Eusko Jaurlaritzaren Industria, berrikuntza, merkataritza eta turismo saileko delegazioetara jo du LABek salaketa egiteko, Carrefourrek ordutegi komertzialen muga gainditu duela-eta. Joan den uztailaz geroztik, eta Mariano Raxoik ordutegi komertzialen araudia aldatu eta ordutegi komertzialak, asteko gehienez 72 ordukoak zirenak, 90 ordutara zabaldu eta gero, Carrefour lehenengo enpresa izan da —EAE osoan bakarra— ordutegia zabaldu duena, jakinik hemen Eusko Jaurlaritzak duela ordutegi komertzialen Ordenaziorako eskumena, eta zentzu horretan ez dela aldaketarik eman.
Carrefourrek, beraz, euskal arautegia hautsi du, eta hori salatzeko mobilizazioak egingo ditugu lan zentruetan, oraingoan Carrefour, eta aurrerago besterik balitz, ordutegi komertzialen mugak gainditzen dituen enpresa oro salatzeko.
Carrefourrek helburu argi bat du, igande eta jai egunetan irekitzea galarazten dion edozein traba edo arau haustea. LABek ez du onartuko hemen ordutegi komertzialak gehiago zabaldu edo luzatzerik. Gure eredu sozialaren eta kontsumo arrazionalaren alde egin behar dugu, eta noski, merkataritzan lanean ari diren langileek duten atsedenerako eskubidea ere bai.