LAB sindikatuak argi adierazi nahi du ezezkoa eman diola Aiala Vidrioko hitzarmen kolektibo berriari. Hitzarmen hau ELA eta CCOO sindikatuen gehiengo sindikalak sinatu zuen, eta langileek bozketaren bidez berretsi zuten. LABen ustez, hasieratik baldintzatu dute enpresaren presioek, bake sozialaren exijentziak eta etorkizuneko inbertsioen mehatxuak.
Azken urte eta erdi honetan, Aiala Vidrioko zuzendaritzak lan arloan norabide kezkagarria hartu du: Aldi Baterako Enplegu-Erregulazio Espedienteak inolako alternatibarik gabe aplikatu dira, kaleratze traumatikoen mehatxua egon da, lanpostuen kanporatu eta 70 lanpostu baino gehiago galdu dira, berreskuratzeko inolako borondaterik gabe.
Vidrala taldea, azkenaldian, irabazi milioidunak lortzeagatik izan da albiste. Hala ere, azken neurriak kontuan hartuta, hitzarmen berriak ez du langileek izandako galera ekonomikoen benetako berreskuratzerik jasotzen, ezta lan-baldintzetan hobekuntza esanguratsurik ere. LABek argi du enpresak etekinak lortzen baditu eta bere jardueraren etorkizunaren alde egiten badu, langile guztien lanari esker dela. Beraz, ahalegin hori lan-baldintzen hobekuntza konkretu eta bidezkoetan islatu behar da.
Negoziazio prozesuan, enpresak marko zurruna inposatu du, inbertsioak presio-tresna gisa erabiliz eta funtsezko proposamenak eztabaidatzeari uko eginez, negoziazio kolektiboa bera urratuz. Horrela, sei urterako akordioa ixtea lortu du enpresak, enpresa-batzordearen jarduteko gaitasuna murriztuz eta aurrera egiteko aukerak ezerezean utziz.
Gehiengo sindikalak bost egun eskasetan itxi zuen aurreakordioa, eta ondoren langileek berretsi zuten. LABek, egindako batzarretan, aurkako bere jarreraren arrazoiak azaldu ditu eta negoziatzen jarraitzeko beharra nabarmendu dugu, betiere langileen babesarekin. LABen ustez, hitzarmen honek ez ditu funtsezko gaiak jorratzen, hala nola lanaldia murriztea, gizarte-baldintzak hobetzea edo enpleguaren benetako bermea. Aukera galdu da langileen benetako beharrei erantzuten dien akordioa eraikitzeko eta egungo erronkei ausardiaz aurre egiteko.
LABek ez du hitzarmen hau sinatu, eta tinko jarraituko du Aiala Vidrioko langileen eskubideak defendatzen, eta etorkizunean lan-baldintzak ez daitezen enpresak inposatutako eta langileen errealitateari erantzuten ez dioten exijentzien menpe egon.