LAB sindikatuak salatu nahi du Osakidetzako Giza Baliabideko Zuzendaritza jardun sindikala behin eta berriro oztopatzen saitzen dela. Zuzendaritza honen esku daude ordu sindikalak ziurtatzea, formazio orduak ematea, erabiltzen dugun emailaren kudeaketa eta gure eguneroko lanean beharrezko diren hainbat gestio.

Eman beharreko liberazioak atzeratu egiten dira etengabe, arazoak behin eta berriro agertzen dira, eta jasatzen ditugun oztopo guzti hauek gure sindikatuarengan ondorio kaltegarriak dakartzate, gure funtzionamendu normala eragozten baitute. Zer esanik ez Gipuzkoan, hauteskudeak ate joka ditugularik eta eta dagozkigun liberazioak heltzen ez direnean.

Bestalde, orain dela 6 hilabete murrizketa informatikoak pairatzen ari gara, Osakidetzak erabaki duelako emailen bidalketa beraiek markatzen duten kopuru zehatz batetik ezin dela pasa. Murrizte informatiko hauekin amaitzeko txosten bat mahaiganeratu ziguten, baina sindikatuok ez dugu begi onez ikusi oso kontrolatzailea eta murriztailea delako, beraz oraindik jarraitzen dugu arazo latz honekin.

Eraso guzti hauek helburu bakarra dute, gure lan sindikala oztopatzea eta gure adierazpen askatasuna eta askatasun sindikal mugatzea.

LABek egoera hau gogor salatu nahi dugu eta Osakidetzako Zuzendaritzari behar diren neurriak hartzeko exijitzen diogu.