UPV/EHUko LAB, STEILAS eta ELAko atal sindikalek, Ernai, Ongi Etorri Errefuxiatuak, Ikasle Abertzaleak. Mugarik gabeko ingeniaritza elkarteak militarismoarekin lankidetza mozteko eskatu diogu UPV/EHUri, Bilboko Ingenieritza Eskolan egindako kontzentrazioaren bidez.
Uztailaren 6an eta 7an Horizonte Elcano ekimena garatuko da Getarian. Bertokoa zen pertsonaia honen figura goraipatzeko prestaturiko programan lau marina motak batuko dira: arrantzakoa, merkataritzakoa, kirolakoa eta armada. Hain zuzen ere, Horizonte Elcano ekimenaren bultzatzaile nagusien artean Armada espainiarra dago. Beste euskal entitate, elkarte eta enpresa kolaboratzaileen artean (baten bat armagintzari lotua) EHUko Bilboko Ingeniaritza Eskola dago ere. Horrez gain, euskal kostaldean egingo den itsas-zeharkaldian Saltillo-k, Eskola horren belaontziak, parte hartuko du, beste itsasontzi batzuen artean, Armadaren Juan Sebastián Elcano eskola-ontziarekin batera.
Ez da UPV/EHU militarrekin eta armagintza industriarekin harremanetan agertzen den lehenengo aldia. Ez gaitu harritzen beraz, baina haserrea bai sortzen digu. Izan ere, indar armatuekin eta armagintzari lotutako entitateekin UPV/EHUk izan dituen harremanak eta dauzkan kolaborazioak ez dira gutxi izan, aurreko gobernu taldeekin eta oraingoarekin ere.
UPV/EHUren funtzioa euskal jendartearen beharrei erantzutea da eta bere ekimenak hitz hutsetan geratu ezin diren baloreetan oinarritu behar dira, eta indar armatuekin eta beste herriak txikitzen dituen euskal armagintzarekin kolaboratzea ez da sartzen betebehar hauen artean, baizik eta kontrakoa. Aniztasun kontzeptu zabalaren barruan denak ez du lekurik, ez behintzat militarismoa eta herrien suntsiketa ahalbidetzen eta normalizatzen dituzten ekimenek. Izan ere, aipatutako jarduera batean Armadaren alboan UPV/EHU-k parte-hartzeak euskal kostaldean itsasontzi militar baten presentzia normalizatzen du.
Ekimen honetatik haratago, zein unibertsitate eredu nahi dugun da muina. Eta diskurtsoaz gain, halako jardueretan islatzen da ere unibertsitatearen izaera.
Horregatik UPV/EHUko langileok, ikasleok eta sindikatuok baita talde antimilitaristok zein erakunde batzuok ere Bilboko Ingeniaritza Eskolari Armadarekin batera egitekoa den ekitaldi honetan bere parte-hartzea bertan behera uztea eskatzen diogu. Era berean, UPV/EHUko Gobernu taldeari eskatzen diogu parte-hartze hau ezestea eta, horretatik haratago, antimilitarismoaren baloreekin bat egitea baita militarismoari eta armagintzari lotutako instituzio eta enpresekin harreman guztiak moztea ere.