2026-02-02
Blog Page 569

Langileen parte hartzea beharrezkoa izango da eremu sozioekonomikoan euskararen egoerari buelta emateko

admin
-
0
Langileen parte hartzea beharrezkoa izango da eremu sozioekonomikoan euskararen egoerari buelta emateko

Euskararen Egunaren atarian gauden honetan, LAB sindikatuak nabarmendu nahi du aurtengo fokoa eremu sozioekonomikoa euskalduntzeko egin diren eta egiten ari diren zenbait jardunaldi, plan eta ekimenetan jartzea ezinbestekoa iruditzen zaigula. Horregatik uste dugu 2020 bide horretan sakondu behar dela, lan munduaren euskalduntzeaz arituko bagara ezinbestekoa delako langileon hizkuntza eskubideak onartu eta errespetatzea, eta baita egiten den oro langileokin batera egitea ere.

Euskararen Egunaren atarian gauden honetan, ezin ukatu 2019ak utzi dituela hizkuntzaren gaiarekin hausnarketarako gako batzuk. Hala nola, Euskaraldia edo Korrika bezalako ekimenak. Eremu sozioekonomikoa nola euskaldundu ere, egin dira zenbait jardunaldi eta identifikatu omen dira beste hainbeste gako. Helduen euskalduntzeak eta doakotasunak eman du zer esana eta nola ez, administrazioak eta bere politikek ere bai; Nafarroan zein Hego Euskal Herrian, bederen.

LAB sindikatua ere, noski, ez da horietatik guztietatik aparte ibili. Eta orain dela 20 urte hasitako bideari jarraiki, EUSLAB gure plan estrategikoa berritu eta aurrera nola egin landu, eztabaidatu eta ekinean ibili gara. Sindikalismotik eta daukagun ardura soziopolitikoari uko egin gabe jardun dugu euskararen gaiarekin, bai kanpora begira, arestian aipatu direnetan aktiboki parte hartzen, baina baita barrura begira ere.

Nafarroan, Euskararen Lege berriari bide emateko antolatu zen batzordean parte hartu genuen eta egun indarrean dagoen dekretuaren topeak berriro mahai gainean jarri genituen. Hala ere, osatu den gobernuarekin ez du ematen lege berrirako biderik irekiko denik. Ez hor ez eta beste eremu batzuetan ere. UGT-ek jarritako helegiteari Nafarroako auzitegiak eman dion erantzuna ikustea besterik ez dago. Gure herriaren asimilazio eta ezabatze estrategiaren parte dira horiek guztiak, baina LAB sindikatuak irmo jarraituko du erantzuten eta euskararik gabe Euskal Herririk ez dagoenaren aldarria kaleratzen!

Aurtengo fokoa, ordea, eremu sozioekonomikoa euskalduntzeko egin diren eta egiten ari diren zenbait jardunaldi, plan eta ekimenetan jartzea ezinbestekoa iruditzen zaigu. EAEn, Hizkuntza Politikarako Sailburuordetzak egin nahi duen eremu sozioekonomikoa euskalduntzeko plana egikaritzean gainerako eragile guztiekin elkarlanean aritu gara ekarpenak eginez, nahiz eta jakin badakigun plan horrek muga batzuk izango dituela. Izan ere, LAB sindikatuaren ustez, Jaurlaritzaren hizkuntza politikak araugintzari bide ematen ez dion bitartean eta langileen parte hartzeari aterik zabaltzen ez bazaio, nekez lortuko da eremu sozioekonomikoan euskararen egoerari buelta ematea.

Horregatik uste dugu 2020 bide horretan sakondu behar dela, lan munduaren euskalduntzeaz arituko bagara ezinbestekoa delako langileon hizkuntza eskubideak onartu eta errespetatzea, eta baita egiten den oro langileokin batera egitea ere.

Guk, kalean zein lanean euskaraz askatasunean.

