2026-07-29
Blog Page 595

Laminaciones Arreguiko langileek mobilizazioa egin dute Lakuan, Eusko Jaurlaritzaren inplikazioa eskatuz

admin
-
0
Laminaciones Arreguiko langileek mobilizazioa egin dute Lakuan, Eusko Jaurlaritzaren inplikazioa eskatuz

Laminaciones Arreguiko langileek mobilizazioekin jarraitzen dute, enplegua eta etorkizunaren alde. Pasa den otsailaren 6an lanuzteak hasi ondoren, pasa den astean eta honetan ere lanuzteekin jarraitu dute, Zuzendaritzak baztertu egin duelako Batzordearen azken proposamena kaleratzeak ekiditeko. Horregatik, gaur dei egin diote Eusko Jaurlaritzari Arabako lantegietan enplegua eta etorkizuna bermatze aldera.

Enpresaren negoziazioak amaitutzat eman ondoren, langileek lanuzteak eta mobilizazioak abiatu zituzten pasa den otsailaren 6an, enpresak iragarritako 9 langileen iragarpenaren eta Laminaciones Arreguiko Gasteiz eta Urbinako lantokiekiko konpromiso faltaren aurrean. Lanuzteek produkzio langileen %99aren jarraipena izan zuten eta Batzordeak proposamen berria egin zuen kaleratzeak ekiditeko proposamen berri batekin, bertan enpresak nahi zituen ondorio berdinak lortzen zituen proposamen alternatiboak jaso zituzten. Enpresak ez zuen proposamena entzun ere egin nahi izan.

Azken egunotan jarraitu egin dute lanuzteek eta gaur bertan, langileek bi ordutako lanuztea egin dute eta kontzentrazioa egin dute Lakuan, Eusko Jaurlaritzaren aurrean. Era berean, Enpresa- Batzordeak bilera formala eskatu du Industria Sailarekin. Honi lotuta, dei egin diote Eusko Jaurlaritzari inplika dadin, Laminaciones Arreguin enplegua bermatze aldera eta era berean, konpromisoa har dezan lantegietako jarduera berma dadin.

Honetaz gain, gaur arratsaldean, osteguneroko mobilizazioa berreskuratuko dute langileek, 19:00etan abiatuko dena Bilbao Plazatik, 2012ko gatazkan urteetan zehar errepikatu zutena.

Horregatik, berriro ere dei egiten diogu zuzendaritzari azken 8 urteotan zehar eraman dituen mehatxu eta alde-bakarreko bidea bertan behera uzteko, ez Celsa taldeari ez langileei inolako irabazirik ekarri ez diena. Ordua da Gasteiz eta Urbinako lantegietako jardueraren eta enpleguaren etorkizuna Araban finkatuko duen planaren aldeko apustua egiteko.

Horrela bada, Laminaciones Arreguiko langileek mobilizatzen jarraitzen dute enpleguaren eta benetako industria planaren alde.
 

 

 

Nafarroako Jauregiaren aurrean mobilizatu gara, Hezkuntza Itunaren defentsan

admin
-
0
Nafarroako Jauregiaren aurrean mobilizatu gara, Hezkuntza Itunaren defentsan

Nafarroako Irakaskuntza Publikoaren Kalitatea Hobetzeko Ituna sinatu genuen sindikatuok jakinarazi nahi diegu irakasleei, eta oro har gizarteari, Nafarroako Gobernuak ez duela asmorik Itunean jasotako neurriak osoki betetzeko.

Aferaren berri ofiziala izan genuenetik, joan den urtarrilaren 15ean, bilerak izan ditugu Hezkuntzako Kontseilari jaunarekin eta Parlamentuko talde guztiekin, gure kezka azaltzeko.
Hezkuntza Ituna negoziatu genuenean, biziki kostatu zitzaigun zenbait neurriren egutegia adostea, Administrazioak ez baitzuen konpromisorik hartu nahi, finantzatzerik eta epean betetzerik ez bazegoen. Horregatik neurri gutxik dute osorik egikaritzeko epe zehatza.

