2026-01-30
Blog Page 630

Bilboko Udaleko 010 zerbitzuko langileek beste 6 greba egun egingo dituzte ekainean

admin
-
0
Bilboko Udaleko 010 zerbitzuko langileek beste 6 greba egun egingo dituzte ekainean

Bilboko Udaleko 010 zerbitzuko langileek ekainaren 3an boskarren greba eguna egingo dute beraien lan-baldintzak eta zerbitzua hobetzearen alde. Udaleko zerbitzu hau Lanalden S.A. enpresaren bidez subkontratatua dute, zerbitzu publiko baten ardura hartzen duena izanik. Langileek, oporraldian eta soldatetan hobekuntzak eskatzen dituzte eta zerbitzua hobetzeko langile bat gehiago kontratatzea. Honegatik guztiagatik, ekainaren 3, 4, 10, 11, 17 eta 18an 010 zerbitzua greban egongo da.

Maiatzean izandako 4 greba egunetan ezta hurrengo egunetan, enpresa zein udalak ez du bilerarik deitzeko ahaleginik egin. Beraz, ikusirik enpresa ez udala ez daudela gatazkari irtenbiderik bilatzeko prest, 010eko langileak ekainean beste 6 egunetako greba konbokatu beharrean daude.

Astelehena 3 eta asteartea 4, ekaineko lehen bi greba egunetan, plantilak hurrengo kontzentrazioak deitu ditu:

Ekainak 3
-8:30-9:30, Pablo Alzola
-11:00-13:00. Plaza Venezuela

Ekainak 4
-8:30-9:30, Pablo Alzola
-10:30-11:30, Plaza Venezuela
-11:45-13:00, Plaza Erkoreka San Agustin
 

 

 

Gizarte zerbitzuen ratioak arautzen dituen 1991ko dekretua behingoz aldatzea exijitzen diogu Nafarroako Gobernu berriari

admin
-
0
LAB sindikatuak urteak daramatza lanean eta mobilizazioak egiten Nafarroako Gobernuaren gizarte zerbitzuen erabiltzale-langile ratioen dekretua gaurkotu dezaten eskatuz. Orain indarrean dauden ratio altuek langileen osasuna eta zerbitzuaren kalitatea urritzen baitituzte. Hartara, LABek uste du badela garaia gaurkotze horri ekiteko, halaxe eskatu baitzuten 2016an Nafarroako Parlamentuko talde guztiek.

Aspaldiko arazoa da Nafarroan langile eskasia izatea desgaitasunari, adin txikikoei, familiei, hirugarren adinari eta gizarte bazterketari eskaintzen zaizkien zerbitzuetan. Egoera horrek, alde batetik, erabiltzaileen zaintzan eskaintzen den kalitatea urriagoa izatea eragiten du eta, bestetik, langileen osasuna okertzea dakar. Nafarroan, erabiltzaile-langile erlazioa 1991ko 209 Foru Dekretuan arautzen da. Dekretu horrek ia 30 urte dauzka, zaharkiturik dago, eta ahalik eta lasterren eguneratu behar da, agertu diren beharrei erantzunen zaiela berma dadin.

Xede horretan, 2016ko otsailean LAB sindikatuak sektoreko langileen artean sinadurak biltzeari ekin zion. Aste batzuetan 11.258 sinadura bildu zituen eta Nafarroako Gobernuari helarazi genizkion, Dekretua egungo errealitateari egokitu zekion eskatuz.

Ordu hartan ere lan saio bat egin zen Nafarroako Parlamentuan, Gizarte Politiketako Batzordean, eta han talde parlamentario guztiek bat egin zuten agerturiko aldarrikapenekin; eta denek aho batez ebazpen bat atera zuten, Gobernua dekretua gaurkotzera premiatzen zuena. 2017-2018 ikasturtean, enpresetako delegatuekin ahalduntze kanpaina egin zuen LABek, eta mobilizazio baten bidez Nafarroako Jauregiraino eraman zuen aldarrikapena 2018ko ekainaren 14an.

