Osakidetzako Zuzendaritza 2011ko EPEaren kudeaketa pentsaezina den eraginkortasun eta gardentasun falta punturaino eramaten ari da, prozesuan bertan parte hartu duten milaka eta milaka izangairekiko inolako errespeturik agerturik.
Lehenengoari dagokionez, Osakidetzak formakuntza neurtzeko Epaimahaiak egindako irizpide aldaketa ontzat eman du, baina irizpideak zeintzuk diren ez du publiko egin. Nahiz eta eskaera egiten duten izangai guztiek euren espedientea ikusteko eskubidea izango dutela esan, hori ez da nahikoa. LABek eusten dio eskaerari: EPE eta kategoria guztietan izangaiak baloratzeko irizpideak argi eta garbi adierazi, eta publiko egin modu zehatz batean eta puntuazioarekin. Hauxe da putxerazo, entxufe eta irregulartasunekin amaitzeko bide bakarra.
Bestaldetik, Osakidetzak bere arau propioak ez dituela betetzen salatu nahi dugu, beste leku batean plaza atera duten langileak euren oraingo lanpostuan gera daitezen “berariazko prozesuak” abiatu baititu. LABek plaza ateratzen duten pertsonei ahalik eta lasterren euren bizitokitik ahalik eta gertuen egotea ahalbidetuko dien EPE sistema baten alde egin dugu. Baina holako prozesuak langile guztiontzat izan behar dira, irizpide objektibo eta publikoetan oinarriturik, ez gardentasun faltan eta txantxullotan oinarriturik, aukera berdintasunerako eskubidea urratuz.
Hau al da PNVk behin eta berriro aldarrikatzen duen kudeaketarako ahalmena?