Dagoeneko 3 aste baino gehiago daramazue greban, tarte honetan enpresa ixteko mehatxuak, zuen borroka nahiari erasoak edota zuekiko irainak jaso dituzue. Hala ere, gogor eta irmo jarraitzen duzue, zuen oinarrizko eskubideak defendatzen!
Zabaldu nahi izan duten mezu maltzur eta gezur guztien aurrean, burua tinko duzue, norabidea galdu gabe. Badakizue, inork baino hobeto, bide honek dituen aukera eta arriskuak eta, hala ere, borrokatzea erabaki duzue. Ongi dakizue, orain amore emateak patronalaren “titere” bihurtuko zaituztela betirako eta ez zaudete hori onartzeko prest.
Enpresari, mahai gainean jartzen dituen “arazo ekonomikoak” konpontzeko akordioak eskaini dizkiozue; badakigu ez zenutela zertan, baina hori da zuen esku-zabaltasunaren eta enpresaren etorkizunarekiko konpromisoaren adierazle. Eta enpresak ordea, lan gatazka konpondu ez eta Hartzekodunen Lehiaketa batekin mehatxatu zaituzte. Zuen erantzuna argia izan da, eutsiko diogu, borrokan jarraituko dugu! Lanera itzuli nahi duzue, badakigu greba egiterik ere ez zenutela nahi, lehenago akordio bat egotea espero zenutela, baina gutxieneko eskubideak onartzea nahi duzue.
Iñaki Errastik, NANUKeko Gerenteak, inposaketaren kudeaketa ezagutzen du eta ez negoziazio eta akordioena; ezta legeak hala dioenean ere. Horren adibide, maiatzean langile batzuei egindako lan baldintza aldaketa; legeak jakinarazpena eta negoziazio prozesu bat egon behar dela badio ere, berak egun batetik beste lanerako formak aldatu zizkizueten, beraien abokatuak ere onartu du hori txarto eginda dagoela! Horrelakoak dira onartzen ez dituzuenak, forma horiek dira gehiago ikusi nahi ez dituzuenak.
Elefantea da Iñaki, bere handitasunean NANUKeko Gerente izateaz gain, ASETRAVIko Lehendakaria ere badelako. Bizkaiko Garraioko Patronalaren nagusitasuna defendatu behar du, nahiz eta horretarako NANUK itxi; eta ondo doan enpresa bateko 90 familia kale gorrian utzi. Euskal Herriak gehiengo osoz esan dio Espainiar Erreformari ezetz, eta orain NANUKeko grebalariek eutsi diote borroka horri, entzun dezatela bai Errastik baita gainerako bazkideek ere; errespetatu Euskal Herriaren hitza!
Elefanteak, ordea, badu izu bat, kontrolatu ezin duen beldurra. Zuei, txindurriei, baina ez zuen txikitasunari, ez! Zuen lanerako, antolaketarako eta borrokarako konpromisoari baizik, horrek handi egiten baitzaituzte!
Muxu bat, zelan ez, enpresaren jarrera bortitzena pairatu duen Xaguri eta familiari! Lanera bueltatuko zara! Bueltatu egin behar duzu! Enpresaren erabakia ez delako mendeku jarrera bat baizik, eta argi dugu borrokaren autua zigortzerik ez dugula ez gaur eta ez inoiz onartuko!
Guk, zer esan gutxi dugu, ondoan gaituzuela, bide lagun, lanerako eta borrokarako prest eta, batez ere, harro! Gure indar eta berotasun osoa zuei, eredu zarete guztiontzako-eta!
LAB Durangaldea
{module[111]}