Sindikatuok deitoratzen dugu Hezkuntza Departamentuak itundutakoa errespetatzeko duen beharra ez betetzea, ez baitute sartu 2020ko aurrekontuetan diru-zuzkidura aski sinatutakoa aurrera eramateko.

Gainera, aurrekontuen proiektuak ez dio Hezkuntzari nahiko baliabide ematen, hezkuntzako inbertsioa %17tik %16ra jaisten baita aurrekontu orokorrean. Bestalde, gogo gutxi erakusten du Gobernu Itunak ezarri duen Barne Produktu Gordinaren %5 Hezkuntzan inbertitzeko helburuari heltzeko.

Hezkuntza Departamentuak Ituna bete eta garatu behar duelakoan gaude, hori baitzen adostu zena, eta hezkuntza arloko konpromisoek ez dituzte jasan behar gobernu aldaketek sortzen dituzten gorabeherak. Bidenabar, Gobernua osatzeko Legealdi Akordian jasoa dago, eta Kontseilari jaunak berak eta Parlamentuko alderdi guztiek adierazi diote ituna betetzeari haien sostengua.

Egoera honen aurrean, zentzuzkoa eta beharrezkoa da neurri hauek diruz hornitzea 2020ko aurrekontuetan (57 urtekoen ordutegi murrizketa eta ordu gehiago ematea ikastetxeei zuzendaritza lanengatik galtzen diren orduak konpentsatzeko). Bide batez, egutegia behar da, garatu gabe dauden Ituneko beste neurri garrantzitsuen ezarpena gauzatzeko.

Hezkuntza Ituna sinatu dugun sindikatuok jo eta ke ibiliko gara lanean sinatutakoa betetzea erdietsi arte. Afera ez bada lehenago konpontzen, hurrengo otsailaren 27an, ostegunean, mobiliziazio bat eginen dugu eta bertan parte hartzeko gonbitea luzatzen diegu irakasleei eta jendarte osoari, egun horretan Parlamentuak Nafarroako 2020ko aurrekontuak onetsiko dituelako.

 

 

 

Euskal gehiengo sindikaletik kalera atera gara Zaldibarren gertatutakoa argitzeko eskatuz

admin
-
0
Euskal gehiengo sindikaletik kalera atera gara Zaldibarren gertatutakoa argitzeko eskatuz

LAB, ELA, ESK, STEILAS, HIRU eta Etxaldek ekimen bateratua egin dugu, Zaldibarreko Verter Recycling enpresan izandako istriputik bi astera. Sindikatu bakoitzak kontzentrazioak egin ditu Bilbo, Donostia, Gasteiz, Iruñea eta eskualde-buruetan; guztira 30 deialditik gora.

Markina Xemein.

Gertatutakoa argitzeko eskatu dugu sindikatuok “ZaldibarArgitu. 2 aste desagertuta. 11+2. Prekarietatea hiltzailea” lemapean egin ditugunn kontzentrazioetan. Mobilizazioek 13 minututako iraupena izan dute, minutu bana otsailaren 6tik hona pasatu den egun bakoitzeko, egun horretatik baitaude desagertuta bi langile, Joaquin eta Alberto.

Iruñea.

Sindikatuok lanetik etxera osasunez eta bizirik bueltatzeko eskubidea aldarrikatu dugu, prekarietateak gaixotu eta hil egiten duela salatu eta urte hasieratik Hego Euskal Herrian hil diren 11 langileak eta desagertuta dauden biak oroituz. Honekin lotuta, desagertutakoen bilaketa lanari lehentasuna ematea exijitu eta euren senideei elkartasuna adierazi diegu.

Gasteiz.

Orain bi aste Zaldibarko zabortegiaren luiziak Joaquín eta Alberto harrapatu zituen. Gehiengo Sindikaleko kideon ustez bi langileen bilaketa lanek lehentasuna izan behar lukete Eusko Jaurlaritzarentzat, baina 14 egun hauetan ez dugu halakorik ikusi.

Bilbo.

Sindikatuon ustez, zaborren kudeaketa ekonomizistak eragin du luizia. Oinarrizko azpiegitura publikoa izan behar lukeen zabortegia diru-irabaziaren logikan kudeatu da eta, horrez gain, administrazio publikoak ez du kontrol publiko eraginkorrik egin. Prekaritatearen eta lan- istripuen atzean logika neoliberal hau errepikatzen da behin eta berriro.

Azpeitia.

Luiziaren ondoren ere autopista irekitzea izan da Eusko Jaurlaritzaren lehentasuna, zabortegian erreskate lanetan ari ziren langileen osasun eta segurtasunaren gainetik. Ingurumen Sailak herritarrei osasun-gomendioak egin dizkie airearen kalitate eskasaren ondorioz, baina ez da halakorik izan zabortegiaren inguruko herrietan lanean ari diren pertsonentzat; ordu eta erdiz eliteko kirolariek ezin dute lanik egin, baina bi aste hauetan langile arruntek lan fisikoak egin ditzakete Eusko Jaurlaritzaren inongo gomendiorik jaso gabe.

Donostia.

Sindikatuon ustez, krisi honetan langileen osasuna ez da lehentasuna izan, ezta Joaquín eta Albertoren bilaketa ere.
 

 

 

Fekoor-eko langileek lanuzteei ekin diete etorkizun duin baten alde

admin
-
0
Fekoor-eko langileek lanuzteei ekin diete etorkizun duin baten alde

Gutxitasun fisikoa edoeta organikoa duten bizkaitarrei arreta ematen dieten elkarteak biltzen dituen entitatea da Fekoor. Bertako langileak lanuzteak egiten hasi dira bizi duten egoeraren aurrean eta euren etorkizunaren defentsan, antzeko leku batzutan baino lan-baldintza okerragoak dituztelako. Gaur, manifestazioa egin dute Fekoor-en egoitzatik Bizkaiko Foru Aldundiak Ugaskon duen egoitzaraino, instituzio hau delako Fekoor-ek ematen dituen zerbitzuen titularra.

 

 

 

Langileon eskubideak defendatzea ez dela delitu aldarrikatu dugu Durangon

admin
-
0
Langileon eskubideak defendatzea ez dela delitu aldarrikatu dugu Durangon

Bizkaiko Metalgintzako borrokan aritu ziren hiru grebalari deklaratzera deitu dituzte Durangoko epaitegira, eta sindikatuok elkarretaratzea egin dugu langile hauei babesa emateko.

 

 

 

EHUren Klaustroaren aurrean mobilizatu dira garbitzaile azpikontratatuak

admin
-
0
EHUren Klaustroaren aurrean mobilizatu dira garbitzaile azpikontratatuak

Euskal Herriko Unibertsitateko eta EAEko Hezkuntzako garbitzaile azpikontratatuek mobilizazioa egin dute Bilbon, EHUren Klaustroaren aurrean. Langileen parte hartzea handia izan da, baita ikasleengandik jasotako babesa ere. Garbitzaileek martxoaren 2tik aurrera egingo duten bost asteko grebaren atarian egin dute gaur protesta.

 

 

 

Lan baldintza duinak aldarrikatu ditugu Arabako helduen egoitzetako langileentzat

admin
-
0
Lan baldintza duinak aldarrikatu ditugu Arabako helduen egoitzetako langileentzat

Elkarretaratzea egin dugu Gasteizen, Aldundiaren aurrean, hitzarmenaren defentsan.

