez, arazoa antzekoa da, nahiz eta ordu eta egun zehatz batzuetan ematen den. Aurre-salmenta bidez zein autobusean bertan eros daitezke txartelak, baina ez geltokiko leihatilan. Kasu honetan ere lehentasuna txartela aurrez erosia dutenek daukate, eta jendea eserlekurik gabe geratzen da autobusa iristean.
Gasteizko geltokian ere arazo berdina gertatzen zen, Eibar, Arrasate eta Donostiako lineatan. Kasu horretan arazoa honela konpondu zuten: Txartelak lehiatilan soilik saltzen ziren, ezin zen autobusean bertan erosi, lehiatila itxia zegoenean soilik saldu zitezkeen txartelak autobusean bertan. Berdina eskatzen dugu Donostiarako.
Egoera hauek antsietatea eta urduritasuna eragiten digute gidatzerakoan eta gainera ezinegona lan orduetatik kanpo ere pairatu behar izaten dugu. Gidariok ez gara zerbitzuan ematen diren arazoen erantzule eta ez dago gure esku hauek konpontzea.
Ez dugu arduraduna den administrazioaren isiltasun gehiago onartuko. Konponbide erraza duela uste dugu. Aintzat hartu ezean ez dugu mobiliazioetara jotzea beste irtenbiderik izango.
