2026-01-31
Blog Page 621

Ostiraleko mobilizazioekin egin dugu bat, Urruñako erailketa matxista salatzeko

admin
-
0
Ostiraleko mobilizazioekin egin dugu bat, Urruñako erailketa matxista salatzeko

Beste erailketa matxista baten berri izan genuen asteartean, lehendabizikoa dugu aurten Euskal Herrian. Mayie Nervi 81 urteko emakumea erail berri du bere bikoteak Urruñan, Lapurdin. Asteartean aurkitu zuten emakumea Urruñan, bere etxean. Hiltzaileak, tirokatu ondoren, bere buruaz beste egin zuen. Alabak aurkitu zuen, eta poliziari deitu zion. Emakumeen Mundu Martxatik gogor salatzen dugu Urruñako erailketa, eta ekainaren 21ean egingo diren mobilizazioetan parte hartzeko deia egiten dugu.

Mugimendu Feministak lan kolosala egin du indarkeria matxistari hitzak jartzen eta jendartea sentsibilizatzen. Hala zabaldu dugu emakumeon aurkako indarkeriak ez duela mugarik, bizi garen sistema kapitalista patriarkalaren funtzionamenduaren ezinbesteko tresna baita, eredu honek sortzen dituen pertsonen arteko botere harremanak betikotzeko tresna. Ezinbestekoa egiten zaigu argi eta ozen esatea ez dugula atzera pausurik emango, gogor jarraituko dugu indarkeria matxistaren aurka. nahiz gaurko politikak atzeraka joaten saiatzen diren. ez diogu indarkeri matxistari lekurik emango gure gizartean.

Ez dira modu isolatuan eta bakartuan ematen diren erasoak; gure sistemaren muinean erreproduzitzen den indarkeria da: kultura aparatuan, komunikabideetan, estatuan, lan merkatuan, familian edota hezkuntza sisteman. Honen aurrean, agente sozial, politiko eta instituzional guztien ardura pertsonal eta kolektiboa ezinbestekoa da. Apustu ausartak eta neurri sakonak beharrezkoak dira. Hitzetatik praktikara pasatzeko garaia da.

Emakumeen Mundu Martxatik gogor salatzen dugu Urruñako erailketa, eta ekainaren 21ean egingo diren mobilizazioetan parte hartzeko deia egiten dugu. Honekin batera autodefentsa feministarako deia egiten dugu, gure bizitzak direlako jokoan daudenak. Feministok erantzuteko prest gaude! Martxan jarraituko dugu, elkarrekin borrokan, denak aske izan arte!
 

 

 

Irizarren Ormaiztegiko lantegiaren aurrean mobilizatu dira Alconzako langileak

admin
-
0
Irizarren Ormaiztegiko lantegiaren aurrean mobilizatu dira Alconzako langileak

Alconzako langileak mobilizatzen hasi dira, hitzarmen duinaren eta lantegiari Irizar taldearen barruan balioa emango dion plan industrialaren alde. Hala, elkarretaratzea egin dute gaur Ormaiztegin, Irizarren lantegiaren aurrean.
 

 

 

Enplegu eta zerbitzu publiko duinak aldarrikatu ditugu Bilboko Udalaren atarian

admin
-
0
Enplegu eta zerbitzu publiko duinak aldarrikatu ditugu Bilboko Udalaren atarian

Bilboko Udaleko Langileen Batzordeak elkarretaratze batera deitu du gaurko, Udalaren jarrera salatu eta enpleguaren eta haren langileen lan baldintzen gaian aldaketa bat eman dezan.

Hauxe da Bilboko Udaleko Langileen Batzordearen oharra: 

Hilabete hauetan, Bilboko Udalean gatazka egoerak ugaritu egin dira, batez ere enpleguari loturikoak.

Alde batetik, kontratazio falta dagoelako Udalean, eta, bestalde, Udaleko eta Udal enpresatako azpikontratatako langileen lan baldintzengatik.

Udaleko Gizarte Zerbitzuak gainezka daude. Udal Gobernuak, ez dio irteerarik eman nahi udalbatzarrak onartu zuen Gizarte politiken paktuari, eta hau guztia, behar den langile kopurua kontratatzen ez duelako, eta ondorioz, langileak gainezka daude, herritarrek merezi eta eskubide duten zerbitzua eman ezinik.

Suhiltzaileen parkeetan, suhiltzaileen guardia normalizatua beteta egon dadila, behar diren langile guztiekin. Bajak ordezkatu ditzatela. Lan baldintzen hobekuntza. Behin-behinekotasunekin bukatzeko hautaketa-prozesuak egitea.

Mugikortasun sailean, antolakuntza izugarri txarra martxan jarri dute, C eta D taldeei karrera profesionala mugatzen diena eta zerbitzua bera okertzen duena, etorkizunean plazen amortizazioa ekarriko duena.

Zenbait langile talde (menpekoak, ofizialak…) berriz ere zerrendako azken tokian daude, beraien aldarrikapenei irtenbiderik eskaini gabe.

Eta zer esan, Udaleko eta udal enpresen azpikontratentzako lan egiten duten langileen inguruan.

EAJ-PSE Udal Gobernuak, Udaleko azpikontratatako langileentzako lan baldintza onartezinak bultzatzen ditu, izugarrizko lan kargekin, lanaldi partzial izugarriak egin beharra lanaldi osoak egiteko, estatuko lan hitzarmenak, eta are gehiago feminizaturiko sektoreetan.

Langileen legez kanpoko lagapena BilbaoTIKen, estatuko hitzarmenak eta 0 elkarrizketa hitzarmenak berriztatzeko (010 zerbitzuaren kasua), lan karga handia Bilbao Bizin… Hauek ez dira adibide batzuk baino.

Udalak ez du bere baldintza-agirietan enpresarien diru gosearekin amaitzeko klausularik ezarri nahi. Ez dugu nahi DIRU PUBLIKOA ENPRESA PRIBATUEN IRABAZIAK HANDITZEKO IZATEA, langileentzako miseriazko soldaten bizkar egiten direlako.

Hori guztiari erantzun behar dio Udal Gobernuak, benetan, hainbatetan saltzen diguten “Bilbo, balioen hirian” sinesten baldin badu.

Horregatik mobilizatu gara gaur, eta hemen egongo gara berriro ere, enplegu duina eta kalitatezkoa aldarrikatzeko, Bilboko hiritarrek merezi eta eskubide dituzten kalitatezko zerbitzu publikoak eskaini ahal izateko.

 

 

 

Pozarren jaso dugu aldi baterako kontratudunak eta funtzionarioak gehiago parekatzera datorren Europako epaia

admin
-
0
Europar Batasuneko Justizia Auzitegiak gaur argitaratu du aldi baterako langileek gradua kobratzeko planteatu zitzaion auziari buruzko epaia. Auzi hori ANPE sindikatuak sustatu zuen, eta espero bezala, Europak onartu egin du sindikatuaren erreklamazioa. Horren ondorioz, amaitu eginen da administrazio-kontratudunek urtetan jasan izan duten bidegabekeria larria. LABek, bere aldetik, kexa bat jarri zuen Europako Batzordean 2016eko abenduan eta graduaren bi eskari eraman zituen Europara 2018ko urtarrilean, baina prozesu hauek geldituta zeuden gaurko epaiaren zain.

Gaurko argitalpenaren ondotik, LABek bere poza eta alaitasuna agertu nahi ditu, Administrazioko aldi baterako langileen eta funtzionarioen arteko parekatzea lortzeko bidean pauso handia dakarrela ulertzen baitugu. Gure ustez, denboran dagoeneko gehiegi luzatu den egoera bidegabe bati amaiera emango dio honek. LABen gure-gurea dugu “lan berdina, soldata berdina” aldarria, eta beti defendatu izan dugu langile guztiek lan baldintza duinak izan ditzaten. Hori, foru Administrazioan tamalez handiegia den aldi baterakotasun tasarekin amaitzeak baino ez du ekarriko, ordea. Eta Horretarako, LEP deialdi zabalek baino ez dute bide ematen. Hori iritsi bitartean, hala ere, gaur Europan eman den pausoaren modukoek administrazio kontratudun langileak eta funtzionarioak parekatzeko balio dute, eta horrek poztu egiten gaitu.

Argitaratu berri den epaia erreferentziatzat harturik, LABek oraindik orain gradua kobratzeko tramiteak egin ez dituzten Administrazio publikoko langileen eskaerak bideratzeko kanpaina berri bat jarriko du abian. Nolanahi ere, badakigu epai hau aplikatzea beste erakunde batzuei dagokiela, eta horregatik errekerimendua egiten diogu Nafarroako Gobernuari lehenbailehen bete dezan Europar Batasuneko Justizia Auzitegiaren epaia, eta langile guztiei ordain diezaien gradua, atzeraeragina, eta baita horri dagozkion interesak ere.

 

 

 

Gipuzkoako papergintzako bigarren greba egunak ere %90ko jarraipena izan du; ADEGIri dagokio mugitzea

admin
-
0
Gipuzkoako papergintzako bigarren greba egunak ere %90ko jarraipena izan du; ADEGIri dagokio mugitzea

Gaurkoan, atzo bezala, Gipuzkoako papergintzaren bigarren greba egunaren jarraipena %90koa izan da. Produkzioa erabat geldituta dago. Manifestazioa egin dute sektoreko langileek Tolosan.

Papergintzako sektorean bi greba egun arrakastatsu bizi ondoren, argi geratu da langileek sektorean sortutako aberastasuna banatuko duen hitzarmen duin bat nahi dutela.

ADEGIk aintzat hartu behar du langileek adierazi dutena. ADEGIK bere jarrera inmobilista alde batera utzi eta behingoz benetako negoziaketa bati ekin behar dio. Azken negoziazio bileran sindikatuok mugitu ondoren, orain ADEGIri dagokio mugitzea. Hau horrela ez bada, papereko langileok berriro ere kalera aterako gara ekainaren 26 eta 27an gure eskubideak defendatzera. LABek sektoreko langile guztiei borrokan tinko jarraitzeko dei egiten die. Denon artean lortuko dugu.
 

 

 

Hainbat eragilek 11/13 makrosumarioan auzipetutako 47 herritarrei babesa erakutsi diegu

admin
-
0
Hainbat eragilek 11/13 makrosumarioan auzipetutako 47 herritarrei babesa erakutsi diegu

Agerraldi bat egin dugu Bilbon, hainbat eragiletako ordezkarirekin batera, 11/13 makrosumarioan auzipetutako 47 herritarrei babesa emateko eta epaiketaren aurkako manifestua aurkezteko. Sinatzaileok irailaren 14ko manifestazioarekin egin dugu bat.

Hauxe da agerraldian aurkeztutako manifestua:

Irtenbidera, etorkizuna askatu

47 euskal herritar epaituak izango dira datorren irailetik aurrera eta, guztira, 601 urtetako zigor eskaerari aurre egin beharko diote. Gertakizun larri honen aurrean honako hau adierazi nahi dugu:

47 euskal herritarrak eta beraien jarduerak zigortu nahi dituen epaiketa hau, lehen bezala orain, lekuz kanpo, garaiz kanpo eta euskal jendartearen bake eta justizia nahietatik kanpo dagoela salatzen dugu.

Euskal jendarteak aurrera egin nahi du eta etorkizunari behar bezala ekiteko iraganeko zauriak ixtea eta korapiloak askatzea ezinbestekoa da. Ez ditugu kate berriak asmatu behar eta ez dugu gehiago estutuko gaituen korapilorik nahi. Ez dugu bidean harri berririk behar, ez dugu min eta zauri berririk irekitzerik nahi. Zalantzarik gabe, konponbideari begira dagoen herria da hau, aurrera egiten ari den herria, eta ez gaude prest atzera eraman nahi gaituen egoerarik onartzeko.

Elkarbizitza, bakea eta justizia jendarte ororen altxor preziatua dira, baita gurea ere. Euskal jendartearen nahi horri erantzun behar diogu eta gatazka logika batean asmatutako eta abian jarritako prozedurak eten behar ditugu, eraikitzen ari garen orainaldia kutsatu ez dezaten.

Jendarte berri bat eraiki nahi dugu, sinistuta baikaude urteotan garatu ditugun baloreak eta eskubideekiko sentsibilitatea izango direla bestelako herri bat sortzeko zimendua: norbanakoen giza eskubideak, eskubide kolektiboak, elkartasuna, enpatia eta elkar bizitza. Etorkizuna guztion artean, elkarrizketaren bidez eta eskubide ororen errespetoan oinarrituta eraiki behar dugun etxea da eta guztiok gara ezinbestekoak, guztiok elkarrekin bizi behar dugun etxea baita.

Horregatik, hau sinatzen dugunok ez gara epaituak izango diren 47 lagun hoiengatik soilik ari. Euskal Herrian bizi garen norbanako, eragile eta erakunde guztiok osatzen dugun euskal jendarte zabal eta anitzak hartutako bidean aurrera egiten jarraitu dezan ari gara. Horregatik honakoaren bitartez, epaiketa hau salatzeaz gain irailaren 14 manifestazioarekin bat egiten dugula adierazi nahi dugu.

Bihur dezagun iraganera eraman nahi gaituen epaiketa hau etorkizunerako ate. Irten bidera. Askatu dezagun etorkizuna, guztion erronka da.
 

 

 

CAFeko langileek bi orduko lanuztea egin dute Beasainen eta Irunen, lan hitzarmenaren alde

admin
-
0
CAFeko langileek bi orduko lanuztea egin dute Beasainen eta Irunen, lan hitzarmenaren alde

CAFen lanuzteak egin dituzte gaur berriro, joan den asteartean bezala. Hain zuzen ere, 10:00etatik 12:00etara gelditu dute ekoizpena Beasain eta Irungo lantegietan, lan hitzarmenaren defentsan. Gaurkoan ere langileen erabateko parte hartzea izan da. Titulatu, enplegatu eta tailerreko langileak, denok elkarrekin, helburu beraren alde mobilizatu dira. Ekainaren 26an eta uztailaren 2an, berriz, hiru orduko lanuzteak egingo dituzte, 10:00etatik 13:00ak bitartean. Bi egun hauetan, manifestazio bana egingo dute Ordizian eta Beasainen, hurrenez hurren.


 

 

 

Jarraipen oso zabala izan du Bizkaiko Metalgintzako laugarren greba egunak, Ertzaintzaren jazarpenak jazarpen

admin
-
0
Jarraipen oso zabala izan du Bizkaiko Metalgintzako laugarren greba egunak, Ertzaintzaren jazarpenak jazarpen

Arrakastatsua izan da Bizkaiko metalgintzan, herrialdeko hitzarmenaren alde, sektorean ordezkaritza duten sindikatu guztiek deitutako laugarren greba eguna. Jarraipena aurreko egunetako greben antzekoa izan da, %80tik gorakoa, eta Sestao eta Barakaldo arteko martxa zein Durango egindako manifestazioa jendetsuak izan dira. Azken honetan, eserialdia egin dute Ertzaintzaren jarrera oldarkorra eta egindako atxilotuak salatzeko.

Langileek bi mobilizazio nagusi egin dituzte gaurkoan; Sestaotik Barakaldoraino egin duten martxa eta Durangon egindako manifestazioa. Bihar, ekainaren 21ean, boskarren greba egunean, manifestazioa egingo dute Bilbon, 12:00etan, Jesusen Bihotzetik hasita.

Gaurkoak gertakari larri eta latzak izan dira, izugarria izan da grebalariek Ertzaintzaren aldetik jasotako jazarpena eta errepresioa. Identifikazioak izan dira Bizkaia osoan eta Durangon atxilotuak eta bi zauritu ere, Ertzaintzak borraz kolpatuta. Patronalaren estrategia da, grebaren arrakasta ezkutatu eta desitxuratzeko.

Piketeei eta zaurituei gure elkartasun eta babes osoa bidali nahi diegu, eta atxilotuak askatzeko exijitzen dugu.
 

 

 

Asturiasera abiatu gara jazarpen sindikala salatzeko

admin
-
0
Asturiasera abiatu gara jazarpen sindikala salatzeko

LABeko ordezkaritza bat Asturiasen dago, langileen eskubideen defentsan. Hain zuzen ere, errepresioaren aurkako mobilizazioak antolatu dituzte gaurko, lantokiz lantoki ibiliko den karabana bat eta CSI, CGT Asturias, Suatea eta CNT sindikatuek deitutako manifestazio bat, kasu, Asturiaseko hainbat enpresatan pairatutako jazarpen sindikala salatzeko.

 

 

 
1...620621622...1,588Page 621 of 1,588

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus