Zuzendaritzak ez du galdera erraz bat erantzuten: zergatik etekinetan hamarnaka milio lortu dituen enpresa batek ezin du langileen eros ahalmena bermatu? Eta zergatik ezarri nahi du 12 orduko lan eredu diskriminatzaile bat, ez badu behar?
Azken egunetan arlo askotatik presioak areagotu dira MERCEDESeko langileekiko biharko, hilaren 18ko, erreferenduma baldintzatzeko. Halere, LABen ustez, MERCEDESeko Zuzendaritza da azalpenak eman behar dituena:
2021ean 62 milio euroko lortu ondoren, zergatik ezin du langileen eros ahalmena bermatu? Dibidendoetan 265 milioi euro banatuta, zelan ezarri nahi dute lan eredu berri diskriminatzaile bat, 12 orduz lan egiten?
Guk ateratzen dugun ondorioa argia da: ez da arazo ekonomikoa. Kontua beste bat da ordea, enpresak txantaia egin nahi baitio plantilari: inbertsioak eros ahalmena galtzearen eta diskriminazioa mantentzearen truke. Baina inbertsioak ez daude, ezin dira egon langileen lan baldintzak okertzearen menpe. XXI. mendeko lantegi bat egiteko XXI. mendeko lan baldintzak behar dira.
Plantilaren erantzuna erabatekoa izan denez, presioak biderkatzen ari dira, enpresarenaz gain, sindikatu batzuetatik, instituzioetatik,… Hori dela eta, LABek zuzenean galdetu nahi die sindikatu eta instituzio horiei, Urkullu buru delarik: zergatik onartzen dute haien erraz langileek erosahalmena galdu behar dutela? Zein mezu bidaltzen diote jendarteari, batez ere gazteei, ontzat ematen badute langile berriek gutxiago kobratu behar dutela, bai lan eredu berrian baita oraingoan ere? Langileak eta beren osasuna erdigunean kokatzen dira lerroetan 12 orduz lan eginda?
Aldi berean, azken egunetako mehatxuak baztertu nahi ditugu: enpresako Zuzendariak publikoki zabaldu zuena eta baita lantegi barruan langileei, batez ere ebentualei helarazten dizkietenak, erreferenduma desitxuratzeko asmoz. Horrekin batera, salatu nahi dugu ordezkari sindikalei beraien lan sindikala egitea eragotzi zaiela, langileak informatzea oztopatuz.
Horregatik, LABek MERCEDESeko langileen borroka txalotu nahi du eta bere alternatiba eskaini: erreferendumean ezetz bozkatu konbikzioz eta ilusioz, mobilizazio berriak abiatu eta akordioan langileen eskaerei erantzungo dien negoziazioa berrartu, besteak beste KPIa bermatuz, lan eredu berria gizatiarrago egin, eta kontratatzeko eta kontratuak mugagabe bihurtzeko irizpide objetiboak adostea, kolektibo batzuen diskriminazioa eta betiko susmoak baztertzeko; hau guztia enpresarentzat erabat onargarria izanik.