2025-12-26
Blog Page 188

LAB sindikatuak eta geure ordezkari sindikalek ez dute inongo harremanik izanen espainiar ultraeskuina ordezkatzen duen VOX alderdiarekin

Zubiate(e)ko Aritz
-
0
LAB sindikatuak eta geure ordezkari sindikalek ez dute inongo harremanik izanen espainiar ultraeskuina ordezkatzen duen VOX alderdiarekin

LAB sindikatuaren ustez, VOX alderdiak «Espainia bat, handia eta librea» birsortzea planteatzen du Estatuan dauden nazioen aurkako eraso politikaren bidez, eta langileriaren zein gehiengo sozialaren aurkako inboluzio sozial batekin mehatxatzen duen neofaxismoa ordezkatzen du.

Ultraeskuinak inoiz ez ditu Nafarroako langileon beharrentzako eta kezkentzako irtenbideak ahalbidetuko. Kontrara, langileriaren tresna eta ordezkari diren sindikatua eta delegatuak erasoko ditu langileon eskubideak urratzeko, enpresariek dena ongi lotuta izan dezaten. Horregatik guztiagatik, LAB sindikatuak eta bere ordezkari guztiek muturreko eskuina bazter utziko dute. Bestela adierazita, VOXi eta ultraeskuinari ezta urik ere, eta egarri badira, polboroiak. Era berean, LAB sindikatuak dei egiten dio eraldaketa soziala bilatzen duen ezein eragileri gauza bera egin dezan.

Zaintza lanetara emanda dauden enplegu eta lan guztiak prekarioak dira

Zubiate(e)ko Aritz
-
0
Zaintza lanetara emanda dauden enplegu eta lan guztiak prekarioak dira

Zaintza eraldatu gabe berdintasuna erretorika hutsa dela eta, langile guztiei Azaroko Greba Feminista Orokorrean parte hartzeko deia luzatu diegu LAB sindikatutik.

14. Ikusmiran txostena jarraian duzue eskuragarri:

Ikusmiran14_zaintza_eus-1Deskargatu

Zaintza lan edota etxetik kanpoko enpleguetan dabiltzan langileen errealitatea argitara ekarri du LABek. Zenbait datu eskuratzea zaila edo ezinezkoa izan dela salatu du sindikatuak, zaintza lanen egoera prekarioaren adierazle baita hori. Edonola ere, argiak dira ondorioak: zaintzara emandako enplegua eta lan guztiak prekarioak dira, eta kapitalak zaintza lan eta enplegua baliatzen ditu aberastasuna metatzen jarraitzeko.

Azterketa honetan jasotzen diren datuek azaroaren 30ean kalera ateratzeko arrazoiak agerian jartzen dituzte. Ez dago zalantzarako tarterik, zaintza eredua bidegabea eta bideraezina da.

Guztiok zaintza duina izateko eta zaintzaileen eskubideak errespetatzeko, zaintza eredua eraldatu egin behar da. Zaintza eredu berri baten aldeko borroka sistema kapitalista, heteropatriarkal eta kolonialaren inpugnazio argia dela ulertu behar dugu eta hau izango da, aberastasunaren banaketarekin eta trantsizio ekosozial justu baten aldeko borrokarekin batera, datozen urteetako borrokaren ardatzetako bat.

Zergatik diogu bidegabea dela?

  • Ez dago bizitzarik zaintzen ez bada, baina zaintza emakumeei* egozten zaie eta horrela, produktibo – erreproduktibo dikotomiaren gain eraikitzen da sistema. Etxean, ezkutuan eta emakumeek* egiten duten zaintza lana ez da aintzat hartzen BPGn, kapitalak berak bizirauteko doan lan egiten duen emakume multzo handia du (164.000). Zaintza lanak ez dira aitortzen, ez zaie duten balio politiko ekonomiko eta soziala ematen.
  • Sistema kapitalista kolonialista eta heteropatriarakalak inposatzen duen sexuaren araberako lan banaketak eta zaintzan emakumeei* esleitzen dien rolak genero arrakalak eragiten ditu eta emakumeak* prekarietatera eta pobreziara eramaten ditu.
  • Kapitalismoa zaintza lanen esplotazioaren gain aberasten da eta sostengatzen da. Generoa, arraza, klase soziala eta jatorriaren ardatzen zeharkatzen dute zaintzen banaketa desorekatua. Sistema, etekina ateratzeko, esplotazioan oinarritzen da eta egoera horien artean muturrekoak ere badaude; asko eta asko emakume* migratuek pairatzen dituzte.
  • Prekaritatea ez da soilik ardatz ekonomikoan oinarritzen den zerbait. Prekaritateak emakumeon bizitzak gurutzatzen ditu. Zaintzaren eremuan prekaritateaz eta pobreziaz hitz egiten dugunean denboraren pobreziaz ere hitz egin behar dugu: denbora librerik ez izatea ere prekaritatea da. Denbora faltak parte hartze politikoan ere eragiten du.
  • Gizon eta emakumeen* arteko berdintasunaz hitz egitea erretorika hutsa da, hizpide dugun hau guztia azalarazten eta politizatzen ez badugu. Ez dago berdintasunik zaintza lanak ez badira balioan jartzen, ez badira kolektibizatzen eta banatzen, ez badira duintzen.

Zergatik diogu bideraezina dela?

Errealitate hau ez da kasualitatea, kapitalismoak emakumeei* egozten dien zaintzaile rolak, zaintzari dagokion balioa ez aitortzea dakar. Horregatik, ez da garatu izan zaintza sistema publikorik, instituzioetatik prekarizazioari alfonbra gorria jarri zaio, zaintza lanak pribatizatu eta merkantilizatu dira. Zaintza negozio eta eskubide, zaintza negozio eta ustiaketa bilakatu da.

Muturreraino eraman da eredua eta jada ez da sostengatzen. Zaintzaren gaia, zaintzan ari diren emakumeen* arazo eta kezka izatetik jendarte osoaren kezka eta lehentasun izatera pasatzen ari da. Emakumeak* ahalduntzen eta planto egiten ari dira. Feminismoak eta feminismoa ekintza sindikalera ekarri izanak, lagundu du pedagogia egiten eta hainbat borroka pizten.

Zaintza krisiak gero eta dimentsio handiagoa izango du. Zaintza beharrak gero eta handiagoak dira baina emakumeak* ez daude prest orain arte bezala zaintza lan horiei heltzeko eta instituzioen utzikeriaren aurrean kalean bultzatuko dugu zaintzan eman beharreko eraldaketa.

Orain arteko borrokei beste dimentsio bat eman eta mugarri berri bat jartzera goaz Azaroaren 30eko grebarekin.

Zaintza nola, nondik eraldatu:

  • Urgentziaz zaintzaileen lan baldintzak duindu egin behar dira:
    • Etxeko langile egoiliarren erregimena desagerraraziz, etxeko langileak lan-erregimen orokorrean sartuz (Lanaren Nazioarteko Erakundearen 189. hitzarmena bere osotasunean berretsiz)
    • Etxeko langileei zein zaintza eremuan ari diren beste langile guztiei gutxieneko soldatatik gorako lansariak ezarriz.
    • Ratioak, lanaldiak, lan osasuna… eta bestelako lan eskubideak duinduz.
  • Zaintza lanak banatu eta berrantolatu, kolektibizatu. Pertsona guztiok ditugu zaintza beharrak eta zaintza guztion ardura da. Zaintza lanak aitortu eta banatu egin behar dira eta gizonek dagokien ardura hartu behar dute zaintza lanei denbora gehiago eskaintzeko. Zaintza lanak kolektibizatu eta berrantolatu egin behar dira. Horrek guztiak enpleguaren antolaketan ordutegiak eta baimenak berrikustea dakar.
  • Zaintza sistema publikoa: Aztertutako datuek erakusten dute Zaintza Sistema Publiko Komunitario bat ez garatzeak eta ez indartzeak beti ekarriko duela emakumeak* kontratatzea eta zaintza lanak modu “pribatuagoan” -familian- kudeatzea. Sistemak ez du bermatzen (kontrakoa sustatzen du) baldintza egokietan emango direnik zaintza lanak. Beraz, zaintza sistema publikoaren beharra azpimarratzen dugu.

HAINBAT DATU ESANGURATSU:

  • Etxeko lanetan (lan erreproduktiboa) eta gizarte zerbitzuetan diharduten langileek sortzen duten aberastasuna BPGrekiko %25,75 da: eraikuntzan (%4,20) edota industrian (%17,19) sortzen duena baino handiagoa.
  • 186.800 herritar ari dira etxeko lanetan, horietatik 164.328 emakumeak* (%87,97). Zazpi eguneko lanastea dute, egunean 10 orduko lana, astean 72 ordu, urtean 170 lan egun oso. Ondorioz, urte erdia lanean ematen dute.
  • Etxeko lanetan ari diren emakumeek* gutxieneko soldata jasoko balute (1.570€, 14 pagatan) 3.611.929.440€-ko gastua suposatuko luke: EAEko 2024rako aurrekontu proiektuaren %24.
  • Etxeko langileen legezko oinarrizko soldata 1.080€-koa da, kasu gutxitan bermatzen dena.

Helduen egoitzetako langileen batez besteko soldata 1.444,74€-koa da. Lan Hitzarmen estatala duten emakumeena* 1.061€-koa.

Berretsi egin dugu Nafarroako 0-3 zikloko hitzarmen kolektibo baten aldeko LABen jarrera

Zubiate(e)ko Aritz
-
0
Berretsi egin dugu Nafarroako 0-3 zikloko hitzarmen kolektibo baten aldeko LABen jarrera

CCOOk 0-3 hezkuntza ziklorako Espainiako Estatuan egin duen greba deialdia dela eta, LAB sindikatuak adierazi nahi du ez duela babestuko eta Nafarroan eta Nafarroarendako eginiko bide orri propio baten aldeko bere jarrera berretsi du. LABek hilabete asko daramatza Nafarroarako hitzarmen sektorial baten beharra aldarrikatzen, haur eskoletako langile guztien lan baldintzak duinduko dituena. Ildo horretan, ez du lagunduko Nafarroako langileen errealitatea kontuan hartzen ez duen Estatuko hitzarmena indartzen edo jarraipena ematen dion deialdirik.

LABek argi du negoziazio kolektiboa Nafarroara ekarri behar dela. Nafarroako langileek beren lan baldintzak hemen negoziatu eta adostu behar dituzte, eta ez Madrilen. Beraz, sindikatu hau ez da borrokatuko bere errealitatea eta benetako beharrak kontuan hartzen ez dituen tresna baten alde. Orain Nafarroako hitzarmena lortzeko pausoak ematen jarraitzeko unea da, eta ez Estatuko hitzarmena indartzeko urratsak egiteko unea.

Nafarroan, 0-3 sektorerako hitzarmen propio bati esker, Nafarroako Gobernuak zerbitzu horien finantzaketa bermatuko du, haiek publifikatzeko bidea eta hezkuntza-ziklo horren kudeaketa bateratuaren ideia erraztuz, eta horrek ez die zama gehigarririk ekarriko enpresa edo kooperatiba kudeatzaileei.

Nafarroako hezkuntzan euskara ikasteko baimenen ukazioa dela-eta, elkarretaratzea egin dugu

Zubiate(e)ko Aritz
-
0
Nafarroako hezkuntzan euskara ikasteko baimenen ukazioa dela-eta, elkarretaratzea egin dugu

Euskararen eta langile publikoen hizkuntza-eskubideen aurkako ekintza uholde berri batek piztuta, Nafarroako Foru Administrazioan gehiengoa duen sindikatuak elkarretaratzea egin du gaur goizean.

Euskarak Nafarroan, oro har, eta administrazio publikoetan bereziki bizi duen egoera oso delikatua dela baieztatu du LABek hasieratik, eta gainera, aspaldidanik oztopo andana jartzen ari zaizkiola: zonifikazioa betikotzea, hizkuntza paisaian gabeziak, euskara eskakizuna duten plazak oso gutxi izatea, euskara merezimendu gisa ia ez baloratzea, eta abar.

Azken asteetan Hezkuntza departamentua euskara ikastaro trinkoetara joateko baimenak ukatzen ari dela eman du jakitera sindikatu abertzaleak, gainera. Hainbat langileri, 195/1993 Foru Dekretuak ezartzen dituen irizpideak bete eta ikastetxeko zuzendaritza-taldearen baimena izanik ere, Santo Domingoko egoitza honetatik parte hartzeko baimenak ukatzen ari zaizkiola azaldu dute. Esan dutenez, Hezkuntza Laguntzako Espezialistak dira gehienak eta ezezkoa jasotzeko arrazoiak zentzugabeak dira: betetzen duten lanpostuak ez duela hizkuntza-eskakizunik behar, espezialista hauei irakasleen baldintza berberak aplikatu behar zaizkiela (ez da egia, baina), ez dutela behar adinako euskara-mailarik egiaztatzen…

Administrazio publikoen barruko jarrera euskarafobiko horiek ez direla Hezkuntza departamentuan bakarrik gertatzen ari gaineratu dute; izan ere, PAGNAn, NOPLOIn eta udal askotan ere arazoak daudela baieztatu baitute. Horren aurrean, LABek borrokan jarraitzeko asmo irmoa agertu du, jarrera eta gertaera hauei bukaera emateko; izan ere, langile publikoek prestakuntza jasotzeko duten eskubidearen kontra egiten baitute eta, ondorioz, baita Nafarroako herritarron hizkuntza-eskubideen kontra ere.

Bukatzeko, LABek azpimarratu du jarrera euskarafobikoa gero eta zabalduago dagoela, eta administrazio publikoetatik epaitegietara ere zabaldu dela honezkero. Horregatik, babesa eta atxikimendua eskaini dizkio Kontseiluak deitutako manifestazioari, “Oldarraldiaren aurrean, euskararekin bat, euskaraz bat” leloa duenari, eta nafar guztiei dei egin die bihar, azaroak 4, Bilbora joan daitezen euskara bereziki azken hilabeteetan jasaten ari den eraso uholdeari aurre egiteko.

Hizkuntza eskubideak errespetatu!

Euskarafobiari STOP!

Nuadiko langileak borrokan

Zubiate(e)ko Aritz
-
0
Nuadiko langileak borrokan

Orkoien-Arazuri industrialdeko NUADIko (lehengo NUCAP) langileek mobilizazio-egutegi bat hasi dute, enpresa itunaren eta soldata duinen alde

Joan den urriaren 23tik, NUADIko langileak mobilizatzen ari dira lantegian. Mobilizazioak fabrikaren atean hasi dira atsedenaldien orduan, eta ez da baztertzen gero eta gehiago izatea.

Mobilizazio horien arrazoia da gaur egun negoziatzen ari den enpresa itun duin bat lortzea , hobekuntza sozialak eta egoera ekonomiko globalarekin bat datozen soldata eguneratzeak bilduko dituena.

Historikoki, enpresa honetan soldata igoerak KPIari lotuta egon dira. Adierazle horrek langileoi erosteko ahalmena mantentzen digu. Baina oraingo honetan, enpresako zuzendaritzak soldaten eta KPI igoeraren arteko lotura hautsi nahi du. Enpresak dagoeneko eguneratu ditu bere produktuaren prezioak, bezeroei saltzeko, eta azken urteetan ematen ari den KPIaren inflazioaren arabera eguneratu ditu, baina ez du horrela egin nahi langileekin, eta pobretzera eraman nahi ditu.

Arrazoi horiek direla eta, Enpresa Batzordeak eta langileek mobilizazioei eutsiko dizkiete, eta areagotuko dituzte enpresak erosteko ahalmenari eusten ez badio. Batzordea prest agertu da behar den guztietan biltzeko, baina ez dute onartuko inolako bilera edo proposamenetan lankideen pobretzea.

Murriztuz doa bila ari denari lana topatzeko lan merkatuak duen gaitasuna

Zubiate(e)ko Aritz
-
0
Murriztuz doa bila ari denari lana topatzeko lan merkatuak duen gaitasuna

Guztion lan eta bizi baldintzen alde azaroaren 30ean egingo den Greba Orokor Feministaren garrantzia azpimarratu du LAB sindikatuak.

Langabeziak gora egin du Hego Euskal Herrian: 3.614 langabe gehiago daude eta azken hilabetean %3 hazi da langabetuen kopurua. Azken hilabetean herrialde guztietan langabezia igo arren, Araban azpimarra jarri behar da, pasa den urtetik hona igotzen jarraitzen baitu.

Emakumeek langabetuen gehiengoa izaten jarraitzen dute, zehazki %58,40. Era berean, emakumeen lan baldintzak prekarioagoak dira, kontratu motak ere aztertuz gero. Batetik, lanaldi osoan emakumeen %57,7 dagoen bitartean, gizonezkoak %78,7 dira. Bestetik, lanaldi partzialekin alderantziz gertatzen da, emakumeen %25,4k baitu lanaldi partziala eta gizonen %10,9k.

Espainiar estatuko azken lan erreformak ere emakumeen egoeran eragin negatiboa izan du. Izan ere, kontratu mota guztiak kontutan hartuta, aldizkako kontratu finkoak %4,1 igo badira ere, emakumeen artean igo da kopuru hau bereziki (%5,4 emakumeen artean, %2,8 gizonezkoen artean). Beraz, aldizkako kontratu finkoen artean, %64,08 emakumeei dagokio. Hala ere, eragina lan merkatu osoan izaten ari dela esan dezakegu. Izan ere, azken hilabetean 8.369 kontratu gutxiago egin dira eta egin direnen artean, %74,40 behin-behinekoa izan da. Kontratu guztien artean mugagabeak igo izanak ez du merkatuaren egonkortasun edota lan baldintzen hobekuntza nabarmenik ekarri, aldizkako finkoak baitira igoera hori hauspotu dutenak.

25 urtetik beherako langabeziak pasa den urtetik hona izan duen gorakada kezkagarria da. Izan ere, %6,86 egin du gora gazteen langabeziak, epealdi berean langabezia orokorra %2,36 jaitsi arren.

Sektore guztietan ere antzeko proportzioan igo da langabezia. Zerbitzu sektoreak gero eta pisu gehiago duenez ekonomian zein lan merkatuan (afiliazioaren %73,27 zerbitzu sektoreari dagokio), sektore honetan langabezian gelditu den langile kopurua nabarmen handiagoa da, 2.645 langabe gehiago baitaude zerbitzuetan. Azken hilabetean langabezian dauden herritarren %70,06 zerbitzu sektoreari dagozkio.

Pasa den hilabetetik hona, aurreko enplegurik gabeko herritarren kopuruak gora egin du Hego Euskal Herrian eta datu honek azaldu dezake langabeziaren gorakada, afiliatu kopuruak gora egin baitu. Izan ere, lan bila ari diren herritar gehiago dago (pasa den hilabetean baino 3.614 gehiago), lana topatu dutenak baino (451 afiliatu gehiago). Hori dela eta, lan bila ari diren herritarrei lana topatzeko merkatuaren gaitasunak behera egin du azken hilabetean. Beraz, lan baldintzen prekaritatean oinarrituriko enplegua handituz doan bitartean, enplegua sortzeko zailtasun gero eta handiagoak ditu lan merkatuak. Bi errealitate hauek Hego Euskal Herrian dagoen Prekaritate Indizea handitu besterik ez du egingo. Gogora dezagun bi herritarretik bat prekarioa dela, enplegua izan arren, bizitza duina bermatzeko diru sarrera nahikorik ez duena.

Hilabete honetako datuek egoeraren gordintasuna agerian utzi eta lan merkatuan sortzen ari diren pitzadurak sistema aldatu ezean konponezinak direla erakusten dute. Hilabete honetan ere badugu aukera zaintza erdigunean izango duen eredu berri baten alde kalera ateratzeko, feminista izango den ereduak guztion lan eta bizi baldintzak hobetuko baititu. Beraz, eta amaitzeko, langile klase osoari azaroaren 30eko Greba Orokorrean parte hartzeko deia luzatzen dio LABek.

Zazpi kaleratze Guascor Energy R & D-ren Gasteizko instalazioan

Zubiate(e)ko Aritz
-
0
Zazpi kaleratze Guascor Energy R & D-ren Gasteizko instalazioan

Mutares inbertsio-funts alemaniarrak, Guascor Energy R & D-ren jabeak, zazpi pertsona kaleratu ditu Arabako Parke Teknologikoan duen egoitzan.

Mutares-ek Guascor Energyk (lehen Siemens Energy) erosi eta urtebetera, zazpi langile kaleratu ditu Miñaoko egoitzatik. Kaleratze horiek, neurri kolektibotzat hartu ezin diren arren, kolpe latza dira langileentzat, langileen % 12 kaleratu baitira. Guascor Energy taldearen egoera zailean, Mutares ez da joera aldatzeko gai izan urtebeteren ondoren.

Enpresa-batzordearen arabera, hartutako kontingentzia-neurriak, Research & Development (Ikerketa eta Garapena) alorreko langileak kaleratuta, epe laburrekoak dira argi eta garbi, enpresaren talentuari muzin eginez eta etorkizuna hipotekatuz.

Guascor Energy R & Dko enpresa-batzordeak, plantilla osoaren izenean, kaleratze horiek eta Mutaresek langileei emandako tratua salatu ditu. Lehen urte honetan, enpresak uko egin dio langileen ordezkariekin funtsezko gaiak jorratzeko elkarrizketari.

Guascor R & D puntako lantegia da teknologia berrietan, eta Eusko Jaurlaritzak eta beste erakunde batzuek dirulaguntza ugari eman dizkiote hasieratik. Eusko Jaurlaritzak kontuan hartu eta inplikatu beharko luke diruz laguntzen dituen zentroen enpleguari eusten. Beraz, batzorde gisa dugun betebeharra da mezu hau helarazteko egoki ikusten ditugun ateetara deitzea.

Gainera, egoera bidegabe hori desberdina da aplikazioan; izan ere, argi eta garbi maskulinizatutako enpresa batean ( % 30 emakumeak plantillan), eta berdintasun-planaren negoziazioan murgilduta, benetako asmoak dituzte, kaleratutako emakumeen ehunekoa %40koa baita.

Enpresaren egoera txarraren eta Mutaresek sustatutako ezegonkortasunaren ondorioz, plantillaren bolumena murrizten ari da, ordezkatu gabeko borondatezko bajekin.

Egoera laster itzultzen ez bada, langileek ez dute baztertzen beste ekintza batzuk hartzea, lanuzte puntualetatik manifestazioetaraino.

Alconza-Irizarri exijitzen diogu langileen borrokaren aurkako kriminalizazioa nahiz irekitako prozesu judizial guztiak bertan behera uzteko

Zubiate(e)ko Aritz
-
0
Alconza-Irizarri exijitzen diogu langileen borrokaren aurkako kriminalizazioa nahiz irekitako prozesu judizial guztiak bertan behera uzteko

Datorren azaroaren 8an, greba egitea eta lan zein bizi baldintza duinak izatearen alde borrokatzea erabaki zuen langileetako bat deklaratzera deitu dute Getxoko epaitegira.

Denok gogoratzen duzuen moduan, Alconzako kaleraketen aurrean, 5 hilabeteko greba burutu zen. Borroka horren ondorioz, hemendik
urtarrilera bitarte, 4 langile deklaratzera deituak daude.

Grebak iraun zuen bitartean, errepresioak ez zuen etenik izan; isun ekonomikoak jaso genituen mozal legea aplikatu izanaren bitartez, eta Ertzaintzak hainbat langile jipoitu eta zauritu zituen.

25 lankideen kaleratzea gutxi balitz, grebalarien kontrako mendeku gosea bere baitan mantentzen dute. Alconzak, Irizarren oniritziarekin, langileen aurkako prozesu judizialei eustea erabaki du.

LABetik salatu nahi dugu langileek lanpostuak defendatzeko egindako mobilizazioetako partaideekiko jazarpena, eta irekitako prozesu judizial guztiak bertan behera uztea exijitzen dugu.

Langileen eskubideak, gure eskubideak eta lanpostuak defendatzea ez da sekula delitua izango. Hori dela eta, salaketak, isunak eta errepresioak ez dituzte lan eta bizi baldintza duinen alde borrokatzea erabakitzen duten langileak geldituko.

Horregatik guztiagatik, azaroaren 8rako LAB sindikatuak lanuzteak deitu ditu enpresan (11:00-12:30) eta (13:45-14:45), eta goizeko 11:15ean kontzentrazioa antolatu du Getxoko epaitegiaren atarian, Alcontzako lankideari babesa emateko, prozesu judizial guztiak bertan behera uzteko eskatzeko eta borroka sindikala delitua ez dela aldarrikatzeko.

Azken urteetan garatutako ibilbideak pentsiodunon eskubideak lortzeko Pentsio Sistema Propio eta Publikoa behar dugula adierazten digu

Zubiate(e)ko Aritz
-
0
Azken urteetan garatutako ibilbideak pentsiodunon eskubideak lortzeko Pentsio Sistema Propio eta Publikoa behar dugula adierazten digu

Gasteizen egindako LABen Helduen eta Pentsiodunen Arloaren Batzar Nazionalean 150 lagunek parte hartu dute. Bilkuran Garbiñe Aranburu koordinatzaile orokorrak, Endika Perez Ekintza Sozialeko Idazkariak eta Maddi Isasi Idazkaritza Feministako arduradunak hitz egin dute.

Aranburuk testuinguru politiko, ekonomiko eta sozialari aurre egiteko LABen lan ildo nagusiak ekarri ditu gogora. Europa mundu mailan duen posizioari eutsi ezinik dabilela esan ondoren, etorkizuna aberastasuna birbanatu, enplegua duindu eta zerbitzu publikoak indartzearen bidetik eraiki beharra dagoela ziurtatu du. Gure misioari heldu eta eraldaketa prozesua elikatzeko Ezker Independentismoaren hegemonia politiko instituzionala, baina baita soziala ere hedatzen jarraitzeko, borroka sindikal eta sozialen garrantzia azpimarratu du. LAB ezker independentismoaren erreferentzia sindikal moduan indartzeko dugun erronkaz ere mintzatu da.

Ekintza Sozialeko Idazkaria den Endika Perezek, eremuz eremu jorratutako ibilbideari erreparatu ostean, gure sindikalismoa eraldatzen jarraitzen dugula esan du eta berrikuntza bezala sindikatuak abian jarri berri duen Idazkaritza Antirrazistari egin dio aipamen. LABeko Ekintza Sozialeko Idazkariak hurrengo ikasturterako LABeko Helduen eta Pentsiodunen arloa indartuko dugula iragarri du. Bestaldetik, Pentsio Sistema Publiko eta Propioaren bidean, Euskal Herriko Pentsiodunen Mugimenduan garatu behar den lana sindikatuarentzat estrategikoa dela ziurtatu du.

Maddi Isasi Idazkaritza Feministako arduradunak, azaroaren 30ean deituta dagoen Greba Feminista Orokorraren nondik norakoak azaldu ditu. Isasik borroka honetan guztion esku hartzea ezinbestekoa dela esan du. Izan ere, zaintza sistema publiko eta komunitarioren beharra pentsiodun arloko aldarri nagusitako bat izan beharra dago.

1...187188189...1,583Page 188 of 1,583

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus