Gaur, azaroak 30, Gipuzkoako Grafikagintzaren sektoreak hitzarmenaren aldeko bigarren greba eguna egin du. Gaurkoan, berriro ere, greba arrakastatsua izan da, lantokien %80ak jarraitu du. Datu hau oso esanguratsua, izan ere, sektoreko ia enpresa guztiak enpresa txikiak edota oso txikiak direla gogoratu nahi dugu. Beraz, sektoreko langileek ozen eta argi hitz egin dute: sektoreko hitzarmena duina nahi dute eta ez dute ADEGIren jarrera immobilista eta arduragabea onartzen.
LABek #ResisteSAT kanpainarekin egin du bat, eta sindikatuko kideok 2.000 litro oliotik gora erosi ditugu Sindicato Andaluz de Trabajadores (SAT) sindikatuari elkartasuna adierazteko. Hain zuzen ere, olioaren salmentarekin ateratako dirua Estatu espainolak sindikatu horretako kideei ezarritako isunak ordaintzeko bideratuko da. Izan ere, SATen lan sindikal eta soziala indargabetu nahi izan dute, errepresioaren bitartez.
Isunekin ez ezik, kartzelarekin ere zigortu du Estatuak SAT sindikatuaren ekinbidea. Estrategia errepresiboa sindikatuko zenbait kideren atxiloketekin biribildu du; hori dela eta, Andrés Bódalo ekintzailea espetxean dago gaur egun. Haren askatasuna eskatzeko mobilizazioetan parte hartu du LABek; Jaengo espetxearen aurrean azaroan egindako agerraldian, kasu.
#ResisteSAT kanpaina dela eta, LABek 400 olio garrafoitik gora erosi ditu; 2.000 litro inguru. Hauek guztiak Sevillako Moron de la Fronterako kooperatiban ekoitzi dituzte, SATeko militante eta ekintzaileen eskutik. LABek irailean egin zuen bat kanpainarekin. Orduan ere elkartasuna adierazi zien SATeko kideei.
ZF-TRW enpresako zuzendaritzak behin behineko beste 57 langile kontratatuko dituela jakinarazi du, 22 langile kaleratzea aurreikusten duen espedientea bere horretan mantendu arren. Hain zuzen ere, Iruñeko Landabenen egoitza duen multinazionalak 123 langile kaleratzeko espediente bat aurkeztu zuen otsailean, eta 101 langile bota zituen apirilean. Gainontzeko 22 langileak urtea amaitu aurretik botatzea aurreikusi du. Hala ere, kontratazio berriak iragarri ditu.
Kontratazioen berri azaroaren 24an eman zion zuzendaritzak langileen enpresa batzordeari. Hala, enpresako LABeko sail sindikalak nabarmendutakoaren arabera, behin behinean kontratatuko dituzten 57 langileak urria bukaeran kontratatutako beste 18 langileei batuko zaizkie. Udan, bere aldetik, beste 200 kontratatu zituzten. “Egoerak frogatzen du espedientea iruzurra besterik ez dela; hots, epaileek eurek aitortu duten bezala, ez dagoela arrazoirik langileak kaleratzeko. Gezurtia, ankerra eta gaitasunik gabeko zuzendaritza baten esku gaude, multinazional zein bertakoei dagokienez”, salatu du sindikatuak, eta 22 langileen kaleratzea bertan behera uzteko eskaera berretsi du.
Neurri gisa, LABek lan poltsa bat eratzeko eskatu zuen, beti ere, kontratazio berriak bidegabe kaleratutako langileen bitartez egin ahal izateko: “Proposamenak langileen batzarraren oniritzia behar zuen ezinbestean, zuzendaritzari aurkeztu ahal izateko, langileek argi berdea emanez gero. Langileen enpresa batzordearen gehiengoak (CCOO eta UGT), ordea, uko egin zion batzar horretan egoteari. Ez zuten parte hartu, erabakiak lantegia arriskuan jarriko lukeela argudiatuta ”.
Legutiotik atera eta Bizkaiko eta Arabako zonalde handi batera hedatzen den anbulantzien sistema egoera larrian dago. Anbulantzia sare horrek Gasteizekin elkarbanatzen du zerbitzua, eta, praktikan, denbora gehiago ematen du Gasteizen, dagokion zonaldean baino.
Aipatutako zonaldeak Luko, Urbina, Urrunaga, Legutio, Miñano, Landa, Ollerias eta Elosu herriak biltzen ditu, Bizkaiko Otxandio eta Ubidearekin batera, baina lau mendate (Barazar eta Urkiolakoak, esate baterako), Goiango Industrialdea eta Miñanoko Parke Teknologikoak biltzen ditu.
Azkeneko hilabeteetan ematen ari den egoera hau salatu nahi dugu, industriaguneetako langileek eta zonalde honetako edozein herritarrek, larrialdi egoera batean, hogei minutuko atzerapenarekin jasoko luke osasun arreta, horrek ekar ditzazkeen ondorio guztiekin. Salaketa hau sektore honetako langileen prekarietate egoeraren isla da.
LABetik argi daukagu Instituzioek bermatu behar dutela guztiok kalitatezko asistentzia izatea, Arabako lurraldeen arteko ezberdintasunik gabe eta sektore honetan duintasunez lan egin nahi duten langileek beharrezko baliabideak izan ditzaten. Osakidetzaren Larrialdi Zerbitzuak probintzia osoko larrialdiei erantzun behar die, babes gabeko zonalderik utzi gabe.
LABek agerraldia egin du, Altzako kiroldegian aurkitutako amianto arrastoaren harira. Sindikatuak azalpenak eskatu dizkie erakundeei, eta ezinbesteko segurtasun neurriak bete ditzatela exijitu du; kiroldegia beraren eraistea atzeratzea, tartean.
LABen aldetik, azpimarratu behar dugu lantegia lurrera bota zutenean, amianto arrastoak zituen bertako lurra hortik kendu, eta gertu edo ondoan dauden lur eremuetan bota zutela. Lur eremu hori guztia horregatik dago amiantoarekin kutsatuta.
Gai hau larritasun handikoa denez, LABeko ordezkariok agerraldia egin dugu komunikabideen aurrean, azalpenak eskatzeko. Hain zuzen ere, erakunde desberdinei eskakizunak luzatzen ari gatzaizkie, udalaren arduragabekeria ikertu dezaten eta ezinbesteko segurtasun neurriak betetzea exijitu, eta, kasua balitz, erantzukizunak argitu daitezen.
Horregatik, erakunde hauen esku-hartzea eskatu dugu:
Lehenik eta behin Donostiako Udala.
1- Akreditatutako enpresa baten txostenaren bidez ziurta dezala, instalazioetako elementu, galdara, hodi eta abarretan amiantorik dagoen ala ez. Era berean, ziurta dezala, neurketa analitiko baten bidez, hodiak babesten dituzten beira-zuntzen estalduretan amiantoa dagoen ala ez. Inguruan amianto zuntzak egon daitezkeen ziurtatzeko neurketa atmosferikoak egin ditzala kiroldegi barrualdean. Jarduera hauek egin bitartean, abenduaren 1erako, ostegun honetarako, aurreikusia dagoen kiroldegiaren eraiste-agindua bertan behera gera dadila exijitzen dugu, ez dadin inor egon amiantoaren arriskupean.
2- Kiroldegian gaur egun eta iraganean kendutako instalazio guztien inbentarioa egin dezala, kalderak, hodiak, etabar…
3- Bai kirol instalazioetan, bai bere garaian lantegi azpian zegoen lurra barreiatu zen lurretan lanean izandako enpresa zein gaur egun dauden edo lehenago egon diren patronatuko, udaleko brigadetako, kontratetako edo azpikontratetako langileak identifika ditzala, eta informazio hau guztia Osalanera bidali.
4- Altzako Udal Kiroldegian azken 27 urteetan lan egin duten udal langileen osasun egoerari buruz dauden datuen ikerketa egin dezala, amiantoarekin lotura duen kalteren bat jasan izan duten jakiteko.
5- Dagoen arriskua saihesteko, eremua desamiantatzeko, egonkortzeko, seinalizatzeko… zer neurri hartuko dituen azaldu dezala eskatzen dugu ere.
6- Baita udalbatzan jada onartua dagoen amiantoaren mapa lehenbailehen egitea. Halaber, amiantoa duten instalazioak detektatu ahal izateko, arriskua murrizteko eta honen antzemate, kontrol edota ezabapenean aurrerapauso egokiak emateko langileen formakuntzarako planak abian jartzea eskatzen dugu.
Bestetik Eusko Jaurlaritzako Osasun Sailari eta Osakidetzari.
1- Herrera-Altzako eremuan azken 30 urteetan egon diren birika-minbizien, asbestosien eta laringe-minbizien ikerketa egin dezala. Baita ere haien kopurua Gipuzkoa, Bizkaia edo Arabako beste auzo eta eremuetan egon direnaren baino altuagoa ote den (prebalentzia-indizeaz ari gara) ikertzea.
2- Egondako minbizi horietatik mesotelioma gaiztoarengatik zenbat izan diren aztertzea ere eskatzen diegu.
3- Hirugarrenik, kontutan izanda gaixotasun honen sortasun aldia oso altua dala, hurrengo urteetan ere jarraipena egitea eskatzen dugu.
Azkenik Osalan eta Lan Ikuskaritzaren esku-hartzea eskatzen dugu.
1- Eragindako eremuek eta lurrek duten amiantoren kontzentrazio eta kutsadura mailak aztertu ditzan eta haien jarraipena egin dezan. Baita azken 27 urte hauetan lan egin duten langileena ere, patronatukoak, udaleko brigadetakoak nahiz kontratetakoak (garbiketakoak bereziki) izan.
2- Hortaz, Altza auzoko minbizi okupazionalen datu epidemiologikoen jarraipena egitea eskatzen dugu, eta minbizi horiek amiantoarekin duten lotura aztertzea ere. Kiroldegiko langileek izan dezaketen amiantoren eragina aztertzea eta amiantoren eraginpean izandako langileen zerrendan kiroldegian urte hauetan guztietan ibilitako langileak, aipatutako lehengo fibrozementuko fabrikaren langileak, kiroldegia eraikitzen aritu ziren langileak eta piknik eremua egin zuten langileak sartzea (guztiak barnebilduko dituen zuhurtasun printzipioa), osasunaren zaintza zuzena, okupazio ondorengoa barne, bermatzeko.
Beharrezkoa da erakunde publikoetatik amiantoa osasun publikoko arazo bezala lantzea, ez lan osasunekoa.
Esperientziatik eta hutsegiteetatik ikasi behar da horrelakorik berriro gerta ez dadin.
Osasun zerbitzu publikoetan amiantoarekin zerikusia duten gaixotasun profesionalak identifikatzeko programak ezarri eta lehen arretako medikuei formakuntza eskaini behar zaie.
Enpresa eta administrazio guzti guztietan amianto mapak osatu behar dira, horretarako beharrezkoak diren baliabideak eskainiz.
EAEko parlamentuan konpentsazio funtsa Madrilgo gobernuari eskatzea onartu bazen ere, hori ez da nahikoa. Gizarte segurantzaren transferentzia eskatu behar da, hemen sortu dadin beharrezkoa den konpentsazio funtsa.
Donostia Kiroleko LAB Sindikatuaren Atal Sindikaletik, Udala eta Donostia Kiroleko Zuzendaritza salatzen dugu, denbora honetan guztian informazio guztia ezkutatu izanagatik eta kontuan eduki ez zaigulako; ez langileoi, ez kanpoko enpresei, ez herritarrei orokorrean. Kontuan izanda gure lankide bat duela 3 urte biriketako minbiziaz hil zela, ondoez hori areagotu egiten zaigu. Honekin eskatzen dugu ere iker dadila lankide honen heriotza eta azaldutako amiantoaren artean harremanik egon daitekeen.
Ez Donostia Kiroleko Zuzendaritza, ez Udaleko inork ez du hildakoaren familiarekin harremanetan jartzeko arreta izan, ez eta inongo langilerekin, laguntza eskaini eta beraien esanetara jartzeko.
Ez dugu ulertzen ezta ere, Udalaren eta Donostia Kiroleko Zuzendaritzaren aldetik ezkutaketaren eta gaizki egitearen arduradunik ez egotea; horregatik, irregulartasun guzti hauek berehala argitzea eskatzen dugu eta ardurak eskatzen ditugu.
Era berean, argi eta garbi salatu nahi dugu Zuzendaritzak Altza Kiroldegiko itxiera baliatu duela, 2-3 urtez gutxienez, instalazioetako 6 lanpostu suntsitzeko. Instalazioetako langileak ez ordezkatzearen Zuzendaritzaren politikaren ondorioz, erabat murriztuak eta kaltetuak izaten ari dira. Behar bezalako zerbitzua eskaintzeko guxienekoak betetzen ez dituztenez, 6 lanpostu horiek Patronatuak kudeatutako beste kirol instalazio guztiak indartzeko erabiltzea exijitzen dugu.
Azkenik, aipatutako instalazioetan lan egin duten langileen eskura jartzen gara, balizko ikerketetan laguntzeko, eta zalantzak eta abar argitzeko. Halaber, amianto eduki dezaketen instalazioak ezagutzen dituzuenei sindikatu honi edo udal arduradunei horien berri ematea eskatzen dizuegu, dakarten arriskua kontrolatu eta saihestu ahal izateko.
Hezkuntzari dagokionez, konpromezuetan erreferentzia egin aurretik oinarriei so egiten badiegu bi dira ardatzak, bikaintasuna bata eta kalitatea bestea baina hauek zer , zertarako, nola eta noiz zehaztu gabe. Eta egiten den aipamenetan ekonomia, lan munduarekin…lotzen dituzte.
Neurrietan esan bezala zehaztasun eza da nabaria, ideia orokor eta ponpoxoak baina nora eramaten gaituzten azaldu gabe helburu ez baitira azaltzen. Betiko erreferentziak PISA (ikuspegi integrala eta hezitzailea kontutan hartu gabe, irakasleen prestigioa (hezkuntza langile guztion funtzio hezitzailea aintzat hartu gabe), LEPak urtero (hau nola egingo duten zehaztugabe)…
Azpimarratu nahi dugu:
Beraz, eta bai PNV zein PSEko kargu publiko eta politikoen hitzen balioa eta ekintzen eragina ezagututa, datozen urteek Euskal Herriak behar dituen zerbitzu publikoei eta bereziki hezkuntza sistema propioari bultzada emateko ez dute batere aurrerapausurik ekarriko.
Jai eguna da gaur Iruñean, azaroaren 29aren etorrerarekin. Bada, jai egunetan irekitzearen aurkako ekintza egin du LABek Arrotxapea auzoan, Simply-Sabeco supermerkatuan.
LABen arabera, jai egunetako irekierekin ezinezkoa da bizitza laborala familarekin edo aisiarako denborarekin uztartu, merkataritza zentru handien onurako baino ez da. Neurri honek denda txikiak kaltetu egiten dituela salatu du sindikatuak: "Gehiegizko kontsumoa bultzatzen du. Ordutegi komertzialak jada nahiko zabalak dira erosketak egin ahal izateko. Honengatik, erosleei dei egiten diegu jai egunetan ez erosteko, merkatari txikien itxieran eta egun hauetan lan egiteko behartuak gauden langileen prekarietatean ez laguntzeko".
David Gonzalez eta Alexis Rodriguez epaitu dituzte gaur Bilbon, eta saioaren atarian elkarretarate bat egin du LABek, ‘Alexis eta David libre. Langile borrokaren kriminalizaziorik ez’ leloarekin, sindikatuko bi kideei elkartasuna adierazteko. LABeko idazkari nagusi Ainhoa Etxaidek salatu du epaiketarekin askatasun sindikala murrizteko beste urrats bat eman nahi dutela.
Epaiketa gaur egin dute Bilbon, eta epaitegiaren atarian elkarretaratzea egin du LABek. Sindikatuko idazkari nagusi Ainhoa Etxaidek babesa eskaini die bi auzipetuei: “Epaiketa honekin ekintza sindikala, langileok gure eskubideak defendatzeko eskubidea, zigortu egin nahi dute. Berriro ere askatasun sindikala murrizteko beste urrats bat eman nahi dute”.
Etxaidek gogoratu du Alexis Rodriguezek eta David Gonzalezek langileen eskubideak defendatzeagatik epaitu dituztela: “Epaituko duten gauza bakarra da langile batzuk euren lanpostuak defendatzeko eduki zuten aukeraren aurrean urrats bat eman izana. Ez zuten beste ezer egin, baina hori guztia egin zuten. Lanpostuak suntsitzen ari ziren momentu batean, enpresariei aukera eman zitzaienean, inolako mugarik gabe, inolako kosturik gabe, lanpostuak eta enplegua suntsitzea krisia baliatuz, hainbat eta hainbat langilek urrats bat egin zuten aurrera, hainbat eta hainbat langilek beraien lanpostua eta Euskal Herrian lan egiteko eskubidea defendatu zuten. Hori da gaur epaitegi honetan egoteko arrazoia”.
Euskal sindikalgintza, borrokalaria den neurrian, ilegalizatzen saiatu direla nabarmendu du; euskal sindikalistak borrokalariak direlako salatu dituztela, alegia. “Kriminalizazioa badago, diziplinatzeko helburuarekin, baina ez dugu onartuko”, esan du LABeko idazkari nagusiak.
“Zer da eskatzen duguna? Oso oinarrizko gauza bat. Botere publikoa den neurrian, behingoz langileen alde jar dadila, behingoz herritarren alde jar dadila, behingoz eskubide sozialen alde jar dadila. Hori da eskatzen duguna, absoluzioa. Horrek esan nahiko luke badagoela botere publiko bat enpresariei mugak dituztela esaten diena, eta langileak eta herritarrak babestu behar direla aitortzen eta onartzen duena”, erantsi du Etxaidek.
Manifestazio jendetsua
Epaiketaren harira, ehundaka herritarren babesa eta elkartasuna jaso zuten igandean Alexis Rodriguezek eta David Gonzalezek, Markinan egindako manifestazio batean.
Epaiketa eginda, ebazpenaren zain geratu dira bi auzipetuak. Fiskalak zein akusazio partikularrak mantendu dituzte euren zigor eskaerak.
Euskararen Nazioarteko Egunaren testuingurua baliatuz, ELA eta LAB sindikatuek eskaini dute gaur, hilak 29. Berta lan mundua euskalduntzeko elkarlanean garatuko duten egitasmo baten berri eman dute, euskararen normalizazioarekiko bi sindikatuok dugun konpromisoa berretsiz. Urola Kostan jarriko dugu martxan ekimen pilotu hau eta lan mundua euskalduntzeari begira, LAB eta ELAko militanteek elkarrekin garatuko dugu. Eskualdeko 10-15 enpresatan garatuko dugu egitasmoa, eskualdeko herri nagusi guztiak bustiz eta enpresa tamaina zein izaera anitzak inplikatuz.
LAB eta ELAren irakurketa:
Euskararen Eguna gure hizkuntzaz, euskaraz, harro egoteko eguna da; euskarak gure bizitzetan duen tokiari erreparatzeko eguna; atzera begiratu eta euskararen normalizazioak egindako ibilbideaz gogoetatzeko eguna; eta baita aurrera begiratu eta erronka berrien aurrean, konpromiso berriak hartzeko eguna.
Horregatik, Euskararen Nazioarteko Egunaren testuingurua baliatuz, ELA eta LAB sindikatuak prentsaren aurrean elkarrekin atera gara, lan mundua euskalduntzeko elkarlanean garatuko dugun egitasmo baten berri emateko, euskararen normalizazioarekiko bi sindikatuok dugun konpromisoa berretsiz.
Egitasmoaren ezaugarri nagusiak, langileon ikuspegitik:
• Langileok protagonista izango garen egitasmoa, euskararen normalizazio prozesuaren subjektu eta eragile aktibo izan behar baitugu lan munduan. Era berean, lan munduko gainerako subjektuekin zubi lanak egingo dira.
• Langileok ditugun hizkuntza eskubideak lan eskubideen baitan ulertzen ditugun neurrian, gure Ekintza Sindikalaren bidez eragitea izango da helburua.
• Euskararen normalizazioan konpromisoa hartu nahi duen langile guztiei zabalik egongo da egitasmoa. Langileon artean, euskalduntzearen aldeko jarrera hegemonikoa bilakatzea dugu helburu.
• Lan munduaren euskalduntze integrala da gure erronka: helburuak definitu eta prozesu arautu, sistematizatu, ordenatu zein partekatuen bidez betetzea sustatuko dugu.
• Ezagutza eta erabileraren arteko jauzia lineala ez dela gauza jakina denez, erabilera ardatz, euskararen aldeko sustapena egingo dugu.
Ingurumari honetan, bi sindikatuok HAKOBA-ren (Hizkuntza Politika gaietarako, Herri Aginteen arteko Koordinazio Batzordearen) gonbidapena jaso genuen, “edonork sinatzeko moduko Adierazpen bati atxikimendua eman” eta argazki batean ateratzeko proposatuz. Zinez uste dugu euskarak konpromisoak behar dituela eta horregatik honako 4 hausnarketa plazaratu nahi ditugu:
• Bi sindikatuok ez dugu Hizkuntza Politikarako Sailburuordetzarekin hartu emanik Hizkuntza Politika gaietan, LanHitz akordioa apurtu eta Eusko Jaurlaritzak diru-laguntzen kudeaketa hutsera mugatu zuenetik egitasmoa. EAE-ko Hizkuntza Politikan ez dituzte langileon hizkuntza eskubideak kontutan hartzen eta langileon ordezkariak garen sindikatuen ondoan argazkia atera nahi dute, zertarako? Langileok lan mundua euskalduntzeko konpromisoak hartu ditugu eta gure bidea egiten ari gara.
• Adierazpenak norberak hartu ditzakeen konpromiso indibidualak azpimarratzen ditu, Herri Aginteek eta kasu honetan, Eusko Jaurlaritzak, duen erantzukizun politikoa maila berean jarriz. Euskararen normalizazioak izan duen bultzada eraginkorrena herri ekimen zein langileen aldetik etorri dela kontutan hartuta, ezin ditugu maila berean kokatu instituzio eta herritarron erantzukizuna, hizkuntza eskubideak bermatzeko orduan. Ezta euskararen egunean ere.
• Gonbidapenean, edonork atxikimendua emateko dokumentua proposatu dutela azpimarratzen dute. Honek testuaren edukia erabat lausotu du eta Jaurlaritzak ez du egiazko konpromiso politikorik hartzen. Bada, Euskararen Legeak 34 urte bete dituen honetan, normalizaziotik urrun egonik, euskarak konpromiso eta borondate politikoa behar dituela aldarrikatu nahi dugu.
• Lan mundua euskaldunduko bada, subjektu guztion elkarlana ezinbesteko da. Langileok baldintzak sortzen jarraituko dugu bide horretan aurrera egiteko, konpromisoen gaineko bide berriak indartuz.
Euskara egoera minorizatuan dago, euskaldunon hizkuntza eskubideak etengabe urratzen dira. Egoerari honi buelta emateko guztion hizkuntza eskubideak bermatuko dituen hizkuntza politika berri bat behar dugu, ahalik eta adostasun maila zabalenean oinarrituko dena baina inori beto eskubiderik onartuko ez diona. Guztiok argazki batean kabitzeko garaiak dira edota euskararen aldeko konpromisoak gehiengo zabal batek hartzeko garaiak?
Langileok prest gaude lan mundua euskalduntzeko prozesu, dinamika edota ekimen errealetan subjektu eta eragile aktibo izateko; langileok prest gaude konpromiso berriak hartzeko; langileok prest gaude euskararen normalizazioaren aldeko gehiengo sozialarekin konpromiso berriak hartzeko. Eta horretara goaz!
Norabide horretan, gaurkoan, ELA eta LAB sindikatuak, Euskararen Gizarte Erakundeen Kontseiluarekin elkarlanean, lan mundua euskalduntzeko martxan jarriko dugun egitasmo pilotua aurkeztu nahi izan dugu.
Lan mundua euskalduntzeko egitasmo pilotua:
• Euskara Erakundeen Gizarte Kontseiluak, ELA eta LAB sindikatuak elkarlanean garatuko dugun egitasmoa.
• Urola Kosta eskualdean praktikan jarriko dugun egitasmo pilotua da.
• Eskualdeko 10-15 enpresatan garatuko dugu egitasmoa, eskualdeko herri nagusi guztiak bustiz eta enpresa tamaina zein izaera anitzak inplikatuz.
• ELA eta LAB sindikatuetako militanteek (eskualdeko ordezkaritza kontutan hartuta) elkarrekin garatuko dugu ekimena lan zentroetan eta horretarako gune bateratuak sortuko ditugu. Langile guztiei ateak zabalik.
• 2017. urtarriletik aurrera garatuko dugu ekimena: formazio tailerra, enpresaren diagnosia, lehentasunak identifikatu eta lan mundua euskalduntzeko ekintza sindikala martxan jarriko dugu.
• Dinamika honen protagonistak langileak izango badira ere, lan munduko gainerako eragileekin hartu emanean arituko gara. Zubi lan hori Kontseiluak egingo du.
• Lan mundua euskalduntzeko nahia eta aldarria, herritar eta eragileekin partekatuko dugu. Lan mundua euskalduntzeko aldarria enpresatara eta herrietara eramango dugu.
• Egitasmoaren baitan adosturiko plangintza betetzean, balorazioa egin, sorturiko baldintza berriak landu eta urrats berriak aztertuko ditugu.