Miguel Laparrak zuzentzen duen Gizarte Eskubideen Departamentuak konpromisoa hartu zuen batzorde parte-hartzaile bat osatzeko foru dekretuaren gaurkotzean ekarpenak egite aldera. Aitzitik, oraindik ez dute batzorde hori eratu. Zain gaude. Eta, horregatik, Nafarroako Gobernu berriari eskatzen diogu lehenbailehen ekin diezaion dekretua aldatzeko prozesuari eta bide horretan berma dezala gizarte eragile guztien parte-hartzea.

LABek argi uzti nahi du lanean segituko duela, mobilizatzen eta aldarrikatzen, zerbitzu sozialetako langileen kopuruak eta artatze denborak handitzeko. Bada garaia erabiltzaile-langile ratioak modu duin batean arautzeko, langileen osasuna eta gizarte zerbitzuen kalitatea hobetze aldera.

 

 

 

Gizarte Ekimeneko ikastetxeetako gatazka dela-eta deitutako bilerara Hezkuntza saila ez agertzea arduragabekeria hutsa dela iritzi dugu

admin
-
0
Gizarte Ekimeneko ikastetxeetako gatazka dela-eta deitutako bilerara Hezkuntza saila ez agertzea arduragabekeria hutsa dela iritzi dugu

LAB, ELA, STEILAS, CCOO eta UGT sindikatuek atzorako deitutako bilerara Hezkuntza saila ez agertzea arduragabekeria hutsa da, eta patronalak maiatzeko greben aurreko proposamen berdinarekin etortzea, ulergaitza. Patronalari eta Hezkuntza Sailari arduraz jokatzen hasteko eta gatazkari bide emateko proposamenak egiteko galdegiten diegu, bestela mobilizazio eta grebekin jarraitu beste biderik ez digute utziko.

Sektore honetako langileok 10 urte daramagu gure lan hitzarmena berritu gabe, 10 urte soldata izoztuta, gure lan kargak gero eta handiagoak dira, eta jaiotze tasaren jaitsiera medio lanpostu galera garrantzitsu bat aurreikusten da datozen urteetarako. Langile kidego batzuk (hezkuntza-laguntzako espezialistak eta haur-hezkuntzako lehen zikloko langileak), hain zuzen feminizatuenak, lan baldintza erabat prekarioak dituzte, eta beharrezkoa da, halaber, Lanbide Heziketa gehiago arautzea.

2017ko azaroan, hamaika negoziazio mahai ondoren, patronalek ez ziguten mahaitik altxatu eta mobilizazio dinamika bati ekitea beste biderik utzi. Jadanik azken bi ikasturtetan 27 greba egun gauzatzera behartu gaituzte. Horrela, mobilizazio eta grebak indartzen joan garen heinean soilik ikusi ditugu mugimenduak eta aurrerapausoak patronal zein Hezkuntza sailaren proposamenetan.

Sindikatuok borondate osoa daukagu langileen eskaerei erantzun serio bat eman eta gatazka bideratzeko adostasunak erdiesteko. Horrela, adostasun horiek lortzeko, erabateko zintzotasunez makina bat saiakera ari gara egiten: Deitzen gaituzten bilera orotara joaten gara, akordioak lortzeko giltzarriak non dauden zehaztasun osoz adierazten dugu, gure eskaerak erabat neurtuak dira eta malgutasuna erakusten ari gara gure planteamenduetan.

Bide horretan, ordea, langileen eskaerei erantzun eta gatazkari irtenbidea emateko ardura eta aukera dutenak, sektoreko patronalak eta Hezkuntza saila alegia, ez dira dagokien arduraz jokatzen ari.