Pasa den otsailaren 6an urtebete bete zen Arabako Foru Aldundian egin genuen lehen kontzentraziotik. Gure nagusien zaintzan ari garen langileok (sektorearen %95a emakumezkoak gara), egoitza pribatu eta etxebizitza komunitoarioetan ordezkaritza handiena duten 4 sindikatuen eskutik, LAB, ELA, UGT eta CCOOek, kalera ateratzea erabaki genuen jasan behar dugun prekarietate eta babesgabetasun egoera salatzeko.

Sektore feminizatu honetan jasaten dugun errealitatea honakoa da: soldata prekarioak, langile ratio askiezengatiko gehiegizko lankargak, egiten ditugun lan desberdinetarako kualifikazio egokia izan gabe sarritan, batez ere zentro txikietan eta kontziliazioa ezinezko izanda.

Guzti honi estatu mailako hitzarmena ezartzea gehitzen badiogu, zailtasunak areagotu egiten dira. Are gehiago kontutan hartzen badugu Bizkaia eta Gipuzkoan badituztela soldata hobeak, aldi baterako ezintasungatiko hobekuntzak, ordu murrizketak…

Gure helburua, ditugun lan-baldintzak Bizkaia eta Gipuzkoako gure lankideek dituztenekin parekatzea da. Azken finean, hiru herrialdeetan alderdi politiko berdinak daude gobernuan eta zerbitzua ematen duten enpresetako batzuk berdinak dira. Horretarako, eta bide honetan egin beharreko lehen pausu moduan, egun esistitzen ez den mahaia zabaldu beharko litzateke egoitza pribatuen patronala eta alde sozialaren artean, hau da, sindikatuak. Eta horrela hasiera emango litzaioke Arabako egoitza pribatuen I herrialdeko hitzarmenaren negoziazioari ulertuta, sektoreak herrialde honetan duen kasuistika dela eta, beharrezkoak izango direla patronal ezberdinak, errealitateak ere anitzak direlako eskainitako plazei, bitarteko ekonomiko etab.ei dagokienez.

Urtebeteko borroka egin dugu, honako balantzearekin:

-Gaur, otsailaren 19an egin dugun kontzentrazioa hamabosgarrena da gatazka hasi zenetik, egin izan ditugun beste hainbat ekimenekin batera: kotxe-karabanak, pankartak jartzea, sinadura-bilketa (4.000 sinadura baino gehiago Arabako egoitza eta etxebizitza komunitario pribatuetako erabiltzaileei kalitatezko zerbitzuak eta arreta eskatu eta babesa emanez), talde politiko guztiekin bilerak eta baita Emilio Sola Politika Sozialetako Ahaldunarekin ere (bi aldiz), alderdi politiko guztiek aldetik, EAJrena izan ezik, herrialdeko hitzarmenaren negoziazio bultaztzeko idatzizko konpromisoa lortuz.

-Pentsionisten plataformarekin harremanetan ari gara eta menpekotasunaren inguruan antolatu dituzten ekimen ezberdinetan parte hartu dugu.

Elkartzen gaituen azken helburu bat dugu, nagusientzako arreta duintzea eta ematen den zaintzaren kalitatea ziurtatzea, edozein egoitzetara joanda ere.

Datorren martxoaren 4an prentsaurrekoa eta kontzentrazio bateratua egingo ditugu egoera larri honen aurrean.

Lan-baldintza duinak eskatzen ditugu sektore honetako langileentzat eta zaintza duina gure nagusientzat eta horretako, ezinbestekoa da Arabako egoitzen Herrialdeko Hitzarmena negoziatzea. Ahaztuta gaude, ez dezagun beste alde batera begira, edozein egon gaitezke egoera honetan.

Mobilizatzen jarraituko dugu lortu arte.

 

 

 

Argentinako CTA-Autonomarekin elkartu gara

admin
-
0
Argentinako CTA-Autonomarekin elkartu gara

LAB sindikatuko idazkari nagusi Garbiñe Aranburu eta Nazioarteko Harremanetarako idazkari Koldo Saenz Argentinako CTA-Autonomako Fito Aguirre eta Gonzalo Manzullorekin elkartu dira Bilbon.

Bilera Euskal Herriko eta Argentinako egoera polítiko eta sindikalaren inguruan sakontzeko erabili dugu, bi herrialdeetako testuinguruak aztertu, eta eraldaketa politiko eta sozialetan sakontzeko sindikatuok jokatu beharreko paperaren inguruan solastu dugu.

Argentina aldaketa prozesu batean dago. Mauricio Macri ultra-eskuindarraren lau urtetako agintaldiaren ondoren, berriro ere herriarengan ilusio piztu duen ezkerreko koalizio batek irabazi ditu hauteskundeak, Alberto Fernandez lehendakari berri bezala aukeratua izan delarik.

Azaldu digutenez, lan handia dago egiteko eta gobernu berriak erronka garrantzitsuak ditu aurrez-arre; hala nola, aurreko gobernuarengandik “herentzian” jasotako kanpo zor neurrigabea. Sindikalgintzak lau urte hauetan urratuak izan diren langileen eskubideak berrezartzea eta herritarron ongizatea defendatzeko erronka dute, eta horregatik testuinguru politiko berrira egokitu den estrategia definitzeko kongresu berezia egin zuen CTA-Autonomak pasa den abenduan, LAB sindikatua bertan egon zelarik.

LAB sindikatuak Argentinako langile klasearen eta sindikatuen alboan egoten jarraituko du, nazioartetik ahal dugun neurrian aldaketa prozesuen alde lan egiten. Horretarako CTA-Autonoma bezalako sindikatuekin harremanetan sakontzea behar-beharrezkoa da, eta gaurkoa bezalako bilerek garrantzi berezia hartzen dute.

 

 

 

Eskola-jangela berriak diseinatzeko, hezkuntza komunitate osoaren parte hartzea exijitu diogu Eusko Jaurlaritzari

admin
-
0
Eskola-jangela berriak diseinatzeko, hezkuntza komunitate osoaren parte hartzea exijitu diogu Eusko Jaurlaritzari

Eusko Legebiltzarraren legegintzaldiaren amaierarekin eta honek Eusko Jaurlaritzari eskola-jangelen eredua aldatzeko emandako epearen amaierarekin kointzidituz, familiek, langileek, ekoizleek eta eragile sozial eta sindikalek osatzen dugun "Gure Platera Gure Aukera" ekimenak agerraldia egin du. Bertan, egungo egoera baloratu dugu eta etorkizunerako proposamenak egin ditugu.

Hauxe da gaurko agerraldiaren harira osatutako adierazpena:

Familiek, langileek, ekoizleek eta eragile sozialek osatutako ekimena da "Gure Platera Gure Aukera". Bere helburua da eskola-jantoki osasuntsuagoak eta jasangarriagoak lortzea.

Azken urteetan ehundaka pertsonek egindako lanari esker, kasu askotan boluntarioa, gaur egun eskola-komunitateak sentsibilizatuta daude jangela osasuntsuagoak eta jasangarriagoak lortzeko beharraz.

Gero eta eskola-komunitate, eragile sozial eta politiko gehiago daude aldaketaren alde, eta proposamen eraldatzaileak egiten ari dira gure seme-alabek ez ditzaten jan catering enpresa handiek euren platerretan jartzen dituzten elikagaiak.

Elikadura osasuntsua eta jasangarriarekin kontzientziatuta dagoen gizartea daukagu, eta bereziki eskola-jangelak duen hezkuntza-balioaz. Iritzi berbera dauka Eusko Jaurlaritzak?

Iruzurra eskola-jangeletan
Gaur egun eskola-jangelak kudeatzen ari diren catering enpresak zazpi milioi eurotik gora ordaintzera zigortuak izan dira merkatua banatuz iruzur egiteagatik diru publikoari, familiei, langileei eta elikagaien kalitateari. Sistemak ez du funtzionatzen, argi dago.

Eusko Jaurlaritzako jantoki-batzordea
2018an, aldarrikapen historiko bati kasu eginez, eskola-jantokien batzordea martxan jarri zuen Hezkuntza sailak. Bertan parte hartu genuen langile, familia eta zuzendaritzek. Urte oso bateko lanaren ondoren, edukirik gabeko aldebakarreko proposamena egin zuen Hezkuntza sailak: nahi zuten IGE-ek euren gain hartuko zuten jangelen kudeaketa osoa. Hezkuntza-komunitate osoak proposamen honen aurka egin zuen, besteak beste ez dagokielako familiei Administrazioari dagokion hezkuntza-eremu publiko baten kudeaketa.

2019ko urriko akordioa Legebiltzarrean
Urriaren 24ean Eusko Legebiltzarreko partidu guztiek 4 hilabeteko epea eman zioten Eusko Jaurlaritzari jantokien plegu berriak inplikatutako eragileekin kontrastatzeko eta beste eredu deszentralizatu batzuk aztertzeko. Horretaz gain, datorren ikasturterako araudi berri bat egitera premiatu zuten, kalitatea eta segurtasuna bermatuz baita lan-baldintzak ere, eta sukaldeak egitera hala eskatzen zuten ikastetxeetan.

Eta nola gaude orain?
Bestelako kudeaketa ereduak eta araudi berria. Hezkuntza-komunitateek eta eragileek hainbat proposamen egin dituzten arren, gaur egun Eusko Jaurlaritzak ez du ipini mahai gainean alternatibarik catering enpresa handien kudeaketari. Ez dago ere proposamenik egungo araudia aldatzeko.

Kontratu berria. Azaroaren amaieran Hezkuntza sailak kontratu berriaren zertzelada gutxi batzuk aurkeztu zizkion soilik EHIGE-ri, familien ordezkari den heinean. EHIGE-k erantzun zion aldaketek ez zutela zerbitzua funtsean hobetuko. Gainontzeko eragileek (langile, etabar) ez dute informaziorik jaso. Gaur egun ez dakigu zeintzuk diren Hezkuntza sailaren asmoak.

Sukaldeen eraikuntza. 2019-2013 Azpiegituren Planak zazpi sukaldeen eraikuntza jasotzen du beste hainbat ikastetxetan. Eskaera gehiago ba daude eta Hezkuntza saila berauek aztertzen ari da baina gaur egun ez dago konpromiso argirik.

Eta egoera honetan, zer proposatzen dugu?
Alde batetik, gure prestutasuna agertu nahi dugu, berriro ere, eskola-jangela osasuntsuagoak eta jasangarriak lortzeko. Bestalde, zera eskatzen diogu Hezkuntza sailari:

• Berma dezala eskola-jantokia hezkuntza-eremua izango dela, eta ez soilik gure seme-alaben elikadura eta zaintza zerbitzu hutsa, dagozkion lan-baldintzekin, eta orain arte bezala Hezkuntza sailaren baitan.

• Ikastetxe publikoen erabaki-ahalmena handitu dezala, nahi duten jangela mota aukera ahal izan dezaten. Horretarako beharrezkoa da kudeaketa osagarrirako proposamen errealak eta bideragarriak egotea.

• Elikadura osasuntsua eta jasangarria, hala nola lan-baldintzak bermatuko dituen plegu berriak egin ditzala.

• Sukaldeak eraiki ditzala posible den ikastetxeetan.

• Elikadura erdigunean ipini dezala, bestelako edozein helbururen gainetik.

"Gure Platera Gure Aukera" ekimenetik exijitzen eta pausuak ematen jarraituko dugu eskola-jangela osasuntsuak, jasangarriak eta hezitzaileak lortzeko, gutxienez egungo lan-baldintzak bermatuko dituztenak.

 

 

 
1...594595596...1,638Page 595 of 1,638

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus