2025-05-22
HomeFederazioakZerbitzu PublikoakLan legepeko kolektiboei erretiro partziala eta langile berriei errelebo-kontratua bermatuko dien akordioa...

Lan legepeko kolektiboei erretiro partziala eta langile berriei errelebo-kontratua bermatuko dien akordioa sinatu da

Euskal Autonomia Erkidegoko Mahai Orokorreko esparruan, Administrazioak eta LAB, ELA, CCOO eta UGT sindikatuok akordioa sinatu dugu. Horren bidez lan legepeko kolektiboei erretiro partziala eta langile berriei errelebo-kontratua bermatuko zaie.

Pasadan asteazkenean, martxoaren 27an, EAEko Mahai Orokorrean Administrazioak eta bertan ordezkaritza dugun 4 sindikatuk bilkura burutu genuen erretiro partziala eta errelebo kontratuen gainean akordioa erdietsiz. Horrela, langileok berriz izenpetu ahal izango ditugu erretiro partzialak eta errelebo-kontratuak, 27/2011 legeak ezarri zituen irizpide murriztaileak gaindituz.

Akordioaren eraginpean ondoko langile multzoak gelditzen dira: Administrazio Orokorra eta erakunde autonomoetako lan legepeko pertsonala, Hezkuntza saileko lan legepeko kolektibo guztiak, Segurtasun saileko lan legepekoak, eta Osakidetzako lan legepeko pertsonala. Itun honi esker, 2018ko abenduaren 31ra arte 2000 pertsona baino gehiagok erretiro partziala eskuratu ahal izango du, eta beste horrenbestek errelebo-kontratua izenpetu ahal izango du.

LAB sindikatuarentzat, akordioa garrantzitsua da. Itun horrekin Patxi Lopezek bultzatutako neurri murriztailea indargabetzen da, eta horrela 2000 langile baino gehiagok sistema erreformatu aurretiko baldintzetan erretreta partzialaren eskubidea egikaritu ahal izango duelako. Aldi berean administrazio publikoetako plantilak gaztetu egingo dira.

Halere, Madrilek arautzen duen legeei begirako mendekotasun itzela dago Hego Euskal Herrian eta akordio honek ere egoera hori ageri-agerian uzten du. Horregatik, mendekotasun egoerak eskatzen digu gainerako eragile sozial eta politikoekin agendak eta edukiak adostea ahalik eta lasterren, Euskal Herrian bertan pentsioen gaineko araudia egin dezagun.

Azkenik, akordioa EAEko enplegatu publikoen lanaldia handitu duen Administrazioarekin egin izanak ez du zuritzen Administrazio honek hartutako inposizio jarrera, lanaldiaren igoera dekretuz ezarri egin duelako, baina bai garbi erakusten du, zerbitzu publikoak eta bertako langileen lan baldintzak hobetzeko edukia dagoenean parte sozialak, eta LAB sindikatuak, akordioetara iristen badakigula.

 

LAB SAREAN
{module[111]}

    

AZKEN ALBISTEAK | ÚLTIMAS NOTICIAS

67 urte betetzear zituen garraiolari bat hil da Irunen

LABek jakin duenez, herenegun, goizaldeko 6:30ean, TRANSDIPE S.L. enpresako S.S. garraiolaria hilik agertu zen Irunen, lanerako prestatzen ari zen kamioiaren aldamenean. Kamioia martxan zegoen, atea irekita eta zantzu guztien arabera, heriotza ez traumatiko baten aurrean gaude. Azken honekin, gutxienez 20 langile hil dira urte hasieratik Euskal Herrian, hauetariko 9 garraiolariak.

Pribatizatutako zaintzako langileak mobilizazio nazionalera deitu ditu LABek, haien izaera publikoa aldarrikatzeko

Langile horiek zerbitzu publiko bat eskaintzen duten heinean, administrazioaren zuzeneko langile izan behar dutela defendatuko du LABek Donostian, eta, norabide horretan, lan baldintzen ekiparazioa aldarrikatuko du.

LABek CENi exijitu dio bertan behera utz dezan lan osasunaren prebentzioaren ardura langileei egozten dien kanpaina, diru publikoarekin ordaindu dutena

LAB sindikatuak arriskutsutzat, iraingarritzat eta mingarritzat jo du CENeko enpresariek diru publikoa erabiltzea (60.000 euro) modu seguruan lan egitea langilearen esku dagoela sinetsarazi nahi duten ideiak zabaltzen dituen kanpaina egiteko. Enpresarien kanpainak prebentzioaren berezko printzipioen aurka egiten du, eta enpresariek arlo horretan dituzten legezko betebeharrak hankaz gora jartzen ditu. Nafarroako lan heriotzen agertoki tragiko honetan, prebentzio legea ez betetzeko orduan erakusten duen lotsagabekeriaren bertze erakusgarri bat da kanpaina.