2024-06-25
HomeZerbitzu PublikoakOsasungintzaOsasun zentroetako ordutegien murrizketa salatu dugu Bilbon

Osasun zentroetako ordutegien murrizketa salatu dugu Bilbon

Bilboko La Merced anbulategian elkartu gara gaur osasun zentroak 17:00etan ixtearen kontra. Aurreko Gabonetan zein udan osasun etxe askoren ordutegia murriztu egin zuten, 17:00etan itxiz, ordutegi normala den 20:00etan itxi beharrean. Pasa den abenduko zubian ere. Eta orain, Gabonetan, hiru anbulategi itxita egon dira 17:00etan, eta beste zazpi zentrotan bi astez murriztu dute ordutegia, urtarrilaren 5a bitartean.

La Merced da ordutegien murrizketak pairatu dituen osasun zentroetako bat, baina aipaturiko neurria ez da soilik Bilbo aldean ezarri, baizik eta Osakidetza osoan, sare osoan. Esan behar dugu Osakidetzako zuzendaritzak zein Eusko Jaurlaritzak (EAJ eta PSE) honako itxiera ezarri dutela sindikatuok informatu gabe eta erabiltzaileoi jakinarazi dietela zentroan pegatu duten orri baten bitartez.

Osakidetzak dio oporrak ordezkatzeko langile nahikorik ez dagoela. Guk, aldiz, bestelakoa diogu: medikuen faltaz haratago, oinarrizko arazoa bilatu behar dugula dauzkagun plantilla eskasetan eta ordezkoak kontratatzeko ez dutela diru gehiagorik gastatu nahi.

Hala ere, arrazoia edozein izanda ere, oinarrizko zerbitzu bat egun batetik bestera murriztea inorekin kontatu gabe arduragabekeria politiko galanta iruditzen zaigu; Bilboko auzokideok eta Osakidetzako erabiltzaileok ez dugu holakorik merezi.

Gabonetan ez al gara gaixotzen? Arratsaldetan ez al gara joaten osasun zentroetara? Justo kontrakoa. Zer suposatzen du anbulatorioa arratsaldeko 5etan ixteak?

• Anbulatorioak berak gainezka egiten du, egunero 3 ordu gutxiagotan ematen delako zerbitzua, eta zitetarako itxaronaldia luzatu egiten da.

• Pertsona askok, atzerapen eta murrizketen ondorioz, ospitaleetako larrialdi zerbitzuetara jo behar dutela, zerbitzu hauek ere kolapsatuz.

• Osasun zentro zein ospitaleetako lan baldintzak zaildu egiten direla, lan-kargagatik, kolapso, presio eta erabiltzaileon haserreagatik.

Izan ere, erabiltzaile zein langileok badugu zer galdu egoera honetan. Batez ere, osasun publikoaren arretaren kalitatea dugu galtzaile.

Nortzuk ateratzen dira irabazle?

• Osasungintzan aurreztu nahi duen Eusko Jaurlaritza, baina enpresei zergak jaitsi eta dirutza xahutzen duena bankuen zorra ordaintzen eta abiadura handiko trenaren egitasmoan.

• Gure osasunarekin negozioa egin nahi dutenak, osasun publikoa ahulduz osasun pribatua bultzatzeko. Ezin dugu ahaztu Darpon jauna IMQko gerentea izan dela.

Osakidetzako langile eta Bilboko auzokide eta osasun zentroen erabiltzaile bezala ezin ditugu honako murrizketak onartu.
 

 

 

AZKEN ALBISTEAK | ÚLTIMAS NOTICIAS

Espainiar Estatuko langile publikoentzako soldata igoera inposatua da eta erosahalmenaren galeran sakontzen du Hego Euskal Herriko langileentzat

LABen ez dugu ontzat ematen bihar Espainiako Gobernuko Ministro Kontseiluak Estatu osoko langile publikoentzako (*) onartuko duen %2ko igoera gehi %0.5eko baldintzatutako gehigarria.

Zumarragako posta zerbitzuaren egoera onartezina da

Plantillari dagokionez, lanpostu huts ugari daude; adibide gisa, goizeko txandako langileen egoera; izan ere, egun batzuetan 5 pertsona baino ez daude bete beharreko 13 lanpostutarako, hau da, % 62 ez da betetzen. Zoritxarrez, egoera hori oso ohikoa da lantoki honetan. Plantillak hainbat elkarretaratze egin ditu langile-falta salatzeko, baina arazoa ez da hobetzen hauteskunde-aldiaren ondoren, eta enpresak ez du inolako asmorik kontrataziorik egiteko. Uztailaren 7an oporraldian sartuko gara eta oporretara joango diren langileak inork ez dituela ordezkatuko aurreikusten da.

Nafarroako Zurgintzako hitzarmena sinatu dugu, eskubideetan aurrerapenak baititu eta erosteko ahalmenari eusten baitio

Gaur goizean LAB sindikatuak Zurgintza sektoreko Nafarroako hitzarmena sinatu du, 2023 eta 2025 urte bitarteko indarraldia izanen duena. Hitzarmen honek eskubideak handituko ditue eta langileen erosteko ahalmenari eutsiko dio; nahiz eta negoziazioak iraun bitartean patronala behin eta berriz saiatu den lan baldintzak okerragotzen praktiketako kontratuen soldatak txarragotzeko edo soldata igoera KPItik aldentzeko bezalako neurriekin.