LAB sindikatuak Barañaingo (Nafarroa) Linacal iturgintza enpresako zuzendaritzaren jarrera onartezina salatu nahi du, langileek euren lan baldintzak hobetuko dituen enpresa itun bat negoziatzeko eginiko eskaeraren aitzinean, isiltasunaren eta axolagabekeriaren aldeko hautua egin duelako. LABen iritziz, jarrera horrek langileon eskubideekiko erabateko mespretxua erakusten du eta, horregatik, grebara deitu du abenduaren 26 eta 27rako.
Linacal-eko plantillak, hamar langile ingurukoak, lan baldintzak hobetzeko konpromisoa hartua du, eta behin baino gehiagotan eskatu du negoziazio mahai bat irekitzeko, enpresa itun bat adoste aldera. Enpresak negoziatzeari uko egin izanak, ordea, neurri irmoagoak hartzera behartu ditu langileak, hala nola abenduaren 26an eta 27an lehenbiziko bi greba egunak egitea.
Grebaren bidez, langileek negoziazio kolektibo bat berehala irekitzea eskatu nahi dute, lan baldintza duinak jasoko dituen enpresa itun bat lortzeko; eta grebaren bidez negoziazio kolektiborako oinarrizko eskubidea urratzen duen enpresaren jarrera prepotente eta antisindikala salatu nahi dute. LABek ez du onartuko patronalak langileen aldarrikapenei entzungor egiten jarraitzea. Horren harira, sindikatu honek langileriaren elkartasunerako eta mobilizazioetan aktiboki parte hartzeko deia egiten du.