 

 

 

Ordubeteko lanuztea egingo dute bihar Laminaciones Arregui-Celsa Atlantic enpresan, gaixo egoteagatik kaleratutako langileari babesa emateko

admin
-
0
Ordubeteko lanuztea egingo dute bihar Laminaciones Arregui-Celsa Atlantic enpresan, gaixo egoteagatik kaleratutako langileari babesa emateko

Laminaciones Arregui-Celsa Atlantic-eko Enpresa Komiteak zuzendaritzak egindako azken kaleratzea irmoki salatu du, fondoagatik, baina baita eduki eta formengatik ere. Lehen aldiz aplikatu dute Laminaciones Arreguin Langileen Estatutuko 52. artikulua (kaleratze objektiboa, asistentzia faltengatik). Hori eraso zuzena da langileen eskubideekiko eta langileen osasuna zaintzeko eskubidearekiko.

Honela jarraitzen du Enpresa Komiteak igorritako oharra:

Neurri hauekin gaixo egoteko beldurra sartu nahi digute, gure gaixotasunekin lan egin dezagun, kaleratzeko beldurra izanagatik. Bajen ehuneko handi bat lanaren ondorioz izan ohi da, enpresaren neurri faltengatik (katarroak eta gripeak hartzen ditugu lan inguruaren baldintzengatik, antsietatea etor daiteke segurtasunik eza eta ezengorkotasunaren ondorioz, kalte muskulo-eskeletikoak izan ohi ditugu…). Hau dena gutxi balitz, enpresak berak zigortzen gaitu orain.

Gainera, kaleratzea ziurgabetasun egoera batean gertatu da, non enpresak ez du argitu nahi zer gertatuko den 2020. urtean, 2018. urteko ERTE prozesuaren azken txanpan. Hori bai, zuzendaritzak argi utzi du zenbait bileretan (azkena, kaleratzea gertatu baino bi ordu lehenago) plantilla murrizteko beharra ikusten duela.

Enpresaren borondatea zalantzan jartzera eramaten gaitu kaleratze honek: hauxe izango al da plantilla murrizteko erabiliko duen formula? Hauxe al da negoziazio baterako eszenatokia prestatzeko estrategia? Iraganera eramaten gaitu honek guztiak, garrantzi handiko lehen iraungipen EREa etorri zen garaira. Zuzendaritzari jarrera hau alboratu dezala exijitzen diogu, 2012. urtean bizitako antzeko egoera saiheste aldera.

Enpresa Komiteak irmoki erantzungo dio kaleratze honi, edonori egokitu dakiokelako. Lan osasunerako gure eskubidearen alde egin behar dugu eta enpleguaren defentsa aldarrikatu behar dugu, lehen kaleratze honen aurrean.

Honengatik guztiagatik, ordubeteko lanuztea eta elkarretaratzeak deitzen ditugu Gasteiz eta Urbinako atarietan, abenduaren 3an, asteartearekin, 12:00etatik 13:00etara, “Laminaciones Arreguin, enpleguaren defentsan, no a los despidos por estar enferm@s” leloarekin.

 

 

 

Jaurlaritzaren aurrekontu proiektuak ez du kalean dauden aldarri bakar bat bera ere jasotzen

admin
-
0
Jaurlaritzaren aurrekontu proiektuak ez du kalean dauden aldarri bakar bat bera ere jasotzen


Garbiñe Aranburu idazkari nagusiak eta sindikatuko Exekutiboko kide Edurne Larrañagak agerraldia egin dute, Eusko Jaurlaritzaren aurrekontu proiektuari buruzko balorazioa egiteko eta LABek horren harira atalez atal egindako azterketa aurkezteko. 2020. urterako proposatutako zenbakiek haserrea eragiten dutela nabarmendu dute, jendartearen beharrei bizkar ematen dietelako. "Aurrekontu proiektu honekin arrazoi gehiago ditugu urtarrilaren 30ean Greba Orokorrera jotzeko", adierazi du Garbiñe Aranburuk.


"Prekarizazio prozesuak amaierarik ez duen testuinguru batean, non gero eta pobrezia gehiago dagoen eta desberdintasun sozialak gero eta nabarmenagoak diren, fase ekonomiko berri baten atarian gauden honetan, Eusko Jaurlaritzaren aurrekontu proiektuak sumindura eragiten du. Aurrekontu hauek ez daude pentsatuta aberastasunaren bidezko banaketa bat egiteko, eta horrek sortzen du haserrea, herritarren beharrei bizkar ematea erabaki politiko bat delako".

LABeko idazkari nagusi Garbiñe Aranbururen hitzak dira hauek, Bilbon egindako agerraldian esandakoak. EAJk bere posizioa ez duela aldatu berretsi du: "Betiko tokian dago, elite ekonomikoen ondoan, bere oasis propioan". Garbiñe Aranburuk ere Podemos alderdiaren posizio aldaketa salatu du, kontu neoliberal eta antisozialak bozkatzeko prest dagoelako.

Aurrekontu proiektuak ez duela kalean dauden aldarrikapen bakar bat bera ere jasotzen azpimarratu du LABeko idazkari nagusiak:

–Ez dago pobreziarekin amaitzeko asmorik. Gastu sozialera zuzendutako kopuruak behera egiten jarraitzen du, BPGarekiko. Aurrekontu proiektuan islatzen dira jada DSBEn eta etxebizitza arloko prestazio osagarrietan egin nahi dituzten murrizketak.

–Ez dira aurrekontu feministak. Bi greba feministen ondoren, Jaurlaritzak mugimendu feministaren aldarriak alboratzen jarraitzen du. "Ez dugu onartuko instituzioek diskurtso feminista bere egin dezaten, ez badituzte bide horretan lagunduko duten politika publikoak garatzen", adierazi du Garbiñe Aranburuk. 

–Ez da kalitatezko enplegu baten alde apustu egiten. Langile publikoek azken urteetan galdutako eros ahalmena berreskuratu ezinik jarraitzen dute. Ez dago konpromiso argirik enplegu publikoa duintzeko eta egonkortasuna bermatzeko. Ez da bermatzen modu zuzenean kontratatutako pertsonek edo azpikontratatutakoek 1.200 euroko gutxieneko soldata jaso dezaten.

–Ez dago pentsioen sistema publikoa indartzeko konpromisorik. "1.080 euroko gutxieneko pentsioa osatu dezakete, baina ez dute nahi", kritikatu du idazkari nagusiak.

–Sektore publikoa indartzeko apusturik ez dago. Gastu publikorako gero eta diru partida gutxiago dago; Hezkuntzarako eta Osasungintzarako, kasu.

–Krisi ekologikoari ez zaio aurre egiten. Egoera hau ekarri duen garapen ereduari jarraipena ematen zaio. AHTaren proiektuak diru zati handi bat eramaten du.

Hau guztiagatik, Garbiñe Aranburuk nabarmendu du are eta arrazoi gehiago daudela oraindik urtarrilaren 30ean Greba Orokorrera jotzeko: "Egun horretan, Euskal Herriko lantokiak hustu eta kaleak beteko ditugu, lan, pentsio eta bizi duinaren alde".

 

 

 

Hilda zegoen hitzarmena berreskuratu dugu Bizkaiko Metalgintzan, eduki historikoekin

admin
-
0
Hilda zegoen hitzarmena berreskuratu dugu Bizkaiko Metalgintzan, eduki historikoekin

Sindikatuok Bizkaiko Metalgintzako Hitzarmena sinatu dugu gaur, borrokatutako edukiei dagokienez, azaroaren 26an erdietsitako aurreakordioaren segida gisa. Hain zuzen ere, edukiak berretsi ditugu gaurko sinadurarekin, eta datozen egunetan eguneratze juridikoa eta hitzarmeneko hizkuntz sexistaren zuzentzea etorriko dira akordioa biribiltzeko.

Hilda zegoen hitzarmen bat berreskuratu dugu, baita eduki historikoz bete ere. Negoziazioaren filosofiak ezartzen duen moduan, hasierako plataforman negoziatzeko abiapuntua planteatu genuen. Oinarri bat zen hura negoziaziorako eta gaur sinatu ditugun edukiak eskuratzeko. Aurreko hitzarmenarekin alderatuz, aldea ikaragarri handia da, eta garaipen hauek, egungo ogia izatea ez ezik, etorkizunerako ogia ere badira, berpiztu eta edukiz hornitutako hitzarmenak ateak irekitzen baititu lorpen gehiago eskuratzeko borrokaren bitartez.

Soldaten kasuan, 2012. urtetik galdutako eros-ahalmena berrreskuratuko dute langileek. Adibide moduan, esan beharra dugu 2003ko soldatak jasotzen dituzten langileak daudela oraindik. Taula horietan 13.403 eurokoa da gutxieneko soldata. Bada, 5.012 euro gehiago jasoko dituzte orain. INELSA enpresako langileen kasua da, besteak beste.

Subrogazioari dagokionez, lehen aldia da subrogazioaren bermea aurreikusten dela hitzarmenean; mantendu laneko azpikontratetako langileentzat, kasu honetan. Langile hauek euren lanpostua ziurtatua izango dute, orain arte ez bezala, eta hori lorpen handia da kontutan hartuta, enpresa hitzarmenetan, subrogazioa ezin dela negoziatu.

Era berean, behin behinekotasuna eta ABLE bidezko kontratazioa mugatu egin dira, lehen aldiz; lan osasun arloan, prebentziorako delegatuak ahaldunduko dituzte; berdintasun mailan, industria sektoreko lehen hitzarmena izango da berdintasunerako bidean hainbat neurri esanguratsu jasoko dituena; eta, beste neurri batzuen artean, ultraaktibitate mugagabea eta lan erreformarekiko blindajea jasotzen da hitzarmenean.

LAB sindikatutik gogoan izan nahi ditugu hau guztia lortzeko borrokan izan diren langileak, eta jakin dezaten bidelagun izango gaituztela etorkizuneko borroketan ere.

 

 

 

Herritarren eta langileen beharrei erantzuten ez dieten aurrekontuak salatu ditugu Bilboko udaletxe atarian

admin
-
0
Herritarren eta langileen beharrei erantzuten ez dieten aurrekontuak salatu ditugu Bilboko udaletxe atarian

Gaur, azaroak 29, Bilboko Udalaren 2020ko aurrekontua onartu dute. LABen iritziz, aurrekontuak herritarren beharrei erantzungo dieten kalitatezko zerbitzu publikoen garapena lehenetsi beharko luke, denon artean sortutako aberastasunaren banaketa zuzena ziurtatuz. Hau salatzeko, Bilboko Udaleko eta azpikontratetako langileek elkarretaratzea egin dugu udaletxe aurrean, aurrekontuetan zerbitzu publikoak garatu daitezen aldarrikatzeko eta Udalaren kontratazioaren prekarizazioa salatzeko.

Aurten ere, onartutako aurrekontuak ez dira onargarriak.

EZ BAITIE ERANTZUTEN:

-Udaleko langileekin hartutako konpromisoei.
-Osoko Bilkuran onartutako Gizarte Politiken Itunari, ez duelako behar adina diru bideratzen itun hori garatzeko behar diren langileak kontratatzeko.
-Herritarren eta Udaleko langileen hizkuntza-eskubideak bermatzea helburu duen Euskararen Erabilera Normalizatzeko Planari, ez baitu Plan hori garatzeko behar diren langileak kontratatzeko behar adinako aurrekontu-zuzkidura ematen.
-Gaur egungo Deustuko Parkea ordezkatuko duen suhiltzaileen parke berri bat sortzeko beharrari, parkearen gabeziak betetzeko balioko duena. Parke berri horrek zerbitzuaren kalitatea bermatuko duten lan baldintzak ziurtatu beharko ditu eta, gainera, Zorrotzaurreko hedapenak etorkizunean sortuko dituen beharrak aurreikusi beharko ditu.
-Basurtu eta Miribilla bezalako auzoak sortu eta zabaltzeak ekarritako behar berriei, non ez dagoen kultura-ekipamendu nahikorik. Ezinbestekoa da liburutegien zerbitzuari buruzko hausnarketa egitea, behar diren irizpideak eta inbertsioak zehaztuz, auzoen arteko desberdintasunei aurre egiteko.

Arestian aipatutako guztiaz gain, Udalak bere gain hartu behar du enpleguaren prekarizazioan duen erantzukizuna. Gaur egun, kontrata askotan lana prekarizatuta dago, are gehiago sektore feminizatuetan (lanaldi partzialak, behin-behinekotasuna …), kasu batzuetan ez baitira betetzen Langileen Estatutuaren oinarrizko alderdiak, hala nola atsedenerako eskubidea. Udalak zaindu eta espedientea egin behar die lan arloko araudia betetzen ez duten kontratei. Era berean, kontratazioen baldintza-agirietan, bai udalarenetan bai udal enpresarenetan, langileen lan-baldintzak prekarioak izan ez daitezen beharrezkoak diren klausulak sartu behar dira:

-Gutxieneko soldata: 1200 euro
-Probintziako lan hitzarmena betetzea
-Subrogazioa
-Kontratu mugagabeen kopurua saritzea
-Lanaldi osoen kopurua saritzea
-Emakumeen eta gizonen arteko berdintasun-irizpideak sartzea, soldata arrakala besteak beste

Udal Gobernuak ez du inoiz konpromiso argirik hartu gero eta langile pobre gehiago sortzen ari den enpleguaren prekarizazioaren aurka.

 

 

 

Bilboko Termibusen egin dugu protesta, kalean utzi nahi dituzten langileei babesa erakusteko

admin
-
0
Bilboko Termibusen egin dugu protesta, kalean utzi nahi dituzten langileei babesa erakusteko

Bilboko Termibuseko kafetegi eta kioskoko langileek ez dute euren lanpostuen etorkizunari buruzko jakinarazpen formalik jaso. Hala ere, zurrumurruen bidez jakin dute zerbitzua hartu duten enpresek ez dituztela subrogatuko, eta gehienen kasuan, kontratatu ere ez, antzinatasunik gabeko kontratazio merkeagoak egiteko.

Kalean geratuko dira langile hauek, baina inork ez die ezer esan. Aste honetan Termibus berriaren irekiera izan da, eta bertan egon gara lanpostu duinak eta urtetako lanean zehar irabazitako eskubideak defendatzen. hala egin genuen irekiera egunean, eta hala egin dugu gaur ere.
 

 

 

Inoiz baino beharrezkoagoa ikusten dugu babes sozialeko sistemaren inguruko eztabaida integral bat zabaltzea

admin
-
0
Inoiz baino beharrezkoagoa ikusten dugu babes sozialeko sistemaren inguruko eztabaida integral bat zabaltzea

LABek kezka handiz ikusten du Elkarrekin Podemosek DSBEaren erreformaren aurrean erakusten ari den jarrera, izan ere, EAJ eta PSEk aurkeztutako lege proposamena atzera botatzeari uko egin dio. LABetik behin baino gehiagotan salatu dugu lege proposamen honek murrizketak besterik ez dituela ekarriko. Pasa den ostiralean Eusko Legebiltzarrean izan genuen agerraldian berriro azpimarratu genuen ideia hori. Beraz, lege proposamen hau bertan behera uztea ezinbestekoa da. Gainera, Eusko Jaurlaritzak aurkeztu duen aurrekontu proiektuak bide horretan sakontzen du, hau da, gastu soziala murriztean eta langileen ongizatearen kontrako politikak aplikatzean.

Lege proposamenak ez du kontutan hartzen genero-inpaktua, eta auzi hau oso larria da. Izan ere, emakumeak dira DSBEa kobratzen duten pertsonen gehiengoa. Beraz, murrizketak emakumeek pairatuko dituzte gehienbat.

Berriki EPDS inkestak eta Caritaseko datuek erakusten duten bezala, pobrezia handitu egin da EAEn. Pobrezia arriskuan dauden pertsonak %16,4tik %17,7ra igo dira azken urteetan. Gainera, kontuan izan behar dugu benetako pobrezian dauden pertsonan %30,7ak ez duela DSBEa eskuratzen.

Inoiz baino beharrezkoagoa da, gaur egungo eta etorkizuneko testuingurua kontuan hartuta, EAEko babes sozialeko sistemaren inguruko eztabaida integral bat zabaltzea. Argi dugu, EAJ eta PSEren lege proposamena ez doala horretara, ez edukian eta ez forman ere. Alde batetik, babes sozialean murrizketak ezarri nahi dituztelako, eta, beste alde batetik, eztabaida sozial ibat izan behar dena tramitazio azkar eta antidemokratiko bat bihurtu dutelako.

Lan, pentsio eta bizitza duina ahalbideratuko duen Babes Sozial eta Lan Harremanetarako sistema propio, justu eta kalitatezkoa behar dugu. Guk badugu alternatiba: Euskal Herriko Eskubide Sozialen Kartak aurkeztutako Herri Ekimen Legegilean jasotzen ziren edukiak.

Orain arte bide horretan gauzatu diren urratsak herri mobilizazio eta herritarron dinamikari esker lorturiko garaipenak izan dira. Horregatik, urtarrilaren 30ean, lan, pentsio eta bizi duinaren aldeko Greba Orokorrera deitu dugu.

 

 

 

Osasunbidean euskararako baliabide falta salatu dugu

admin
-
0
Osasunbidean euskararako baliabide falta salatu dugu

Osasunbidea ez da beharrezko baliabideak jartzen ari langileek euskaraz prestatzeko egiten duten eskaerari erantzuteko. LABek enplegatuen zein erabiltzaileen eskubideak errespetatzeko eskatuko du.

Nafarroako profesional publikoak jakitun dira prestakuntzak duen garrantziaz, bai errealizazio pertsonal eta profesionalari begira, bai herritarren premietara egokitutako kalitatezko zerbitzua eskaintzeari begira. Osasunbideko langileak ez daude errealitate horretatik kanpo, eta zorionez horietako askok euskaraz trebatzea erabaki dute.

Tamalez, errealitatea bestelakoa da, eta Osasunbideko langile horietako askok aurrez aurre egin dute topo harekin: Nafarroako Ospitalean ikastaroak euskaraz egin ahal izatea eskatu duten pertsonen erdia baino gehiago nahi zuten prestakuntza-jarduera egin ezinik geratu da.

Ospitaleguneak eta Zerbitzu Nagusiek euskarara bideratutako aurrekontu-partida ez da nahikoa, ezta gutxiagorik ere, plantillaren euskarazko prestakuntza-eskaerari erantzuteko.

Horrela jokatuta, oztopo larriak jartzen ari zaizkie bai enplegatu publikoen prestakuntzarako eskubideari, bai herritarrek euskaraz arreta jasotzeko legezko eskubideari.

Gainera, Ospitalegunean oraindik ez da proposatu zirkuitu elebidun benetan dimentsionatuak aplikatzea, euskaldunek behar duten arreta elebiduna eskaintzeko. Eta euskarazko prestakuntzarako baliabide faltatik ondoriozta daitekeenez, tamalez, ez dirudi horiek aplikatzeko inolako asmorik dagoenik.

LABek euskararen defentsa berretsi nahi du, Nafarroako berezko hizkuntza den aldetik, eta langile zein erabiltzaile guztien eskubideak errespetatzeko eskatzen jarraituko du.

 

 

 

EAEko Hezkuntza Departamentuko eta EHUko kontratetako garbitzaileak ikasleen babesarekin mobilizatu dira, hitzarmen duin baten alde

admin
-
0
EAEko Hezkuntza Departamentuko eta EHUko kontratetako garbitzaileak ikasleen babesarekin mobilizatu dira, hitzarmen duin baten alde

Hezkuntza eta UPV/EHU-ko garbitzaileek, ikasleen babesarekin, Leioako Campuserako sarbideak moztu dituzte goizeko lehen orduetan, LAB, ELA, UGT, ESK eta CCOO deitutako mobilizazio batean.

Bost urte daramatzate hitzarmena berritu nahian, baina enpresek eta Hezkuntza sailak borondate eskasa erakutsi dute. Datorren astean negoziazio mahaia eta Hezkuntzarekin bilera ospatuko da. Aurrerapenik egon ezean, mobilizazioak areagotuko dituzte.

Hauxe da sindikatuok oharra:

Bost urte! Bost urte betetzera doaz Hezkuntza eta Unibertsitateko azpikontratatutako garbitzaileen lan hitzarmena negoziatzen hasi ginenetik. Erraz esaten da, baina… Bost urte!

Eta zoritxarrez, aurrean daukagun argazkia ez da batere xamurra, negoziazioa oso motel doa. Oso! Mahai gainean dagoena ez da beste munduko aldarrikapena, zerbait zilegi eta erreala baizik: benetako soldata ekiparazioa, oporren bermea, lanaldia handitzeko neurriak…

Enpresek ordea, entzungorrarena egin edo Hezkuntza sailaren gainean uzten dute erantzukizuna. Aldiz, Hezkuntza sailak ez du gurekin biltzeko inolako asmorik erakutsi, hamarnaka eskaera egin izan diogun arren. Eta bitartean noren gain erortzen dira egoera honen ondorioak? Ba bai, langileen gain, garbitzaileen gain.

Hau dela eta, UPV/EHU-ko campus desberdinetan mobilizatu egin gara.

HITZARMEN DUIN BATEN ALDE… GARBIKETA BORROKAN!

 

 

 
1...568569570...1,589Page 569 of 1,589

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus