2025-12-20
Blog Page 107

Euskararen aurkako oldarraldi juridikoa geldiarazteko neurriak eskatu ditu Gipuzkoako Foru Aldundiko LABek

Zubiate(e)ko Aritz
-
0
Euskararen aurkako oldarraldi juridikoa geldiarazteko neurriak eskatu ditu Gipuzkoako Foru Aldundiko LABek

Azkenaldi honetan, etengabeak izan dira Administrazio Publikoaren euskalduntze prozesuaren ardatz nagusietako bat diren lanpostuen Hizkuntza Eskakizunen aurkako errekurtsoak eta ebazpen juridikoak.

EAE osoan gertatzen ari den eraso horietatik Gipuzkoako Foru Aldundia bera ere ez da libratu, bere egunean Uliazpiko gertakariek argi eta garbi erakutsi zuten moduan. Hori dela eta, Aldundiko langileek mobilizazioa egin dute Donostiako epaitegiaren aurrean, beste eraso juridiko baten atarian gauden honetan. Oraingoan, zaintzaile lanpostuen Hizkuntza Eskakizunen aurkako epaiketa izan da.

Etengabe indartzen doan oldarraldi juridiko horri galga jartzea euskal klase politikoari dagokion ardura da, Euskara Legea egokituz ala Hizkuntza Eskakizunen Dekretu birformulatu berria berregokituz.

Adituek zenbait proposamen mahaigaineratu dituzte. Hor dago, adibidez, Iñigo Urrutia legegileak berak mahai gainean jarritako irtenbidea. Euskal klase politikoak ezin du beste aldera begiratu. Jakin behar du horrelako eraso juridikoen aurrean ahoa berotzeaz gain, neurriak hartu behar direla, hori egin gabe oldarraldiak ez baitu etenik izango.

Norberak bere ardura politikoak hartu behar ditu. LABek garbi dauka langileak euskaraz lan eta bizi daitezen neurriak bultzatzea dagokiola, eta euskal klase politikoari hori posible izan dadin beharrezko neurri legalak hartzea dagokio.

Muriba enpresako langileak greba mugagabean dira Ibañez Construccion-ek hiru hilabeteko soldatak zor dizkielako

Zubiate(e)ko Aritz
-
0
Muriba enpresako langileak greba mugagabean dira Ibañez Construccion-ek hiru hilabeteko soldatak zor dizkielako

Muriba S.L. eraikuntza enpresako plantillan oraindik gelditzen diren sei langileak atzotik greba mugagabean daude, Ibañez Construcción enpresak (enpresa nagusia eta jabe berarena) hiru hilabeteko soldata zor baitie. LAB sindikatuak irmoki salatu nahi du Ibañez Construcción enpresaren lotsagabekeria; izan ere, obra publikoak egiteko milioika euro kobratu arren (Memoriaren Nafarroako Institutua, Irunberriko institutua…), filiala erortzen utzi eta langileak prekaritatera kondenatzea erabaki baitu.

Construcciones Jose Miguel Ibañez izeneko enpresak hainbat milioi euro kobratuko ditu aurten Nafarroako Gobernuaren aldetik, Rozalejoko markesaren jauregia Memoriaren Nafarroako Institutu bihurtzeko eta Irunberriko batxilergoko institutu berria eraikitzeko. Baina, hala eta guztiz ere, adierazten du ez duela nahikoa dirurik bere bertze enpresa batean gelditzen diren langile gutxiren soldata ordaintzeko –Muriba S.L., enpresa nagusiaren leku berean egoitza soziala duena–, nahiz eta bertze enpresa baten bitartez azpikontratatzen dituen –Ibañez Construcción, enpresa nagusiaren leku berean egoitza soziala duena–.

Muribako langileek abuztuaren 29an egin zuten lehen elkarretaratzea, Iruñeko Rozalejoko markesaren jauregiaren ondoan, haien egoera salatzeko. Orain, egoera hori are gehiago larritu denez hartzekodunen konkurtsoaren iragarpen ofizialarekin, greba mugagabea hasi dute, eta ortzirale honetan, irailak 13, elkarretaratzea eginen dute Udaletxe plazan, 09:30ean.

