Gizarte demokratiko batean nahi ditugun aurrekontuen osaketan parte hartzeko eskubidea izan beharko genuke. Horrela defendatu du beti LABek, hitzekin eta ekintzekin. Parte hartze hau integrala izan behar da, politika fiskala eta gastu politika hartuko dituena. Aldiz, Chiviteren gobernuak ere oinarrizko elementu demokratiko hau urratu du eta horrela salatu du LAB sindikatuak. Bakarrik Nafarroako Enpresarien Konfederazioari aitortzen diote eskubide hau. Hobe esanda, botere osoa ematen diete enpresariei gobernuaren politika fiskala agintzeko. Hau da UGT eta CCOO sindikatuek nahi duten elkarrizketa soziala?

Politika Fiskala: “kapitalaren errentekin, enpresa-onurekin eta ondare handiekin alderatuta langile-klaseak jasaten du zerga-gainindarra eta sortutako aberastasuna banatzeko ez dago inolako borondate politikorik”
Enpresarien ondarearen inguruko zergarekin gertatu dena aipatutakoaren adibide bat da. Neurri honekin bide arriskutsu bat irekitzen da ondare handiek zergen ordainketa saihesteko. Beste alde batetik, pertsona batzuen aberastasunaren inguruko balorazio erreal bat egitea eragozten du. Ondorioz, 5,5 milioi gutxiago bilduko direla salatu du LABek.

LABek ohartarazi du onartutako neurri honekin PSN eta Geroa Bai alderdiek ultraeskuinarekin batera (NA+) kapitalaren interesak defendatzen dituztela gehiengo sozialak behar duen aberastasunaren banaketa baztertuz.

2020rako aurrekontuen aurreproiektua: “gehiengo sozialak behar duen lan, pentsio eta bizi duina ez ditu bermatzen”
PSN, Geroa Bai eta Podemos alderdiei, Nafarroako gobernua osatzen duten heinean, erabaki bat hartzea eta argitzea eskatu diegu LAB sindikatutik. Ea NA+ ordezkatzen duen ultraeskuinak eta patronalak egiten dituzten eskaerei erantzungo dioten edo aldiz, gehiengo sozialari begira gobernatuko duten denok lan, pentsio eta bizi duina izateko. Beraien “geometria edo gehiengo aldakorrik” ez dugula onartzen esan diegu, kapitalak irabazten
duelako.

LABen ustez, kapitalismoak ezarritako hiru hesi (defizitaren muga, zorraren helburua eta gastuaren araua) gainditzeko Nafarroako burujabetza eta fiskalitate justu bat defendatu behar dira.

Aurrekontu sozialak izateko proposamenak
Gutxieneko pentsioa legez 1.080 euro arte osatzea, enplegu publiko duina, Bermatutako Errenta eta Etxebizitza eskubidearen aldeko Eskubide Sozialen Kartak sustatutako Herri Ekimen Legegilea onartzea, lan arloan ematen den soldata arrakalaren, diskriminazioaren eta indarkeria matxistaren aurkako lege bat onartzea. Hezkuntzan eta osasungintzaren inbertsioak Europako parametroetara igotzea, beste batzuen artean izan dira LABek egindako proposamenak. Honekin batera, lan duin bat bermatzeko gobernuak bat egitea 1.200 euroko soldatarekin eta 35 orduko lanaldiarekin eskatu du LABek.