2026-11-16
HomeEkintza SindikalaJazarpenak jazarpen, borroka sindikala inoiz baino beharrezkoagoa dela aldarrikatu dugu Iruñean

Jazarpenak jazarpen, borroka sindikala inoiz baino beharrezkoagoa dela aldarrikatu dugu Iruñean

Jazarpen sindikala salatzeko hainbat mobilizazio egin ditugu egunotan, eta Iruñeko manifestazio jendetsuarekin are eta gehiago jendarteratu dugu borroka sindikalaren aurkako erasoen eta LABeko zenbait kidek jaso dituzten zigorren salaketa; espetxe zigorrak eta isun ekonomiko larriak, tartean. Hala, autobus geltoki zaharretik abiatuta, Iruñeko kaleak hartu ditugu langileen lan eskubideen alde egiteko eta borroka sindikala inoiz baino beharrezkoagoa dela aldarrikatzeko.

Sindikalismoa, langileontzako borroka tresna gisa ulertuta, inoiz baino beharrezkoagoa da. Langileek eta, bereziki, sektore prekarizatuenek sindikalismo konprometitu, aktibo eta eraginkorra behar dute, eta horren aldeko hautua egina du LABek. Egunotan gauzatu dugun salaketa kanpainaren bidez sindikalisten aurkako jazarpen poliziala eta judiziala salatu nahi izan dugu, baita prekarietate eta lan esplotazioaren kontrako borroka areagotu ere.

Nafarroako LABeko bozeramaile Imanol Karrera.

Izaera horrekin bildu gara gaur Iruñean, eta erdialdeko kaleak hartu ditugu autobus geltoki zaharretik abiatutako manifestazioaren bitartez. Nafarroako LABeko bozeramaile Imanol Karrerak hartu du hitza manifestazio hasi aurretik eta ondoren: "Ez dugu Imanol Salinasen absoluzioa baino onartuko", adierazi du, 21 hilabeteko espetxe zigorra ezarri dioten sindikatuko kidearen auziari helduta. Hain zuzen ere, lan gatazka batean prekarietatea modu baketsuan salatzeagatik, megafono bat eskuetan zuela, kartzelaratu nahi dute Salinas. "Ez gaituzte geldituko, ez dute LABen borroka sindikala baldintzatuko. Injustizia non, LABen megafono bat han egongo da horri aurre egiteko", berretsi dugu.

Gaurko mobilizazioa aurreko egunetan egindako protesta sorten segida izan da. Hain justu, besteak beste, Hego Euskal Herriko hiriburuetan elkarretaratzeak egin ditugu eta Nafarroako Parlamentuan kateatu ginen, jazarpen sindikala salatzeko.
 

 

 

AZKEN ALBISTEAK | ÚLTIMAS NOTICIAS

Leioako Foru Egoitzako langileak grebara doaz lankide falta eta baldintzen okertzea salatzeko

Azaroaren 16an deitu dute greba; izan ere, zuzendaritzak planteatutako langile-kopurua ez da nahikoa, lan-baldintzak okertu egin dira eta zuzendaritzak ez du zentroaren benetako beharrei erantzungo dien lanpostu-zerrenda negoziatu nahi.

Mobilizazioaren indarrak mugitzera behartu du Osakidetza, baina proposamenak oraindik ez dira nahikoa

LAB, SATSE, ELA, CCOO eta UGT sindikatuok balioetsi dugu urriaren 30eko greban profesionalek emandako erantzun irmoak Mahai Sektorialean posizioak mugitzen hastera behartu duela Osakidetzako...

Nafarroako Industria Foru Lege berriak inbertitzaile pribatuak lehenesten dituela kritikatzen dugu, baina ontzat jotzen ditugu jabetza publikoa, deslokalizazioa eta lanaldiarekiko aurrerapenak

Parlamentuak atzo onartutako Industria Foru Lege berriak inbertsio pribatua erraztera bideratuta dago, pizgarri, sinplifikazio administratibo eta kanpoko inbertitzaileak erakartzera bideratutako bestelako neurrien bidez. Hala...