2024-05-22
HomeOharrakZerbitzu PublikoakMaiatzaren 31n Greba Hego Euskal Herriko Administrazioan eta Zerbitzu Publikoetan

Maiatzaren 31n Greba Hego Euskal Herriko Administrazioan eta Zerbitzu Publikoetan

Sektore publikoko langileak gure eskubideak defendatzeko eta osasuna, hezkuntza eta babes soziala bermatuko dituen politika publikoetan aldaketa aldarrikatzeko atera gara kalera.
Gaur Espainian zein EAE eta Nafarroan gobernatzen dutenek baliabide publikoak bankari eta enpresa handien esku jartzea baino beste egitekorik ez dutela salatu dugu.

Greba eta mobilizazioei esker, honezkero ezin diote inori ziririk sartu. Lehenik harria bota eta orain eskua ezkutatu nahian dabiltza, Jimenez eta Lopez bezala Nafarroan eta EAEn, nortzuk behin murrizketak babestu eta ezarri ondoren propaganda hutsezko keinuak egiten dituzten, halako erabakiengandik aldendu nahian. Hemen inor ez omen da ezeren erantzule.

Zerbitzu publikoak suntsitzen ari dira, ahalik eta murritzen bihurtuz, gutxi batzuk gure eskubideekin negozioa egin dezaten. Zerbitzu publikoak pribatizatzen dituzte, eta gero eta zerbitzu publiko gutxiago egotea nahi dute jendeak irtenbideak arlo pribatuan bila ditzan.

Zerbitzu publikoak birritan ordaintzea nahi dute: lehenik, zergen bidez, horietan lanaren errentak dira ekarpen funtsezkoena, enpresariek eta profesionalek langileok baino 10.000€ gutxiagoko urteko errentak aitortzen dituztelarik; bigarrenez, unibertsal eta doakoak izan beharko liratekeen zerbitzuak geure poltsikotik ordainduz.

Zenbat eta zerbitzu publiko gutxiago, orduan eta langile gutxiago. Administrazio eta zerbitzu publikoetako milaka langilek euren lanpostua galduko dute; EAE eta Nafarroako gobernuak bitartekoekin eta ordezkapenekin hasi ziren, baina enplegu erregulazio espedienteekin eta pertsonal finkoarekin ere jarraituko dute, eta horri “Administrazioaren modernizazioa” deituko diote.

Zerbitzu publikoak eta enplegua suntsitzen dituzte eta gure lan baldintzak okertzen, izan ere ez dira espekulatzaileei aurre egitera ausartzen, ezta nahi ere.

Inori ziria ez sartzea lortu dugu, eta Greba honekin euren politikak aldatu edo bestela alde egin araziko ditugu. Erantzuleek horregatik ordaindu egin beharko dute. Eta erantzuleak Madrilgo PPren Gobernua eta gaur bere esanetara Nafarroa eta EAEn gobernatzen dutenak dira. Ez dago balio duen aitzakiarik, ezta hitz hutsalik ere. Ekintzak nahi ditugu.

Politika publikoak aldatzea exijitzen dugu; geuk geure erabakiak hartu nahi ditugu; geure zergen dirua non erabiltzen den, nola garatu geure zerbitzu publikoak eta kalitateko enplegua sortu eta hori lortzeko geure ekonomia antolatzeko modua erabaki nahi dugu.

Nafarroa eta EAEko gobernuei Martxoaren 29ko Greba Orokorrean jendarteak egindako aldarria bere egin dezaten exijitzen diegu, Euskal Herriko langileon borondatea errespeta dezatela eta zerbitzu publikoak bermatzeko behar diren neurri guztiak har ditzatela. Baita, Araba, Bizkaia, Gipuzkoa eta Nafarroan bizi garen pertsona guztioi kalitateko enplegua eta bizimodu duina izateko aukerak emango dizkigun aberastasunaren banaketa bidezkoari ekin diezaiotela.

Exijitzen diegu Hego Euskal Herriko erakunde publikoei Espainiar Gobernuaren neurriak ez ditzatela ezarri.

Exijitzen diegu EAE eta Nafarroako gobernuei helegiteekin itxurakeriak egiteari utz diezaiotela. Gure eskubideak benetan defendatu nahi badituzte, Patxi Lopezek eta Yolanda Barcinak euren kabuz azken urteetan egindako murrizketak bertan behera utz ditzatela eta osasuna, hezkuntza eta babes sozialerako aurrekontuak handitu ditzatela, EBko batez bestekoarekin parekatu arte.

Exijitzen diegu Euskal Herriko alderdi politiko eta erakundeei beharrezkoak diren neurri guztiak har ditzatela, hemen eta orain, geuri gehien komeni zaigun politika ekonomiko, laboral eta soziala erabakitzen dugunak geu izan gaitezen. Eta egiteko prest ez badaude, alde egin dezatela.

Estatu Espainiarraren barruan ez dugu eredu sozio-ekonomikoa aldatzeko aukerarik, eta hondamendira goaz.

Ondorioz, datozen maiatzaren 20 eta 26an Bilbo, Gasteiz, Iruñea eta Donostian gizarte eragileekin batera egingo diren mobilizazioetarako deia luzatzen dugu, bai eta maiatzaren 31n Hego Euskal Herriko Sektore Publikoan deitua dagoen Greba egunean parte hartzera ere.

AZKEN ALBISTEAK | ÚLTIMAS NOTICIAS

Euskal hitzarmenen lehentasuna bermatuta, esparru propioaren eraikuntzan urrats gehiago eskatu ditugu

Aurreko erredakzioa hobetzeko LABetik egin genituen eskarietako batzuk aintzat hartu dira; ondorioz, Euskal Herriko langileek bertako hitzarmenen lehentasuna bermatu ahal izango dute.

Osakidetzako zuzendaritzak eta Osasun Sailak ikuztegiak publifikatzeari ekin behar diote, LABek lortutako EAEko Justizia Auzitegi Nagusiaren epaiaren ondoren

Eskaera formal bat aurkeztu dugu Osasun Sailean, Osakidetzan ikuztegi lanak publifikatzeko behar diren elkarrizketei ekiteko asmoz.

Gasteizko Francisco Vitoria institutuan lan-osasun arloko prebentzioa bermatzeko exijitu dugu

Ikastetxeko langileek eta sindikatuok elkarretaratzea egin dugu Gasteizko Hezkuntza Ordezkaritzaren aurrean. Hezkuntza Sailak eta ikastetxeko zuzendaritzak uko egin diote arrisku psikosozialen ebaluazioa egiteari.