Bi sindikatuon arteko bilera egin da gaur Sevillan (Andaluzia), modu honetan, orain urtebete SATek (Sindicato Andaluz de Trabajadores) Euskal Herrian zehar egin zuen bisita bueltatuz, oraingoan LABeko ordezkariak Andaluziara joan dira.
Bileran bi sindikatuetako arduradun nagusiak elkartu dira: LABetik Ainhoa Etxaide idazkari nagusia eta Jabi Garnika idazkari nagusi ordea eta SATetik Diego Cañamero idazkari nagusia eta Jose Caballero antolakuntza idazkaria.
Bileran egungo egoera sozioekonomikoa izan dute aztergai. Hauek dira bi sindikatuoi gehien gerturatzen gaituzten gaiak:
– Alternatiba sindikalak indartzeko eta zabaltzeko momentuan gaude; eta lankidetza indartu behar dugu eredu sindikal berdina partekatzen dugunon artean. Gogoetaren oinarrian daude:
- Andaluziak koiuntura sindikal berezia bizi dute UGTren ustelkeria bistakoa egin denetik.
- Estatu espainiarrean inboluzio oso bat burutzen ari da eskubide demokratikoei dagokionez. Aurkeztu berri duten Segurtasun Legea eraso zuzena da askatasunaren kontra, erantzun eta borroka sozialaren kontra.
- Bi sindikatuok azterketa berdina dugu: langabezia eta pobrezia egiturazko arazoak bihurtzen ari dira egiten ari diren politiken ondorioz. Estatuak ez du alternatibarik egoera honentzat eta sortu daitekeen erantzun soziala errepresioaren bidez indargabetu nahi dute. Estatu espainiarraren ohitura da, eskubideak ez dauden lekuan errepresioa ezartzea.
– Andaluziako eta Euskal Herriko langileok dugun irtenbide bakarra gure lurraldeetan aldaketa politiko eta sozialak lortzea da. Madrilgo politiken menpe eta Madrilen hartzen diren erabakiei jarraituz ezinezkoa dugu alternatiba eraikitzea. Hau da konpartitzen dugun borroka, neozentrialismoari eta uniformizazioari aurre egin behar diogu gure herrietan nagusitu daitezkeen alternatibei ateak irekitzeko.
Ekimen bateratuak aztertzeko konpromisoa hartuz amaitu da bilera.
{module[111]}