2024-02-24
HomeLan Osasuna IdazkaritzaAmiantoaNaftomar itsas-enpresa 81.000 euro ordaintzera zigortu dute amiantoaren ondorioz gertatu zen mekanikari...

Naftomar itsas-enpresa 81.000 euro ordaintzera zigortu dute amiantoaren ondorioz gertatu zen mekanikari baten heriotzarengatik #LortuDugu

Duela gutxi jaso dugu Bilboko Lan arloko 5. Epaitegiko epaia. Honek, amiantoaren ondorioz sortutako gaixotasun baten eraginez hil zen merkataritza-ontzi bateko mekanikari baten oinordekoei 81.000 euro ordaintzera zigortzen du Naftomar itsas-enpresa.

Mekanikariak nazioarteko hainbat enpresa eta ontzi-ustiatzailetan egin zuen lan, baina egiaztatuta geratu da joan den mendeko 60ko hamarkadatik aurrera eraikitako ontzi guztietan amianto-kopuru handia zegoela, eta “mekanikari gisa, lan mekanikoak, eskuzkoak, soldadura elektrikokoak edo autogenokoak etab. egiten zituen, eta amiantoarekin berotutako hodietan mantentze-lanak egiten zituen. Konponketak egiteko, amiantoa estaltzen zuen geruza metalikoa kentzen zuten, eta, ondoren, isolatzaile-geruza hori (amiantoa), hondatu egiten zena. Amianto-zati horiek berriro erabiltzen zituzten hodien gainean jartzeko, eta, horretarako, urez bustitzen zituzten. Hodi, galdara eta ponpen gainean jarduten zuen. (…) Galdaretara konponketak egitera sartzeko, amiantozko jantzia erabiltzen zuen, gorputzean bakarrik, ez buruan. (…) Soldatzeko, kareta eta mantala erabiltzen zituen, baina ez maskara. (…) Amiantoarekin kontaktua izatea ohikoa zela uste du”.

LAB sindikatutik epai hau modu positiboan baloratzen dugu hainbat arrazoirengatik. Batetik, langilearen gaixotasuna eta heriotza amiantoa bezalako mineral kantzerigeno hori prebentzio-neurririk gabe erabiltzeagatik gertatu dela aitortzea. Bestetik, itsas merkataritzaren esparruan epai aitzindari bat lortzeagatik. Izan ere, gutxi dira itsas merkataritzan aitortutako lanbide-gaixotasunagatiko kalte-ordaina ezartzen duten epaiak amiantoari esposizioa frogatzeko zailtasunengatik, esposizio hau duela urte askotakoa denean edo honezkero desagertuta dauden itsasontzietan gertatutakoa.

Hau tanta berri bat da ozeano honetan, non amiantoaren biktimek banaka borrokatzen jarraitu behar duten. Horregatik, berriz ere eskatzen diegu botere publikoei, Gasteizko eta Iruñeko gobernuetatik hasita, neurriak har ditzatela amiantoaren biktimak aitortzeko, kasuak aztertzeko, tratatzeko eta ikertzeko bidea errazteko, bai eta amiantoaren biktimek ordaina jaso dezaten ere.

AZKEN ALBISTEAK | ÚLTIMAS NOTICIAS

LABek Nafarroa Garaian inoizko emaitzarik onenak lortu zituen 2023ko hauteskunde sindikaletan: 1.223 delegatu ditu eta %18tik hurbil dago

Nafarroako Gobernuak azkenean zabaldu dituen emaitza ofizialen arabera, LAB sindikatuak maximo historikoak lortu zituen 2023ko hauteskunde sindikaletan. Azken datuen arabera, LABek 1.223 delegatu ditu Nafarroa Garaian, eta %17,96ko ordezkaritza. Lau sindikatu nagusien artean, azken urtean LAB izan da delegatu kopuru gehien lortu dituena, bai eta ehunekoan gora egitea lortu duen bakarra ere.

Bizkaiko grafikagintzako patronalak atzerapauso gehiago dituen proposamena egin berri du

Otsailaren 22an, Bizkaiko grafikagintzako hitzarmeneko bederatzigarren negoziazio bilera egin da. Patronalak proposamen berri bat aurkeztu du, aurretik aurkeztutakoak baino baldintza txarragoekin honeko edukietan: iraunaldian, soldata igoeretan eta oporretan. Era berean, atzerapausoak mantentzen jarraitzen dute honako gaietan: lanaldiaren banaketa irregularrean, antzinatasuna, aldi baterako ezintasunen osagarriak, etab.

Mecanerreko trantsizio ekosozialerako plana aurkeztu dugu

Enpresa-batzordean gehiengoa dugun LAB eta ESKk enpresaren trantsizio-planaren jendaurreko aurkezpena egin dugu Urdulizko Kultur Etxean. Enpresaren itxiera saihesteko eta haren etorkizuna ziurtatzeko egindako txostena eta trantsizio ekosozialerako proposamenak ezagutarazi ditugu. Plana enpresa batzordeak egin du Garua kooperatibaren eskutik, eta Urdulizko Udalaren laguntza izan du.