Hezkuntza sailaren rola izan da bere burua zuritzea, gatazka bideratzeko eskuhartzeren bat izaten ari delako itxura egitea, baina gatazkaren irtenbidean inplikatu gabe. Maiatzaren 8 eta 9ko greben ondoren sindikatuok gaurko egunerako egindako bilera deialdiarekiko izan duen jokaera ikusi besterik ez dago. Bilerari uko egiteaz gain, aurreko egunerako bilera deialdi bat luzatu zigun sindikatuoi; baina bilera horretan gai bakar bati buruz hitzegin nahi izan zuen, gela itxieragatik lanpostua gal dezaketen langileen birkokapenari buruz; haatik, gai honetan ere ez zuen ekarri aurrez egindako planteamenduarekiko aldaketarik (eta honek ez du birkokapena bermatzen). Azkenik, herenegungo bileran gatazka bideratzeko planteamendurik ez zegoenez, sindikatuok gaurko bilerara planteamendu egokiekin etortzeko deialdia luzatu badiogu ere, ez da agertu ere egin. Horregatik, sindikatuok beste behin ere eskatzen diogu Hezkuntza sailari langileen eskaerei erantzungo dion gatazkaren irtenbidean inplika dadila.

Patronalek, berriz, behin eta berriro adierazi arren negoziatzeko borondate dutela, borondate hori ez da egin dituen proposamenetan ageri, ez eta izaten ari den jokaeretan ere. Gogoratu behar dugu fede oneko negoziaketa batek eskatzen duen zintzotasuna behin eta berriro hautsi duela; langileen eskaerei erantzun gabe mobilizazioa desaktibatzeko asmo soilarekin, sindikatuon arteko hausturak eta langile zein ordezkarien arteko nahasmena sortzeko saiakera ugari gauzatuz; azkena maiatzak 8 eta 9ko greben bezperetan. Baita, aldebiko bileretan adostasunak erdiestea ahalbideratu zezaketen planteamenduak egitera iritsi den arren, ondoren atzera bota dituela ere.

Sindikatuok deitutako bilerara etortzeko erabakia hartu dute patronalek eta negoziatzeko borondatea dutela adierazi. Ez dute, ordea, langileen eskaerei erantzuten dion proposamen zein planteamendurik ekarri, maiatzeko greben aurretik ezagunak zen proposamen berdintsua ekarriz. Beraz, beste behin ere eskatzen diegu negoziatzeko borondate hori langileen eskaerei erantzungo dioten proposamen eta planteamendu konkretuetan zehaztu dezatela hurrengo bilerara begira, hain zuzen ere pasa den martxoan sindikatuok helarazitako adostasuetarako giltzarrien dokumentuan jasotako ildotik. Horrela izan ezean, mobilizazio eta grebekin jarraitu beste biderik ez baitigute utziko.
 

 

 

ITP AERO CASTINGS-eko langileek kontzentrazio zaratatsua egin dute gaur Zamudion ITP-k duen egoitzaren aurrean

admin
-
0
ITP AERO CASTINGS-eko langileek kontzentrazio zaratatsua egin dute gaur Zamudion ITP-k duen egoitzaren aurrean

Sestao eta Barakaldoko ITP AERO CASTINGS-eko langileek kontzentrazioa zaratatsua egin dute gaur Zamudion ITP-k duen egoitzaren aurrean.

Enpresa-batzordearen oharra:

Urte batzuk pasatu dira ITP AERO CASTINGS-ek (PCB bere garaian) zailtasun finantziero batzuk eta bideragarritasunaren ingurukoak pasatu zituenetik. Garai hartan, enpresaren zuzendaritzak helarazi zien langileei guztiek ahaleginak egin behar zituztela Barakaldoko lantegiaren etorkizuna bermatzeko. Langileek zuhurtziaz jardun zuten, bai soldatari bai beste alderdi batzuei zegozkien kontuetan, euren konpromisoa erakutsiz enpresak zuen egoera txarrari buelta emateko.

Zorionez, gaur da eguna egoerak onera egin duela. Egindako ahaleginak jaso du bere saria, ITP AERO CASTINGS-eko etorkizunari bermeekin aurre egiteko produkzio planekin. Honen erakusgarri da Sestaon duela bi urte inguru zabaldutako lantegia eta langile kopuruaren igoera. ITP taldeak eta ondoren ROLLS ROYCEk erosi izanak interes berezia erakusten du gure lantegietan egindako produktuen inguruan.

Hala ere, lan-baldintzek bere horretan jarraitzen dute. Ez datoz bat langileek erakutsitako eskuzabaltasunarengatik. Gure hitzarmena 2018a amaitzean amaitu zen, eta enpresa-batzordeak hitzarmen berriari begira zuzendaritzarekin egindako bileretan ez dago langileekiko elkarrekikotasunik.

ITP AERO CASTINGS-eko enpresa batzordeak langileek egindako ekarpenak eta ITP talde bereko hitzarmenetakoak jasotzen ditu (adibidez Zamudio). Ulertzen dugu talde berekoak bagara, logikoena alderdi desberdinetan guztion egoera berdinduz joango den hitzarmenaren oinarriak finkatzea dela. Gainera, guztiz zilegia iruditzen zaigu, ziurgabetasun egoerak gainditu ondoren, langileok gure lana saritua ikustea eta ez irabaziak elite baten artean banatzea.

Hala ere, enpresaren zuzendaritzak aurkeztutako proposamenetan, oso modu lausoak jasotzen dira plataformako alderdietako batzuk, beti ere lortutako emaitzeki lotuta. Adibide moduan, bada egia lehen urte bietan %0,5eko soldata-igoera planteatzen dutela eta hurrengo hiruretan %0,3koa, guztiz ez nahikoak direnak eta metalgintzako hitzarmenean aldarrikatutakoaren azpitik daudenak, EBITera baldintzatuta daude gainontzeko soldata eskalak (lantegi edo taldearen emaitza ekonomikoak). Berdina geratzen da absentismo mailarekin lotutako lanaldiekin. Honek baieztatu egiten du Iratxe de Las Hayas-ek lehen bileran botatako diskurtsoa: “Gehiago egin behar da lan, eta gutxiago kobratu”.

Era berean, salatu egin nahi dugu enpresa langileon artean zabaltzen ari den komunikatuen kanpaina, euren proposamenak Zamudioko lankideen hitzarmenean zehaztutakoarekin bat datozela aipatuz, egia ez dena eta euren negoziaziorako borondatea goraipatuz. Hasieratik izan dugu prestasuna akordio txukun bat erdiesteko. Horren froga dira zuzendaritzaren proposamenen aurrean enpresa-batzordeak egindako mugimendu ezberdinak eta adostasunak lortzeko helburuan berrestea.

Aurretik zehaztutakoagatik, eta ITP AERO CASTINGS-eko zuzendaritzak botatako hordagoaren aurrean, esan baitu ez duela maiatzaren 28an aurkeztutakotik aparte beste proposamenik mahai gaineratuko, mobilizazioei ekin diegu gaur. Proposamen ez nahikoek eta enpresak erakusten duen arduragabekeriak, eta langileok kokoteraino egoteak ekarri gaitu mobilizazioak egitera, ITP AERO CASTINGS-eko langile guztiontzako hitzarmen duina lortzeko helburuarekin. Era berean, dei egiten diegu langileei mobilizaziotan parte hartzera, asanblada informatiboetan adierazi genuen moduan.

Enpresaren zuzendaritzari, beste behin, dei egin nahi diogu TIP AERO CASTINGSeko langile guztion bizitza benetan duinduko duen hitzarmen proposamena egin dezan.
 

 

 

Iruñeko ANISER-en enpresa hitzarmena sinatzeko aurreakordioa lortu dugu, Nafarroako metalgintzako hitzarmenarekiko lotura bermatuta

admin
-
0

Iruñeko Aniser Facility Service zerbitzu anitzeko enpresak, egun Euroestampaciones enpresak soldadura lanak egiteko azpikontratatua duena, orain arte ez zien langileei hitzarmenik aplikatzen. Hainbat bileraren ostean, eta enpresaren jarrera ezkorra ikusita, langileek borroka dinamika bat jarri zuten martxan -lanuzteak eta mobilizazioak aurreikusten zituena- eta, horri esker, azkenean atzo lortu zen aurreakordioa sinatzea.

