2025-12-20
Blog Page 1118

LABek lanuzteak deitu ditu Telefónican greban diren Movistarreko langileei elkartasuna adierazteko

admin
-
0

Sektoreko patronalak, Telefonica haren buru izanik, ezarri duen laneko esplotazioaren aurka, Movistarrentzat lan egiten duten eta ia duela bi hilabete greban dauden kontratetako eta azpikontratetako langileei nahiz autonomoei elkartasuna adierazi nahi die LABek. Ekainaren 2an, 4an, 9an eta 11n, Hego Euskal Herrian bi ordutako lanuzteak deitu ditugu Telefonican.

Haiekin bat eginez, arbuiatzen dugu zereginak kanpoko beste enpresetara bidali izana, are gehiago, haietan, pertsonak morroi bihurtzen dituzten egoera latzetan egin behar izaten dutelako lan. Hau guztia jabeen eta zuzendarien onuran egiten da, nahiz eta multinazionalak, iazko irabaziak hirukoiztu zituen 2015eko lehen hiruhilekoan.

Prozedura horrek, Telefonicak lan ematen dien enpresetara atxiki langile guztien erantzun irmoa eskatzen du, prekarietatea bertan behera gera dadin eta lan baldintza duinak lor ditzagun.

Azpikontratazioen sistemak, zeregin berak bete ohi ditugun langileok bestelako lan baldintzak izatea dakarrelako, “lan berdina soldata bera!” oinarrizko printzipioa urratzen du.
Horregatik, ekainaren 2an, 4an, 9an eta 11n, Hego Euskal Herrian bi ordutako lanuzteak deitu ditugu Telefonican, ondorengo aldarrikapenak eginez:

• Kontratuaren eta barrutiaren arabera, kontratetako grebalariek bete ohi dituzten zereginak ordezkatzeko, Telefónicako langileei betebeharrak esleitzearen aurka gaude.

• Telefónicako enplegu duina areagotu behar da, operazioetan eta beste departamenduetan lanera kanpora eramatea eta lanaren kaskartzea ezaba dadin, lan berdinari soldata bera helburutzat hartuz.

• Beharrezkoa suertatuko da Telefónicak langile kopurua handitzeari ekitea; baliabideak, lehentasunez, harentzat lan egiten duten kontratetako langileen artean bilatuko dira.

• Kontratetako eta azpikontratetako langileen baldintzak ezarriko dituen esparru arautzaile eta arauemailea behar dugu; honetan, errealitateak kontuan hartuko dira (enpresa batean lan egitea, norberaren kontura egitea,…). Kasu bakoitzak irtenbide berezia eskatzen du, lan baldintzak ziurtatzeko eta bermatzeko.

  

 

 

TS Fundiciones enpresaren irekiera ospatzeko jaia Ekainaren 6an

admin
-
0
TS Fundiciones enpresaren irekiera ospatzeko jaia Ekainaren 6an

Asteartean Donostiako epaitegian egin zen lizitazio ekitaldian, Zestoako Sansinenea industrialdean kokatuta dagoen TS Fundiciones enpresaren behin betiko adjudikatzailea SHANDONG IRAETA WIND POWER FLANGES MANUFACTURES SL (Gonvarri) izendatu zen, 5.150.000 eurorengatik. LABentzat albiste hau oso pozgarria da bai TS-ko langileei zein haien familie ekarriko dienagatik eta Sansinenean kokaturik dagoen plantan proiektu industrial berri bat jartzea ahalbidetu delako. Denon artean lortutako garaipen hau ospatzeko, datorren Ekainaren 6an denok batera ospatuko dugu goizeko 12:00taik aurrera, Zestoako Plazan.

Zestoako eta Urola-Kostako eskualdean, lehen itxitako enpresa garratzitsu bat berreskuratzea suposatzeaz gain, aktibitate industrialari ezinbesteko bultzada emango dio.

Asko izan dira aurrean izan ditugun oztopoak, onartu beharra daukagu: ez zaituztegu ahazten enpresa itxi zenutenok, eta inolako erantzunkizun gabe enpresatik atera zaretenak, gu langabeziara kondenatuz. Epaitegietako bidea ere gogorra izan da, luzea, askotan itxaropena galtzeko zorian egon gara.

Baina gure arteko diferentziak gaindituz, elkarrekin borroka egiteko gai izan gara: Oztopoak oztopo, langileek egindako mobilizazio, kontzentrazio, biluzte, itxialdi, okupazioak… asko izan dira.

Baina bide horretan ez gara bakarrik egon. Bide horretan, tunelean argirik ikusten ez genuenean, elkartasunak eman digu aurrera egiteko indarra. Zestoako herria eta Urola Kostako eskualde osoaren laguntza izugarria izan da.

Badakigu, oraindik dena ez dagoela bukatuta. Badakigu orain proiektu industriala martxan jarri eta eman diguten hitza betearazteko lanean segi beharko dugula. Hau da, langile guztiek metrezi duten lanpostua lortu arte borrokan jarraitu beharko dugula.

Baina lortu duguna, lortu duzuena haundia da, eta merezi duen bezala ospatu beharra dagoela uste dugu. Ospatu behar dugu langileriak merezi duelako dena kontra duen eredu batean lortutako garaipenak ondo ospatzea. Eta ospatu behar dugu gainera, Zestoako herriak eta Urola Kostako eskualdeari ESKERRIKASKO handi bat esan behar diegulako.

Horregatik, denon artean lortutako garaipen hau ospatzeko, datorren Ekainaren 6an denok batera ospatuko dugu goizeko 12:00taik aurrera, Zestoako Plazan. Bertan, ikusiko dugu elkar!
 

  

{linkr:related;keywords:ts-fun;limit:5;title:Albiste+gehiago}
 

 

LABek gehiengo osoa lortu du Nafarroako bi industria garrantzitsutan

admin
-
0
LABek gehiengo osoa lortu du Nafarroako bi industria garrantzitsutan

5 ordezkari eskuratu ditu Urdiaingo Magotteaux-en eta 7 Tafallako Fagor Ederlanen. LABek hazten jarraitzen du hilabetez hilabete. Lan Sailak publikatutako azken datu ofizialen arabera (apirilak 30), LABek bere gailur historikoa gainditu du berriz ere, ordezkaritza sindikalaren %14,43 eskuratuta.

Berriki Magotteaux eta Fagor Ederlanen eginiko hauteskundeetan LABek emaitza oso onak lortu ditu, gehiengo osoa eskuratuz.

Magottoux-en honako hau zen orain arteko ordezkaritza: ELA 5, LAB 3, UGT 1; Hauteskunde berrien ostean, aldiz, LABek 5 ordezkari lortu ditu, ELAk 3 y CCOOek 1.

Tafallako Merindadeko enpresa nagusiena den Fagor Ederlanen ere LABek gehiengo osoa lortu du. Komitea 17 kidetik 13ra murriztu bada ere, LABek bere 7 ordezkariak berritu ditu. Hona hemen orain arteko ordezkaritza, 17ko Komitean: LAB 7, ELA 4, UGT 4, La Voz 1. Oraingoa, aldiz, 13ko Komitean: LAB 7, ELA 4, UGT 1, CCOO 1.

Honela bada, LABek hazten jarraitzen du hilabetez hilabete. Lan Sailak publikatutako azken datu ofizialen arabera (apirilak 30), LABek bere gailur historikoa gainditu du berriz ere, ordezkaritza sindikalaren %14,43 eskuratuta. Pasa den urteko apirilean, %13,27ko ordezkaritza zuen.
 

 

 

Osakidetzak progresiboki eta modu isilean Kudeaketa Klinikorako Unitateak izeneko gestio sistema merkantila ezartzen ari da

admin
-
0

Osakidetzako zuzendaritza progresiboki eta modu isilean osasun sare osoan Kudeaketa Klinikorako Unitateak izeneko gestio sistema merkantila ezartzen ari da.

Kudeaketa Klinikorako Unitateak (KKU) izeneko gestio sistema merkantila ezartzeko arrazoi hauek ematen dituzte: Gizartearen zahartzearen ondorioz osasun zerbitzuen eskaera geroz eta haundiago izatea, aldaketa teknologikoak, eta gizartearen eskariak geroz eta haundiagoak izatea. Beraien esanetan “erabiltzaileen gehiegizko erabilerak eta krisi ekonomikoaren eraginak osasun sistema sostengaezina” izatea sortzen dute.

