2024-09-20
HomeIdazkaritzakEuskara IdazkaritzaLABek Metro Bilbaon gaztelania hutsean jarri den erakusketa kendu dadin eskatzen du

LABek Metro Bilbaon gaztelania hutsean jarri den erakusketa kendu dadin eskatzen du

35 panelek osatzen dute erakusketa eta gaztelania hutsean daude. Hainbat erakunde publikok babesten dutenez, argi geratzen da ez dutela interes handirik euskararen normalizazioan. Metro Bilbaok ere agerian utzi du kontzientzia urria duela horretan, eta ez diela jarraipen handirik egiten uzten dituen espazio publikoetan erakusten diren edukiei.

“Diálogos: Arquitectura Vizcaína del siglo XXI” erakusketa joan den astelehenean, irailak 8, jarri zuten. 35 panel guztira, Zazpi Kaleak, Abando, Moyua, Indautxu eta San Mameseko gelokietan. Bi hilabete inguru luzatzea aurreikusten du Metro Bilbaok.

LABek eskatzen du berehala kentzeko, panel guztiak gaztelania hutsean daudelako. Sindikatuaren ustez, sinestezina da garraio publikoaren zerbitzuan horren nabarmen urratzea erabiltzaileen hizkuntza eskubideak.

Metro Bilbaok doan utzi ditu instalazioak Euskal Herriko Arkitektoen Elkargoa Ofizialak egindako erakusketa jartzeko, Bilboko Udala, Bizkaiko Foru Aldundia eta Gasteizko Jaurlaritza babesle nagusi dituela.

LAB sindikatuaren iritziz, utzikeria nabarmenez jokatzen ari dira erakunde horiek guztiak, euskaldunen hizkuntza eskubideak zaindu eta leku eta instalazio publikoetan, hala nola, Metro Bilbaoko geltokietan, euskararen presentzia eta erabilera sustatu beharko lituzkeen arren.

LABek salatu du, halaber, Metro Bilbaoko zuzendaritzak ez duela sentsibilitaterik hizkuntza kontuetan, ez baitu inolako hizkuntza eskakizunik ezartzen ez eta inolako jarraipenik egiten diskriminazio horiek saihesteko.

LABen iritziz, horrelako urratzeek argi erakusten dute hitzetatik ekintzetara igaro behar dela, eta Metro Bilbaok baliabideak eta aurrekontua bideratu behar dituela hizkuntzen kudeaketarako arlora, hiriarteko trenean euskararen normalizazioan ganorazko lana egingo bada.

Horregatik guztiarengatik, LAB sindikatuak Metro Bilbaoko zuzendaritzari, eta erakunde publiko laguntzaile guztiei, eskatzen die gaztelaniazko panelak kendu eta erakusketa elebitan jar ditzaten, lehenbailehen, herritar guztion hizkuntza eskubideak bermatzeko.

Amaitzeko, LABek enpresako zuzendaritzari galdegiten dio erakunde eta protokolozko adierazpenez harantzago, urrats sendoak egin ditzala Metro Bilbaoko langileek euskaraz lan egin ahal izan dezaten, barruko eta kanpoko harremanetan.
 

 

 

AZKEN ALBISTEAK | ÚLTIMAS NOTICIAS

Bilboko hiribilduaren mantentze elektrikoari buruzko agiri teknikoa inpugnatu dugu, hitzarmena ez betetzeagatik

2024ko irailaren 4an, Bilboko Udalak argitara eman zituen Bilboko argiteria publikoaren eta instalazio elektriko eta osagarrien mantentze- eta kontserbazio-zerbitzuaren lizitazio berriaren agiri teknikoak. Agiri horietan, Bilboko Argiakeko 39 langile agertzen dira langile subrogagarri gisa, eta subrogazio-zerrendatik kanpo geratzen dira mantentze elektrikoko zerbitzuko obren atalari atxikitako 9 pertsonak.

Karrera profesionala guztiontzat exijitu dugu

Sindikatuak Nafarroako Parlamentuaren aurrean elkarretaratzea egin du gaur goizean helburu bikoitz bati jarraiki: batetik, ateez bestaldean izenpetu behar zen akordioa ospatzeko, zeinaren bitartez Osasunbideko 3.000 langile baino gehiagorentzako karrera profesionala onartuko baita; eta bestetik, eskubide hori bera gainerako langileentzat ere zabal dadila aldarrikatzeko. Egun historikoa dela nabarmendu dute, borroka sindikalaren beharra eta garrantzia azpimarratzearekin batera.

Pentsioen inguruko akordio berriak erretiro adina atzeratzen du eta pauso berri bat suposatzen du gizarte segurantzaren pribatizaziorantz

Gaur, Pedro Sanchez buru dutela, sinatu dute CCOO eta UGT sindikatuek eta CEOE eta Cepyme patronalek pentsioen alorrean adostutako akordio sozial berria. Akordio hori estatu-mailan egin da, eta legezko adina eta kotizazio-urteak igotzen jarraitzea du helburu, erretiro adina atzeratzea sustatuz. LABen uste dugu akordio honek ez diela erantzuten euskal gehiengo sindikalak eta Euskal Herriko Pentsiodunen Mugimenduak aurkeztutako premiazko eskaerei. Aitzitik, Espainiako Gobernuak aurrera egiten du Bruselatik garatutako politika neoliberaletan, betiere patronala babesten duten sindikatuen bermearekin.