LAB-ek sinatutako aurreakordioak, besteak beste, honako eduki hauek jasotzen ditu: lanaldiaren murrizketa handi bat -oraingo 1.808 orduetatik 1744 orduetara pasatuko dira 2021ean-, soldata igoera, behin betiko kontratazioa %80ra handitzeko enpresaren konpromisoa eta Nafarroako Metaleko hitzarmenarekiko lotura jasotzen ditu beste eduki batzuen artean.  

 

 

Bi egunetako greba partziala San Martin Unxeko Santa Zita egoitzan lan-baldintzak errespetatuak izan daitezen

admin
-
0
Bi egunetako greba partziala San Martin Unxeko Santa Zita egoitzan lan-baldintzak errespetatuak izan daitezen

San Martin Unxeko Santa Zita egoitzako langileek, berriz ere, ukabila altxatu dute Idea enpresak (Innovación y Desarrollo Asistencial) azaldu duen intrantsigentziaren eta pasotismoaren aurrean, hitzarmen duina lortze aldera aurkeztu ditugun proposamenen harira. Hori dela eta, ekainaren 1ean eta 2an, larunbatean eta igandean, greba partziala deitu dute, euren lan-baldintzak errespetatuak eta baloratuak izan daitezen.

Langileen oharra

Denbora gehiegi, 2018ko ekainaz geroztik, eman dugu enpresa-hitzarmena sinatzea lortu eta hitzarmen duin bat negoziatu nahian, eta alde sozialak pauso ugari egin ditu bide horretan. Hitzarmena lortzearren, gure hasierako asmoak sarritan jaitsi ditugu, 2018ko abenduan eta 2019ko maiatzean, esate baterako. Baina aski da! Ez gara gehiago makurtuko! Gure lana baloratu egin behar da, gure adinekoen zaintza-lana baloratu egin behar da.

Lehenbiziko mobilizazioaren ondoren, bilera pare bat egin dugu zuzendaritzarekin. Bilera horietatik ateratzen garenean, gure irudipena da adarra jotzen ari zaizkigula: mahai gainean jartzen dituzten proposamenak gero ez dira aktetan ageri. Eta horrela, behin eta berriz. Sindikatuarekin biltzen saiatu dira, ordezkari sindikalei ezer esan gabe. “Lan bera, soldata bera” oinarrizko printzipioa urratzen dute, soldata baxuagoak proposatuz gure atzetik datozenentzat. Enpresaren informazio ekonomikoari dagokionez, benetako kontuak ezkutatzen dizkigute. %19,3 igo dute egoitzako plaza pribatuaren prezioa adineko jendearentzat. Plaza itunduez den bezainbatean, bere horretan segitzen dute: haien iritziz, ezinezkoa da Nafarroako Gobernuarekin dagoen ituna berritzea, baina ongi dakigu inguruko egoitza gehienetan plaza itundu gehiago eskatzen ari direla. Zer egin nahi dute gure egoitzarekin? Itxi?

Egoera honek baditu arduradunak: Rafael Sánchez Ostiz, Idea enpresaren arduraduna; Eduardo Castillo abokatua, negoziazioaren buru ari dena, behin eta berriz kontraesanetan aritzen baita; eta egoitzako zuzendaria, Rafael Cortijo Gorraiz, Guadiana ibaia bezala agertu eta desagertzen dena.

Horren guztiaren aurrean, guk lan baldintza duinen alde borrokan segituko dugu. Horregatik, larunbatean eta igandean (egun horretan Ardo Gorriaren festa ospatzen da gure herrian), grebara joateko prest gaude, gure eskubide guztiak bermatzen dituen hitzarmen kolektibo baten alde eta Santa Zita egoitzak eta bertako langile guztiek etorkizuneko proiektu bat izan dezagun.

 

 

 

UPV/EHUren aurrekontuak ez nahikoak dira aurten ere

admin
-
0
UPV/EHUren aurrekontuak ez nahikoak dira aurten ere

Gaur, maiatzaren 30ean, Leioan egindako UPV/EHUko Gobernu Kontseiluan 2019ko Aurrekontu Aurreproiektua onartu da. LABetik gure desadostasuna eta egonezina adierazi ditugu, zuzenketarik aurkeztu gabe. Ez dugu uste aukerarik dagoenik behar estruktural eta ezinbesteko askori ganoraz heltzeko. Horregatik ere, LABek aurkeztutako 2019ko Aurrekontu Aurreproiektuaren aurrean abstentzioa bultzatu du. UPV/EHUk finantzazio publiko gehiago behar du irakaskuntza, ikerkuntza, transferentzia eta zerbitzu jardunei zein premiei aurre egiteko, baita bere langileei egonkortasuna eta diskriminaziorik gabeko lan-baldintzak eskaintzeko ere. Eta horretarako, zuzendaritzak aurkeztutako proposamena ez da tresna egokia. Zoritxarrez, aukera bat, berriro ere, galdu egingo da.

LABen iritziz, UPV/EHUren finantzazio publikoa, aurten ere, ez da nahikoa izango eta 2019ko aurrekontuetan ez dugu ikusten aukera handirik lehentasunezko gai batzuei heltzeko, hala nola: Administrazio eta Zerbitzuetako Pertsonalaren arloan, lanpostu berrien beharrei eta langileek egonkortzeko neurriei erantzutea, behin behineko balorazioa duten lanpostuen zein gainerakoen eguneratzea. Irakasle eta ikertzaileei dagokienez, berriz, doktore aurreko ikertzaileen soldatak igotzea –gutxienez legeak ezarritakoa betetzeko-, ikertzaile doktore guztien soldatak parekatzea, lanaldi partzialeko irakasleen soldatak duintzea -egiten duten lan-jardunari egokituta-. Gainera, soldata-igoera ez zaie kolektibo guztiei aplikatu, eta, edonola ere, ez da eros ahalmena berreskuratzeko beste izan.

Era berean, euskararen normalizazio eta erabileraren garapenean urrats eraginkorrak eman ahal izateko; onartu berri den Berdintasun Planak jasotzen dituen ekintzak sustatzeko; langileen segurtasuna eta osasuna behar bezala zaintzeko edota lankidetza egitasmoak garatu ahal izateko baliabide nahikoak bermatu beharko lituzke.

Unibertsitate-sistemaren eragile nagusi eta garrantzitsuena den UPV/EHUren diru-sarrera gehienak, 314 milioi euro, Eusko Jaurlaritzaren aurrekontuetatik datoz. UPV/EHUk aurten jasoko duena aurreko urtean baino 10,5 milioi gehiagoko ekarpena izan bada ere, 2019-2022ko Euskal Unibertsitate Sistemaren Planak jasotakoa baino 6 milioi € gutxiagokoa da. Era berean, bai Jaurlaritzaren ekarpena bai planak jasotzen duen aurreikuspena, 2010ean jasotako finantzazioaren azpitik gelditzen dira (27 milioi € gutxiago).
 

 

 

Lehen indarra gara Hego Euskal Herriko irakaskuntzan

admin
-
0
Lehen indarra gara Hego Euskal Herriko irakaskuntzan

LABeko irakaskuntzako kideek prentsaurrekoa egin dute gaur Donostian. EAE eta Nafarroako kideak elkartu dira, eta kolektibo ezberdinetakoek: haurreskolak, irakasleak, sukaldari eta garbitzaileak, heziketa berezia eta unibertsitatea (administrazio eta zerbitzuetakoak eta irakasle eta ikerlariak. Ikasturte honetan zehar egindako hauteskunde sindikalen ondoren, LAB da lehen sindikatua Hego Euskal Herriko irakaskuntzan. Emaitzen balorazioa egin eta hemendik aurrerako erronken berri eman dute.

Ikasturte honetan zehar, Hego Euskal Herrian, irakaskuntzako kolektibo desberdinetan hauteskunde sindikalak burutu ditugu.

LAB irakaskuntzatik zorion mezu bat helarazi nahi diogu gure hezkuntza komunitatea osatzen dugun kide guztiei, liberatu, delegatu eta afiliatuei, une oro gure bide lagun izateagatik eta egunez egun erakusten duten konpromisoagatik. Era berean, hezkuntza komunitateko langile guztiak zoriondu nahi ditugu, oztopo guztien gainetik, hauteskunde sindikaletan parte hartzeagatik.

Nafarroako sare publikoan, LABek gora egin du bai ordezkarien kopuruan (11 izatetik 12 izatera pasatu gara), baita lortutako boto kopuruan ere. 900 bototik gora lortu ditugu lehenbiziko aldiz, emandako boto guztien ia %20. Horri esker, irakaskuntza arloko lehendabiziko indarra izaten segitzen dugu. Gure sindikatuak 2011ean eta 2015ean lortutako garaipenak berretsi ditu, eta argi gelditu da Nafarroako Gobernuko langileek LABen jarduna babestu eta Erregimenaz haratago eredu sozial bat bultzatu nahi duela. Gogorarazi nahi dugu, ikastoletan %96ko ordezkaritza duela LABek, eta itunpeko sarean zein unibertsitatean, erreferentzialtasuna handituz goazela apurka apurka.

Euskal Autonomia Erkidegoko sare publikoan, LABek lehenengo indarra izatea berretsi du, 96 delegaturekin ordezkaritza handiena lortuaz. Ikastoletan ere ordezkaritzaren gehiengoa dugu. Ibilbide oparoa egin dugu azken urteetan. Sare publikoan nahiz itunpekoan, piztuta izan ditugun lan gatazka eta borrokaldiak, arrakasta handiko mobilizazioak izan dira. Negoziazio kolektiboan zegoen blokeoa hautsi eta adostasunetarako bideak ireki ditugu. Aipamen berezia egin nahiko genioke gizarte ekimenean irekita jarraitzen duen gatazkari. Lerro hauen bidez, patronalak negoziaziorako duen borondate falta nabaria salatu nahiko genuke. 28 greba egun egin eta gero, oraindik ez baitugu aurrerapausorik.

Bide honetan, aintzat hartu nahi ditugu, Hego Euskal Herrian kolektibo desberdinetan sinatu ditugun akordio sendoak, hezkuntzaren kalitatean eta lan baldintzetan hobekuntza nabarmenak lortuz.

Ipar Euskal Herrian, azken urteetan ere hezkuntza komunitatea biziki indartsu aritu da. Ekimen desberdinak burutu dira bertan: “Baxoa euskaraz!” aldarrikatuz egindako mobilizazioak, Seaskan irakasle falta salatuz egindako ekintzak, eremu publikoan murrizketen aurrean egindako grebak…

Guzti honek agerian uzten du egungo hezkuntza sistema agortua dagoela eta jauzia eman behar dugula eredu berri baterantz.

2016ko maiatzean Iruten dinamika abiarazi genuen, inposaketak salatzeaz gain, hezkuntza sistema propiora bidean gaurdanik urrats praktikoak emateko erronkarekin. Ebaluazioa erdigunera ekarri eta ebaluazio hezitzaileari buruzko jardunaldiak antolatu genituen. Elikadura burujabetza ardatz hartuta, jangelen ereduaren inguruan hausnarketa burutu dugu ere. Honetaz gain, ikasturte honetan, sexu heziketari buruzko gida argitaratu dugu, besteak beste. Era berean, gure hezkuntza egitasmoa berriztu dugu, euskal gizarteari proposamen sendo eta integrala aurkeztu diogularik. Zentzu honetan, argi dugu langileriak babesa eman diola LABek eskaintzen duen proiektu integralari.

Garbi daukagu gauza asko hobetu behar direla oraindik. Izan ere, Euskal Herriko hamaika txokotan hezkuntza arazoak ugaritzen eta larriagotzen ari dira: proiektua aurrera atera nahi eta finantziazioa falta, euskararen erabilera eta kalitatean beherakada, euskal kulturaren transmisioan hutsune larriak, jatorri eta egoera ekonomikoaren araberako segregazioa gainditzeko nahia eta ezina… Horregatik, guk borrokan jarraitzeko konpromiso irmoa dugu; Euskal eskola publiko komunitarioaren bidean eta langileon lan baldintzak defendatzen, burujabetzaren bidean sakonduz. Guk gurea izango den hezkuntza sistema nahi dugu, gure herriak dituen beharretara egokitua. Tokian tokiko errealitate zehatzei herri erantzunak ematea planteatzen dugu. Adostasunetara iristeko eta arduraz jokatzeko garaiak direlako.
 

 

 

Estaturik Gabeko Nazioetako Sindikatuen Plataformatik independentismoaren kontrako sasi epaiketa behin betiko buka dadila exigitzen dugu

admin
-
0
Eguerdi hontan Jordi Cuixar, Jordi Sànchez eta Oriol Junquerasen kartzelaratzean inguruan NBE-ak atxilotze arbitrarioaren inguruan daukan lan taldeak eginiko txostena ezagutu da. Txostenak oso argi dio preso hauen kartzelaratzea arbitrarioa eta Giza Eskubideen Adierazpenaren kontrakoa dela, eta hauen berehalako askatasuna exigitzen du.

Erabaki hau loteslea ez den arren, NBE-aren Giza Eskubideen kontseiluak antzeko 245 txosten egin ditu. Txostenaren arabera Jordi Cuixart, Jordi Sànchez eta Oriol Junqueras-en atxiloketa arbitrarioa eta Giza Eskubideen Adierazpenaren kontrakoa da.

NBE-eko Giza Eskubideen Kontseiluarenpean dagoen erakunde honen txostenaren arabera: «Iritzia emateko askatasunak eta adierazpen askatasunak herriek haien sistema politikoa nola zehaztu dezaketen adieraztea barnebiltzen du».

Irailaren 20an, Ekonomia Kontseilaritzaren aurrean egoniko mobilizazioen inguruan NBE-ak dio ekintza hauek ezin direla Cuixart, Sànchez eta Junquerasi egotzi. Aldi berean, matxinada inputazioak egiteko erabili den biolentziaren erabileraren inguruan, txostenak akusatutakoei ezin zaiela biolentziaren erabileraren inguruko inolako ekintzarik egotzi.

Horregatik, NBE-eko adituen iritziz ez dago behin-behineko espetxeratzerako eta epaiketarako inolako arrazoirik. Txostenaren arabera akusatutakoak sententziaren aurretik publikoki kondenatzen dituzten injerentziek errugabetasun presuntzioa urratzen dute eta prozesu judizialean onartezina den injerentzia bat dela deritzo. Horregatik, Kataluniako Preso Politikoen berehalako askatasuna eskatzen du, eta nazioarteko zuzenbidearen araberako kalte-ordainak eta bestelako erreparazioak izan ditzatela eskatzen du.

Horregatik guztiagatik, Estaturik Gabeko Nazioetako Sindikatuen Plataformatik independentismoaren eta Kataluniaren nahiz beste herrien autodeterminazio eskubidearen kontrako epaiketa fartsa hau behin betiko buka dadila exigitzen dugu eta preso politiko eta errefuxiatu guztien etxeratzea exigitzen dugu. Herrien autodeterminazio eskubidea defendatzen jarraituko dugu, eta Estaturik gabeko nazioetan prozesu konstituziogileak garatzearen aldeko apustuak egiten jarraituko dugu, Espainiako Estatuaren zentralismoaren eta askatasun ezaren kontrako berme bakar bezala.

 

 

 
1...629630631...1,588Page 630 of 1,588

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus