2024-05-28
HomeEkintza SozialaKutxaren batzordeko ELA eta LABen ordezkariek ez dute parte hartuko Banku-Fundazioaren Patronatua...

Kutxaren batzordeko ELA eta LABen ordezkariek ez dute parte hartuko Banku-Fundazioaren Patronatua izendatzeko prozesuan

ELAk eta LABek ez diote babesik emango Kutxabanken pribatizazioari.

Kutxarentzako Estatutu-proiektuan, zeina EAJ, PSE eta PPren artean adostu duten, esaten da Kutxa Banku-Fundazioaren Patronatuan langileen ordezkariak izango direla. Bihar, hilak 17, Enpresa-Batzordearen bilera bat deituta dago gai hau aztertzeko. ELAk eta LABek uste dugu izendapen hori egiteak Estatutuak onestea esan nahi duela, eta bidenabar Kutxa Banku-Fundazio bihurtzea.

ELAk eta LABek hasieratik adierazi dute Kutxabanken kapital pribatua sartzeko aukeraren aurka daudela, eta salatu egin dute Kutxak likidatu eta Kutxabank pribatizatzeko prozesua (Bizkaia eta Araban hau aurreratuta dago, Kutxak banku-fundazio bihurtu baitira; halaber, patronoak ere izendatuta daude: hauek inolako kontrol publiko eta sozialik gabe erabakiko dute akzioen salmenta).

Bizkaia eta Araban egin duten gauza bera orain Gipuzkoan proposatzen dute, azaleko aldaketa txiki batzuk gorabehera, jendarteari sinetsarazteko gauzak hobeto egingo direla.

ELAk eta LABek goitik behera baztertzen dute norabide horretan urrats gehiago egitea, eta Euskal Kutxen izaera publiko eta sozialaren defentsa exijitzen dugu; kutxetan jasotako aurrezkia euskal jendartearentzat erabilgarri izan behar da, ez akziodunen onerako. Aurrezkiarekin zer egin behar den Euskal Herrian erabaki behar da, ez banku handien bulegoetan.

Jarraitu beharreko bidea botereen mesedetan erabakitzen duten alderdi politikoek (EAJ, PP eta PSE) eta zenbait sindikatuk hautatu duten estrategia salatu behar dugu: CCOOek eta Gipuzkoako Pixkanakak Kutxabank Euskal Kutxen pribatizazioan lankide izatea erabaki dute, erakundeon izaera publiko eta sozialaren lepotik; horrela babesa ematen diote langileen baldintzen okertzeari eta enplegu galerari.

Behin eta berriz esan dugu Kutxabankek hartutako bideak baduela alternatibarik; honi buruzko eztabaida soziala hasi beharra zegoela adierazi izan dugu. Horren ordez aukera bakarra jarri dute mahai gainean, inolako eztabaidarik gabea. Kutxako Patronatuan langileen ordezkariak izendatzea Mario Fernandez Kutxabankeko buruak daraman atzerabiderik gabeko egintzen logikaren baitan dator; esaterako, hark jendaurrean adierazi zuen -baita gero errepikatu ere- Kutxabanken kapitalaren %70, gutxienik, kapital pribatuaren esku jartzeko borondatea.

Astia badago; alternatibak ere bai, hil honetan bertan argitaratu diren ikerketek adierazten duten moduan. Hots, gauzak bestela egiteko aukera badago, baldin eta borondate politikorik egotekotan.

Euskal Herrian, 2014ko irailaren 16an
 

 

 

AZKEN ALBISTEAK | ÚLTIMAS NOTICIAS

Indarkeria matxista lantokietako prebentzio planetan sartzeko eskatu dugu

Lan Osasuneko ebaluazioetan arrisku bezala identifikatu eta landua izan dadin, Osalan zein NOPLOIra eramango dugu proposamena.

CCC: 85 urteetako bilakaera zaborretara eta, ondorioz, 50 langile kalera

Urrutiko formakuntza eskaintzen duen CCC Donostia enpresan haserrea agerikoa da. Duela hiru urte, 1939an Donostian sortu eta 85 urteetan zehar Gipuzkoan errotuta egon den gure enpresa Grupo Crescendo deituriko inbertsio-funtsak xurgatu zuen. Geroztik, Donostiako lan-zentroaren hustutzea bizi izan dugu, oinarrizko sailak (ikasleari arreta, informatika, kontabilitatea, marketing-a eta arlo komertziala) Madrilera eraman baitituzte: 2020an bertan lan-zentro bat ireki zuten; hori bai, Donostiako CCC-ko lan esperientzia baliatuz eta irabaziak lortuz, hemen gauzatzen genituen gestioei esker.

Bizkaiko ostalaritzan akordioa #LortuDugu: erronda hau beraien kontu!

Soldatak desizozteaz gain, sektoreko urraketak, iruzurrak eta gehiegikeriak oztopatzen dituen akordioa lortu du LABek. Sektore gutxitan gertatzen dira honetan adina irregulartasun eta iruzur; hori dela eta, hitzarmena baldintzak erregularizatzeko tresna izan behar da, eta hori izan da bere lehentasuna negoziazio honetan.