LAB sindikatutik, Papresan (Errenteria) lan egiten duen Algeposako langileen ordezkari garen aldetik, jakinarazi nahi dugu Papresak Algeposarekin zuen kontratua bertan behera utzi izanak sortu duen egoera larria.
Joan den otsailaren 18an, Papresak Algeposari jakinarazi zion indarrean zuten kontratua bertan behera geratu zela. Hurrengo egunean, otsailaren 19an, Papresako instalazioetan azken lan eguna izango zutela jakinarazi zitzaien langileei. Erabakia bat-batean hartu zen, langileak erabateko ziurgabetasun egoeran utziz.
Erabaki horren ondorio zuzen gisa, Algeposak jakinarazi du Papresan lan egiten zuen plantilla osoari eragiten dion Enplegu Erregulazio Espediente (EEE) bat aplikatu duela, 16 langileen kaleratzea emanez.
LABetik salatzen dugu egoera hau ez dela gertaera isolatu bat, baizik eta Papresak bizi duen egoera larriaren eta bere zuzendaritzak egiten ari den kudeaketaren lehen ondorio zuzena. Kudeaketa oso kaxkarra dela deritzogu eta enpleguan eta langileen bizi baldintzetan eragin zuzena izaten ari da, azpikontratazioek industria sarean sortzen duten prekarietate eta ezegonkortasunaren isla ere badena.
Ez dugu onartzen langileek enpresa-erabakien eta kudeaketa txarraren ondorioak ordaintzea. Erantzukizunak eskatzen dizkiogu Papresari eta Algeposari, bi enpresak baitira 16 langileei sortzen ari zaizkien egoeraren erantzule.
Egoera horren aurrean, langileek mobilizazioekin hastea erabaki dute, euren lanpostuen defentsan eta gertatutakoa publikoki salatzeko.
Lehenengo mobilizazioa datorren otsailaren 23an izango da, eta ez dugu baztertzen ekintzak areagotzea enplegua bermatuko duten benetako irtenbideak eskaintzen ez badira.
LABetik lan eskubideen defentsarekin dugun konpromisoa berresten dugu, eta ohartarazi nahi dugu ez dugula onartuko plantillak gatazka enpresarialetan trukerako txanpon gisa erabiltzea.