2024-02-21
HomeEkintza SindikalaNegoziazio kolektiboaren defentsan LABek sustatutako mozioa onartua izan da Tolosako Udalean

Negoziazio kolektiboaren defentsan LABek sustatutako mozioa onartua izan da Tolosako Udalean

Negoziazio kolektiboa guztiz blokeatzeako erabaki politikoa hartu dute CONFEBASK osatzen duten herrialdetako patronalek Adegi, Cebek, Seak. Akordioei atea ixten diete, ez bada lan erreforman sakontzeko, soldata igoerak mugatu eta lan baldintzak kaskartzeko; azken batean, sortzen den aberastasuna gero eta okerrago banatzeko ez bada. Salbuespena dira sinatzen diren sektoreko akordioak.

Geroz eta dimentsio handiagoa hartzen ari den arazo politiko baten aurrean gaude. Arazoa CONFEBASK da, blokeoaren erantzulea CONFEBASK da. Eta desblokeoan, erabakigarria izan daiteke instituzioek hartzen duten jarrera, erabakigarria, jendartearen gehiengoaren eta herri honetako ekonomiaren mesedetan hartuko dituzten erabakiak edota elite ekonomiko txiki bati men egiten jarraituko duten.

Instituzioak eta eragile politikoak mugitzen direnean, erabaki politikoak hartzen direnean, patronalean eragina izan badu, daramaten bidean babestuak edota erasotuak sentitzen direlako. Zilegitasun politikoa eman edota kendu egiten zaielako.

Lan erreforma indarrean sartu zenetik proposamenak egiten ari da LAB, eztabaida eramaten ari gara instituzioetara eta horretan jarraituko dugu.

Metaleko negoziazioak desblokeatzeko proposamen zehatza egin eta Aburtori eskuhartzeko eskatu diogu, ikusiko dugu egiten duen. Udaletxe batzutan ere mozioak aurkezten hasiak gara, eragile politikoak banan-banan duten jarrera azaldu dezaten. Datorren kurtsoan segida izango duen dinamika da honakoa.

Dagoeneko Tolosako udaleko plenoan eztabaidatu dute (atzo). Bergaran ere atzoko plenoan eztabaidatzekoa zen baina atzeratu egin da.

Tolosan onartua izan da LABek aurkeztutako mozioa, EHBildu eta PSEren aldeko bozkekin. PNVk kontramozio bat aurkeztu zuen eta guk aurkezturiko mozioaren aurrean abstenitu egin zen. Kontra-proposamen horretan negoziazio kolektiboa balioetsi egiten du eta lan harremanen berezko esparruaren alde egiten du. Baina ez da horretan geratzen, desblokeoaren ardura berriro ere bi aldeengan kokatzen du eta hori onarteziana da. Beste behin ere aukera paregabea galdu du PNVk ardurak dagokion lekuan ipini eta patronala interpelatzeko. Berriro ere ustezko ekidistantzia jarrera batekin langileoi bizkar ematen ari da.

LABek enpleguaren defentsan, hitzarmenak aldarrikatzen jarraituko du, bihar, Donostia, Bilbo eta Gasteizen eguerdian, eta Gipuzkoako eskualde guztietan arratsaldez, egingo ditugun mobilizazioak kasu, abiatutako dinamietan sakonduz eta mobilizazioak indartuz.
 

 

 

AZKEN ALBISTEAK | ÚLTIMAS NOTICIAS

Arabako CEAReko langileek esku hartze sozialeko herrialdeko hitzarmena aplika diezaietela eskatu dute

Arabako CEAReko langileek 3 orduko lanuztea eta mobilizazioa egin dituzte Gasteizko egoitzaren aurrean, erakundeak behin eta berriz uko egin baitio 2023ko maiatzean onartu zen Arabako Esku-hartze Sozialerako III. Hitzarmenaren aplikazioari buruz hitz egiteari.

LABek ere parte hartuko Gernika Palestina deialdi herritarraren elkartasun aktiboko kanpainan

Gernika Palestina deialdi herritarrak martxan jarri du elkartasun aktiboko kanpaina, Palestinak Israelen aldetik bizi duen eraso larriaren aurrean. Helburu hirukoitza dauka kanpainak: Netanyahu nazioarteko epaileen aurrera eramatea, Gazan elkartasun proiektuak bultzatzea eta Palestina leku guztietan ikustaraztea.

EAEko sektore publikoan euskararen erabilera normalizatzeko Eusko Jaurlaritzak onartuko duen dekretua administrazioaren euskalduntzean jauzi egiteko aukera galdua da

Eusko Jaurlaritzak onartuko duen Sektore Publikoan Euskararen Erabilera Normalizatzeko Dekretua-ren balorazio kritikoa egiten du LABek. Aurreko dekretuarekiko aurrerapauso batzuk dakartzan arren, guztiz ez-nahikoa da. Finean, dekretua berritzeko prozesu hau aukera galdua da benetan EAEko administrazioaren euskalduntzean jauzi egiteko. Batetik, euskararen normalizazio-prozesuak egun dituen aldeko baldintzak ez dituelako baliatzen; bestetik, prozesu horrek une honetan eta epe motz batean dituen beharrei eta izango dituen erronkei ez dielako erantzuten.