Osakidetzako Administrazio Kontseiluak 2012ko maiatzean onartu zituen Kudeaketa Klinikorako Unitateak, eta progresiboki osasun sistema publikoan ari da zabaltzen. Osasun zerbitzuak, ospitaletako plantak, lehen arreta, osasun arreta, laborategiak… modu deszentralizatu eta autonomoan jestionatzeko modua balitz bezala saldu nahi digute.

KKU delakoen bidez baliabide materialak eta giza baliabideak kudeatzeko ardura eta boterea unitate bakoitzeko mediku eta erizainei ematen zaie. Azkenean, eredu honen funtsa da “pizgarri ekonomikoen” banaketa eta hauek lortu ahal izateko profesionalek helburu batzuk lortu behar izatea. Lehentasuna ematen zaio gutxi gastatzeari, arreta espezializatura paziente gutxi bideratzea, pazienteak denbora gutxian izatea ingresaturik, farmazian aurreztu, aparatuen preskripzioan…

Lortu nahi diren helburuen arabeara profesional perfil zehatza aukeratu ahal izango da. Profesionalak helburuak lortzen baditu ongi ordainduko zaio. Osakidetzan jadanik txertatua dago “Garapen Profesional” kontzeptua. Honen arabera, profesionalei lau mailen arabera ordaintzen zaie, kontutan harturik beraien esperientzia profesionala, formakuntza, eta sistemarekiko inplikazioa. LAB sarritan agertu izan da Garapen Profesional eredu honen aurka, aitortza ekonomiko batean oinarritzen baita. Bestetik, erdi mailako agintaritzen irizpide subjetiboak hartzen ditu kontutan, eta ondorioz buruzagitzekiko adiskidekeria eta peloteoa bultzatzen ditu. Formakuntzaren aitorpenari dagokionez, ia osorik zenbait sindikatu eta enpresa pribaturen esku uzten du formakutza Osakidetzak.

KKUren aldekoek harrotasunez adierazten dute sistema honek kostuen jeitsiera dakarrela, aurrekontuak profesional beraiek kudeatzen baitute, plantila gutxiagoatze neurriak aplikatuz, absentismoa eta aldi bateako ezintasunak zigortzen dira, ez dira ordezkapenak egiten baimen eta oporretan, etabar. Era berean profesionalek osasun material eta botiken inguruan erabakiak hartu ahal izango ditutzte. Froga diagnostikoak eta interkontsultak eskatu edo ez ere erabaki ahal izango dute.

Kudeaketa Klinikorako Unitateetako Zuzendaria soilik dirua baloratzen duen enpresa Gerentea bihurtzen da.

LAB sindikatuaren iritziz larria da irizpide hauek ezartzea OSASUN SISTEMA PUBLIKOAN. Larria da ere guzti honetan mediku eta erizain sindikatuek eta elkarte zientifikoek laguntzea, “Osasun sistema nazionalaren iraunkortasun eta kalitatearen aldeko ituna” sinatuz osasungintza publikoaren aurkako eraso larri hau posible izatea egiten bait dute aipaturiko sindikatu eta elkarteek.

Hainbat komunitateetan eta Europan izandako esperientziek alertan egotera garamatzate. Osakidetza Kudeaketa Klinikorako Unitateak ezartzen ari da Mahai Sektorialeko sindikatuoi kontsulta egin edota adostasuna bilatu gabe, eta gizarteko beste sektore batzuen adostasuna lortu gabe. Horregatik, gai honen inguruko salaketa lanarekin jarraituko dugu, gure herriko osasungintza publikoa progresiboki eta konszienteki kaltetzen bait du.

 

 

 

SEAk lan baldintzak desarautzeko duen estrategia utzi du agerian Epaitegi Gorenak

admin
-
0

Epaitegi Gorenak eman duen sententziak SEAk sektoreko lan baldintzak desarautzeko duen estrategia utzi du agerian. Sententzia hau SEA patronalak eragin orokorreko metaleko hitzarmena erdiesteko inongo asmorik ez duen seinalerik argiena da.

