"Trabajadoras no domesticadas, Hitzarmena orain trabajadoras de hogar en lucha" kolektiboak eta LAB sindikatua elkarrekin sortu dugu bideo hau, Eusko Jaurlaritzako Lan eta Gizarte Segurantzako zuzendari Elena Perez Barredok ETB2ko "360 grados" programan egindako adierazpenei erantzuteko. Gure eskubideekin ez da jolasten! Etxeko langileak borrokan!
EAJk duela gutxi esan du historikoa dela Madril, 40 urte geroago, Gizarte Segurantzaren kudeaketa ekonomikoaren transferentziaz hitz egiteko prest egotea. Gaur egun arte, Espainiako Gobernuak uko egin dio transferentzia hau betetzeari, baina EAJrentzat ere ez da lehentasun bat izan.
Pentsiodunen mugimenduaren eta euskal gehiengo sindikalaren mobilizazioek agenda politikoan kokatu dute pentsodunen egoera, baita pentsio duinak bermatzeko beharra; 1.080 euroko gutxieneko pentsioa, tartean. Horregatik, ulertzen dugu ez dela kasualitatea transferentzia hau mahai gainean egotea. Hala ere, atzo adostutakoaren arabera, titularretan gaude, ez inolako lorpenen aurrean.
Atzo adostutakoa 2021eko ekaina arte hasiko ez litzatekeen azterketa baten gauzatzea da. Gainera, akordioaren aurretik iragarri dute lehenago, Toledoko Itunean, pentsio sistemaren inguruan neurri berriak hartuko dituztela.
Dakigunez, Toledoko Itunetik pentsio erreformak besterik ez dira irten, Toledoko Itunaren izaeraren arabera, pentsiodunak direlako sistema bideragarri egin behar dutenak. Gaur egun, euskal pentsiodunen erdiak 1.000 euro azpiko pentsioa jasotzen du. Ez da kontutan hartzen gero eta prekarioagoa den enplegua dela sistema okertzen ari dena.
Gizarte Segurantzaren transferentzia oso tresna garrantzitsua da, euskal herritarren bizi kalitatean eragin zuzena duelako. Horregatik, EAJri esaten diogu ez dezala espektatiba faltsurik saldu eta euskal jendarteari azaldu diezaiola zer dauden prest proposatzeko Madrilgo Gobernuari. Euskal jendarteak jakin behar du ea EAJren agendan dagoen gutxieneko pentsioaren inguruan erabaki ahal izatea, jubilazio adina, pentsio erreformen indargabetzea eta gizon eta emakumeen arteko pentsio arrakalarekin amaitzea, besteak beste. Hori da euskal jendarteak jakin nahi duena, eta ez atzo Madrilekin abiatutako elkarrizketek ea bukaerarik gabeko kulebroi berri bat den, inolako eraginik izan gabe euskal langileen etorkizuneko baldintzetan.
LABek berretsi egiten du gizarte segurantzako euskal sistema publiko bat eraikitzeko apustua.
LAB eta ELA sindikatuok Zaldibarko zabortegi barrura bisita egingo dugu datorren astelehenean. Lanen berri jaso eta bertan ari diren langileen egoera ikuskatuko dugu bertatik bertara. Langile eta herritarrei egoera lotsagarri bezain kezkagarri honen aurrean mobilizatzen jarraitzeko deia egiten diegu.
Bisita honen helburu nagusiak honakoak dira:
• Luizia gertatu zenetik hona egindako lanen berri jasotzea.
• Egun lanean ari diren langileen egoera ikuskatzea, beren lan osasuna bermatua dagoela ziurtatzeko.
• Desagertuta dauden bi langileen, Joaquín eta Albertoren, bilaketa lanen berri izatea.
• Eta zabortegiaren egungo egoerak inguruko herrietan duen eraginaren berri zuzena jasotzea.
Bi sindikatuok eskariz egingo da bisita. Ez gutxi kostata, bertaratu ahal izateko oztopo eta zailtasunak jarri baitizkigu Jaurlaritzak. Osalani zein Jaurlaritzari zabortegiko lanak ikuskatzeko sindikatu biek egindako eskaeraren aurrean, Ingurumen Sailak bisita debekatu zigun lehenik. Baina legez bisita egiteko eskubidea dugula ikusita (Zaldibarren lan nagusia egiten ari den Moyua enpresan gehiengo osoa dugu bion artean), gure eskaerari baiezkoa eman diote azkenean.
Bide beretik, salatu nahi dugu ere prozesu honetan Jaurlaritzak ez duela sindikatuokin inolako harremanik ireki, are gehiago, egin ditugun informazio eskaera guztiak ukatu dizkigu. Eta Jaurlaritzaren azken mugimendua izan da, erabat anormala den egoera zuritu nahian, normaltasun irudi bat emate aldera, CCOO eta UGT ere bisita berera gonbidatzea.
LAB eta ELAk, gure lehentasunei eusten diegu: Joaquín eta Alberto handik lehenbailehen ateratzea eta bertan lanean ari diren langileen lan osasuna bermatzea.
Horregatik, astelehenean 12etan han izango gara eta zabortegitik ateratzean bisitan ikusitakoaren berri emango dugu. Horrela, adierazpenak emango ditugu komunikabideen aurrean 13:00etan, zabortegiaren sarrera nagusian, Ibarrerreka poligono industrialean.
Gipuzkoako Postako sindikatuok (LAB, CCOO, ESK, UGT eta ELA) Zaldibarreko zabortegiaren inguruko herrietako Postako langileen egoeraren berri eman nahi dugu, eta bereziki, banaketan ari diren langileenaren berri, egunean lauzpabost ordu pasatzen baitituzte kalean lanean.
Langileek salatu nahi dute enpresak erakutsitako arduragabekeria, ez duelako inolako neurririk ez jarduera protokolo espezifikorik hartu. Langileak eztarri, begi, azal eta ahoko hazkureak jasaten ari dira, buruko minak, urdaileko mina, metal zaporea arnasa hartzerakoan eta antzerakoak.
Airearen kalitatearen azterketaren ondoren eta dioxina eta furano maila altuak jasotzen dituzten emaitzak lortu ondoren, gutxienez deigarria iruditzen zaigu eman diren osasunerako aholku apurrak afektatuetako batzuk soilik jarraituak izateko modukoak izatea.
Futbol partida bat eta ihauteriak bertan behera uztearen moduko neurriak hartu dira, aholkatu da kalean jarduera fisikorik ez egitea, leihoak itxita edukitzea eta umeak barruan izatea. Oso zaila da aipatu neurriok euren lagunaren zati handiena kalean pasa behar duten langileek bete ahal izatea, eta honek, babesgabetasun egoeran uzten ditu.
Tamalgarria da enpresaren erantzun bakarra autoritateek emandako informazio ofiziala bidaltzea izatea, “ez da beharrezkoa neurri bereziak hartzea”, langileok bizi dugun egoeraren inguruko interes gehiagorik izan barik.
Hilabeteko hirugarren ostiralero bezala, LAB, ELA, UGT, ESK, STEILAS, CGT/LKN, CNT, EHNE, HIRU eta Etxalde sindikatuok hileroko elkarretaratzea egin dugu Bilbon, “Konponbide garaia da. Orain presoak” lemarekin, presoen eskubideen defentsan. Espainiako ordezkaritzaren aurrean bildu gara, presoen aferari konponbidea jar diezaioten exijitzeko.
Otsailaren 19an greba mugagabeari ekin zioten langileek, euren eskubideen eta etorkizunaren defentsan. Egoera jasanezina zen eta aukera bakarra izan zen makinak itzali eta kalera ateratzea, borrokara. Egun batzutako mobilizazio eta borrokaren ondoren, enpresak behartuta ikusi du bere burua jarrera inmobilista eta pasiboa birplanteatzera. Atzo eguerdian bilera egin zen enpresaren zuzendaritza eta greba batzordearen artean eta aurreakordioa lortu zen, aurretik langileen asanbladan onartu ondoren.
Akordioan honako konpromiso hauek hartu ditu enpresak, langileek igorritako oharraren arabera:
1. 10 egunetako epean, langileoi zor dizkigun nomina atzeratu guztiak ordaintzera.
2. Enpresak eta langileon ordezkariek osatutako batzorde mistoa sortzea. Aldiro elkartuko da eta honako funtzioak izango ditu: enpresaren egoeraren jarraipen eta kontrola egitea eta mekanismoak sortu eta neurriak jartzea iraganeko egoeretara bueltatzea ebitatatzeko.
3. Aldi baterako Enplegu Erregulazio Espedientean dauden langileak, modu progresiboan itzul daitezela euren lanpostuetara, aipatu neurria geldiaraziz.
Guzti horrengatik, La Auxiliar Navaleko langileok bertan behera uzten dugu otsailaren 19an hasi genuen greba, argi utzita enpresak adostutako ezer beteko ez balu edo iraganeko jarrera eta praktika okerrak baliatuko balitu, erantzun bateratu eta antolatua emango diogula langileok.
Amaitzeko, gure borroka zabaltzen lagundu eta babestu gaituzten guztiei eskerrak ematea. Bi ondorio ateratzen ditugu guzti honetatik. Lehenik, egoerari eta jabeari modu bateratuan aurre egin eta antolatzeko beharra. Eta bigarrenik, borrokak merezi duela.
Asteartean agerraldi bat egin genuen, LABeko idazkari nagusi Garbiñe Aranburu eta Idazkaritza Feministako idazkari Elixabete Etxeberriaren eskutik, LABek soldata arrakalaren arazo politikoa gainditzeko proposatutako neurrien berri emateko. Horren inguruan aritu gara Gasteizen egindako mintegian.
Nafarroan, berriz, soldata arrakalaren salaketa ere egin dugu ostiralaren etorrerarekin, gizon eta emakumeen soldata berdintasunaren aldeko egunaren bezperan. Hain justu, Cordovillan protesta egin dugu garbiketen sektorean ematen den diskriminazioa agerian uzteko. Nafarroako Industria Elkartean (AIN) bildu gara, garbiketa hitzarmena negoziatzen duen patronal baten egoitza parean.
Bi urtetako borroka eredugarriaren ondoren, Bizkaiko kirol-lokal eta zelaietako langileek aurreakordioaren sinadura lortu dute. Honek, modu funtsezkoan hobetzen ditu sektoreko egoera larrienetako batzuk, azken helburuak ahaztu gabe.
LABek sektoreko langile guztiak zoriondu nahi ditu egin duten lanagatik, honek ekarri duelako horren premia zuen sektore bat esnatzea. Oraingoan ere argi geratu da berriro borrokatzeak merezi duela.
Lorpenen artean, soldata-igoera nabarmendu dezakegu. Hau KPIaren araberakoa izango da 2018 eta 2019rako, eta KPI gehi %0,75ekoa 2020, 2021 eta 2022rako. Lanaldia murriztea ere lortu da, urtean 50 ordutan (1.660 ordutakoa izango da 2022an). Gainera, lortu da 2021ean gutxieneko soldata 1.200 eurotakoa izatea, 16 pagatan.
Era berean, gora egin du jai-egunetako plusak. Horrela, 15 eurotakoa izango da 2020an, 18koa 2021ean eta 20koa 2022an. Gainera, gaukotasuna lehen ordutik aurrera ordainduko da, borondatezkoa izango da Eguberri eta Urte Berri egunetan lan egitea, aintzinakotasuna hobetu da, urtean 12 ordu lortu dira klaseak prestatzeko, eszedentzien aukera 10 urtetatik 12 urtetara pasatuko da, laneko erropan hobekuntzak lortu dira eta garrantzitsuena dena, bakanteak estaltzeko sistema objektiboa.
Edozelan, borroka ez da bukatu, lortzeke geratu direlako kategorien definizioa, ratioak zehaztea, baldintzen pleguak, 35 ordutako lan-astea eta orduen kontsolidazioa.
LABek fiskaltzaren aurrean Gasteizko Santiago ospitalean topatu zituen irregulartasun ekonomikoak salatu zituenetik 3 hilabete pasatu dira eta oraindik, Arabako ESIko zuzendaritzak ez du azalpenik eman bertan gertatutakoaz. Murga kontseilariak berak txosten bat egingo zutela agindu zuen arren, LABek oraindik ez du horren berririk izan. Hala, Araba ESIko zuzendaritzaren jarrera salatzeko eta 200.000 euro horiek non dauden argi dezaten eskatzeko, Santiago ospitaleko ate nagusian kontzentrazioa egin dugu.
