LAB sindikatuak, Nafarroako espazio eszeniko nagusietan ordezkaritza duenak, dei egiten die espazio eszeniko publikoetan zerbitzu teknikoa ematen duten azpikontratetako teknikariei abenduaren 18an greba egiteko, sektorean pairatzen diren lan baldintza kaskarrak salatzeko. Greba baino lehen, kontzentrazioa egonen da Iruñean abenduaren 12an, igandearekin, Gayarre Antzokiaren parean, 18:30ean.
LAB sindikatuaren iritziz, kultur espazio publikoen kudeaketa ez litzateke lizitatu behar enpresa esleipendunetako langileei baldintza duinak bermatzen ez dizkieten pleguekin. Ordutegi-erabilgarritasuna, egutegi irekia, aldakorra eta ikuskizunen programazioaren mende dagoena, eta lan horren idiosinkrasia berezia konpentsazio bat eta berme batzuk izan behar dituzte langileek.
Hona hemen espazio eszenikoetako teknikarien aldarrikapen nagusiak:
Hitzarmen bat sortzearen alde
Sektorea erregularizatu behar dugu, eta Nafarroarako sektoreko hitzarmen bat sortzen aurrera egin. Horretarako, politikarien inplikazioa eskatzen dugu, arazo horri aurre egiteko; izan ere, baldintza agirietan ezarritako baldintzek lan-hobekuntzarako eskaeretan aurrera egitea eragozten digute, eta, aldi berean, bidezko hitzarmen bat sortzea eragozten dute. Halaber, arte eszenikoetako kontratazio publikoko jardunbide egokien kode bat sortzea eta haren jarraipen eraginkorra egitea, tarifak, ordutegiak, funtzioak eta abar arautzeko. Administrazioa edo haren mendeko erakundeak dira enpresak eta teknikariak kontratatzeko eragile nagusiak, eta bere gain hartu behar dute gai horretan duten erantzukizuna. Ziurtatu behar da lehiaketetako baldintzek bermatu behar dutela enpresek lan-baldintza duinak eskaini ahal izanen dizkietela langileei.
Bidezko baldintza agiriak
Lizitazio-agiriek teknikarien lan-errealitatea kontuan har dezatela eskatzen dugu. Espazio eszenikoen behar teknikoak asetzeko gai diren eta, aldi berean, azpikontratatutako enpresei beren langileei lan-egutegi eta lan-baldintza duinak emateko gai diren gutxieneko lan-ekipoak aurreikusi eta ziurtatzea.
Bidezko subrogazioa
Bidezko subrogazio-irizpidearen arabera, fakturazioa ez ezik, sektoreko lan-errealitate berezira egokituko dena eta subrogatu beharreko langileen lanaldiak errespetatuko dituena. GAYARRE ANTZOKIAN %4, %15, %34 EDO %40KO SUBROGAZIORIK EZ!
Lizitazio-lehiaketak geldiaraztea
Teknikarien lan-errealitatea kontuan hartu eta bidezko subrogazio-irizpideak adostu arte abian dauden lizitazio-lehiaketak geldiaraztea edo kentzea.
Lan-prekaritatea salatzea
Sektorean pairatzen ditugun lan-baldintza eskasak salatzeko eginen dugu planto, batez ere kontziliazio familiar eta sozialari dagokienez. Egoera hau gaitz endemikoa da sektorean, eta sektoreko hitzarmenik ezaren eta administrazioak lizitazio-lehiaketetan ezartzen dituen baldintzen ondorio da.
- Urteko lan-egutegirik gabe, ez sei hilean behin, ez hamabost egunean behin. Nekez iristen da asteko egutegia izatera, eta horrek epe laburrerako edozein plan egitea eragozten du.
- Astean egun jakin bat libre ez izatea.
- Esleitutako txandarik gabe. Goizez, arratsaldez eta gauez lan egiten dugu, edo hiru txanden zati batean egun berean. 10, 12, 14 eta 16 orduko lanaldiak egiten ditugu batzuetan.
- Ordutegi jakinik gabe. Ordutegiak aldatu egiten dira ikuskizunaren beharren arabera. Astelehenean 09:00etan sar gaitezke, asteartean 12:00etan, asteazkenean 17:00etan…
- Irteera-ordutegiak gutxi gorabeherakoak izaten dira. Irteera-ordua egun berean alda daiteke, ikuskizunaren edo ekitaldiaren beharren edo ezustekoen arabera.
- Lanean 13 egun jarraian kateatu ditzakegu.
- Ohikoa da hainbat egunez jarraian 10, 11 edo 12 orduko lanaldiak kateatzea; beraz, benetan desagertu egiten gara gure familia- edo gizarte-ingurunetik.
- Ez dugu gehieneko lanordu kopururik, ez astean, ez hamabostean, eta batzuetan ezta hilean ere.
- Antzinatasunik gabe, gaueko plusik gabe, jaiegunetako plusik gabe… Soldata baxuak ez datoz bat, inolaz ere, merkatuko prezioarekin eta pairatzen ditugun lan-baldintzekin.