Zer nolako borondatea izango ote du SEAk negoziatzeko, epaitegietan hitzarmena desager dadila eskatzen ari bada? Honek gainontzeko sindikatuak, alegia ELA, UGT eta CCOO, hausnarketa sakon batetara eraman behar ditu, ia urtebetez, SEArekin negoziatzen -biltzen- ari diren honetan. Zein izan den honen emaitza? Ba, hutsaren hurrengoa, SEAk ez daukalako inolako asmorik negoziatzeko. 

Epai hau ezagutu ostean, SEAk lan eskubideak murrizteko asmoz, gutxiengo sindikala osatzen duten UGT eta CCOO sindikatuekin eragin mugatuko hitzarmena erdiesteko prest ote dagoen beldur gara. Zalantzarik gabe, patronalarentzat erosoena hauxe izango litzateke eta euren jarrera zuritu eta babestu baino ez luke egingo. Baina, honela jokatuz, sektoreko langileei iruzurra egingo litzaieke eta ez lituzke patronalak negoziazio koletiboan mantentzen dituen blokeo eta inposaketa estrategia konponduko.

Irtenbidea ez dator patronalaren neurrirako hitzarmen bat egitetik, sindikatu eta langile guztiek, sektoreak dituen benetako arazoei aurre egingo dizkien hitzarmen duin baten aldeko borrokatik baizik. 
  

 

 

Deustu eta Zorrotzaurreko eraso lebofobo eta matxista salatzeko konzentrazioa bihar Bilbon

admin
-
0
Deustu eta Zorrotzaurreko eraso lebofobo eta matxista salatzeko konzentrazioa bihar Bilbon

Deusto eta Zorrotzaurren gertatutako eraso lesbofobo eta matxista salatzeko elkarretaratzea izango da bihar, hilak 29, Bilboko Arriaga plazan arratsaldeko 20:00etan. LABek Bilboko Koordinadora Femistak "Erasorik ez erantzunik gabe!" lelopean deitutako mobilizazioan parte hartzeko deia luzatu nahi dio euskal langilegoari.
 

 

 

Nafarroako aldaketaren aldeko gehiengo parlamentarioa txalotu eta aldaketa soziopolitikorako proposamena berresten du LABek

admin
-
0

Xahuketaren, Nafarroako Kutxaren desagerketaren, pribatizazioen eta murrizketen erantzule diren Erregimenaren indarrak (UPN-PP-PSN) zigortu egin ditu Herritargoak bozka bidez. Geroa Bai, EH Bildu, Podemos eta Izquierda-Ezkerrak gehiengo nahikoa dute Aldaketaren Gobernua osatzeko, baita udal gehienetan alkatetzak eskuratzeko ere. Langileriarentzat oso berri ona da eta aipatutako lau indarrek akordioak egin ditzatela nahi du herritarren gehiengoak.

LABen iritziz, aldaketaren aldeko gehiengo instituzionalak osatzearekin batera, aldaketa sozial eta politikoa gauzatzeko prozesu soziopolitikoa martxan jartzea beharrezkoa da. Aldaketa eremu guztietatik bultzatu daiteke eta bultzatu beharra dago: eremu sozialetik, sindikaletik eta politiko-instituzionaletik. Alderdi politikoek egingo dutenari begira geratzea akats galanta litzateke. Herria antolatu eta aktibatu beharra dago eredu ekonomiko eta sozial berria eraikitzeko, azken urteetan murrizketen kontra aktibatu den bezala. Aktibazio soziala izan da Erregimena behera botatzeko giltzarria eta ezinbestekoa da baita eredu berria eraikitzeko ere. 

Ildo honetan, aldaketaren aldeko eragile sozial, sindikal eta politikoen artean Akordio Soziopolitikoa egiteko proposamena berresten du LABek. Eremu bakoitzaren autonomiatik, aldaketa integralerako oinarri estrategikoak adostuz. Aipatu akordioak gutxienez lau ardatz izan beharko lituzke LABen iritziz: 1) democratizazioa 2) zerbitzu publikoak 3) lan harremanetarako eta babes sozialerako esparru berria; eta 4) erabakitzeko eskubidea. 

LABek, bere aldetik, eremu sindikaletik aldaketa sozial eta politikoa bultzatzeko konpromisoari eutsiko dio. Eremu honetan ere Erregimena ahultzen ari da, entxufismo, klientelismo eta zerrenda beltzak gora-behera, Lan Sailak publikatutako azken datuek erakusten dutenez (apirilak 30): UGT-CCOO blokeak duela urte t’erdiko %54,09tik %51,65era jaitsi da, Enpresa Batzordeetan gehiengoa galduz (%49,15); beste aldetik, LAB %13,05tik %14,43ra igo da. Datu hauei nafar administraziokoak gehitu behar zaizkie; bertan, UGT-CCOOek hamar ordezkari galdu dituzte, LABek irabazitako kopuru bera hain zuzen ere. Kontratazioa merituen arabera (eta ez entxufeen bidez) egiten den eremu honetan UGTk eta CCOOek batera dutena baino ordezkaritza handiagoa du LABek: LABek 71 ordezkari, UGT-CCOOek 53 (aurreratu ziren Larrialdietako Agentziako laboralen hauteskundeak kontutan hartuz).

Beraz, aldaketa ibili badabil, baina Herriak ez dio bultzatzeari utzi behar. 
  

 

 

Ekintza sindikala indartzeko dinamika martxan da

admin
-
0
Ekintza sindikala indartzeko dinamika martxan da

Lantokietako ekintza sindikala berritu eta indartzera goaz LABetik. Egoera aldatu egin da, langileontzat okerrera aldatu ere, eta horren aurrean, ekintza sindikala urrats berriak eman behar ditugu. Nola? Gure eskaintza eta praktika sindikala berrituz. Sindikatuon erronka ez da dagoenaren gainean langile batzuren egoera hobetzea, egoera bere osotasunean aldatzea baizik, langile guztien egoera hobetu ahal izateko. Horretara goaz.

Patronalaren ahalmena eta pribilegioak ziurtatzen dituzten arauak gailendu dira. Lehen akordioa behar zen lan baldintzak aldatzeko, orain enpresariek beren kasa aldatu ditzakete, ez dute akordiorik behar euren asmoak aurrera ateratzeko.

Langileoi negoziazio kolektiborako eskubidea lapurtu digute. Lehenagotik zetorren desarauketari, orain, enpresarien aldebakartasuna gehitzen zaio. Negoziazio kolektiboa ezinbestekoa da, bai, eta negoziazio kolektiboan eta hitzarmenak defendatzen jarraituko dugu aurrerantzean ere, baina ezin dugu gaurko joko arauetara mugatu.

Langileok bizi dugun prekarizazio prozesuaren aurrean erabaki berriak hartu behar ditugu. Inor ez dago salbu. Langile guztiok gaude modu batean edo bestean prekarietatearen jopuntuan. Gauzak aldatzeko giltza non dago? Ekintza sindikala, lantokietako borroka indartzea, helburu berriak jarriz eta bide berriak irekiz.

Egoera berriak erantzun berriak eskatzen ditu, eta LABen erabaki dugu momentua dela sindikalgintzaren inguruko gogoeta sakon bat egiteko. Gure sindikatua etorkizunean nolakoa izango den erabakitzeko eztabaida ireki dugu. Eta bien bitartean, iparrorratz berarekin, luzera begirako gogoetak motzera begirako erabakiekin elkarlotu ditugu: prekarietatearen kontra borrokatzeko gaitasunak markatuko du sindikalgintzaren oraina eta etorkizuna.

Lantokietan abiatzera goazen dinamika iraunkor honekin prekarietatearen kontrako borrokari zentralitate osoa emango diogu. Langile kolektibo guztion erreferentzia bihurtu behar dugu, eta gure eguneroko arazoei erantzunak eta alternatibak eskaini.

LABen eskaintza sindikala lantoki guztietara eramango dugu, gure delegatuen eskutik. Bost zutabe nagusi ditugu: kalitateko enplegua, soldatak, lan osasuna, aukera berdintasuna eta euskara. Eremu horietan benetako neurriak hartuz errealitatea aldatu daiteke. Hor dugu erronka. Enpresaz enpresa, eremuz eremu, beharren araberako ekimen desberdinekin osatzen joango gara bidea.
 

 

EMAN BOSTEKOA! GURE BOST ZUTABEAK PREKARIETATEAREN AURKA

admin
-
0
EMAN BOSTEKOA! GURE BOST ZUTABEAK PREKARIETATEAREN AURKA


Continue
1...1,1171,1181,119...1,582Page 1,118 of 1,582

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus