Pasadan asteartean Pasaiako udal langileek beren ordezkari sindikalak aukeratu zituzten. Bost ordezkari lortuta LABen zerrenda izan zen boto gehien jaso zituen sindikatua. Pasaiako LABek bere hautagaiengan jarritako konfiantza eskertu die udal langileei, eta programan zabaldu dituzten konpromisoei helduko dietela esan dute.
«Pasaiako Udaleko LABek eskerrak eman nahi dizkizue gure hautagaiengan jarri duzuen konfiantzagatik; pertsonetatik haratago, proiektu batean sinisten dugu.
Azkeneko lau urteak oso gogorrak izan diren arren, botoei eustea lortu dugu, eta botorik gehien lortu duen zerrenda izan gara.
Gure hauteskunde-propagandan adierazten genuen moduan, behin-behinekotasunarekin bukatzeko ahaleginak egingo ditugu, legediak aukera ematen digun neurrian. LEPak egin daitezen borrokatuko gara, lanpostuei egonkortasuna eman nahi diegulako. Gure eskubideen alde borrokatzeko konpromisoa ere agertu genuen, bai esparru sektorialean eta bai gure Udalean dauzkagun hobekuntzei eutsiz.
Udalean gure hizkuntzan, euskaraz, normaltasunez lan egin ahal izateko borrokatuko gara; eta dagokionari eskatuko diogu euskararen erabilera eta zabalpenerako udal ordenantza betetzeko.
Ez dira makalak aurretik dauzkagun erronkak, baina arduraz eta konpromisoz egingo diegu aurre.
Ordu Sindikalak etikoki eta arduraz erabiltzeko konpromisoa berresten dugu
Azkenik, ezin dugu ahaztu LAB ezinbesteko tresna dela aldaketarako, eta hala erakutsi duela koherentziaz jardunez.
INDARRAK BILDU ETA ALDAKETA ERAGIN!»