Langileek diote burlaizekoa izan dela enpresako gerentea haiekin hitz egitera esertzea, noiz eta langileek salaketaren lehen kontzentrazioa egin zutenean behartuta egon ostean, eta ez ordaintzeko aitzakiatzat jartzea “ez dagoela dirurik”. LAB sindikatuari ulertezina egiten zaio enpresei enpresa-sare horiek eraikitzen uztea, langileak prekarizatzearen truke etekin gehiago lortzea bertze helbururik ez baitute. Zentzu horretan, LABi lotsagabekeria iruditzen zaio Muribako jabeek erratea ez dutela dirurik beren bertze enpresek diru publikotik jasotako milioika euro fakturatzen dituztenean.

Langileek nabarmendu nahi dute bukaera arte salatzen eta borrokatzen jarraituko dutela, euren lanpostuen defentsan, lan eta bizi baldintza duinen alde. Hurrengo hitzordua, erran bezala, irailaren 13an izanen da, Iruñeko Udaletxe Plazan. Langileek dei berezia egiten diete Eraikuntza sektoreko pertsona guztiei kasu honen salaketan parte har dezaten, izan ere, bertze enpresa batzuetan errepikatzen diren inguruabarrak eta jokabideak ematen dira bertan.

Ordezko irakasleen lan baldintzak okertzea salatu eta hezkuntza publikoa indartu dezaten exijitu dugu

Zubiate(e)ko Aritz
-
0
Ordezko irakasleen lan baldintzak okertzea salatu eta hezkuntza publikoa indartu dezaten exijitu dugu

Ikasturte hasierako lehen aste honetan Araba, Bizkaia eta Gipuzkoako ikastetxeetan irakasleek bat egin dute LABek deitutako mobilizazioekin. Hezkuntza Sailari hezkuntza publikoa indartu eta inbertsio publikoa handitu dezan ozen esan diogu, kalitatezko hezkuntza publikoa helburu.

Kalitatezko hezkuntza publiko bat izateak, besteak beste, administrazioaren prozesuak edota esleipenak modu egokian, baliabide tekniko egokiekin eta dagokien garaian egitea eskatzen du. Izan ere, arrazoi teknikoak aitzaki hartuz, azken urteetan estruktural bilakatu da ikasturte hasierako ordezkagunean hautaketa eta esleitzea egin ondoren hau bera atzeratzea, honek ordezko langileengan suposatzen duen guztiarekin.

Ordezko langileek ez ezik, karrerako funtzionariek ere pairatzen dituzte administrazio prozesu hauen huts egite eta planifikazio kaxkarrak. Horren lekuko dira, esaterako, lekualdatze-lehiaketan, administrazioa jakinaren gainean egon arren, existitzen ez ziren behin-betiko lanpostuak esleitu ondoren 2024-2025 ikasturteari begirako uztaileko esleipenetan parte hartzera behartuak izan ziren hainbat eta hainbat irakasle.

Kalitatezko hezkuntza publikoa izateak ikasturteko lehen lan egunetik langileak lan zentroan bertan izatea ere eskatzen du, horrek kudeaketa eta hornikuntza egoki bat eskatzen duelarik. Bide honetatik, urrats bat gehiago emango litzateke ordezko langileen lan baldintzak hobetzeari begira, baita lan zentroen funtzionamendua hobetzeari begira ere. Honetaz gain, ikaslea erdigunean jarri eta hezkuntza komunitatea osatzen duten familiei begira ere jartzea litzateke.

Kalitatezko hezkuntza publiko bat izateko eta benetan ikaslea erdigunean jartzeko, langileon lan baldintzak hobetu behar dira, izan bitarteko langile zein karrerako funtzionario. Hezkuntza Sailak, aldiz, aldebakarrez 2023-2024ko ikasturtean ordezko irakasleen lan baldintzak aldebakarrez okertu ditu udako kobraketari dagokionez. Horregatik, LABen borrokan jarraituko dugu, besteak beste, ordezkoen lan baldintzak arautzen dituen araudia berritu, lan zamak arindu eta gazteberritze neurriak lortzeko.

Ez dugu sinatu Nafarroako itunpeko ikastetxe eta ikastolen akordioa, urriegitzat jotzen dugulako

Zubiate(e)ko Aritz
-
0
Ez dugu sinatu Nafarroako itunpeko ikastetxe eta ikastolen akordioa, urriegitzat jotzen dugulako

Nafarroa Garaiko itunpeko ikastetxe eta ikastoletako patronalek eta SEPNA eta UGT sindikatuek akordioa lortu zuten atzo, sektoreko hurrengo bi urteetarako hitzarmen berriaren inguruan, baina LAB sindikatuak ez du akordio hori sinatu, ez sinatuko, bertan jasotzen diren neurriak ez direlako nahikoa.

Iragan abuztuaren 31n bukatu zen Nafarroako Itunpeko Irakaskuntza eta Ikastoletako azken akordioaren indarraldia, eta aurreko ikasturtea akordio berri hobea lortzeko lanean eta borrokan aritu zen LAB buru-belarri. Baina, ohikoa duenez, Hezkuntza Departamentuak ez zuen negoziaziorako biderik eman; Carlos Gimeno kontseilariak beti izan duen jarrera itxiarekin jarraitu zuen. Abuztuaren bukaeran, patronalek azken proposamen bat helarazi zieten sindikatuei, bi elementu berrirekin: hiruko mahai informatiboa osatzea eta 57 urtetik gorako irakasleei, ahal den neurrian, tutoretzarik ez egokitzea.

Gainera, Hezkuntza Departamentuak birkokapen plan bat eskaini zuen. Baina plan horrek dituen ezaugarriak kontuan hartuta, sindikatu honi zalantza handiak sortu zitzaizkion, planean eragiteko gaitasun faltagatik. LABen ustez, hiru neurri horiek ez dira nahikoa.

Pasa den astean izandako negoziazioetan, LABek gutxieneko bi baldintza ezarri zituen, akordioa sinatu ahal izateko. Lehenik, akordioa ez izatea hurrengo lau urteetarako, bi urterako baizik, hobekuntza nahikorik ez zuelako. Eta bigarrenik, konpromisoa hartzea sindikatuei aurrekontuen berri emateko, horiengan eragiteko nolabaiteko gaitasuna izateko. Lehenbiziko baldintza onartu zuten bertze aldeek. Ez, ordea, bigarrena eta horregatik LABek ez du akordioa sinatu.

SEPNA eta UGT sindikatuek akordioa sinatu dute eta, gehiengoa dutenez, akordio berriko neurriak bi urtez aplikatuko dira; betiere, Nafarroako Gobernuak aurrekontuetan nahikoa dirua jartzen badu. Hurrengo bi urteetan, LABek akordio horren jarraipen estua eginen du eta berau hobetzeko lanean segituko du.

Patronala ez da mugitzen Bizkaiko Grafikagintzako Hitzarmenean

Zubiate(e)ko Aritz
-
0
Patronala ez da mugitzen Bizkaiko Grafikagintzako Hitzarmenean

LAB-ELA-CCOO-UGTk Cebeki negoziazioak blokeatzeko asmoa gaitzetsi diogu berriro. Desblokeoa borroka egun gehiagorekin etorri beharko da.

Abuztuko etenaldiaren ondoren, irailaren 9an berriro ekin zaio sektoreko hitzarmenaren negoziazio mahaiari. Hori bai, ez dago berririk uztailarekin alderatuta. Cebekek uztailaren 3an egin zuen azken proposamenaren ildo beretik jarraitzen du. Proposamen hori:

• Erosteko ahalmena bermatzetik oso urrun dago.
• Ez zaie erantzun positiborik eman lanaldi murrizketari, aplikazio bermeari, Aldi Baterako Laneko Enpresei, subrogazioari eta beste eduki batzuei buruzko asmoei.
• Nahiz eta patronalak ia elementu atzerakoi guztiak kendu dituen, 14. artikuluko errelebo kontratua desagerrarazi nahi du.

Horregatik guztiagatik, LAB-ELA-CCOO-UGTk uste dugu, nahiz eta negoziazio mahaiaren bilera gehiago egiten jarraituko diren, grafikagintzako patronalaren eta bere enpresa elkartuen jarrera negoziatzailea gaurkoa bada; hurrengo borroka zikloa laster zehaztuko da. Bestela esanda, gatazka egongo da berriro.

Negoziazio Mahaiaren hurrengo bilera irailaren 24an izango da.

Idiazabalgo JASO Tower Cranes-en grebara goaz

Zubiate(e)ko Aritz
-
0
Idiazabalgo JASO Tower Cranes-en grebara goaz

Joan den astean zuzendaritzak zortzi lankide kaleratzeko hartutako erabakiari aurre egin asmoz, grebara jotzea erabaki du langile batzarrak.

Ez dugu enpresaren erabakia onartzen, ez eta erakutsitako jarrera ere. Jada hartua zuen erabaki bat jakinarazteaz gain ez du bestelako aukerak negoziatzeko inolako borondaterik erakutsi. Horregatik, greba eta mobilizazioaren bidea da JASOko langileei geratu zaien aukera bakarra.

Hala, aste honetan greba egingo dugu ostegunean eta ostiralean (hilak 12 eta 13), datorren astean asteazkenetik ostiralera (hilak 18, 19 eta 20), hurrengoan asteartetik ostiralera (hilak 24, 25, 26 eta 27) eta, irtenbiderik ezean, greba mugagabeari ekingo diogu handik aurrera. Dei egin nahi diegu langile guztiei grebara batu daitezen eta mobilizazioetan par har dezaten, batuta lortuko dugulako.

Kaleratzeak atzera botatzeko eta negoziatutako irtenbide bat bilatzeko helburuz, denon lanpostuen etorkizunaren defentsan borrokatuko gara. Hori dela eta, dei egin nahi diogu enpresari egoera gehiago gaiztotu aurretik akordioetara iristeko borondatearekin hitz egitera eser dadin.

Nazio askapenean eta eraldaketa sozialean egindako bidea eta egiteko duguna aldarrikatuko ditugu Gasteizen

Zubiate(e)ko Aritz
-
0
Nazio askapenean eta eraldaketa sozialean egindako bidea eta egiteko duguna aldarrikatuko ditugu Gasteizen

LAB sindikatuak 50 urte bete ditu aurten eta urtean zehar hainbat ekimen egin ditugu LAB Zabaltzen lelopean, nazio askapenerako eta eraldaketa sozialerako bidea zabaltzen mende erdi egin dugula gogoratu, eta, aldi berean, etorkizunera begira bide horretan jarraitzeko konpromisoa berritzeko. Bada, irailaren 14an Araba mailako egun osoko egitaraua izango dugu Gasteizen, hain justu, sindikatuak betidanik kalea hartzeko ohitura duen hirian. Arabari eta Gasteizi begirako eguna izango da, bertako borrokek LAB indartu dutelako eta, aldi berean, LABek Arabako langile klasearekiko duen konpromisoa berretsi nahi duelako.

Izan ere, Araban ere sindikalismo berria indar handiz ari da zabaltzen: borrokak aktibatzen, lan eta bizi duinak defendatzen, gure balioak eta egiteko moduak hedatzen eta baita gure presentzia handitzen ere. LAB jada Arabako hirugarren sindikatua da, eta afiliazioan eta ordezkaritza mailan inoizko kopuru altuenak ditu egun.

Kaleak aldarrikapenez bete, hamarkada hauetako borrokak balioan jarri eta urteurrena giro onean ospatzeko asmoarekin, egun osoko egitaraua prestatu du sindikatuak Gasteizen, belaunaldiz belaunaldi izan garena, bagarena eta izango garena lotuz:

-11:00etatik aurrera, Andra Mari Zurian: Infogunea. Bertan, informazio sindikalaz gain, sindikatuaren oinarriak, ildoak eta proiektuak modu ikusgarrian azalduko ditugu.

-12:00etan Andra Mari Zuritik: Aldarrikapen-kalejira. Gasteizko kaleetan borroka desberdinak ikustaraziko ditugu, ekimen ikusgarrien bitartez. Bukaeran ekitaldi txiki bat egongo da Andra Mari Zurian.

-14:30ean Sumendin: Bazkari herrikoia. LABeko belaunaldi desberdinak bilduko gara, eta esperientziak partekatu. Bukaeran, bazkaloste musikatua izango da, Gorka Etxeberria abeslariaren eskutik.

-20:00etatik aurrera Garraxi tabernan DJak egongo dira.

Hezkuntzako sindikatuok irailaren 26an Nafarroako irakaskuntza publikoan egingo dugun greba erregistratu dugu

Zubiate(e)ko Aritz
-
0
Hezkuntzako sindikatuok irailaren 26an Nafarroako irakaskuntza publikoan egingo dugun greba erregistratu dugu

Nafarroako Foru Komunitateko hezkuntza publikoko sindikatu guztiok (LAB, STEILAS, ANPE, AFAPNA, CCOO, ELA eta UGT) 2024ko irailaren 26rako, ostegunerako, greba deialdia erregistratu dugu Iruñean, Hezkuntza Departamentuan.

Administrazioaren aurrean sektore publikorako lan-hobekuntzak denbora luzez aldarrikatu ondoren, Hezkuntza Departamentuak eta Nafarroako Gobernuak ez diete jaramonik egin gure eskaerei: ratioak jaistea, erosteko ahalmena berreskuratzea, lan-gainkarga murriztea eta irakaslegoaren egonkortzea.

Horregatik guztiagatik, irakaskuntza publikoko irakasleak ordezkatzen ditugun sindikatuok adierazi dugu nazkatuta gaudela administrazioaren negoziazio faltarekin.

Mobilizatzeko unea iritsi da, eta dei egin diegu irakasle guztiei irailaren 26an grebarekin bat egin dezaten.

40 laneko heriotza 8 hilabetetan

Zubiate(e)ko Aritz
-
0
40 laneko heriotza 8 hilabetetan

Abuztuaren 25ean, Bermeoko Pesquería Vasco Montañesa SA (PEVASA) enpresarako lanean ari zen P.M.S. arrantzalea hil zen Dakar (Senegal) inguruko uretan. Itsasontzian arrantzan ziharduen langile bermeotarraren heriotza ez traumatikotzat jo da ofizialki. Honekin, 2024an gutxienez 40 langile hil dira lan istripuz, horietatik 6 abuztuan.

Lehenik eta behin, LAB sindikatutik gure elkartasuna eta samina adierazi nahi dizkiegu hildakoaren senide, lagun eta lankideei.

Salatu behar dugu mota honetako istripuak aztertzeko eta argitzerako orduan ikaragarrizko trabak eta gardentasun eza aurkitzen ditugula. Era berean, nabarmendu behar da heriotza ez traumatikoen atzean faktore ezberdinak daudela eta lan karga, erritmoak, estresa eta jarduera mota honetan presente dauden faktoreek eragin zuzena dutela.

LABetik irmoki salatu nahi dugu heriotza hau. Arrantza sektorean gertatzen diren diren eskubide urraketak, hitzarmen duinen falta, segurtasun neurririk eza, etenik gabeko lanaldiak edo sektorearen ezaugarri diren lan neurri gogor eta arautu gabeak dira heriotza hauen errudunak.

Heriotza hauek eragiten dituztenak ez dira aurretik aipatutako arrazoiak bakarrik. Euskal Herriko enpresak dira Senegalgo eta beste hainbat lekutako itsasoak ustiatzen eta arpilatzen dituztenak, hemengo agintarien laguntzarekin. Ezaguna da Eusko Jaurlaritzak atunontzi handiak dituzten eta altura handiko flora kudeatzen duten enpresen alde egiten duen apustu irmoa. Baliabideak arrantzaleen segurtasuna bermatzeko erabili beharrean, armak erosteko ematen diete dirua, hauekin piraten erasoetatik babesteko.

Baxurakoa bezalako beste arrantza arteak gutxiesten dituzte, askoz ere jasangarriagoak eta hurbilagoak direnak, eta plan estrategiko baten beharrean itotzen ari direnak.

Arrantza sektore osoak behar du lan baldintzen aldaketa eta arauketa legala. Aski da orain dela urte askotako araudiekin eta ohiturekin lanean aritzeaz. Arautzeak eragina izango luke istripu eta heriotzen tasan.

Eusko Jaurlaritzaren arrantza politikek beste herrialdeetako itsasoak arpilatzea soilik dute helburu. Enpresek bertako herritarrak kontratatzen dituzte baldintza prekarioetan lan egin eta lanean bizia galtzeko. Sasoi bateko sistema kolonialak erabiltzen dituzten enpresak diru publikoz laguntzen dituzte eta gainera, baldintzarik gabeko babesa eskaintzen diete. Politika hauek ere badira itsasoan gertatzen diren arrantzaleen istripuen erantzule.

Horregatik, lan osasuneko baldintza egokiak bermatu ditzaten exijitzen diegu enpresei, eta Eusko Jaurlaritzari, ereduaren inguruko norabide aldaketa eta lan osasuneko neurriak betetzen direla berma dezala.

1...106107108...1,582Page 107 of 1,582

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus