2000ko hamarkadaren hasieratik abian dagoen laneko ezbeharren inguruko akordio intersindikalak bere horretan jarraitzen du. Berriki ELAk jakinarazi du bere burua akordiotik kanpo kokatzen duela eta bide berri bat arakatuko omen duela, oraindik ezagutzen ez duguna.
LAB, STEILAS, ESK, EHNE eta Hiruk adierazi nahi dugu, akordioa lan istripuei erantzuteko tresna egokia dela eta bere potentziala aurrera eraman behar dugula indar gehiago ipiniaz. Lan osasunaren galera hain da nabarmena, elkarlan sindikala bestelako eskenatokirik ez dela onargarria, adostasunerako jarrera eta ariketa zintzoa dela izurrite honen aurrean erakutsi behar duguna, ez besterik. Honela, adierazi nahi dugu akordioko ateak beti zabalik izango direla.
Hau esanda, ostiral honetan, martxoaren 24an, goizeko 11:00tan Gasteizko Telefonicaren egoitzaren aurrean (Loreto de Arriola, 1) elkarretaratzea deitu nahi dugu aurten enpresa honen ardurapean eman diren altueretako bi istripu salatzeko, bata hilgarria eta azkena oso larria.