“Nous resistons pour vivre, nous luttons pour exister!” (“Bizitzeko erresistitzen dugu, existitzeko borrokatzen dugu!”) lelopean abiatu ziren ostiralean Emakumeen* Mundu Martxak bost urtean behin antolatzen duen Nazioarteko Ekintzaren baitako jardunaldiak. Eskuin muturraz, bakeaz eta desmilitarizazioaz, elikadura burujabetzaz eta emakumeen* parte hartzeaz hausnartu dugu, indarkeria matxista, krisi ekosoziala eta migrazio politikak ardatz izan dituen ekintzan.
Euskal Herritik ordezkaritza zabala iritsi zen larunbatean, aliantzak egiteko espazio izan zen jardunaldian parte hartzera, munduko hainbat herrialdetako ordezkariekin batera (Sahara, Suitza…). Mobilizazioa egin genuen Marsellako kaleetan, eta “Gora borroka (trans)feminista” edo “Solidarité avec les femmes du monde entie (“Elkartasuna mundu osoko emakumeekin”) oihukatu. Horrez gain, “Palestina askatu” aldarria zabaltzeko, mobilizazio intersindikalean parte hartu genuen goizean, beste hainbat sindikaturekin batera, Gazan berehalako su-etena eta laguntza humanitarioa oztoporik gabeko sar dadin lortzeko.
Martxoaren 8an hasi eta urriaren 17ra arte luzatuko den Nazioarteko VI. Ekintzan ekimenean parte hartzeaz gain, LABetik gerra eta kapitalismoaren aurka, herrien burujabetza eta eta bizitza duinen alde borrokan jarraitzeko hautua egiten dugu.