Osakidetzak berriki jakinarazi du euskarazko 2. Hizkuntz Eskakizuna egiaztatzeko ez-ohiko deialdia egingo duela, langile finkoei zuzendua. Ez-ohiko froga honen bidez, eguneroko laneko ahozko jardunean euskara erabili arren ohiko Hizkuntz Eskakizunen deialdiak gainditzerik lortzen ez duten langileen egoerari konponbidea eman nahi da, ez-ohiko deialdi bat eginez, moldatua, ahozko froga idatzizkoaren aurretik eginez, besteak beste. Honela, Osakidetzan euskara normalizatzeko planaren helburuak eguneroko jardunean bete arren, plan horretatik kanpo geratu diren langileak normalizazio lan horretan baliatu nahi omen dira.
LAB sindikatuak bat egiten du neurri honen helburuekin, baina gure ustez, neurria erabat motz geratzen da, ez baita onargarria langile ez finkoak deialdi honetatik kanpo uztea. Osakidetzako langile guztiek, finkoek eta ez finkoek, izan behar dute Hizkuntz Eskakizuna egiaztatzeko ez-ohiko deialdi honetan parte hartzeko aukera. Ohiko jardunean euskara erabiltzen duten langile ez-finkoak Osakidetzan euskara normalizatzeko eta hizkuntz eskubideak bermatzeko ezinbesteko baliabide dira, probestu beharrekoak. Ez-ohiko deialdi honen asmoak lortu ezinak dira langile ez-finkoak kanpoan utziz. Bestalde, langileen eskubideei dagokienez neurri hau diskriminatzailea da erabat.
Guzti honengatik, langile ez-finkoak kanpoan uzten dituen Hizkuntz Eskakizuna egiaztatzeko deialdi honi helegitea aurkeztuko dio LABek, deialdia diskriminatzailea izanik legez kontrakoa delakoan. Hizkuntz Eskakizuna egiaztatzeko ez-ohiko deialdia langile guztiei egitea, finko eta ez-finkoei, eskatuko du sindikatuak.
Euskararen egoera normalizatzeko neurrietan motz geratze hau arazo orokorra da Osakidetzan: Langileen parte-hartzerako aukerak, buruzagi eta gainbegiraleen erantzukizuna, euskalduntzeko bitarteko nahikoak edota lana euskaraz egin ahal izateko beharrezkoa den sustapen lana bezalako gai garrantzitsutan Osakidetzak ez ditu beharrezko ekimen eta neurriak hartu. Ondorioz, behar eta ahal baino askoz motelago doa euskararen garapena Osakidetzan, zoritxarrez.