2024-09-20
HomeEkintza PolitikoaLABek eta ELAk Nafarroan garai berri bat ireki eta Gobernuarekin akordioetara heltzeko...

LABek eta ELAk Nafarroan garai berri bat ireki eta Gobernuarekin akordioetara heltzeko prestutasuna adierazi dute

Gaur Iruñean egindako prentsaurrekoan, Igor Arroyok (LAB) eta Mitxel Lakuntzak (ELA) Gobernuarekin akordioetara heltzeko prestutasuna adierazi dute, baldin eta honek elkarrizketa sozialaren etapa itxi eta lan arloan garai berri bat irekitzeko erabakia hartzen badu. Igor Arroyoren arabera, "elkarrizketa soziala iruzurra izan da, praktikan Patronalaren bakarrizketa pairatu baitugu. Nafarroan bake soziala erosi egin da: hamabost urtetan UPNk 183 milioi euro eman zien CEN, UGT eta CCOOi". Arrazoi honengatik, LAB eta ELAk Elkarrizketa Sozialaren Kontseilua berehala bertan behera uztea exijitu dute.

Lanean jartzeko prestutasuna adierazi du Arroyok, garai berri bat irekitzeko: "Prest gaude langileon baldintzak hobetuko dituzten akordio zehatzetara iristeko. Gobernuak erabaki behar du ea iraganeko markoetan iltzatuta jarraitu nahi duen ala etorkizuneko akordioetarako bidea jorratu nahi duen".

LABek eta ELAk hamar akordio zehatzen aukera jarri dute mahai gainean, egungo esparru juridikoaren baitan garatu daitezkeenak. Horrekin batera, harago joateko lan arloko eta babes sozialeko eskumen osoak lituzkeen esparru berri baten beharra oroitarazi dute.

AZKEN ALBISTEAK | ÚLTIMAS NOTICIAS

Bilboko hiribilduaren mantentze elektrikoari buruzko agiri teknikoa inpugnatu dugu, hitzarmena ez betetzeagatik

2024ko irailaren 4an, Bilboko Udalak argitara eman zituen Bilboko argiteria publikoaren eta instalazio elektriko eta osagarrien mantentze- eta kontserbazio-zerbitzuaren lizitazio berriaren agiri teknikoak. Agiri horietan, Bilboko Argiakeko 39 langile agertzen dira langile subrogagarri gisa, eta subrogazio-zerrendatik kanpo geratzen dira mantentze elektrikoko zerbitzuko obren atalari atxikitako 9 pertsonak.

Karrera profesionala guztiontzat exijitu dugu

Sindikatuak Nafarroako Parlamentuaren aurrean elkarretaratzea egin du gaur goizean helburu bikoitz bati jarraiki: batetik, ateez bestaldean izenpetu behar zen akordioa ospatzeko, zeinaren bitartez Osasunbideko 3.000 langile baino gehiagorentzako karrera profesionala onartuko baita; eta bestetik, eskubide hori bera gainerako langileentzat ere zabal dadila aldarrikatzeko. Egun historikoa dela nabarmendu dute, borroka sindikalaren beharra eta garrantzia azpimarratzearekin batera.

Pentsioen inguruko akordio berriak erretiro adina atzeratzen du eta pauso berri bat suposatzen du gizarte segurantzaren pribatizaziorantz

Gaur, Pedro Sanchez buru dutela, sinatu dute CCOO eta UGT sindikatuek eta CEOE eta Cepyme patronalek pentsioen alorrean adostutako akordio sozial berria. Akordio hori estatu-mailan egin da, eta legezko adina eta kotizazio-urteak igotzen jarraitzea du helburu, erretiro adina atzeratzea sustatuz. LABen uste dugu akordio honek ez diela erantzuten euskal gehiengo sindikalak eta Euskal Herriko Pentsiodunen Mugimenduak aurkeztutako premiazko eskaerei. Aitzitik, Espainiako Gobernuak aurrera egiten du Bruselatik garatutako politika neoliberaletan, betiere patronala babesten duten sindikatuen bermearekin.