LABen adierazpena Kataluniako Gobernuak azaroaren 9ko galdeketarako egindako deialdiaren aurrean, deialdiaren dekretua eta Kataluniako Kontsulta Legea baliorik gabe uzteko Espainiako Auzitegi Konstituzionalak hartu duen erabakiaren aurrean.
Estatu erreforma baten testuinguruan eman da erabakia; Espainiar Gobernuak egin duen hautuaren adierazle da Kataluniari emandako ezezkoa, herrien erabakitzeko eskubidearen egikaritzari bizkar emanez, oinarri adostua duen prozesu orori ateak ixten dizkiona. Estatu erreformaren nolakotasuna definituz Madrilgo Gobernuak egiten duen dekantazioa agerian geratzen da erabaki honekin: prozesu demokratiko baten baitan erabakitzeko eskubidearen aitortza eta egikaritza adostutako bideorri baten gainean eraikitzeko aukerak baztertuz.
Momentua da euskal eragileon aldetik erantzun bateratu bat emateko, eremu politiko, sozial nahiz sindikaletik onarrizko eskubide zibil eta politikoen aurkako eraso honi aurre egiteko eman beharreko urratsak eztabaidatu eta adostuz. Euskal Herriak behar eta eskatzen duen neurriko erantzuna hor kokatzen dugu; erantzun hori emateko adostasunik ez badugu nekez kokatuko gara herri honek eskatzen duen mailan. Zentzu honetan, EAJk argitu beharko du non kokatzen duen estatus politikoaren eztabaida eta non kokatzen duen bidelaguna, Madrilgo Gobernuaren kudeaketa antidemokratikoan, ala euskal eragileon arteko adostasunean.
LAB sindikatutik erantzun bateratuaren mesedetan adostasunak eraikitzeko gure prestutasuna adierazi nahi dugu. Honez gain, Kataluniaren eta Euskal Herriaren aurkako azken eraso honen salaketa eta erabakitzeko eskubidearen aldeko borroka lantokietara eramango du LABek. Dei egiten diegu gure afiliatu eta militante guztiei lantokietan, eta lan zentruetatik kanpo, erabakitzeko eskubidearen aldeko borrokarekin bat egiteko.