2024-09-20
HomeEkintza SindikalaLAB ez da izango eredu neoliberalak soilik kontutan hartzen dituen elkarrizketa sozialeko...

LAB ez da izango eredu neoliberalak soilik kontutan hartzen dituen elkarrizketa sozialeko mahaian

LABek prentsaurrekoa eskaini du gaur Donostian, Eusko Jaurlaritzak elkarrizketa sozialerako eginiko proposamenaren balorazioa eta jarrera plazaratzeko. Ainhoa Etxaidek eta Garbiñe Aranburuk salatu dute Jaurlaritzak aurkezturiko txostenean ez dela herri honek eskatzen duen eredu berriaren aldeko apusturik egiten, ez eta euskal esparrua lantzeko zantzurik ikusten. Jaurlaritzak mahaia osatzeko erakutsi duen asmoaren aurrean adierazi dute LABek ez duela bertan parte hartuko eta areago, konponbidetik urrundu ez gaitzan mahaia ez deitzeko eskaera egin diote Jaularitzari.

EUSKO JAURLARITZAK ELKARRIZKETA SOZIALERAKO EGINIKO PROPOSAMENAREN AURREAN LAB SINDIKATUAREN BALORAZIOA

 Valoración de LAB ante la propuesta para el diálogo social del Gobierno Vasc0 (Youtube) 

Joan den udaberrian LABek proposamen publikoa luzatu zion Jaurlaritzari, lan harreman eredu berri eta propio baten eztabaida egiteko eta euskal esparrua eraikitzeko. Bertan argi azaltzen genuen elkarrizketa sozialaren aurrean dugun jarrera eta zer eskatzen dion LABek horrelako elkarrizketa marko bati.

Orain Jaurlaritzak txosten bat aurkeztu du eta LABek bi ondorio nagusi atera ditu planteamendu horren aurrean: EZ DAGO EREDU BERRIRIK, EZ EUSKAL ESPARRUAREN ERAIKUNTZARIK.

EZ DAGO EREDU BERRIRIK…
Txostenean ez da lan erreforma auzitan jartzen, ez da erreforma gainditzeko inolako proposamenik egiten. Bien bitartean lan erreforma bere bidea egiten ari da: langabezia tasa izugarria da, enpleguaren prekarizazioak ez du etenik, negoziazio kolektiboa blokeatua dago, soldatak erasotzen ari dira eta sortzen den aberastasuna gero eta okerrago banatzen da. Azken batean, pobrezia areagotzen ari da.

Patronala da erreforma eskutan bide hau zuzentzen ari dena eta Jaurlaritzak babestu egiten du bide hori.

…EZ EUSKAL ESPARRUAREN ERAIKUNTZARIK
Lan harreman eredu berri bat eraikitzeko ez dugu bitartekorik — ez eskuduntza ez ahalmen legegilerik ere— eta eremu horretan atzerakada nabarmena gertatzen ari da. Horren inguruko aipamenik ez da egiten Jaurlaritzaren txostenean. Arazo moduan aipatu ere egiten ez bada, nekez helduko zaio lan harremanak hemen erabakitzeko euskal herritarrok dugun eskubideari.

LABen ustez gobernu honen posizioa hobekien laburbiltzen duena ENPLEGU PUBLIKORAKO EUSKAL LEGEA da, zeinak estatuko inposaketen aurrean men egiten duen euskal esparrua eraikitzeari bizkarra emanez eta negoziazio kolektiborako eskubidea bermatu gabe, aldebakarrez arautzeko erabakia ez baita auzitan jartzen.

Langabezia eta prekarizazio prozesuari aurre egiteko, lan harreman eredu berri bat eraikitzea langileon premia da, baita krisiari irtenbide bat emateko modua ere. Eztabaida hau egin behar dela pentsatzen dugu eta horretan jarraituko dugu. Jaurlaritzak aurkeztu duen proposamenak ez du benetako eztabaida egiteko aukerarik ematen, egungo ereduaren joko arauak ontzat ematen ditu, egungo ereduan du abiapuntua eta helmuga.

LAB EZ DA JAURLARITZAREN ELKARRIZKETA SOZIALERAKO MAHAIAN ESERIKO
LAB mahaian ez eseritzearen arrazoiak bi dira: Lehena, Jaurlaritzarentzat mahaiaren helburua ez dela lan munduan ditugun arazoak konpontzeko bidean aurrera egitea; eta bigarrena, Jaurlaritzaren jarrera, lan mundutik desagertu egin baita, patronalari lan munduarekin gertatzen denaz erabakitzeko ahalmen guztia emanez. Politika horren arabera ulertu behar da enplegu sailaren proposamena. Azken finean, zer da sail honek benetan egiten duena? Lanbide kudeatu enplegu zerbitzua langabetuei jarraitzeko tresna bihurtuz, langabeziari aurre egiteko tresna bezala indartu beharrean.

LABen JARRERA
LABen ustez lan mundua berrantolatu beharra dago, hor dago gure etorkizun ekonomiko eta soziala ziurtatzeko gakoetako bat. Oraintxe bertan bide hori egin beharrean patronalaren neurrirako lan mundua inposatzea erabaki du Jaurlaritzak, hau da, lan mundu guztiz desarautu, boterea duenak nahi duena egin dezan inolako mugarik gabe. Euskal Herriaren premia ekonomiko eta sozialetan oinarritu beharko lukeen lan mundua gutxi batzuen irabaziei begira jarri nahi izan dute.

LABek egina du lan harremanetarako eredu berri baterako proposamena, eta argi du elkarrizketa eta negoziazioa derrigorrezkoak direla urratsak emateko.

Hala ere, argi geratu da patronala ez dagoela prest bide honi ekiteko eta Jaurlaritzak beste behin uko egin dio gure proposamenari.

Baditugu aurrera egiteko aukerak: LABek defendatzen duen bideari langileok eman ahal diogun bultzada erabakigarria izango da eta horrekin batera, eztabaida hori behingoz benetak egiteko hartu beharreko konpromisoetan dago giltza.
Sindikatuak Jaurlaritzari eskatzen dio ez dezala mahaia osatu, ezer ez konpontzeaz gain, konponbidetik urrunduko gaituelako kontrakoa egiteak.

Lan harremanetarako eredu berri baten bila LABek mahaia ez osatzeko eskaera Parlamentura eramango du, eta udaberrian aurkezturiko proposamena eremu politikoan eta sozioekonomikoan zabaltzeko lanetan jarriko da. Proposamena lantokietara eramanez, beste sindikatuekin konpartituz eta instituzioetan aurkeztuz.

Bide berean, gaurko ereduaren kontra borrokatzen jarraituko du LABek: lantokiz lantoki, eta eta ereduaren arduradunak diren instituzioen aurrean azalduz.

 

{linkr:related;keywords:elkarrizketa-soziala;limit:5;title:Albiste+gehiago}
 

 

AZKEN ALBISTEAK | ÚLTIMAS NOTICIAS

Bilboko hiribilduaren mantentze elektrikoari buruzko agiri teknikoa inpugnatu dugu, hitzarmena ez betetzeagatik

2024ko irailaren 4an, Bilboko Udalak argitara eman zituen Bilboko argiteria publikoaren eta instalazio elektriko eta osagarrien mantentze- eta kontserbazio-zerbitzuaren lizitazio berriaren agiri teknikoak. Agiri horietan, Bilboko Argiakeko 39 langile agertzen dira langile subrogagarri gisa, eta subrogazio-zerrendatik kanpo geratzen dira mantentze elektrikoko zerbitzuko obren atalari atxikitako 9 pertsonak.

Karrera profesionala guztiontzat exijitu dugu

Sindikatuak Nafarroako Parlamentuaren aurrean elkarretaratzea egin du gaur goizean helburu bikoitz bati jarraiki: batetik, ateez bestaldean izenpetu behar zen akordioa ospatzeko, zeinaren bitartez Osasunbideko 3.000 langile baino gehiagorentzako karrera profesionala onartuko baita; eta bestetik, eskubide hori bera gainerako langileentzat ere zabal dadila aldarrikatzeko. Egun historikoa dela nabarmendu dute, borroka sindikalaren beharra eta garrantzia azpimarratzearekin batera.

Pentsioen inguruko akordio berriak erretiro adina atzeratzen du eta pauso berri bat suposatzen du gizarte segurantzaren pribatizaziorantz

Gaur, Pedro Sanchez buru dutela, sinatu dute CCOO eta UGT sindikatuek eta CEOE eta Cepyme patronalek pentsioen alorrean adostutako akordio sozial berria. Akordio hori estatu-mailan egin da, eta legezko adina eta kotizazio-urteak igotzen jarraitzea du helburu, erretiro adina atzeratzea sustatuz. LABen uste dugu akordio honek ez diela erantzuten euskal gehiengo sindikalak eta Euskal Herriko Pentsiodunen Mugimenduak aurkeztutako premiazko eskaerei. Aitzitik, Espainiako Gobernuak aurrera egiten du Bruselatik garatutako politika neoliberaletan, betiere patronala babesten duten sindikatuen bermearekin.